India ramah Serchhip District-ah Cancer vei tam ber

1. India ramah District tam tak a awm a, chung zingah chuan Serchhip District hi Cancer tamna berah puan kan ni a, hei hi pawi kan tiin a vanduai thlak kan ti tak zet a ni.

Pu Lal Thanhawla Serchhip bialtu MLA leh Mizoram Chief Minister ni bawk hian Serchhip District-a Cancer a tam nachhan bik, a sorkar hian enge a chhan tih zawng chhuak a, Research-te beia, tun thlenga hmalakna al nei miah lo hi a mak kan ti a. Zuk leh hmuam uar vang a ni tih vak vak ringawt hi, District dangte aiin Serchhip District hian zuk leh hmuam kan uar bik kan ring lova. Chuvangin, Pu Lal Thanhawla Serchhip bialtu MLA leh Chief Minister ni bawk hian Cancer vei tamna ber District kan ni hi, a chhan chhui chhuak a hma la ngei turin Serchhip MNF Block ‘East’ te chuan kan phut tlat a ni.

2. Congress sorkar-ah hian dan leh thupek a tlakhniam avangin Serchhip khawpui chhungah dan lova hnamdang sumdawng an hluar ta in, an pung tual tual ta mai hi hnam tana thil pawi tak la thleng thei a nih avang leh nakin tu leh fate thlenga Economic-a inchimralna hmanrua tha tak a nih avangin Pu Lal Thanhawla Bialtu MLA leh hief Minister ni bawk hi a rang thei ang bera Dan anga hma la turin kan phut tlat a ni.

Issued by MNF Serchhip Block East

18-6-2011

Thu lakna : ZawlaiDi Magazine

Rilru paukhauh a pawimawh

Mihring reng reng hi kan rilru azirin kan awmdan pawh hi a ni. Rilru paukhauh tak nih hi a ngai a, huaisen kan tihte pawh hi an rilru a huai a ni mai a, taksa tet leh len lam pawh a ni lo. Rilru nghet chet chawt i neih loh chuan engpawh ti dawn la engmah hlawhtlin tak tak theih a ni lo. Kan thil tih reng reng hi 50% a then phawk chuan a thatna leh that lohna hi a intiat deuh rial zel. Entirnan, Sex Education-te hi naupangah leh nula tlangvalah a tha zawnga hman dan tur leh a nih dan tur sawifiah chiam ila, rai theih hun leh rai theih loh hunte hre bel han sela, an hmansual duh chuan nasa taka hmansual theih a ni ve leh a. Drugs-te pawh sawi fiah tak tak tur chuan a ruih dante sawi tel a ngai a, zu te pawh, tam tak rilru-a awm ngailo kha tih chhin chakna kan tuh ve leh thin a ni. Pathian thu pawh, a hmangaihna leh mi a ngaihdam theih zia ringawt sawi a theih loh a, a fa ni tawhte chunga a thikthu chhiat zia leh mi hrem hmang a ni tih sawi ve zel a ngai ang hian, chempui pawh lo vah nan chuan a hriam thei ang ber kan duh laiin mihring sah nan chuan a duhawm lo ber a ni ve thung.

Martyrs Day kan hmang!

by L.M.Kima (Martin)

Photo - Google

Vawiin khan London-a awm thralai rualten Burmese Embassy hmaah Martyrs Day hriatrengna hun serh kan hmang a, mi kal kan thrahnem thaw khat hle a ni. Mi 150-200 inkar vel kan kal khawm a. Tlai lam dar 1:00 ah hunserh hman tran a ni a, hunserh tran hmain kan ram Independence hruaitu pa ber Gen. Aung San-a leh a thriante, ama ruala an kah hlum tak te sunna hun tawi minute 2 thra vel kan nei. Chumi zawhah Burma Democratic Concern Director U Myo Thein hnen atrangin thuchah tawi kan ngaithla a ni.

Damdawi thi leh sa trin....

Tunlai hian Damdawi thi ei avanga boral awm ni awma sawi te a awm a, hei hian mipui pawh tiharh se a tha hle mai. A anpui tihte, a expire a pawilo tihte hi mi tam zawk hriat dan a ni a. Vanglaini April 11, 2011-ah khan Science expert-in a rawn ziak fiah hle a, kan chhiar vek lo anih pawhin ka han thual leh reng reng ang e.

Damdawi reng reng Allopathic (Damdawi kan tih pangngai hi) Chemical chi hrang hrang chawhpawlha siam an ni a.Entirnan, Quinine te hi a lo chhuahna chu Cinchona Tree (Thing) a ni a, he Cinchona hi miin a tui sawrin in teuh mahse taksa a tibuai ngai lova, mahse khawvel puma han sem darh tham a awm si lo. A chhunga Chemical ang chiah kha an siam ve ta a, chu chu a mumin Quinine tiin an zuar ta a ni. Mahse Quinine mum 10 te chu han ei la, i thih loh pawhin i buai hle ang. Chutih laiin Cinchona tui chu nikhatah vawi tam pawh in la Quinine mum 10 hu aia tam pawh nise i buai hauh lovang. Vitamin C mum te pawh hi vawikhatah mum 20 vel han ei teh, a hlauhawm zia chu vanramah emaw hremhmunah emaw i hre mai ang.
Damdawi reng reng 50% vel hi chu hnim, thlai a a anpui chemical siam a ni a, Ayurvedic leh Homeopathy
hnim leh ransa emaw atanga an lak chhuah an siam a ni ve thung a, chuvanga side effect neilo emaw tlem emaw an ni. Damdawi a lo thih chuan a preserve-na (A chhiat lohna) tur damdawi leh amah kha eng eng emaw a insiam kual a, turah pawh a chang thei a, ei loh a tha ber.
Tin, kan la chin fo, Sa tin-te, Rasgulla tin-te, engpawh tin-a dahthat a chhin phui ho hi, pawn lam boruak Oxygen nena a intawh chiaha danglam an ni a. Chuvangin tin-a dah chi reng reng i hawnga i ei anih chuan ei zawh nghal vek tur, darkar 12 aia rei awm tir loh a tha. Thenkhatin a chanve an siam a, a chanve an dahtha thin hi thil hlauhawm tak a ni. Hawn rual chiah hian Oxidation an ti a, chu chuan thil dang tur ang deuh te a siam thei.Chuvangin tin chi reng reng, mizo siam Baibing tin te, rawtuai tin te pawh nise a thing ei loh tur, tam tak pum natna chhan pawh a ni fo mai.

