Zo Vapual

I thawhpuite malsawm thin rawh

C. Lalmuankima 

Slough, United Kingdom 

Kan thawhpui te, kan rawngbawlpui te, kan zirpui te, kan zinpui te, kan chenpui te hi mal kan sawm thin em aw? Mal kan sawm ngai lo a nih chuan han ti chhin mah teh, a hlawkzia chu i nunah khan hmuh theihin a rawn lang chhuak nghal mai ang. Mi tam tak hian kan thawhpui te hi malsawm nachang kan hre thin lo va, a then phei chu malsawm a hnekin an fel loh lai sawi nuam ti tlat hi kan awm a, chutiang rilru kan put chhung chuan kan thawhpuite nena kan inkar inlaichinna hi tihnghehin a awm ngai lo vang. Mite dik lohna ringawt hmuh tuma zawngtute tluka mi vanduai hi khawvelah hian an awm awm lo ve. Chutiang mite nun chu a khawngaihthlak hliah hliah bawk a ni. 

Photo: Google Image 

I thawhpuite laka i rilru put dan hmang a dik phawt chuan i thawhpuite nena in inkar inlaichinna hrui chu eng emaw ni avang maiin tihchah a ni ngai lo vang. Thawhpuite laka kan rilru put hmang a dik hi a pawimawh a, kan inkar inlaichinna tinghettu pawh a ni. I thawhpuite laka i rilru put dan hmang khan anmahniah nasa takin hna a thawk thei a ni tih hi hre reng thin ang che. 

I taksa ngei pawh kha mal han sawm chhin mah teh, a hlawkzia i hmu zel ang. Malsawmna hi chu kan taksa pawh hian a ngeih khawp a, i taksa mal i sawm fo khan i taksaa hrisel lohna lo thleng tur lakah pawh i lo inveng lawk sa tihna a ni.

I thawhpuite chu nang aiin an nihna a sang a ni emaw an nihna a hniam a ni emaw an tan tawngtaisakin malsawm thin la, nang nena in inkar inlaichinna chu tihnghehin a awm sauh mai ang. Thawhpui hmuh theih vak loh te i nei thin em? Chutiang mi chu malsawm hlauh zawk mah teh, amaha i hmuh thiam vak lohna kha i hriat loh hlan khan mitmim lak bo angin a bo duak mai ang.

Mi ngei leh huat riau neihte hi a tha lo hrim hrim a, anchhia lawh phei chu a tha lo lehzual a ni. Mi ngei leh huat riau neihte hi kan mi ngei leh huataten an hriat loh phei chuan an hriat loh hian chhungrilah kan na ngawih ngawih thin. Chuvangin i mi ngei zawng leh huat zawng tak kha mal han sawm hlauh chhin mah teh, i hriat loh hlanin nangmahah khan malsawmna luankawr chu hruai luhin a awm mai ang.

Malsawmna hi eng hnam pawh hian an lo duh vek a, malsawmna duh lo hnam an awm lo a ni. Chuvangin eng mi leh sa pawh hna thawhpuiin rawngbawlpuiin zirpuiin zinpui thin mah la, an hming i hre lo a nih pawhin malsawm thin rawh. Malsawmna tawngkam hi chu hnam tin tan damna a tling a, duh lo kan awm lo bawk. Chuvangin kan thiltihpuite malsawm fo hi a tha a, chutianga mite tana malsawmna kan ka atanga a chhuah tam phawt chuan keimahni tan pawh malsawmna dawnthleng zau takin kan dawh nghal tihna a ni. 

I chhehvela i pangpar huan ti par vul chuk turin nangmah ngeiin tui leh thil dang lei tha hmanga i chawm that a pawimawh a, chutianga i enkawl that phawt chuan i tan an par vul chuk tawh mai ang. Nangmah ngeiin i chhehvela i par huan tivul turin i tawngka ngeiin mal sawm thin la, i chhehvel chu a lo nuamin a lo par vul chuk tawh mai dawn a ni. I thiltihpuite malsawm thin la, an tan thatna ui hauh suh.