Zo Vapual

Mi puitlingte mizia/zia (Then khatna)

C. Lalmuankima

Newcastle, United Kingdom

Thuhmahruai

Mi puitlingte mizia/zia kan teh dan leh thlir dan hi chi hrang hrang sawi tur a awm teuh ang a, mihring kan ni a, ngaihdan thuhmunlo awm khawm kan ni a, chhul khat kuala thisen zawmpuite ngei ngei nen pawh hian kan ngaihdan leh duh dan a inthuhmun lo fo a ni.

Photo Image : Google Image

Chutianga ngaihdan leh hmuh dan in ang lo awmkhawm kan nih avang chuan kan awn lam (kan rilruin a awn lam) leh kan ngaihdan a buk rih zawng pawh hi a in ang vek lo thei a, kan ngaihdan a in anloh mai avanga mite ngaihdan pawisak loh pawh kha a puitling lo hle thei bawk. Chuvangin kan ngaihdan ang diak diaka thil a lo kal thin lo a nih pawhin mite ngaihdan va hluta va zah thiamsak fo hi mi puitlingte miziaa bet tel tlat leh anmahni tizahawmtu pawimawh tak a ni tih kan hriat reng atan a tha hle mai.

Mi puitling han tih hian kan rilruin tinzawn kan nei sa run thin a, kum thu hlaa naupang leh thalai lam deuh ngaihtuahna seng vak lova tibawrh bawrh thin leh ti pur pur thin te chu kan rilruin mi puitlingah kan chhiar thei ngai lo va, kum thu hlaah pawh tlema phanchang deuh te chu kan tinzawn sa tlat thin a ni. Chuti chu mi puitling tehna hi kum thu hlaah em ni ti dawn ila a ni leh chuang hauh si lo va. Kum upa na zawng hi an taksaah puitlingin thankin tawh mah sela, an rilruah a puitling lo thei ve bawk a, kum naupang an nih avangin an rilru a no vek bik chuang lo va, kum naupangte ni sia rilru puitling tak an awm teuh tho a ni. Chuti chu mi puitling tehna key chu kum upat leh naupan atanga han teh mai theih pawh a ni leh ta lo va (kan rilruin kum upa deuh chu tinzawn thin mah sela….), an mizia leh chetzia, nun dan atang hian a lang ta thin zawk a ni. 

Thenkhat chuan putar/pitar deuh te chu puitling viau turah kan ngai mai thei a, a dik na lai tam tak awm tho mah sela, upa na zawng hi rilruah an lo puitling lo thei ve bawk. An hlawhtlinna ropui tak atanga teh tur a ni bawk lo vang a, a thiam theih avanga mi puitling mizia pu nghal turah ngai lo bawk ila. Puitlinna chu nangmah leh midangte chunga i rilru put dan hmangah khan thui tak a innghat a ni. A tlangpui thuin han khaikhawm dawn ta ila, hringnuna tawnhriat nei tam tawh te hian mi puitling mizia/zia chu an hnaih ber a, mi puitling kan teh dan pawh hi kawng engkima tawnhriat lo nei teuh tawh te nun atang hian kan teh fo thin a, midangte chunga an rilru put dan hmang azira teh a ni fo bawk. Kan sawi tawh angin mi puitling teh dan chi hrang hrang awm thei zingah a hnuaiah hian tlem azawng han tarlang ila.

A.    Mi puitling chuan a sawi hmain vawi tam tak a ngaihtuah hmasa thin

Mi puitling miziaa bet tlat zingah chuan sawi hmaa vawi tam tak ngaihtuah hmasak hi a pawimawh em em a, kan thu sawi duh dan leh sawi awm leh sawi awmlohah te hian mi puitling mizia a lang thin. Kan thu sawi hian ngaithlatute thinlungah damna a thlen nge hliam na tak a thlen zawk tih te pawh hi ngaihtuah tel fo a tha a. Kan thu sawi hian ngaithlatute tana rilru hliam na tak a thlen dawn ai chuan ngawi renga sawi loh law law mai pawh hi a chang chuan a him ber thin a ni. Mi puitling chuan a thu sawi turah ngaihtuah nawn hmasa lovin a sawi ngai lo. Ngaihtuah nawn hmasa lova sawi pawp pawpte hian an rap pelh rem rum thin a, an nunah mi puitlingzia hmuh tur a vang hle. Chuvangin kan thu sawi tum thu mal khat chauh pawh hi a let tam taka ngaihtuah leta sawi hian ngaithlatute tan dam sawng sawngna a thleng thin a ni.

