Zo Vapual

Fak leh chawimawi ninawm loh Pathian

(Sam 150:1ff, Galatia 6:9)

C. Lalmuankima

Newcastle, United Kingdom

Pathian fak leh chawimawi thangte chuan a hun leh a hmun hi an lo thliar lem lo khawp mai. Pathian fak leh chawimawi thangte chuan nitin an mita an hmuh leh an benga an hriat te hmangin an fakin an chawimawi mawlh mawlh mai a ni. An siamtu Pathian fak leh chawimawi an ning ngai lo.

Photo: Google Image

Thenkhatin Biak inah chauh emaw Pathian fak leh chawimawi tum ni awm ang taka kan rilru kan siam a nih chuan a fuh ber chuang lo vang. Kan thlenna chin chinah hian siamtu Pathian thilsiam mawizia leh ropuizia fak leh chawimawi tur a lo awm khat tlat a ni tih hi kan hriat a tha hle mai. Pathian fak leh chawimawi hi a hun leh a hmun thliar hran a awm chuang lo va, Lalpa nena kan inpawlna hmun apiang mai kha kan tan chuan hmun thianghlim a lo ni vek zawk a ni. Biak inah kan kal khawma Lalpa kan faka kan chawimawi hi kan sawi sel lo va, Biak in chauh hi Amah Lalpa fak leh chawimawina hmunah chauh kan ngai palh ang tih hi ka hlauh vang zawk a ni. Kohhranho chu pakhat leh pakhat intiharh/inchawkharh tawn tura tih kan nih angin kan testimony kan in share te leh pakhat leh pakhat rawngbawlna kan inhriat tawnsak hi a tha hle a, chakna tha hrui kan inpe phah a ni tih hi i hre reng ang u.

Pathian kan fak leh kan chawimawi lai hmel tluka kan zahawm lai hmel a awm chuang lo a ni. Ringtuin a rin Pathian a chawimawia a fak lai hmel hi a hmuh nawm em em a, van lam pawhin an hlimna ber niin ka ring tlat. Chutiang bawkin Lalpa hmaa rilru leh thinlung taka kan tawngtai lai hmel hi van lam chuan hmuh nawm an ti a, an en ning thei lo bawk a ni.

Kan tuk tho atanga kan zan mu tur thleng hian Pathian fak leh chawimawi chhan tur kan va ngah tak em! Thil ho tak anga kan ngaih leh kan ngaihthah fo, a lova kan awm theih loh, kan thaw thawk rualrem taka kan la thawk theih avang chauh pawh hian siamtu Pathian fak leh chawimawi tur a awm a ni. Kan mita kan hmuh leh kan benga kan hriat thil ropui tak tak te avang pawh hian fak leh chawimawitlak Pathian a nihzia a hmuh theih a ni. A thilsiam ropui tak tak te hian a ropuizia an puang chhuak fo thin a, mihringte bawk hi min siamtu Pathian fak leh chawimawi nachang hre turin zirtir kan lo ngai leh thin.

Min siamtu Pathian fak leh chawimawi chhan tur pakhat mah sawi tur nei lo ringtu kan nih chuan ringtu azawnga mi khawngaihthlak ber kan ni ang. Chuvangin ringtute chu kan nitin nun leh kan thil tawn apiangah hian Pathian fak leh chawimawi chhan tur kan nei zel a, thil tê bera kan ngaih leh kan ngaihthah fo thinah pawh hian Lalpa Pathian fak leh chawimawi chhan tur thil tam tak a inphum ru fo thin a ni.

Photo: Google Image 

Kan rilrua a thawh hun nghak chauhva Lalpa Pathian fak leh chawimawi thin kan nih chuan ringtu azawnga ringtu khawngaihthlak ber kan ni bawk ang. Rilruah a thawh loh pawhin Pathian fak leh chawimawiin bul han tan ila, tichuan Lalpan a thawk chhunzawm zel mai dawn a ni. Pathian hi fak leh chawimawi thang apiangin an fakin an chawimawi ning thei lo va, fak leh chawimawi chak deuh deuhna an nei thin. Kan nunah Lalpa fak leh chawimawi nachang hre lo khawpa hmelma Setana awpbehna kan chang a nih chuan chumi atang chuan Isua hmingin i tal chhuak thin ang u. Pathian fak leh chawimawi nachang hre lo khawpa min siamtu leh min bawi tlattu hi Isua hmingin phelhin lo awm zel rawh se.

Ringtu nun leh thil tha tih hi a inzawm tlat a, thil tha tih hi ringtu nuna kan thanlenna thil pawimawh tak a ni bawk. Chu thil tha tih chu ning lova kan tih zel phawt chuan a hun takah kan thawhrim rah kan la seng dawn a ni. Mahni thawhrim rah theuh kan la seng leh dawn avangin he leia kan thawhrim rah pawh hi vanah ropui takin kan la seng leh dawn a, chumi lawmman dawng tur chuan kan inbuatsaih fo a pawimawh hle a ni.

Pathian fak leh chawimawi pawh hi i ning suh ang u, a hun takah Lalpaah hlimna leh lawmna tam tak kan dawng zel dawn a ni. Kan engkim mai hian Lalpa Pathian han fakin han chawimawi ila, a hlawkna chu keimahni bawkin kan lo chang mai a ni. Lalpa fak leh chawimawi tam apiangte nun hi a hlim thin a, fak leh chawimawi an kham ngai lo bawk.