Zo Vapual

Han ti ve chhin phawt teh le….

C. Lalmuankima

Newcastle, United Kingdom

Photo: We Heart It

'Try is key of success....' an lo tih angin han ti chhin ve phawt ila, chutah kan try hard (taihmak) dan azirin a rah chhuah kan hmu mai thin a ni. I tih chhin phawt loh chuan a result i hmu dawn lo tihna a ni mai a, han tih ve chhinna atang chauh lo chuan hlawhtlinna pawh hi a thleng ngai lo. Tih chhin han tih hian a tha lam kawngah pawh a chhe lam kawngah pawh result a nei vek a, a tha lam ti chhin tam chuan thil tha bawk a hmu thin a ni. Thil tha lo ti chhin turin tuman kan induhsak a rinawm loh.

Tih chhin hmaa a rah chhuah tur lam rin hmanga sawi vak aiin mahni ngeiin tih chhin hnua a rah lo chhuak hmuh hian a mi deh dan a dang a, min tihlim bawk. A thu chuan thlawhna pawh siam chhuak thei mah ila, a tak ram kan thlenpui loh chuan a thua kan thil siam chhuah theihna khan kan nunah awmzia a nei lo tihna a ni. Chuvangin i nunah khan han ti ve chhin phawt teh le, thil tha han ti ve chhin phawt la, a rah chhuak tur pawh i hlimpui ngei ang. I la ti ngai lo a nih pawhin a dawnsawn dan i thiam phawt chuan i tih chhun apiang mai kha Bonus a ni vek tawh mai dawn a ni. Thil reng reng chu a dawnsawn dan kan thiam phawt chuan nun hlimna min thlentuah an chang thin. A dawnsawn dan kan thiam loh erawh chuan rangkachak leh lunghlu hlawm lian tak te pawh hian nun hlimlohna min thlen thei ve bawk a ni.

I hmaa hlawhtlinna ropui lo awm tur chu nangmah ngeiin a kawng i sial thei a, nangmah ngeiin a hlawhtlinna pawh i siam thei a ni. A pawimawh ber zawk chu han ti ve chhin phawt mai teh le. I tih chhin phawt loh chuan a result lo thleng tur chu engtin nge i hriat theih ang? Kan thiltih rah chhuak hre tur chu tihchhin phawt a ngai a ni.

Ziaktu pakhat chuan heti hian a lo ziak ve tlat mai, 'Thiltihnaa hlawhchham kan la hlauh chhung hi chuan engtikah mah kan hlawhtling ngai lo vang' tiin. Han ngaihtuah chiang ila, a dik hle a ni. Hlawhchham hlauhna hian min bum fo thin a, ke pen ngam lovin min siam fo thin. Hei hi min tihthaihna mai a ni tih kan hriat a tha hle a ni. Hlawhchhamna chu thian tha taka i hman thiam hunah chuan i hlawhtlinna thlentu hmanraw tangkai tak a ni tih hi i hrethiam tawh mai ang. Vawi hnih khat kan ti ve a, hlawhchham lutukah kan inngai a nih chuan kan tisual fo bawk ang a, hlawhtlinna tlang lawn liam chu kan la hlat deuh hret tihna a ni ang.

He thu hi ka sawi ve fo thin a, kan thu sawi tum a fiah lehzual theih nan ka han sawi nawn leh teh ang. Thomas A. Edison-a khan a vawi khat tihchhinnaah khan lo tawpsan ta mai se la, vawiina electric bulb êng pawimawh tak hi kan hmu kher lo mai thei asin! Chutiang bawkin Graham Campbell pawh khan a vawi khat hlawhchhamnaah khan lo tawpsan ta mai se la chuan vawiina Telecommunication pawimawh tak tak hi kan hmu kher lo bawk ang. Hlawhchhamnain a phuar beh zawh loh te hi a tawpah an hlawhtling leh nge nge thin a ni.

