Zo Vapual

Mi tin ta tur chanchin tha lawmawm em em

(Luka 2:10-14; Isaia 9:6-7; )

C. Lalmuankima

Newcastle, United Kingdom

"Tin, vantirhkoh chuan an hnenah, "Hlau suh ulang, ngai rawh u, mi tin ta tur chanchin tha lawmawm em em ka rawn thlen che u a ni." (Luka 2:10)

Good news then khat hi chu mi thenkhat tan chanchin lawmawm a nih laiin thenkhat tan erawh a ni lo thei ve bawk a, mi tin ta tur chanchin lawmawm nih a tling thin lo va; kan Pathian thu erawh hi chu mi tin tana chanchin tha a ni tlat mai a ni.

Photo Image : Google Image

Bar thla tawp ber han chuan kai leh meuh chuan rilruin Bethlehem lam a hawi leh tan a, Josefa leh a nupui rai teuh Mari ten khualbuk lam an pan a; khualbuk chang lo va ran ina an innghah tak thu leh ran chaw pekna thlenga nausen Isua mu lai te a rawn lang a,.....chu lam thawnthu chu khati khan duh tawk dawn mai ila, kan sawi tum tak zawk 'mi tin tana chanchin tha lawmawm em em' hi kan ngaihtuah ho dawn a ni.

Khawvel lawmna thil then khat hi chu mi thenkhat tana lawmna a nih laiin thenkhat tan chuan lawmna a ni lo thei bawk a. Khawvel sual chhandam tura Vanlal fapa lo pianna thu erawh chu mi tin tana chanchin lawmawm em em a ni thung a, mi hausaten an pumbilh thei lo va, mi rethei te tan pawha lo kal a ni tlat a ni. Lehkha thiam leh mi ropui tak tak te tan chauhva lo kal a ni lo va, keini mi mawl tak tak leh pachhe daikilkara mi te tan pawha lo kal a ni a, mi tin te tana lo kal a ni. (Mi tin zingah hian kan tel ve ngei a ni tih hi hriat fo a tha a ni.)

Chanchin Tha (Lal Isua) hi mi hausa leh mi neinung te tan chauhva lo kal ni se la chuan keini mi rethei leh pachhe daikilkara mi te tan hian chatuan nunnaa luh ve theihna chance kan nei hauh lo vang, mahse kan Pathian thu chu mi tin tana chanchin lawmawm a nih tlat avangin mi hausaten an mawipui ang thovin keini mi rethei zawk te pawh hian kan mawipui hlei hlei a ni lawm ni tih tur khawpin kan mawipui a ni. Mifing leh mifel te tan chauhva lo kal a ni lo va, mi mawl ber te tan pawha lo kal a nih avangin nang leh kei pawh kan tel a ni. 

He khawvela chanchin tha reng reng sawi tur nei ve tawh lo te tan pawh Lal Isua hi kan chanchin tha a ni tlat. Kan nihna leh dinhmun hi kan hriat thiama chanchin tha dawngtu kan nihna te, chhandam kan nihna te hi vawiinah pawh hian a la pangngai reng a. Pathianin 'ni rawh' min tiha 'nih' hi a lo hahdam ber zel a ni. Pathianin ‘ni rawh’ min tiha ‘nih’ tluka thlamuanthlak hi a lo awm awm lo ve! 

Kan Bible chhiarah khan han lut chhunzawm nghal dawn ila. "Mi tin ta tur chanchin lawmawm em em...." tih hnua kan chhiarthlak zel chuan Berampute hnena vantirhkoh thusawi, Berampute pawhin an bo lohna tura fiah taka an hriat theih tur 'nausen puana tuam, ran chaw pekna thlenga mu' an hmuh tur thu chiang leh fiah takin a hrilh a ni.

Beram ven hna te, ranvulh hna te phei chu a hunlaiin hna hnuaihnung bera ngaih a ni thin a, Aigupta ho phei chuan an ten hle a ni. (Genesis 46:34) Chutiang khawpa hna hnuaihnung leh mite endawng te hnenah pawh vantirhkoh a inlar a, an mawl ang anga an chhinchhiah theih tur ran chaw pekna thlenga mu nausen mua chu chibai buk turin a tir a ni. (Beramputen maimitchhing chung pawha an hriatpawlh loh tur leh an ni tin nuna an hman thin leh an ni tina an hmuh leh hriat than em em ran hmangin chiang fel fai taka hrilhin an awm a ni.)

Kan Pathian hi chiang lo leh tiririaiin a mite hnenah a inpuang ngai lo. Mimawl ber pawhin kan hriat thiam theih turin tehkhinna thu mawl te te hmangin a inpuang a, mifing ber tan pawh an dinhmun azira a inpuang angin mimawl ber te pawhin an hriat thiam theih turin a inpuang thin a ni.

Mi tin ta tur chanchin tha lawmawm em em a nih angin kan zaa tan Lal Isua khi a lo kal a ni a, mi tin te tan kan thinlungah Lal leh Chhandamtu ah lo piang zel rawh se. Kan ke pen khat pawh hi Lalpan min chhinchhiahsak tawh avangin kan tih chhun chhun te, minute tin second tin mai hi an lo pawimawh vek tawh mai a ni. Khawvel dana mahnia chanchin tha sawi tur nei ve lo te tan pawh Lal Isua hi kan chanchin sawi tur neih chhun a ni a, mi fel ber te tana an chanchin tha a nih rual rualin mi mawl ber te tan pawh kan chanchin sawi tur neihna awmchhun a ni.

He mi tin ta tur chanchin tha lawmawm em em hi nang leh i chhungte, nang leh i kohhran, nang leh i khawtlang, nang leh i ram, nang leh i hnamah a tharin lo thleng nawn leh rawh se. Chanchin tha lawmawm em em mi zawng zawng tana huap zo lo hi tur changtute kan ni lo va, chanchin tha lawmawm em em mi zawng zawng tan huap zo changtute kan nih avangin Pathian hnenah lawmthu i sawi zel ang u. Lal Isua kha kan chanchin tha lawmawm em em a ni a, kawng engkimah pawh kan innghahna bulpui ber a ni bawk a ni. Fakna hla siamtu’n ‘Ka chanchin hi ziak dawn ila, a phek tinah i tel ve ang’ tia a lo sawi angin Lal Isua hi kan chanchin ziahna bulpui leh neihchhun a ni a, kan chanchin ziahna phek tinah pawh a tlar hmasa luahtu a ni tlat a ni. Bung tin leh chang tin, phek tin maiah hian Lalpa khi a lo tel vek mai a, chanchin tha sawi tur neilote tan pawh kan chanchin sawi ve theihna awmchhun chu amahah zel a ni. Lalpa kan lawm e, chanchin tha lawmawm em em i fapa Isua min pek avangin lawmthu kan hrilh a che.

Isua, van atanga rawn chhuk chhang nung (Johana 6:51) khi miin a ei phawt chuan a tan chanchin tha lawmawm amahah a thleng tihna a ni. Lal Isua khi chanchin sawi tur nei ve tawh lo te tan pawh kan chanchin lawmawm em em a ni. Kan chanchin sawi ve theihna awmchhun pawh amah a ni. Mi tin ta tur chanchin lawmawm em em Lal Isua hi kan thinlungah lo piang thar theuh rawh se. Chu mi tin ta tur chanchin lawmawm em ema chu a changtu atan Lalpan min buatsaih theuh rawh se.