Thu lakna : Dawrpui Veng

Pi Suu Kyi-i, Pagan pathian biak khualzin hlawhtling takin hawng...

Kawlhovin an pipu ro va an neih leh hmanlai pagoda hlui tak tak awmna hmun, Pagan khawpui, pi Suu Kyi leh a fapa Ko Htain Lin (Kim Aris) te inserh hrang ( pathian biak), ni 4 chhung hun hmanga an zinna chu vawiin ni khan hlawhtling takin an hmang zo ta a ni tiin NLD hmunpui rorel khawl hruaitu U Ohn Kyaing chuan a sawi a ni.

"Zing dar 11:5 ah khan Yangon Airport an thleng a, dar 12:10 ah ama chenna hmun, an inah tluang takin an thleng a ni."

Pi Suu Kyi-i pathian biak inserhhran khualzin kawngah hian an thlenna hmun apiangah mipuiin an lo hmuak a, zan lamah chuan an thlenna Pagan Hotel-a hotute leh staff te chuan lawmthu sawia thlahin vawiin ni khan Yangon-ah hlawhtling takin an lo thleng leh ta a ni. 

Chawlhkar khat chhunga ramchhung sumdawnna chanchin te

Chhiah 3% tlahniam, sumdawng mite lawm

Revenue lam department chuan July ni 1 atang khan sumdawnna chhiah 3 % in an tihniam a, sawrkar thar hunchhunga chhiah pek an tih hniamna zawnah sumdawng mi te an lawm hle. Sumdawng mite, sumdawnna a tlakhniam lai taka tun anga chhiah 3 % lai an tihhniam avang hian tawk fang chu kan zia awm phah a ni tiin Yangon-a sumdawng mi pakhat chuan a sawi a ni.

Tun hma khan sumdawnna chhiah hi chhiah chawina department atangin zaa pariat (8 % ) an la thrin a, sum lut chhiah zaa pahnih (2 %) lak a ni bawk. Tichuan sumdawnna chhiah hi zaa panga (5 %) tihniam turin ramchhung president hnenah lehkha an thawn a, tun ang hian zaa pathum (3 %) ah tihhniam a ni ta a ni.

Myanmar ramchhunga chhiah lak dan chungchang hi ramin a hlawkna a tel ai tur mahin sumdawng mite leh chhiah lam department te inkara thamna thilpek te a tam thrin avangin chhiah chawi tlahniam hian awmzia a nei meuh ang em tih chu ngaihtuahna a awm ve thei bawk.

Chin State, ramchhunga rethei ber la ni zel

Myanmar ramchhunga States leh Divisions 14 zinga Chin State chu retheih hluarna ber State niin State chhunga cheng 73.3 % chu hmun dang aia retheih hluarna aia tam zawk niin kum 5 chhung kal ta atrang khan State rethei ber a la nih thu UNDP thu chhuah chuan a tarlang a ni.

KIA leh sawrkar thar la inkap zel....

Kachin State sawrkar palaite leh KIA palaite inhmuin ni li chhung engmah boruak thawmvang awm tawh loh hnuin pakhat leh pakhat an inkap chhunzawm leh a ni. Tun thla tir khan inkah hi tran a ni a, Moemouh Township-a Tarpine tuikhuah, kawlphetha siamna hmunpui bula pawn rawn chhuak sawrkar sipai rawn chhuak te chu tun thla ni 3 ni khan KIA lamin an lo kap a, tichuan sipai sawrkar lam pawhin an kap let ve bawk a ni tiin KIA hruaitu U La Nann chuan a sawi a ni. Pakhat leh pakhat inkara in kah haina sawihona chuan awmzia a nei lo hle a ni a ti bawk.

'Thil thar lutuk engmah a thleng lo va, thil nih dan pangngai a ni e. Vawiin ni atan chuan thil thar lutuk a awm lo va, anmahni lam atrangin chanchin kan la dawngsawng lo bawk' tiin.

Ropuina Dik Tak 

Kum tam tak kaltaah khan England ramah zirtirtu pakhat chuan 'Ropuina Dik Tak' tih thupui hmangin a zirtirte chu thu ziak turin a ti a. A zirlaite zingah chuan hmeichhe naupang rethei tak leh lehkhathiam lo chhungkua atanga lo chhuak hi a awm ve a. Chutiang thilah chuan an hotunu chuan chu hmeichhe naupang hnen atang chuan eng thil ropui mah a beisei lo. Mahse chu hmeichhe naupang thu ziak chuan chu zirtirtunu rilru chu a hneh khawp a, chanchinbua chhuah turin a pe ta a. Mite chuan an lo lawm hle mai a, hmun tin maiah chanchinbute chuan an chhuah ta uai uai mai a. Chu hmeichhe naupang hming chu hriatreng pawh a ni tawh lo, mahse a thu ziak chu a la dik reng mai. Tlem lo tar lang ila;

Ropuina dik tak chu neih tum avanga neih mai theih a ni lo. I zawn loh hunah chiah hian i nei thei a ni. Thuamhnaw tha tak te hi a tha khawp mai. Thuamhnaw tha tak tak han inbel hi chuan tuihnai tak anga lan hi a awl hle mai a. Mahse ropuina tak tak i hmuh duh chuan thuamhnaw chhe tak inbel chung pawha thuamhnaw tha inbel ang maia khawsa thei hi en mai rawh. Vawi khat chu ka nu naupai laiin an Inah chuan sava pakhat, Bill an tih chu an khawi a, Bill chuan a ke a titliak a, a thih mai te pawh an ring a, a nih loh leh tihhlum mai pawh tha zawkah an ngai a ni. Mahse a tuk khua a lo var chuan a ke tha lam hmang chuan awn ang tei tawi hian a lo ding hram hram a, a lo zai vet vet mai a. Chu chu 'Ropuina Dik Tak' chu a ni. 

