Zo Vapual

I vanneihzia hi i ngaihtuah ngai em....? 

C. Lalmuankima 

Slough, United Kingdom 

Pathian khawngaihna zarah pianphung fu ke kim biaia i lo piang chhuak te, i tawng thei a, ri i hre thei a; thil tui leh tui lo i leiin i thliar thei a, i pangtiin i feel thei a; i ngaihtuah thei a, i kal thei ringawt te hi mi vannei bik i nihzia i ngaihtuah ngai em? 

Hetianga kan hmu thei, kan ei leh in thei te, kan khawih thei te, kan kal thei te hi a nih dan tur rengah kan ngai a, mi vannei bik kan nihzia hi kan ngaihtuah ngai reng reng thin lo. Damdawi inah han kal mah teh, Pathian fak chaka tawng theih chak em ema tawng thei lo te, khawvel parmawina hmuh chak em ema hmu thei lo te, ei leh in tui tak tak ei chaka chu ei leh in tuina hre thei map lo te, mite zinga awm ve a rual pawl chak ngawih ngawih te, pianphunga rualbanlo te  an awm teuh asin.....! Chung mite chu i hmuh changin i rilruin Pathian hnenah lawmthu i sawi thin em? (Heng mite hian an vawiin khawvel hi an duh vangin an thlang bik hauh lo asin.....Mahse, Pathian remtihna tel lo chuan a thleng bik hauh si lo a ni. Chuvangin Pathianin tun hun tun darkara i duh duh ti thei leh i nuam tih zawng ti theia a siam che kha lawmthu sawina tlak a tling a ni.) I vanneihzia hriain Pathian hnenah lawmthu i la sawi ngai lo a nih chuan vawiin atang hian lawmthu lo sawi tawh ang che. 

Photo image: Google 

Tun khat chu city bus ka chuannaah pianphunga rualbanlo pakhat, kut nei lo hi ka hmu a; ka va lainat tak em...! Bus atanga ka chhuh thlak hnu chuan ka ngaihtuah zui ta a, Pathian hian min va siam vannei tak em.....! Ka nu leh pate kaltlangin fu ke kim biaiin min siam a, kut pahnih neia amah fak theihna hun tha ka nei hi ka va lawm tak em....! tiin. Ka rilruah kut ke kim neia min siam avangin Pathian hnenah lawmthu ka sawi mawlh mawlh a ni. Heti hian ka ngaihtuah chhunzawm ta zel a, kha city bus chhunga ka hmuh kha ama duh thua a chunga lo thleng chu a ni bik hauh lo vang, mahse a chunga thil thlengah Pathian remruat dan kan hre lo va; amah siamtu Pathian chu a changin theih tawp chhuaha kut khing hnih meuh benga fak chu a chak ve thin ngawt a, amaherawhchu tuna a dinhmunah a thei tlat lo. (Kut khing hnih Pathianin min pe a, heng kut khing hnih kan neih te hi amah fak nan kan sum lutuk thin em aw ka ti thin, Pathianin a malsawmna kut ke kim min pek avang te hian lawmthu sawiin amah chu uar lehzualin i fak thin ang u.) Mi vannei i nihzia hi hre nawn fo vang che.

Tum khat pawh ka Hapui pakhat nâ chungchangah Pathian chungah ka vui lek lek a, Daktawr te hnenah in entir tuma ka kal mek laiin ka rilrua thil lo thleng ka hriat reng mai chu, 'Tunah khan i hâ pakhat nâ avang khan ka chungah vui i tum a maw? A dang zawng zawng vensaktu che kha tu nge? Keimah ka ni lo vem ni...?' tih hi a rawn lang teh tlat mai a, ka zak lutuk a; 'A ni dawn tak e Lalpa, a nâ lamah hian ka rilru ka lo pe leh thin atin a ni. A dang zawng pawh hi i venhimna tel lo chuan tunah pawh hian an nâ vek thei a ni....Lalpa min ngaidam ang che, vawiin thlenga ka taksa peng dang zawng zawng pawh min venhimsaktu chu nangmah ngei i ni' tiin kawng tluanin rilru tawngtaina ka hmang chhunzawm ta nghal a.

Ka han sawi tum tak zawk chu, kan taksa peng hrang hrang invuah dan leh inchuktuah dan te, a changa natna lo thleng thin te hi min siamtu Pathian hmaa vuivaihpui nan kan hmang fo thin. He ngaihdan hi kan thlak tial tial a hun ta.! Kan taksa hi tun darkara chhe vek thei a nih lai pawha Pathian venhimna kan chan avang te hian lawmthu sawi nachang kan hre thin lo va, a pawi hle a ni. 

I taksa kha tun dinhmunah pawh khan na vek thei a ni asin, amaherawhchu Pathian khawngaihna chuan a venhimsak che a; chumi avanga lawmthu sawi mai kha nang leh keiin kan tih tur awm chhun chu a ni mai a ni.

Chawngzawng pakhat pawh a thu lo chuan leiah an tla ngai lo a ni a, nang leh kei phei chu a duh taka a siam te kan ni a; kan tana thatna tur lo chuan kan chungah thil tha lo a thleng ngai lo vang. Chuvangin kan chunga thil thleng ang angah hian a hnena lawmthu sawi mai hi a him ber a, Lalpa kan chunga a lawm phawt chuan kan awmna rama thil tha tha te min pe mai dawn a ni. 

Pathian khawngaihna changtu i ni a, mi vannei chung chuang i nihzia hi hre nawn fo vang che.