Zo Vapual

Lalpaa lawmna

( Sam 4:7; Phil. 4:4; Hab 3:17-18; 1 Thes. 5:16-22; Neh. 8:10)

'Lalpaa lawmna' han tih rikngawt mai pawh chu thupui thlan tur hriatlohthlak mang e in lo ti pawh a ni mai thei a, thupui dang han thlan chhuah ka tum tak ngial pawhin he thupui bawk hi a rawn lang leh thin a; tun tum atan chuan a pawimawh a ni ang e.... tiin 'Lalpaa lawmna' tih hi ka han bel ve chawt mai a ni e. Kan thupuiin a sawi tum kan phawk zo lo vang tih erawh rilruin a phang deuh hlek a......

Photo : Google Image

Heti hian ka ngaihtuah a : Pathian hian a mah tiha lawmna nasa zawk chang zel tur hian min duh si a, keini lah chuan heti zo zai a malsawmna, damna, hriselna, hausakna, leh hmuingilna chi hrang hrang kan chang/dawng chung pawhin a hnena lawmthu sawi na chang kan hre thin lo erawh hi chu a hrilh hai ve thei ngawtin ka ring a lawm le.

Kan thupui kha hre rengin 'Lalpaa lawmna' tih a nih kha. Kan thu sawi tum a fiah theihnan 'Khawvela lawmna' tih hi i han sawi hmasa dawn teh ang. Khawvela lawmna han tih ngawt mai pawh chu kawng tam takin sawi tur a awm ang a, eg. kan sumdawnna a lo hlawhtlin changa lawmna, kan faten an zirna an pass avanga lawmna, motor thar neih avanga lawmna leh adt..... thil dang tam tak avanga lawmna te a awm ngei ang. Heng zawng zawng hi he khawvela kan cham chhung hi chuan an tha vek a, anmahni mai chuan sualna an nei hauh lo. Amaherawhchu Lalpaa lawmthu kan sawina atana hmanruaa a tlin loh phawt chuan kan mittui min titla tamtu mai an lo ni thin. 

Lei lam thila kan lawmna hi chuan mihring hi min tichapo tel tlat a, (chapona lah chu Pathian huat zawng tak a ni leh lawi si a.....) nei ve lo te leh hre ve lo te chal delhnan leh hmuhsit nan kan hmang leh mai thin. Hei tak hi a ni Pathian duh loh zawng tak chu ni. Pathian malsawmna hi kan mal chunga liam zawih zawiha dawn sen loh khawpa tamin dawng thin mah ila, a hnena lawmthu sawi nachang kan hriat leh si loh chuan malsawmna khingbai a ni thei ang. Thil petu i thilpek ni lovin thil petu nangmah zawk ka duh che..... tih hla hi kan innghah nan i hmang ngam ang u.

Lalpaa lawmna (van lawmna thuruk te pawh i han ti teh ang...) Hei hian ringtu nunah hian hun pawimawh tak a chang a. Ringtu tan chuan leiah hian malsawmna te, hausakna te, chawimawina te, ropuina te leh adt.... dawng lo mah i la, hriselna te, damna te, hmuingilna te kan dawn hmanga kan Pathian kan fakna hian van Pathian chhungril a han khawng daih zawk a ni. Lalpaa lawmna hi a van pawimawh tak em...! Lalpaa lawmna chu kan chakna a ni tel bawk a.... Neh 8:10. 

Photo : Google Image

Lei dana lawmna tur a awm loh lai pawha chhungrila lawmna hi van lawmna kim kan dawnna a ni. Habakuka anga kan nun kan hman chhoh thiam phawt chuan lei lam thila innghahna zawng zawng pawh tihboralin lo awm mah se, ka lawm zel ang Lalpaah chuan ka chhandamna Pathianah chuan ka lawm cheu dawn.... ti hla hi ring takin kan sa ngam tawh dawn a lo ni. (Hab. 3:17-18)

Mi tam zawk hi chuan kan hma zawnah, kan chungah malsawmna a lo thleng phawt loh chuan lawmna tur a awm ta lo emaw kan ti thin a; lawm nachang kan hre thin lo a ni. A malsawmna kan dawn vang chauhva lawmna hi chu lawmna ze dik a ni ngai lo va, kawng engkima lawmna tur a awm loh lai pawha lawmna hi lawmna ze dik tak chu a ni. Chu ngei chuan Lalpaa lawmna kim min thlen zawk bawk.

Sam 147:11 ' Lalpa chuan amah tihtute chungah chuan lawmna a nei thin....' a ti a. Lalpa hi kan chungah a lawm phawt chuan lei malsawmna te chu duh leh duh lohvin kan dawng/chang tawh mai dawn a ni. Chuvangin kan lawmna chu Lalpaah zel ni se la, chu Lalpaa lawmna chuan kan nitin nuna a malsawmna kan mamawh ang zia zelin min vur zel dawn a lo ni. 

Lalpan kan za atan a tharin mal min sawmsak theuh rawh se....Amen.