Tihchhin hmaa hlawhchham kan hlauh phawt chuan hlawhtlinna kan la hlat hle tihna a ni ang a, engtikah mah kan hlawhtling ngai lo vang. Hlawhchham hlauhna hian min bawi fo thin a, chumi lak atanga kan tal chhuah fo a ngai reng a ni. Chu hlawhchham hlauhna bawi ata talchhuahna awlsam ber mai chu taihmak chhuaha thahnemngai lehzuala beih let hi a ni. Chutianga thahnemngai lehzuala i beih let phawt chuan hlawhchham turin i piang bik lo a ni tih hi i hrechiang tawh ang. Hlawhchham bik tura pianga inngai tlat te hi mi khawngaihthlak ber te an ni. Siamtu Pathianin min siam dan rengah hian mahni tawka hlawhtling vek turin min siam a, chu thil chu kan tihhlawhtlin hunah chiah Pathianin min siam chhan kan tihlawhtling tihna a ni. Mahni tawka kan hlawhtling lo a nih chuan siamtu Pathian min siam chhan kan tihlawhtling lo a ni bawk ang.

Hlawhtling tur chuan kan rilru puthmang pawh hi tih pau khauh a ngai fo thin bawk. Mi thenkhat chu an rilruah 'Kei hi ka hlawhtling ve chuang lo vang' 'Kei chu mite angin ka thiam ve si lo' tiin hlawhtlinna hi mite chan atan chauh an dah thin a, hlawhtling ve turah an indah ngai lo bawk a, an tisual fo thin reng a ni. Chutiang mite chu hlawhtlinna nen an inhlat nge nge thin. Hlawhtlinna hi i thenawmpa chan bik atan chauhva tih a ni lo va, i thawhrim azira nangma tawka hlawhtling ve tura siam i ni ve bawk tih hi theihnghilh ngai suh ang che. Mite tih theih bika kan ngai tlat thin te hi kan hlawhtlinna min dangtu an ni fo thin a ni.

Hlawhchham hlauh vanga tih loh chu hlawhtlinna nena inhlat taka insiamna a ni a. Mi hlawhtlingte nuna ze nghet inphum ru tlat mai hi han zir chiang ila, hlawhchhamna kawng lo zawh fo tawh te an ni a, hlawhchhamna erawh an inbawitir hauh lo thung. Hlawhchhamna chu a mitah tak an en a, anmahni tihlawhtling tura hmanraw tangkai takah an hmang thiam thin a ni. Hlawhchhamna chu anmahni tichheltuah an hmang a, chu chhelnaah chuan taihmakna an belh leh hlek a, chu taihmakna chuan mi hlawhtling takah a siam ta thin a ni.

Tih chhin phawt loh chuan eng hlawhtlinna mah a thleng ngai lo tih hi kan hriat reng atan a tha hle mai. Kan career tihlawhtling tur pawhin beih chhin (tih chhin) phawt a ngai a, chu tihchhinnaah chuan taihmakna belh leh ila, tichuan mahni tawka mi hlawhtlingah min lo siam tawh mai dawn a ni. Mi tam takin kan tih chhin ngam lohna chhan chu hlawhchham kan hlauh vang hi a ni duh khawp mai. Miten mi hlawhchham min tih kan hlau va, mite sawi kan hlauh avangin hlawhtling tur pawhin kan tichhin ngam lo thin. Hlawhchham hlauhna phenah hian kan biru rei lutuk palh ang tih a hlauhawm thin bawk. Tihchhin phawt loh chuan a rah chhuah a hmuh theih bawk si loh va, chu tihchhinna atang chuan engtianga beih nasat tul nge a nih kan lo hre thei ang a, tichuan taihmak chhuaha kan beih zel phawt chuan kan hringnunah kan lo hlawhtling zel tawh dawn tihna a ni. I hringnunah khan i lo hlawhtlin theih nan han ti ve chhin phawt mai teh le.