Zo Vapual

Hlau ma ta che!

II Lalte 6:16

C.Lalmuankima

Ringtute sakhaw dangte aia kan vanneihna em em chu Lal Isua ngeiin a thisena min chhandama van khua leh tuia min siamtu ngeiin hlau lo tura min tawng thlamuanna tawngkam hi a ni. Chu min tawng thlamuanna tawngkam mai chu a la duh tawk lo va, hlau leh thin, ringhlel leh mai thin, rinhlelh ching leh mai thin kan ni tih min hrechiangtu ngei chuan kumkhua leh khawvel tawp thleng pawha kan hnena awm zel pawh a intiam chhunzawm nghal a ni. A van thlamuanthlak teh reng em!

Khawvel pumpui chu sawi loh kan ram zimte chhunga lal ber hian kan ding leh veia min kaihruai turin kan hnena awm zel hi han intiam teh reng se la (!) kan va han thlamuang dawn tak em!  

Khawvel rorelna hmaah pawh kan hmel hriat mi pakhat te avang pawhin kan thla a muan phah a ni a, nakin rorelna hun lo thleng tura min sawisaktu tur pawh lei leh van siamtu ni si, rorelna hmaa dinga thiam min chantirtu tur pawh amah ni ta zel chu a van thlamuanthlak dawn em! He khawvela lalte mah kan thlamuanpui a nih chuan lei leh vana thil awm zawng zawng siamtu ngeiin kan hnena awm zel tura a intiamna thu phei hi chu a thlamuanthlak tak meuh meuh a ni.  Lalpa chu fakin awm rawh se…..

Bible mi thiamten an sawi dan chuan kan Bible chhungah hian hlau lo tura min fuihna tawngkam hi vawi 365 a awm an lo ti a, chuti a nih chuan kum khatah ni 365 chiah a awm a, chumi hmanga kan chhut chuan kan Pathian ngei chuan a thu hmangin nitin mai hian,”Hlau suh” min lo ti thin a lo ni reng mai! (Engvang nge kan tih chuan keini chu nitin hlau thin, mangang thin, thlaphang thin leh ringhlel leh mai thin kan ni tih min hriat vang a ni.)

Sualina min beih dawn apianga min hum theitu chu Lalpa zawlnei (Isua Thlarau) a ni. Hmelma pa chuan mahni ban tha chakna hmanga inrinchhan turin min bei fo thin a, chu ngei chu Jeremia 17:5 thua Lalpa hawisanna thinlung mizia ngei kha a ni. Chu ngei chu Bible chuan,”Kan buante hi tisa leh thisen an ni si lo, lalnate leh, thuneihnate leh, he thim chunga khawvel roreltute leh, van hmunahte thlarau sualho awmte an ni zawk e” tiin min lo kawhhmuh a. (Eph. 6:12)

Nang leh keia thinlung hi chu zamna hlirin a khat thin a, kan chhungah hian zam ve ngai lo tur nun min pe ta zawk a, chu ngei pawh chu Amahin a ang chhungah min kawlsak ta zawk a ni! Ringtu chuan rin a nei thin a, chu a rina chuan a thawhsak zawk thin. Chuvangin Lalpa inpuanna zawlnei chu a zam ngai lo. Amaherawhchu kan lama tang hi Lalpa a ni tih kan hriat chian hma chuan zamna hlirin kan khat thin. Mihring kan nih miau avangin min tanpuitu tur kan theihnghilh chang chuan kan zam leh mai thin bawk. Kan thu sawi tum a fiah theihnan zawlnei Elisa leh a chhiahhlawh te chanchin atang hian I han zir ho dawn teh ang. 

