Zo Vapual

'Tun' hi Lalpa ta a ni

C.Lalmuankima

Newcastle, United Kingdom

"Tun' hi Lalpa Pathian chan a ni a, 'nakin' erawh Setana chan a ni ve thung."

Hunpui pathum zinga hun tha ber leh pawimawh ber mai chu 'Tun' hun hi a ni. Hun kal tawh 'Nichin' hun kha i siam thain i siam danglam thei tawh lo va, hun lo kal tur 'Nakin' hun pawh i tan thil chiang a ni lo mai thei bawk. 'Tun' hun erawh Lalpan a pek phal avang che khan i tan hun tha a ni a, i tan hun pawimawh tak a ni bawk.

Lalpa Pathian tana Chanchin Tha hril leh thil tha tih pawh tun hun aia tha a awm chuang lo. I tun hunah khan Lalpa tan engnge i tih thin tih hi nangmah leh nangmah inzawt nawn fo thin ang che. Kan tun hunah Lalpa tana engmah kan tih loh chuan nakin hun lo thleng tur lah thil chiang sa a ni bawk si lo nen, vanah lawmman kan dawng ve lo hlauh palh ang e.

Photo: Workingwomenoffaith.com 

Vawiin hun lawmawm hi a herchhuak leh tawh dawn lo va, kan vawiin hunah hian Lalpa tan thil tha kan ti nge keimahni hlimna kan zawng zawk? Chutianga kan tih chuan nakinah chan tur kan nei ve tawh lo vang. I tun huna Lalpa tana i thahnemngaihna khan i nakin hunah nasa taka hlimna leh lawmna a la siamsak dawn che a ni. Vawiin huna Chanchin Tha kan hril hian nakinah Pa Pathian hnen kan thlen hunah kan lallukhum timawitu leh tiropuitu an la ni dawn a ni.

Chanchin Tha hril hna thawk tura koh i ni em? Lalpa hmingin hril nghal teh le. Thilpeka rawngbawl tura koh i ni zawkin i inhria a nih chuan tunah khan han pe nghal teh le. Tawngtaia rawngbawl tura koh i nih chuan tunah khan tawngtai nghal rawh le. Tun hun zela i tih khan Diabola hmun i kian lo tihna a ni. Keini chu 'Nakinah ka ti mai ang, nakinah ka pe mai ang, nakinah ka tawngtai mai ang.....etc.' tih kan ching lutuk a, hmelma Setana hi kan hriat loh hlanin hmun kan lo kian leh duai duai thin a ni. Bible-in Diabola hmun kian lo tura min tih laiin kan sawm zawk emaw tih tur te hian a lamah hmun awl kan siamsak nasa thin lutuk a, a tawpah a bawiah kan tang leh nge nge thin. Chuvangin i nunah khan Bible-in a sawi angin Diabola hmun kian lo turin fimkhur thin ang che (Ephesi 4:27).

Miin tawngtaisak tur emaw tawngtaipui tur emaw chein an duh che a ni thei. Tunah khan an hming lamin tawngtaisak nghal teh le, tun darkar ngeiah pawh khan an rilru hahna tam tak a kian phah thei asin! 'Nakinah ka tawngtaisak mai ang.....' ti thin suh, tun huna tawngtaipui tura an sawmna che kha tun hunah khan tihhlawhtlinsak nghal thin la, an rilru hahna leh an rit phurh te thlengin i chhawk zangkhai thei dawn a ni.

Pathian zarah tawngtaipui tura min sawm hian an thu thawn emaw tawngka emaw ka dawnin an hming lamin ka tawngtaisak nghal thin a, a tawngtaisaktu keimah ngei pawh hi ka hlim tel a ni. Lalpan hna a thawh phawt chuan kan tawngtaina au aw tlawm tak pawh hian mite thinlungah nasa takin hna a thawk thei a, tun huna ti tura Lalpa Pathianin assignment a pek che kha han ti nghal teh le. Nangmahah pawh hlimna leh lawmna leh hlawkna tam tak i hmu ve ngei ang tih hi ka sawi tel duh a ni. Tun huna mite rilru hahna leh manganna chhawk zangkhai tur khan tun hun bawk kha a pawimawh a, tun hun zel atan ti thin ang che.

Tun huna kan tih loh chuan nakin hun kan hmu hman lo mai thei asin, kan tana rawngbawlna hun tha ber mai chu tun hun hi a ni a, tun hunah hian Lalpa tan thahnem i ngai zel ang u. Kan sawi tawh angin tun hun hi Lalpa chan a ni a, nakin hun i nghah zel chuan Setana chan hun (an phuar beha an hrem hun) ah i liam ve mai palh ang e. Tun hun zel hi ringtute tan chuan Lalpa tana kan rawngbawlna hun tha leh pawimawh a ni. Tun hun zel hi miten Chanchin Tha eng keimahnia an hmuh hun a ni a, nangmah atang khan Chanchin Tha eng sem chhuak thei turin inbuatsaih thin ang che. Tun huna i hril loh chuan i hun tha kharsakin a awm mai palh ang e. Pathian Thu chu tun hun zela kan hril hi a tha ber a ni.

Tun hun hi Lalpa chan a ni. Kan tun hun zel hi Pathian pawh hian a hauh tlat si a, tun hunah hian a rawng kan bawl loh chuan nakin hunah a rawng bawl chak viau mah ila kan bawl theih loh hun a la thleng dawn. Natna leh bawrhsawmnain min tlakbuak pawh a ni thei asin. Chuvangin kan tun hun zelah hian Lalpa tan hmun i insiam zel ang u.

Chanchin Tha rawngbawl hna han sawi hian Mission Field-a full time-a thawkte leh bialtu pastor-te chauh thawh tur emaw kan ti thin a, kan tisual fo thin reng a ni. Mission rawngbawl hna hi a field-a thawk leh koh bikte chu an awm ngei ang, amaherawhchu Pathianin a kohna zawn atang che khan he Mission rawngbawl hna i bang chuang bik lo. A hmunah i va kal thei lo a nih pawhin thil dang i thiam thil hmanga koh i ni tho vang. Kohhran Mission Field-ah hi chuan a thawk bikte an lo awm a ni mahna, mahse Pathian Mission Field-ah erawh chuan mi zawng zawng koh kan ni thung. Chu kohna chhang tur chuan tun hun hi hun tha a ni a, tun huna i chhan loh chuan nakin hunah chhang hman lova mual i liam palh chuan a pawi viau vang. Chuvangin Pathian kohna chhang thei turin i tun hun kha Lalpa Pathian tan serh hrang rawh le.