Zo Vapual

Tattoo 

- Dr Thangchungnunga, MS (Ortho)

Tattoo hi Mizo tawngin a awm lova, mizo tawngah kan la lut mai ang a, kan hrethiam vek tho a. He thil hi tunhma kum 20 kalta vel khan tleirawl hovin an uar em em mai a. A awmzia leh a that lohna hre silo a, lo inchuttir ve ngawt an tam em em a, a pawi hle. Kan Bible Leviticus 19:28-ah pawh hian Tattoo hi a duh lova, hei hi kan thu hriltu leh Kohhran hruaitute lam hian an sawi ngai loh lutuk avang a ni ber a. A chhan chu sakhuana nen a inzawm tlat vang a ni.

Tunah phei chuan Sipai tur te, sawrkar hna thawk tur hrang hrangah Tattoo nei chu an lak duh loh phah tawh a. Kan Kohhran Presbyterian atanga kal chhuak an tam thinna pawh kha kan thurin innghahna kan hruaitu ten an sawi tlem lutuk a, a zira kan zir tak hial kha. Tattoo pawh hi Pathian duh loh a nih thu hi sawi tam se, naupang lo thang leh zel turte kan humhim thei ang.

Tattoo lo chhuahna hi hriatphak pawh a ni tawh lova, a tir te atangin Ramhuai (Setana) biakna lam chi a ni a. Tin, an hriat miah loh hian Tattoo hian awmzia a nei vek a, chu chu Pathian dona lam hlir a ni. Hriat theih chinah khawvela mi awm hmasa Pagan-ho an tih mai, Mayan-ho nen an hmasak zawk leh zawk loh pawh a hriat tawh lo a. Spanish-ho USA an luh tirh khan Tattoo hi a mi chengten an lo chhu tawh a. A hmuh veleh Ramhuai sign tih an hre thei a ni. A awmze tlangpui chu - Ramhuai bia, Pathian dodal tih hian a funkim ber a ni. Chi hrang hrang hlawm lian deuhin a then theih a:-

1. Luruh lam pang ho hi Thihna entirna a ni.

2. Mei alh ang deuh a an siam hi Hremhmun entirna a ni.

3. Cross lem pawh hi Kristiante cross ang a awm ngai lovang. Heng hi thisen chhuah entirna a ni.

4. Tangtial ril ang deuh deuh a an siam ho hi rilru sual leh huaikawmbawl entirna a ni.

5. Dragon, Rul lem lam chi reng reng hian Eden huana Rulpui tar an bia tih a entir bawk.

Heng Tattoo hrang hrang hi a putu in a awmzia hre lo mahse thisen tam tak chhuaka siam a nih avangin thisen a inthawina a ni bawk. An neih tawh rau rau chuan Setana’n a phuar tlat tawh thin. Thisen lo chuan Chhandamna a awm thei lo, kan Bible-in a tih ang chiah khan Tattoo an chhut hian thisen tam tak a chhuak a ni.

Tunah phei chuan Sorkar hna leh Kohhran lama lut tur pawhin Tattoo nei an duh tawh lo. Tunlai hian a tihreh hna hi kan thawk reng a, tireh tur pawhin thisen chhuak lo chuan a tih theih loh; Kartin deuhthaw zai kan nei reng a ni. Tattoo atanga (Setana phuarna) chhuak leh tur pawhin thisen tho ala ngai a nih chu! Pathian hnen thleng tur pawhin a fapa thisen tho kha a ngai a ni. Nunna leh thiltihtheihna chu Thisenah a awm miau si a.

Thu lakna : Dawrpui Veng