Tum khat chu Suria Lalin Israelte a run a,’Chu mi, kha mi hmunah chuan I chang ang u’ tiin a puipate ho a rawn a. Tin, Pathian mi chuan Israel Lal hnenah,”Chutiang hmuna kal lo turin fimkhur rawh, chutah chuan Suria ho an lo chhuak dawn a nia.” Tiin mi a tir thin a. Tin Israel Lal chuan Pathian miin a lo hrilh tawh hmun chu mi a va en thlithlaitir thin a, chutah chuan vawi hnih khat chang pawh ni lovin, a lo inhumhim thin a ni. Suria Lal mangang chuan,’Kan zinga mi a tu hi nge Israel Lal lama tang mi hrilh duh dawn lawm ni?...’ tiin ( a thawnthu a sei lutuk loh nan….) Suria sipai rual chuan zawlnei Elisa awmna Dothan khua chu zan khat thil thuah an hual khat ta mup mai a. A tuka zawlnei Elisa chhiahhlawh tuk tho chuan a pu hnenah a mangan thu a hrilh a, thil dang ni lovin….. Dothan khua leh a chheh vel zawng zawng chu Suria sipaihovin an lo hual khat vek niin. Tichuan zawlnei Elisa chuan,”Hlau ma ta che, an lama tang ai chuan kan lama tang an tam zawk alawm” tiin a lo thlamuan ta a. Pathian hnena a chhiahhlawh tan mitvarna a dilsak zawh hnu meuh chuan a chhiahhlawh chuan a hmu fiah ve ta a, tichuan an velah chuan tlang chu mei tawlailir leh sakawrin a khat mup mai a, chhiahhlawh chu a thla a lo muang ve thei ta a ni. (Suria sipaite aia a let engemaw zata tam leh thiltithei zawk kha tlang chungah khan an lo khat mup mai a ni.)

Khai le, vawiin niah kan sawi tum tak chu kan hre thiam thei maiin a rinawm a, min tanpuitu tur kan theihnghilh chang hi chuan zawlnei Elisa chhiahhlawh ang chiah hian kan mangang a, kan buai a; kan thla a bar thin. Chutiang bawkin min tanpuitu tur chu Lalpa lei leh van siamtu Pathian khi a ni tih kan theihnghilh chang chuan kan mangang a, kan thla bar thin. Mihring lam taka manganna chi hrang hrang leh lungngaihna chi tin reng ten min nuai vel chang hi chuan mahni mihringpuite rinchhan tumin kan theih chen chen tanpuina dilin kan phe thin a, rilruah Lalpa a lang lo hnai lo thei hle. Kan unau sum leh pai nei zawk te an rawn lang hmasa ber thin a, chutah an nin min puih theih loh tawpah, kan manganna tawp khawkah Lalpa kan au leh thin a ni. (Hei hi mihring zia a ni miau si a,….) Mi tam tak chuan kan rina thiltihtheihzia kan hriat chian thin loh vangin lei dana thlemna chi hrang hrang lo thleng thin te hi kan do zo thin lo  reng a, a pawimawh ber chu i rin Lalpa khi hrechiang la, hlauhawm bera I ngaihna hmunah pawh phur tak leh thlamuang takin pe i pen thei tawh ang.

A hneh sa rama ke pen tur tan chuan engkim mai hi saruak leh inhawng sa vek a ni.

Chuvangin mihring ban tha chakna rinchhanna hi chu rei lo te ah keimahni min vaw lettu a la ni dawn a, Lalpa rinchhannaah erawh chuan kan nuna thil engkim lo thleng hi kan chaw a ni tawp mai a, mangan buaina te hlei hlei hi kan lungtat-ah Lalpan min chantir a, kan ringtu nun hi Lalpa chakna rinchhan chungin hriam takin ke a pen theih a ni. A ni chuan ni tin darkar tin mimute tin second tina hlau lo turin min chah tawh si a…….. khawvel tawp thleng pawhin in hnenah ka awm zel ang ti tu chuan vawiinah pawh hian kan hnena awm zel hi a la tiam a ni.

Lalpan kan za atan mal min sawmsak rawh se. Amen!!!!