Kan ram chungchanga ka ngaihdan

Salai Martin

Tunlai kan ramchhung boruak thil thleng te hian rilru ngaihtuahna min siamtir lo thei lo va, ngaihtuahna tam tak min neihtir a ni. U Thein Sein sawrkar thar hian ramchhungah hian engnge a tih le? Tunlaia Kachin ramchhunga buaina chin fel a la ni lo leh, chin fel a hnekin buaina chuan pun lun lam a pan tual tual si a, a hminga democracy ram in ti si hian ramchhungah buaina a punlun telh telh mai a ni. Chumai ni lovin ramri depa Karen leh sipai sawrkar te innghirngho thrin te pawh hian ramchhung sawrkar thar rorelna thrat leh thrat lohzia chu a tilang chiang mai lawm ni.....?

Kan ram chian a hming maia Democracy ni lovin a taka lang thei leh mipuiten kan duh thala ram hruaitu tur te kan thlan theihna tur Democracy ram thar kan mamawh a ni. Ramchhunga Democracy a lo nih theih nana hmalaa nunna chan ta te kha an van fakawmin an van entawntlak tak em! An thisen hi a luang ral mai mai dawn lo a ni. Tunah hian an thisenin min au va, kan ram hian Democracy dik tak a hrinchhuah theihnan kan thralai rual te hi nasa lehzualin min fuih nasa a ni. Chuvangin zam chhe mai mai tur kan ni lo va, nasa lehzuala tran la a, ram leh hnam chhan pasalthaten an nunna hial dah khama ram tana tran an lo lak tawhna zawng zawng chu zam mai lova chhunzawm zel tur kan ni.

Sai Nyunt Lwin kum 60 na piancham lawm

Sai Nyunt Lwin (Photo-DVB)

Tuna Kalay (Kawlpui) Jail-a tang mek, sipai sawrkarin kum 85 jail tang tura a chungchang an rel tak Shan National League for Democracy Secretary Sai Nyunt Lwin piancham kum 60 na chu chhungkhat laina leh thren leh rual thraten an lawm a ni.

Yangon khawpui Komyaing-a ama chenna inah lawm a ni a, politik lama a thawhpui te leh thren leh rual thra te nen an lawm thu SNLD hruaitu pakhat Sai Shwe Kyu chuan a sawi. 

"He piancham lawmnaa tel tura thren leh rual thra kan sawm te chu an lo kal kim hle a, politik lama a thawhpui te hnen atrangin U Aye Thar Aung, U Thar Baan, U Thawng Khaw Thang, U Naing Ngwe Thein, Pu Cin Sian Thang te an ni a, chhungkaw ukil lam atrang pawhin U Kyi Win, U Nyain Win leh U Aung Thein te pathum an lo tel ve bawk a ni. A piancham lawmnaa lo kal te chu ualkham an nih hnuin a chanchin tawi ziakna lehkhabu chu piancham lawmpui tura lo kal te hnenah pek an ni. U Nyunt Lwin atan hian piancham lawmpuina leh malsawmna lehkha (autograph) an ziak sak threuh va, hemi ni hian piancham 60 hriatreng nan sava 60 chhuah a ni. (Hei hi  Kawl ho chuan an tih dan thin a ni a,.... ed) Jail atranga a rang thei ang bera a lo chhuah thuai theihnan trawngtraina an hlan sak bawk."

Australia Foreign Minister leh pi Suu Kyi inhmu

NLD hruaitu pi Aung San Suu Kyi leh Australia Foreign Minister Kevin Rudd te inkawm lai
Photo - Writer

Tuna Myanmar-a cham mek Australia Foreign Minister leh National League for Democracy hruaitu pi Aung San Suu Kyi telin party hrang hrang hruaitute chu vawiin khan Yangon-ah an inhmu a ni. 

A vawi khatna atana Kawlrama rawn zin Australia Foreign Minister Kevin Rudd hi vawiin chhun khan NLD hruaitu leh Secretary pi Aung San Suu Kyi leh hmunpui rorel khawl hruaitu U Hantha Myint leh office-a thru mi pawimawh te nen an inkawm a ni. Vawiin chhunlai dar 12 velah khan Australia Club ah an inhmu a, vawiina an inhmuh chungchang kimchang zawk chu House Speaker U Ohn Kyiang chuan ti hian a sawi," National League for Democracy General Secretary Pi Aung San Suu Kyi leh party hruaitute chu lo mikhualin inkawmna neih a ni a, chu inkawmna/inhmuhna ah chuan Australia Foreign Minister chuan Australia ram chuan Myanmar ram chu mipui mi mir zawng tak pawha a support thu chu kimchang leh fiah fel takin a hrilhfiah thu a tel a ni." tiin. 

Pi Suu Kyi-i, sipai sawrkarin man leh a tum em ni le...?

U Thein Sein-a sawrkar thar chuan pi Suu Kyi-i chu politik lam thil titawh lo turin lehkha a pe a. Chumi chungchangah chuan pi Suu Kyi chuan Home Affair Ministry nena sawi dun a duh thuin a chhang let a ni.

