Zo Vapual

Mahni inchhandam thei lo Lal Isua (2019 Good Friday Pual)

(1 Kor 1:18; Matt. 15:29; Rom 8:3)

C. Lalmuankima

Newcastle, United Kingdom

Lal Isua mahni ngei a intihdam theih lohna kraws kha nang leh keia damna atana Pathian chatuan thil tum tihlanna pawimawh tak a ni zawk a ni.

Amah khengbettute amah leh amah intidam a, kraws ler atanga rawn chhuka anmahni pawh tidam tura an tihel lai khan Pathian fapa a ni a, a intidam thei lutuk ringawt (Mk. 15:29). Man tira a awm zan pawh khan a pa Pathian hnenah vantirhkoh sangruk hmun sawm leh hmun hnih aia tam dilin a ngen thei a (Matt. 26:53), amah mantute chu a tiboral vek thei bawk. Mahse, chutiang chuan a ti tlat lo. A pa Pathian thu zawmin kraws lera an khenbeh thleng khan rum leh na a tuar a ni. Chu a rum leh na tawrh chu nang leh kei atan a ni thung.

Photo: Google Image

Lal Isua kha mihring lamah pawh zaah za a ni a, vawiina na leh nuam kan tawrh ang te, lungngaih leh thlaphan te, mihringin kan tawrh theih ang apiang hi chu a tuar ve vek ngei ang. An man dawn hnaiha Olive tlanga a tawngtai pawh khan a thla a phang em em a, a thlan pawh thi far lian tak angin leiah a far nghe nghe a nih kha (Lk. 22:45). Chutianga mihringin kan tawrh theih ang zawng zawng chu tuar ve thei a nih avang chuan a thla a phangin a mangang ve em em ang tih chu a hriat theih a ni. Mahse mihring lama zaah za ni chung si khan Pathian lamah pawh zaah za a ni a, a pa thu erawh a thih thlengin a hnial lo va, '....nimahse keima thu ni lovin, nangma thu ni zawk rawh se.' (Lk. 22:42) tiin a thlaphan mangan vawrtawpah pawh a pa Pathian thu a awih tluan thak a nih kha.

Khai le.....kan thu sawi tumah lut dawn teh ang. Lal Isua kha amah leh amah a inchhandam thei lo tak tak em ni kan ti mai thei. Kan sawi tawh angin Lal Isua kha mihring lama zaa za a nihnaah khan rum leh na chu a tuar duh bik hauh lo vang le. Mahse Pathian thil tum lo thlenna turin a tawrh a ngai bawk si a, Pathian a nihna zawnah chuan amah leh amah a inchhandam thei teh meuh mai. Pathian a ni a, kraws lera an khenbeh hnu pawh a Pathian thiltihtheihna hmangin a inchhandam thei a ni. Mahse a inchhandam tlat lo. A Pathian thiltihtheihna hmangin ropui takin inchhandam ringawt ta se la, Pa Pathian thinlungah khian keini hi kan thi kumkhua tawh dawn a, nang leh kei hi Pa Pathian thinlunga kan dam/nun kumkhua theih zawk nan ama fapa ngei chu tisa sual ang puin sual thawi nan a rawn tir ta zawk a (Rom 8:3).

Amah kan mamawh tih pawh kan inhriat miah loh laiin ani chu kan mamawh engkimah a lo tang ta zawk a, chatuana boral mai tur chu khawngaihna leh hmangaihna avangin min lo chhandam ta zawk a ni. Pathian fapa meuh mai khawvel chhandam tura a lo kal hi a mak em atin a ni. Chu kraws thu chu khawvel mite (boral mekte) tan chuan hriatthiam a har em lah tak a, keini tan erawh chuan Pathian thiltihtheihna a lo ni zawk si hi a mak em a ni. Hei aia chanchin mak leh danglam hi khawvelah zawn hmuh tum duh suh, i hmu chuang lo vang.

Lal Isua amah leh amah a inchhandam theihlohna hmun kraws lerah khan miten mi nung an hmu tel thin a, kraws thiltihtheihna leh ropuina chu mihringte ngaiha thing kawkalh phenah hian vawiin miten Lal Isua hmel an hmu tel thin a, amah leh amah a inchhandam theihlohna hmunah hian miten chhandamna ropui tak an chang lawi si a ni. Amah chauh lo intidam ta se la chuan Pa Pathian hmaa kan bawhchhiatna leh damlohna zawng zawng hi tihdamlohvin kan awm kumkhua ang a, kan hmabak chu ngaihtuah mai pawhin a thim hle a ni. Chuvangin mahni ngei a inchhandam theihlohna hmun hi nang leh kei atan chuan Pa Pathian thinlunga chhandamna ropui tak min siamsaktu a ni thung a, a hlu tak zet a ni e.