Photo Image : Google Image

Ngaihdan chu kan sawi thiang vek a, amaherawhchu kan ngaihdan sawi hian mite tan thatna a thlen nge thlen lo tih te ngaihtuah tel hmasak fo hi mi puitlingte ziaa bet tlat a ni. Mi puitling chuan a thu sawi khan ngaithlatute tana rilru hliam na tak a siam/thlen dawn ai chuan sawi loh law law kha a chang chuan a tha bera hriatna a nei fo thin. Ngawih a tul huna ngawih ngam hi mi puitlingte ze nghet tak pakhat a ni tel bawk a, dawizep vang a ni lo va, luhlul chhuaha mahni leh kan thu ngaithlatute ngaihdan pawh thlir hmasa lek lova at thlasik mau puah phawng phawng thin hi mi puitlinglote mizia a ni. (Hemi zawnah pawh hian inzir tur kan la ngah hle mai.)

Mite thusawiah kan ngaihdan ang chiaha an rawn sawi lo a nih pawhin a pehhela mawi deuh zawka sawi dan a awm fo thin a, a ngial a ngana inchirh theh tawngkam ang dawn dawn leh tawngkam dengkhawng tak tak kan tawng chhuak a nih phei chuan (thahnemngaih thil thuah pawh ni se la....) kan thusawi ngaithlatute ngiau kan titliak thei a, kan thusawi ngaithlatute beng kan tithlep thei a ni tih hi hriat a tha hle. Chuvangin hemi kawngah pawh hian kan fimkhur tlana puitlin lam pan zel hi a tha a ni. (Bible-in a sawi angin puitlin lam i pan zel ang u.)

Midangte ngaih pawimawh thiamna hi mi puitlingte miziaa bet tel tlat a ni a, a ngai pawimawhtu bawkin fak leh chawimawi a hlawh thin. Mahni ngaihdan chauh tha ber emaw tia mite ngaihdan va pawisaklohna hian min tuam bet tlat a nih chuan mi puitling mizia nih dan turah kan la hlat hle tihna a ni thei ang. Vawi leh khatah mize puitling tak chu a neih theih loh mai thei, mahse mize puitling tak nei tur hian a inzir theih a, vawiina mi puitling tak taka kan ngaih te pawh hi vawi duailo lo inzir fo tawh te an ni duh khawp mai.

Hei erawh kan hriat fo atan a thain ka hria. Kan ngaihdanah mite hruai luh kan tum a nih chuan an ngaihdan va pawisa hmasa ila, tichuan an ngaihdan kan hmin vek hnuah kan ngaihdanah awlsam takin kan hruai lut thei chauh dawn a ni. An rilru hmin hmasa lova kan ngaihdana hruai luh phet kan tum hmasak chuan an rilru kan tihel fo vang. Chuvangin mite ngaihdan pawisak hmasak hi mite rilru hnehna tha ber a ni a, mi puitling zia pawh a ni tel bawk. Mahni lam kan indah len hmasak lutuk chuan mite rilru hneh a har thin a, mahni lam hi a tul phawt chuan a tlawm zawkah tang thiam thin ila, tichuan mite rilru kan hneh ang a, an rilru kan hneh tawh tawh chuan kan ngaihdan hmangin kan duhna hmunah kan hruai lut thei tawh dawn a ni.

Entirnan thil pakhat ka han zep tel teh ang. Bawng chuan hnim a duh em em a, a huanga hruai lut turin i chakna thahrui hmangin i nawr lut thei lo mai thei. Mahse kha bawng tan khan hnim kha a huanga hruai luh nan a tawk em em a; bawngin a duh tak hnim hmangin i duhna hmun a huangchhungah ngei awlsam takin i hruai lut thei ang khan mite ngaihdan leh duh dan pawisak hmasaka an ngaihdan leh duh dan hmang veka kan hruai chuan kan duhna hmun takah awlsam takin kan hruai lut zung zung thei dawn a ni tih hi hriat a tha hle mai.

Kan thu vawi khat sawi tur hi vawi tam tak ngaihtuah hmasa nawn leha kan sawi phawt chuan kan thu sawi ngaithlatute nun kan hneh ang a, kan thu sawi ngaithlatute tan damna dawi tha tak thlentute kan ni zel dawn a ni. Ngaihtuah nawn hmasa lova sawi pawp pawp hian ngaithlatute nena inkar a tikak zau fo thin a, a thatna lam ai mahin thatlohna a tam zawk a; mi puitling na lam kawng min zawhtir thei lo fo thin. Chuvangin mi puitling chuan a sawi hmain vawi tam tak a ngaihtuah nawn thin a, vawi tam tak a ngaihtuah nawn hnuah a sawi chhuak thin a ni.


Chhunzawm leh atan....