Photo-DVB

Tun ang dinhmuna hetianga political party hruaitu hnenah lehkha han inpek chu thil mak tak a ni a, ngaihtuahna a tithui duh khawp mai. A lang lo lamah phei chuan engtiangin nge a chungchang an rel ang tih te pawh a awm a. He sawrkar thar hian pi Suu Kyi hi a man leh dawn a niang tia ngaitute pawh tam tak an awm a ni. Heng thil thleng avang hian pi Suu Kyi-in ramchhunga a bial fan tur thu a lo puan lawk sa chu a thrulh ang em? tih hi zawhna awm thei a ni a, ramchhungah bialfang ta se la, sawrkar thar hian an mi leh sa tu tu te emaw hmangin kut an thlak leh mai lawng maw? tih te pawh ngaihtuah tur a awm bawk a ni. 

Pi Suu Kyi-i lehkha an pek rual hian U Aung Shwe hnenah pawh lehkha an pe tel bawk a ni. 

Thulakna : DVB
                 Chinworld.info

Malaysia sawrkarin illegal worker te legal an nih theih nan 'Amnesty program' a puang...!

Mazovi/zp

KL

Tun lai Malaysia ramchhung chanchinbu-a chuang fo '6P' chuan foreign worker te beng a verh hle..!

Malaysia sorkar in a ram chhunga overstay/illegal-a hna thawk te thlawp (reduce) a duh a, 'Amnesty program (6P)' a puang a, July 11 hian a effective tan ang. 31 December 2012 hma ngeia apply fel tur ani a, hemi program-a in barh lut lo illegal worker te chu 1 January 2012 tang an man hmiah hmiah tawh dawn ani. 

Lam tawi 6P chu 1) Registration, 2) Legalization, 3) Amnesty, 4) Supervision, 5) Enforcemen, 6) Deportation  a  nia,  process  buaipui turin sorkar in agent  thenkhat  a  hmang  ang.  Dik lo  taka thawk agent te chu black-list ah a record ang.

Burma (Myanmar) ramchhungah Chin State rethei ber....

Chin State, Burma

Kawlram chhunga retheihn hluarna ber chu Chin State a ni tiin UNDP leh sawrkar thar hruaitute trang kawp chuan an chhinchhiah a ni. An enfiahnaah hian Chin State chu 73% niin ramchhunga rethei ber State a ni a, chuti zawhah chuan Rakhine State, Tanintharyi Region, Shan State leh Ayeyarwady Region ten an dawt a ni.

State rethei ber a nih chungchangah hian CPP secretary U Dai Thawng chuan Chin State-ah hian zirna, hriselna, sumdawnna engkim mai hi a chhe em em a, a bik takin zirna lam hi tun ai hian hmalakna chak zawk awm thei se tiin a sawi. 

"Ka hmuh dan chuan zirna hi thupui berah ka dah a, zirna lam tihhmasawn hmasak ka duh a ni. A pahnihna atan chuan hriselna lam ni se la. Zirna chungchanga naupangten hma an sawn chuan tun hnu kum 10, 15 hnuah chuan lehkha thiam an lo chhuak ang a, chumi atan chuan zirna hi a pawimawh a, uar se ka duh a ni."

Hotupa i nih chuan

Thil siamna hmun lian tak pakhat bangah chuan he thu mak tak si, ngaihtuah tithui tak mai hi a intar a," Hotupa ni ta la, nangmah khan hetah hian hna rawn dil ta la, i inruai duh ang em?"

Mahni leh mahni inpu chawp chu a thua han sawi a rik dan a danglam ai hian a hla vak lo asin. Thil thar pawh zu ni hek lo va. Kum 3,000 vel kal taah khan Lal Solomona, a fin chungchuan vanga hmingthang em em mai chuan ziak ngeiin he thu hi a lo hnutchhiah tawh nia,"Mi chak ai chuan thinrim lama mi truanmuang chu a thra zawk e, khawpui hnehtu ai chuan ama ngaihtuahna thunun theitu pawh a thra zawk."

Photo-http://www.cio.com/special-reports/boss-and-you/index

Party chu pi Suu Kyi-in mi thar zawk te nena hmalak duh

National League for Democracy (NLD) hi pi Suu Kyi chuan thrangthar ngaihtuahna thar zawk nena hmalak tlan a that thu, Upper Myanmar-a States leh Divisions pasarih atanga thralai lo kalkhawmte nena an inkawmnaah a bik takin a sawi/fuih a ni tiin hmunpui roreltute zinga mi thralai hruaitu pakhat Ko Myo Nyunt chuan a sawi.

Pi Suu Kyi-i House Arrest atanga an chhuaha Upper Myanmr
NLD thralaite nena inhmuhkhawmna hmasa ber ni 28.6.2011,
zing dar 10:30 atanga tlai dar 3:00 thleng, Yangon khawpui
Bahan Township, NLD Office rorelna hmunpuiah neih a ni a,
States leh Divisions atangin mi 80 chuang an kalkhawm a ni.
Photo - NLD Youth

Mandalay, Sagaing, Maguay leh Shan, Kachin, Chin, Kayah State atanga mi 80 chuang lo kalkhawmte nena inhmuh khawmna hi Yangon khawpui, Bahan Township, NLD Office hmunpuiah ni 28.6.2011 thawhlehni zing dar 10:30 atanga tlai lam dar 3:00 thleng neih a ni. 

Hei hi Party Secretary leh Thralai department chungchanga mawhphurna latu ni bawk pi Aung San Suu Kyi-i leh Upper Myanmar-a NLD party thralaite nena inhmuh khawmna hmasa ber a ni bawk.

