Zo Vapual

Masi rim

C. Lalmuankima 

Slough, United Kingdom 

Photo Image: Reader's digest

Masi rim hi kan ti teh chawk thin a, a hranpa taka chawhmeh rim leh pangpar rim leh thil dang rim anga hnara han zawn chhuah tur awm lo a ni a, chutih rual rual chuan Kristianten kan hunpui pakhat, khawvel misualte chhandam tura Pathian fapa meuh mihringa a rawn chana a lo pianna ni pawimawh tak denchhena kan thiltih vel hi a kawk tel a ni ti ila kan sawi sual tam viauvin ka ring lo. A hranpa taka hnar rim hriatna atanga zawn chhuah tum kan nih chuan engtikah mah kan hmu bawk hek lo vang.

Vawiina pi tar leh pu tarho pawh hi zawt ta ila, Masi rim chu thil hmuh theih anga min hrilhfiah thei an awm ka ring meuh lo. Mahse Krismas a lo thlen dawn apiangin 'Masi rim a lo nam leh ta' (Thlasik rim a lo nam leh ta) kan ti bawk si a, thil awm ve ngei ni si hnar rim hriatna atanga zawn chhuah theih si loh, Kristianten kan hunpui lo thleng tep tawh sawifiahna chi khatah ngai ta mai ila rilru a hahdam berin ka ring. Chuti ni lova Diksawnari keu meuhva zawn chhuah tum kan nih chuan khawiah mah kan hmu bawkin ka ring lo.

Masi rim zinga tel tur kan duh zingah hian telh duh kan nei nualin a rinawm. Hnam tinten Krismas kan hmuah dan pawh a in ang lo thluah a, hnam pui zawka kan ngaihte hman dan kha a dik ber a tih theih chuang loh va, a pawimawh ber zawk chu a hmangtute thinlungah Lal a lo pianna kha thil pawimawh ber zawk chu a ni. Hnam puite tih dan chauh hi Masi rim nih dan tur a ni lo va, Zofate pawh kan hnam nunphung nena inmil takin Masi rim kan hmang a, mahni hnam nunphung nena inmil taka Krismas hman tluka Masi rim dang a awm chuang lo vang.

Thu hmasa lama kan sawi tawh ang khan hnar rim hriatnain kan zawng chhuak dawn lo kan tih tawh kha. Masi a lo thlen dawn hi chuan hawina lam apiang mai leh thiltih apiang mai hi a hunlai a nih angin a Masi hliah hliah vek hian a lang a ni. Entirna tam tak sawi tur a awm ngei ang, chung zinga thil thenkhat te han zep tel ila, Krismas Kerawl te, Krismas lengkhawm te, Krismas inkhawm te, Krismas sermon te, Krismas chhang te, Krismas thilpek te...adt. hian Masi rim a tinam hliah hliahin ka hre thin. Zofaten kan hnam nunphung nena inmil taka kan tana nausen lo piang, chibai kan bukna chi hrang hrang hi Masi rim tinam zualtute an ni kan ti lo thei lo vang. Krismas a lo thlen dawna kan thinlung robawm kan hawng a, Amah chibai buk nan theihtawp chhuaha kan thiltih hian Masi rim a tinam hliah hliah bawk a ni. Thenkhatin ‘Masi rim chu Lal Isua rim hi a ni mai lawm ni?’ an ti a, a dik viau tho mai. Khawvel misualte chhandam tura vanlal fapa meuh hring changa a lo kalna ni denchhena kan thiltih hi Masi rim tinam zualtute an ni bawk. Hei aia Masi rim dang hi kei chuan sawi tur ka hre chuang hauh lo a ni.

Kuminah pawh Pathian khawngaihna zarah Krismas kan lo hmang thleng leh dawn ta a, a phawvuak thil leh huau huau mai maiah hian em ni i hman dawn tih hi nangmah leh nangmah in ngaihtuah ang che. A phawvuak thil leh huau huau mai maia Krismas hman tum kan nih chuan Krismas kan hman chhan kan hmang fuh lo tihna a ni ang. Chuvangin a phawvuak vet vela hmang mai ni lova rilru leh thinlung taka Krismas tak hmangtu ni thei turin i rilru leh i thinlung kha Lal thar lo piang tur tan buatsaih thar leh ang che. Chutianga i tih phawt chuan nangmahah khan Krismas ze dik tak i lo hmang tawh ang a, nangmahah bawk khan engtik lai pawhin Masi rim i nam reng tawh mai ang.