Khawvel tukverh khar phal nun nei thin ang che

C.Lalmuankima

Newcastle, United Kingdom

Kan pawn lam inthuam mawina kan ngaih pawimawh tluk hian kan chhung lam inthuamna pawh hi ngai pawimawh ni ila chuan kan nun hi a va duhawm dawn tak em!

Tum khat chu Mencap Planning for the Future Seminar kan neih mek laiin ka ngaihtuahnaah he thu hi a lo lut alawm le. 'Ringtute hian kan pawn lam inthuamna kan ngaih pawimawh tluk hian kan chhung lam inthuamna hi ngai pawimawh thin ni ila chuan kan nun hi a va duhawmin a va hlimawm dawn tak em!' tih hi. Mi tam tak chuan kan pawn lam taksa lan mawi dan kan ngaih pawimawh tluk hian kan chhung lam mawi dan kan ngaihtuah thleng pha lo thin a, a pawi hle a ni.

Photo: Google Image

Chhung lam mawina hi ngai pawimawh hmasa thin ila, pawn lamah pawh hian duhawm takin a rawn lang chhuak mai dawn a ni. Chuti ni lova pawn lam mawina chauh ngaih pawimawh hmasak bera kan neih phawt chuan kan nun hi midangte tan duhawm takin a par chhuak thei ngai lo vang. Chhung lam nun kha lutuk leh sehhel lutuk hi midangte pawhin an lo digest hlei thei der lo mai a, an bula chen hi nuam kan ti ngai lo va, an bul atanga kal sawn vat kan duh thin.

Hna zahawmna hre khawpin thawkrim thin ang che

C. Lalmuankima

Newcastle, United Kingdom

Eng hna pawh hi (sawrkar huat zawng ni lo tawh phawt chu) thawk mah ila, hna zahawmna hre khawpa thawh thin a tha. Hna zahawmna hre khawpa kan thawh thin loh avangin kan hnathawhah kan lungawi lo va, kan hnathawhah kan lungawi loh chuan kan hnathawh zahawmna kan hmu thei thin lo.

Photo; Brainy Quote 

Miin eng hna pawh hi zah taka a thawh a, rinawm taka a thawh bawk a, a chhungkua leh nupui fanaute hrawkhrui chawmna atana a hman theih phawt chuan chu tluka pawimawh leh tha chu a awm chuang lo. Chutiang ti mi chungah chuan hna zahawmnain a thlen chilh a, malsawmin a awm thin. Thenkhatin hna hnuaihnung zawka kan ngaih Cleaning hna te hi thawh kan zak thin a, a pawi hle a ni. Cleaning hna thawka chhungkua kan chawm theih chuan officer hna lian tak thawk si a, chhungkua chawm zo si lo ai chuan a tha tawh hrim hrim a, eng hna pawh thawk ila (sawrkar huatzawng ni lo hna tawh phawt chu), chhungkuain a zar kan zo tlan theihna a nih phawt chuan a tha tawh hrim hrim. 

Photo; Hellomoscow.info

Zirtirtu hnai ber Nute

C. Lalmuankima

Newcastle, United Kingdom

John Rondalph thu sawi hi chuan vawiin thlengin ka nun min hneh a, han chhiar nawnin han ngaithla nawn leh thin mah ila, keimahah hian ril takin thu a la sawi tho tho hian ka hre tlat thin. Eng thu nge a sawi i lo ngaithla teh ang. Heti hian a sawi a, “Ka naupan laia ka nuin ka kut vuana a bula min thingthittira, ‘Kan pa vana mi, i hming zahawm rawh se,’ tih min zirtir hre chhuak hauh lo ila chuan, Pathian awm ring lo mi, Pathian a awm lo ti pawl ka ni ang.” a tih hi a ni. Nu zirtirna leh hmangaihna dawng tha lote chu an nunkawng hi a pelhe tlat thin a, a tawpah nunkawng tha lovah an lut nge nge thin. Nu zirtirna hian fate thinlungah chi nung angin a intuh nghet a, an rilruah a lut thuk bawk a, an damchhunga an theihnghilh tawh ngai loh tur zirlai pawimawh tak tak an lo zir chhuak hman ta thin a ni.