"Innghahna hlimawm, party tana mi thrahnemngai tur te hmel a lang a, kum upa zawk te zah dan an thiam a, kum upa zawk ten an chawlhsan hnuah pawh an awmna hmun an luahlum theih nan tun atanga inzirtir a, chi tuh a ngaih thu a bik takin a sawi thu....." hmunpui roreltute zinga thralai hruaitu Ko Myo Nyunt chuan Mizzima chanchin bu hnenah a hrilh a ni.

Salai Tin Maung Oo thih cham vawi 35 naah lehkha sem

Sipai awpna hnuaia Burma Socialist sawrkarin an khaihlum tak, Yangon University zirlai hruaitu (Chin mi) Salai Tin Maung Oo thih champha vawi 35 na hriatreng nan ama trawngkam leh au hla te ziakna lehkha chu vawiin khan sem a ni. 

Yangon leh Mandalay telin kawlram khawpui hmun thren khatah te sem chhuah a ni tiin a semtute zinga mi chuan DVB hnenah a hriattir/sawi a ni. 

Australia Foreign Minister leh pi Suu Kyi inhmu dawn...

Australia Foreign Minister Kevin Rudd chuan kar leh khian Burma (Myanmar) ram tlawhin a zin dawn a, ei leh bar thila hmasawnna leh ram hmasawnna lam kawng tam tak sawipui turin chhimchhak Asia rama rethei ber te zinga ram a tlawh dawn a ni. Hei hi sipai sawrkar awp beh hun kum 9 chhunga Australia Foreign Minister-in kawlram a zin vawi khatna a tih theih bawk.

(Australian Foreign Minister Kevin Rudd) Photo-AFP

Mr.Rudd hian Burma (Myanmar) sawrkar thar hruaitute a tlawh mai bakah political party hruaitu hrang hrangte leh pi Suu Kyi pawh a tlawh bawk ang. A ni hian national reconciliation leh democratic reform dik tak a nih theih nan Australia-in long-standing a neih chungchang te chu he inkawmnaah hian a sawi tur thu a tarlang bawk a ni. 

Australian sawrkar hian ram pawn tanpuina atana a hman, a bik takin Burma ram hmasawnna atana a hman hi kum hnih kal ta atang khan a pung nasa em em a, $29.1 million (2009-2010) atangin $47.6 million (2011-2012) a han ni chho va, 2012-2013 ah phei chuan $50 million a tling chho dawn a ni.

Thu laknate : DVB

                    Australian Minister for Foreign Affairs

Mizo Hnam Dan

R.Vanlawma

Khawvel ram hrang hrang kan hriat phak tawk tawk kan han thlir hian Mizo hnam dan hi a lo tha tawk hlein kan inphu tawkah chuan tha hlein a lang.

Ro khawm thu ah chuan pa a lo thihin nuin a ai a awh nghal mai a, pa hminga thil awm apiang te kha a neitu a ni zel a ni. Ro khawmtu chu a ni lo na a, a neitu a la ni reng a ni. Pain ro khawmtu tur a duh ang khan nuin a khawmtir leh tur a ni. Fatlum hi ro khawmtu ber an ni. Chumi awmzia chu fapa kha indang tura ngaih an ni a, fatlum ber kha indang lo tura ngaih a ni a, fatlum ber a indan a, fapa dangin nu leh pa an chawm hlum chuan fatlum dinhmunah an ding a ni. An pa ro neih dan azirin unauten an insem thin.

Ruah sur nasat vangin N.Dagon (Yangon) ah tui lian tuar

Tunhnaia ruah sur nasa leh chawl lova ruah a sur avangin Yangon khawpui North Dagon Township, New Dagon ah mihring chenna in leh huan te tuiin a chim a, Laydaungkan-ah phei chuan an buh chin te pawh a chimpil vek a ni.

North Dagon Township huam chhungah hian ruah a sur nasa hle a, tui a len bawk avangin tuilenna hmun ward 4 chhungah hian in 2000 chuang a awm a, mipuite leh zirlai naupangte sikul kalnaah harsatna an tawh nasat thu, khaw tual mi pakhat chuan a sawi a ni. Khawtlang mipuite chuan Municipal thuneitute hnenah thu thlenin hriattir mah se thuneitute chuan rawn kalin engmah hmalakna hranpa a awm lem lo a ni.

Chanchin hi RFA Correspondent Ko Moe Kyaw hnen atangin dawn a ni. Chanchin kimchang zawk chu radio ah ngaihthlak theihin a awm bawk.

Thu lakna : RFA

Radio link : RFA

London Kachin unaute huaihawtnain Burmese Embassy hmaah duhloh entirna neih a ni

Protesters in London (photo-Burma Campaign UK)

Vawiin 24th June tlai lam dar 1:00 - 3:00 inkar vel khan London-a awm Kachin unaute huaihawtnain tun hnaia Kachin ram chhunga sipai sawrkar leh KIA te inkahna chungchang duh loh entirna Burmese Embassy hmaah neih a ni. Mi 200 tha kal khawm te chuan darkar hnih tha zet Burmese Embassy hmaah hun an hmang a, UK based Kachin National Organisation (KNO)  leh Kachin National Council (KNC) huaihawtnaa kawng zawhnaah hian tunlai Kachin ramchhunga thil thleng chungchanga sipaiin KIA a kah chungchang chu duh loh entirna neih a nih mai bakah UK a awm pawl hrang hrang hruaitute hnen atangin thuchah tawi ngaihthlak a ni bawk.

Sawrkar thar ka hmuh dan....

 L.M.Kima

Tunlai kan ramchhung buaina te leh sawrkar thar hmalak dan te han en hian lung hi a awi thei mawlh lo a ni. A hmingin mipui sawrkar a ni an ti a, mipui chuan thu kan nei lem hlei lo va. He sawrkar thar hian anmahni duh dan danin ram an kaihruai a, anmahni hi dan an ni tawp a, dan chungah an thu a ni ber mai. Mipui lam atangin eng han tih theih a awm bawk si lo, ‘A che che sih hlawkah...’ tih te pawh a ang zo ta. Mipui lam atanga voice han nei thei deuh tura an hriat te chu jail-ah an khung zel bawk si a, vawiin ni thleng hian political avanga jail tang hi mi sang tel an awm a, vawiin thleng hian a tam zawk chu an la tang a ni. Danin awmzia a nei thei lo va, anmahni tawngka chhuak apiang kha dan a ni zel mai si a, ramchhung mipuite lakah an lalna an hrawt a la reh thei lo bawk.

Tun hnaia Kachin State chhunga sipai leh KIA te inkahna  leh Karen State chhunga inkahna te avang ringawt pawh hian he sawrkar thar hian ramchhungah enge a thawh tih chu a hriat mai awm e. Ramchhungah inremna lam aiin buaina a hluar tial tial a, ei leh bar a harsa tial tial bawk. Tribal (tlangmite) min hmusit em em bawk a, tlangmite min hmuhsih dan em em hi sawi aiin kan tawnhriat atangin kan hre thei zawk awm e. 

EU palaite nena inpawh taka inkawmna a nih thu pi Suu Kyi-in a sawi.

Kawlrama lo kal European Union (EU) vice Chairman ni bawk, Security Council-a thurawn petu ni bawk Mr.Robert Cooper leh a hote nena inhmuhna chu inpawh tak leh tlang taka inkawmna a ni tiin pi Suu Kyi chuan a sawi.

Mr.Robert Cooper rual hian Myanmar ram chungchanga palai David Lipman leh EU in Myanmar ram chungchanga a bik taka palai Piero Fassino te telna EU palaite chu nimin chaw hnu lam khan ama inah darkar khat chuang an inkawm zawh hnuin chanchinbu mite hnenah chuan pi Suu Kyi chuan a sawi a ni. 

Hemi chungchang a sawinaah hian NLD hmunpui rorel khawl atangin U Ohn Kyaing chuan ti hian a sawi, "Secretary chuan EU leh NLD inbiak pawhna hi tun hma atang khan a tha sa reng a, chuvangin thian tha leh thian tha inkara tun ang dinhmuna kan inhmuh pawh hian pakhat leh pakhat inpawh tawn takin leh mahni ngaihdan fel fai takin, tlang takin kan inhrilh bawrh bawrh thei a ni. Ani pawhin a hmuh dan chu tlang takin a sawi a, keini lamah pawh hmunpui rorel khawlin kan hmuh dan kan sawi bawk. He inkawmhona hi a tha thaw khat a, pakhat leh pakhat tlang taka kan inbiakna chuan nakin leh zelah pawh inlaichinna tha tak a hrin chhuah ngei a beiseiawm hle a ni tih te a ni a, a chip chiar zawkin kan sawi tawh lo mai ang a."

Rinawmna

C.Lalmuankima

Rinawmna hi Pathianin lei mihringte a malsawmna min pek zawng zawng zinga pawimawh ber a ni awm e. Rinawmna tluka hringnun ze mawi leh tha, duhawm hi a awm chuang lo vang. Rinawmna hi mihring min timihringtu te pawh ti ila kan sawi sual tam lo vang.

Rinawmna chuan mihring hi mihring tak takah a siam a, a tizahawm a, midangte a tithlamuang a, a tihlim thin. Rinawmna hi Pathian malsawmna kan dawn zinga thil ropui ber a ni. Chuvangin kan nunah hian thil hlu a tling tak zet a ni. Rinawmna lo liama thil dang pawimawh hi a awm thei chuang lo vang. Sum leh pai aia hlu, rangkachak leh thil hlu tinreng aia hlu zawk, mihring tana lallukhum mawi ber leh ropui ber, mihring tana hriamhrei pawimawh ber mai chu Pathianin mihringte a pek rinawm theihna hi a ni.

Aung San Suu Kyi Birthday kan lawm.....!

by L.M.Kima

66th Birthday, Daw Aung San Suu Kyi (Photo-Ko Martin)

Kumin 2011 June 19 a lo thlen hian NLD hruaitu Daw Aung San Suu Kyi piancham vawi 66 na a lo ni reng mai a, ramchhung leh rampawna awm zawng zawng Kawlram mipuiten kan lawmpui tak meuh meuh a ni. Kan pi ber hian kum rei tak chhung ram leh hnam tan a theih tawp chhuahin politik lamah hma min lo hruai tawh thin a, kumin kum 20 dawn lai mai jail leh house arrest-a an khung hnuin nikum khan sipai sawrkar chuan a chhuah zalen ve chauh a ni. Nobel Peace Prize dawngtu NLD hruaitu ni bawk Daw Aung San Suu Kyi hi kan chhuang tak meuh meuh va, kan ram leh hnam tan Rohlu nih a tling tak meuh meuh bawk. Kum tam tak damin leh a Vision te a hlawhtlin ngei theihnan theih tawpin i tawngtai zel ang u.

Kan Veng (Agape Kids Club)

Khumtea, Mandalay

Pathian venhimna zarah kan awm hmun theuhah kan dam tlan  ka  beisei.  " Vawiin  chu  ka  han bawk deuh hun ang e" ka ti!!

Aw le,,kidz club tih hi kan veng a din ve tirh atrang tawh khan tunthleng hian kan khawtlang chuan kan hmelhriat zawng a in ka ring lo. Lalpa trul tihna avangin tun hian Tahan leh a chhehvelah poh la awm ngai hauhlo chu kan vengah bul tran a ni ta e.

Kan hriat threuh angin u Thranga reng reng hi chu,,,,mission rawngbawlna hi a mutmawh hnarmawha a lo neih atan leh a nupui atan reng a'n Lalpa a lo pe ni berin a lang. Kawlram zofate mission rawngbawlnaah harh turin kum tam tak ke a lo pen tawh a. Wesleyan kohhrana a awmlai khan Myanmar Wesleyan kohhran chu Mission vei kohhran ni turin Lalpan a mah hmangin a chher kan ti theih awm e.(Tunah erawh rawngbawlna zau zawk a beisei avangin Sanmyo Baptist-ah a lawi a ni.)

Ni 27 tlai lam dar 3:45 - 4:50 inkar vel khan Chinese Embassy (UK) ah Burma Democratic Concerns (BDC) huaihawtnain Demonstration neih a ni a, mi 40 tha vel kan kal khawm. He demonstration (kawng zawh) ina a tum ber chu tuna China rama khualzina thang mek(26-28 May ), U Thein Sein sawrkar-in China sawrkar hruaitute nena insumdawn tawnna an siam tur chungchang duhloh entirna a ni. 

                            Kan Entawn Fo Tur Mite

1.                  Evi leh Adama angin mi rawnna fiah lovin i zawm mai lo vang u. Gen. 3:

2.                  Enoka leh Nova angin Pathian nen i leng dun thin ang u. Gen. 5:22; 6:9

3.                  Abrahama angin Pathian i ring ngam ang u. Gen. 12:1,7; 15:6. Rom 4:3

4.                  Isaaka angin nupui pasal zawn thuah Pathianah innghat ang u. Gen. 24:4-7

5.                  Jakoba angin Pathian In (Bethel) i din ang u. Gen. 28:20-22

6.                  Josefa angin sual lakah i inveng ang u. Gen. 39:7-12

7.                  Mosia angin zaidam i zir ang u. Num. 12:3

8.                  Mosia angin khawvel mi nih aiin Pathian mi nih i thlang ang u. Heb. 11:24,25

9.                  Mosia  angin Pathian mite mawh i phur ngam ang u. Ex. 32:32

10.                Davida angin Lalpa hminga mualpho I hlau lo vang u. 2 Samu. 6:14-22

Chhunzawm leh atan,…..

Thulakna : Mizoram General Knowledge

Taihmakna Thuruk

by Robert Chtea

Khawvel lei mihring fate nitin nun kawng kan zawhnaah hian loh theih loh va thil tih tur pawimawh ber leh mawhphurhnaa kan neih ngei ngei tur, kan neih hnu pawha kan vawn tluan hleih theih loh fo thin chu, "Taihmakna" hi a ni.

He thu 'taihmakna' tih hian chanchin (History) tha tak leh entawntlak 'Ro' tling leh khawvel thil dang zawng aia hlutna min hmuh chhuahtirtu a ni bawk a ni. Tunhma B.C hun lai daih atang tawh khan, mihring nunphungah hian taihmakna tello va thiamna leh finna chauhvin mi hlawhtling leh mi ropui dinhmunah chuankai theih rual a nihlohzia te kan hriat theuh a rinawm. Chutih rualin tunlai thang leh tharte nun zia kan thlir chian hian tawngka ringawta taima fe fe kan tam ta lutuk hi vei tham a tling tak meuh a ni. Kan chenna khawvel inhlumlet boruak nghing dut dutah te phei hi chuan nasa zawka tanlak a pawimawh hle mai.

Tihsual tur hisap lawk

I khawsak dan tur i duannaah mite sawiselna cho chhuak tur i tihpalh tur te hisap lawk tel a tha hle a ni. Tumah hi kan famkim loh avangin thil kan tisual fo thin a, siamthat kan ngai ngei ngei thin. Sumdawng tam tak chuan kum tin hian cheng engemaw zat hi dah hrangin ‘Sumdawnna thila hlawhchhamna tur pawisa’ an dah ve zu nia. An hisap a sual thin a, an thil zawrh tur hriat thar thenkhat chu a fuh lo va, an thil zawrhdan thenkhat pawh a fuh lo fo bawk thin.

Tihsual atana pawisa dah hran ai chuan tihsual tawh atanga inzir hi a pawimawh zawk fo thin. Tingtang nawh mi (violin) tum thiam hmingthang tak mai, Ole Bull-an mipui hmaa Violin a tum hmasak ber dawn tum chuan a dinhmun a khirh ve khawp mai.

Lalber khumtir rawh u…

Rev. Vanlalzuata

“Beram No talh tawha hi thiltihtheihna te, hausakna te, finna te, chakna te, chawimawina te, ropuina te, malsawmna te hmu tlak a ni e.” (Thup. 5:12)

French ram lal Philip Auguste-a hi a sipaite nen ral do turin an chhuak dawn a. An kal dawn chuan a sipaite hnenah, “He indonaah hian hnehna kan chan chuan he ka lallukhum hi kan zinga sipai huaisen berin kan hawn hunah a khum ang a, kan ram lalah kan pawm nghal ang a, keipawh a hmaah ka kun nghal ang,” tiin a lallukhum chu a phawk a, dawhkanah chuan a dah a. Indona hautak tak an va beih hnu chuan hnehna changin an lo hawng leh ta a. An lal chuan a sipaite chu a ko khawm a, an hnenah chuan, “Khai le, kan zinga sipai huaisen ber thlang ila, ka lallukhum hi keiman ka khumtir ang a, ka lalthutthleng hi a luah nghal ang,” tiin a hrilh a. Sipaite chu an ngawi thup mai a, an dak chhuak ngam ta lo va. Chutih lai chuan an zinga sipai huaisen tak chu a tho va, dawhkana lallukhum chu a la a, an lal hmaah chuan a ding a, “Aw lalber, he lallukhum hi nangmah hian i inhmeh ber e,” (Tu Oroi, es le plus digne) tiin an lal luah chuan a khumtir ta a. Chu veleh chuan sipaite chu lawmin an au rual thup thup mai a, a hma ai zawngin an lal chu an zahin an ngaisang ta a ni.

Koladan Project-ah Tihluihnain Burma Mi 1,570 Chhawrlui An Ti

Written by Mizo Aw

Monday, 09 May 2011 00:00

Burma Centre Delhi BCI{BCI} leh Chin Huma Rights Organizations leh Aizawl and Grassroot Development Network Mizoram te buatsaihin zirtawpni khan I& PR Conference Hall-ah  on “Regime change in Burma: Post 2010 Elections and its Consequences” tih thupuia hmanga kum Burma 2010 inthlan zawh hnu pawha Burma sawrkar kalphung a la danglam lohzia te sawihona hun hman a ni. A bika sawm Pu Vanlalngaia, Chairman, Mizoram Committee for Democracy, chuan Burma sawrkar kalphung chu zalenna duh Burma mipuite chungah pawh a inthlak loh thu a sawi a, Burma sawrkara thil inthlak awmchhun chu Burma sipaiten an uniform an ha tawh lo chauh hi a ni a ti a, hei vang hian khawvel puma zalenna duhte chuan Burma ram zelnna atan hian tan kan lak zel a tul thu a sawi.

Hlau ma ta che!

II Lalte 6:16

C.Lalmuankima

Ringtute sakhaw dangte aia kan vanneihna em em chu Lal Isua ngeiin a thisena min chhandama van khua leh tuia min siamtu ngeiin hlau lo tura min tawng thlamuanna tawngkam hi a ni. Chu min tawng thlamuanna tawngkam mai chu a la duh tawk lo va, hlau leh thin, ringhlel leh mai thin, rinhlelh ching leh mai thin kan ni tih min hrechiangtu ngei chuan kumkhua leh khawvel tawp thleng pawha kan hnena awm zel pawh a intiam chhunzawm nghal a ni. A van thlamuanthlak teh reng em!

Khawvel pumpui chu sawi loh kan ram zimte chhunga lal ber hian kan ding leh veia min kaihruai turin kan hnena awm zel hi han intiam teh reng se la (!) kan va han thlamuang dawn tak em!  

                            Kristian Chhungkua    
                              M.S.Dawnga (Seattle, USA)

       Bible bu hmasa ber Genesis-ah chuan Pathianin mihring hmasa ber Adama a siam thu kan hmu a. Adama amah chauha awm chu kim lo a ti a,chuvang chuan a kawppui tur Evi a pe a.Tichuan Adama leh Evi chu nupa an lo ni ta a,chuta tang chuan chhungkua kan tih hi a lo intan a ni.

          Genesis tih hi a awmzia chu 'bul,tobul,intanna'tih a ni a.   (Bible thumal hrilhfiahna,p,203).  Genesis chu Bible bu hmasa ber a ni a,lei leh van Pathianin a siam tan dan kan hmu a,mihring hmasa ber berte lo awm  tan dante nen.Hetah hian a lang apauva  Pathianin thil siam zinga kan hmuh ve si loh,mahse a ruka pawimawh tak ni si,lo inphum chu chhungkua hi a ni.

Lal Isua a tho leh ta!

C.Lalmuankima

Lal Isua hnathawh zingah chuan kraws-a a thihna leh thawhlehna thu hi a pawimawh ber a tihtheih hial awm e. Hei hi Kristianten kan innghahna bulpui ber pawh a ni reng a, tin, a lo kal chhan pawh,”....rawngbawl tur leh mi tam tak tlan nana a nun pe zawk turin a lo kal a ni si a.’ (Mk. 10:45). Thlaichi chu leiah kan tuh a, a tawihral hmasa zet a, chumi hnuah rawn to chhuakin a lo thanglian a, rah tam tak a chhuah ang hian Lal Isua ngei pawh kha keini misual tluchhe boral mai tur te tan vuak leh velh a nih hnu, sualna nei miah lo a nih chung pawha kraws-ah khenbeh a nih hnuin, (amah ngei chu thlai chi nungah rawn tangin chatuan nunna kan neih theihnan leh rah tam tak a chhuah theihnan ama taksa ngei chu hrehawm tinreng tuar turin a rawn inhlan a...) phumin a awm leh a, a zirtirte hnena a lo sawi lawk ang ngeiin ni thum niah kaihthawhin a awm leh ta a! Chumi a thawhlehna nun hmang chuan chatuan hremhmuna kal liam mai tur mi tam tak te nun min lo tlan ta zawk a ni! He tlanna hi a van ropui tak em! Amah ngeiin ama thisen ngeiin pa Pathian thinlunga lei leh van inrem tawh lo chu remna palaiah rawn tangin inremna min lo siamsak leh ta a ni. Lalpa chu fakin awm rawh se! Hei tluka thiltih ropui hi a awm thei chuang lo vang. Tichuan rah thlamuanawm tak chhuahin mi tam tak te min chhandam ta zawk a.

Lal Isua kha tho leh ta lo se la chuan vawiin niah nang leh kei hian Chatuan Nun kan nei ngut ang emaw chu? Lal Isua kha tho leh ta lo se la chuan sakhaw dangte aia kan rinna a danglamna a awm chuang lo vang. Kristiante, sakhaw dang laka kan danglamna chu kan rin Pathian ngei a thi a, a tho leh hi a ni. (Sakhaw dang pathianten hetiang hi an nei ve lo reng reng....) Thawhlehna thu hi Kristiante thurin bulpui pawh a ni a, Lal Isua chuan a thih tur thu te leh a thawhleh tur thute a sawi lawk vek a, chutiang chiah chuan a thleng famkim bawk a ni. Lal Isua a tho leh ngei a ni tih Bible-in hetiang hian min hrilh. (Mt. 28: Mk. 16; Lk. 24: Joh 20 & 21 ).