Ka nu min zirtirna kut kha

C.Lalmuankima

Newcastle, United Kingdom

Thuhmahruai

Photo: Google Image

Nu zirtirna kut hlutna leh pawimawhna kan sawi hmain 'Nu' tih tawngkam thumal hi han sawi hmasa dawn teh ang. Mi tam takin 'Nu' tih hi an rilrua an hrilhfiah danah chuan - Nu chu hmeichhia, a chhula nau paia hringtu, naute enkawl seiliantu, pasal tana nupui, fate tana nu nihna neiin kan hrilhfiah thin a, a dik lohna chu a awm hauh lo. Amahrawhchu nu tih thumalah hian hmangaihna leh mawhphurhna engzat tak inphum ru ang maw? tih lam hi kan zu ngaihtuah thleng lo thin a, a pawi hle a ni. Nu pakhat leh pakhat inkar pawh hi a lo inthlauh theih ngawt dawn a nih hi maw. Hmeichhia nau pai thei an nih avanga pai ve ringawta nau an hrin theih avang ngawt hian nu an ni satliah ringawt lo. Nu nihna dik tak zawk chu tuna kan sawi zawng zawng piah lama fate enkawla zirtir seilenna kawnga mawhphurhna la thin te leh pasal mamawhte tihsak thulh chuang si lote hi nu nihna (Title) dik tak pek turte an ni ang. Ti ti thiam thenkhatin an sawi fo thin angin, ‘Nu nih chu a awl a, nutling nih erawh har tak a ni.’ an tih te pawh ngaihtuahnaah a rawn lang tel tlat. Khai le, kha lam chu kan sawi tum ber a nih loh avangin kan thu sawi tum lamah bur chawt dawn teh ang.

Nu zirtirna kut hlutzia leh pawimawhzia hi sawi tur tam tak a awm thei ngei ang a, an hlutna leh pawimawhna pho chhuak thei tur khawpa ka ziak chhuak thiam lo tur erawh pawi ka tihle thung. Amaherawhchu kan ziah chhuah chhun chhunah mi pahnih khat talin an lo hlawkpui hlauh a nih chuan chu chu he thuziak hlawhtlinnaah ka ngai.

Mahni inchhandam thei lo Lal Isua (2019 Good Friday Pual)

(1 Kor 1:18; Matt. 15:29; Rom 8:3)

C. Lalmuankima

Newcastle, United Kingdom

Lal Isua mahni ngei a intihdam theih lohna kraws kha nang leh keia damna atana Pathian chatuan thil tum tihlanna pawimawh tak a ni zawk a ni.

Amah khengbettute amah leh amah intidam a, kraws ler atanga rawn chhuka anmahni pawh tidam tura an tihel lai khan Pathian fapa a ni a, a intidam thei lutuk ringawt (Mk. 15:29). Man tira a awm zan pawh khan a pa Pathian hnenah vantirhkoh sangruk hmun sawm leh hmun hnih aia tam dilin a ngen thei a (Matt. 26:53), amah mantute chu a tiboral vek thei bawk. Mahse, chutiang chuan a ti tlat lo. A pa Pathian thu zawmin kraws lera an khenbeh thleng khan rum leh na a tuar a ni. Chu a rum leh na tawrh chu nang leh kei atan a ni thung.

Photo: Google Image

Lal Isua kha mihring lamah pawh zaah za a ni a, vawiina na leh nuam kan tawrh ang te, lungngaih leh thlaphan te, mihringin kan tawrh theih ang apiang hi chu a tuar ve vek ngei ang. An man dawn hnaiha Olive tlanga a tawngtai pawh khan a thla a phang em em a, a thlan pawh thi far lian tak angin leiah a far nghe nghe a nih kha (Lk. 22:45). Chutianga mihringin kan tawrh theih ang zawng zawng chu tuar ve thei a nih avang chuan a thla a phangin a mangang ve em em ang tih chu a hriat theih a ni. Mahse mihring lama zaah za ni chung si khan Pathian lamah pawh zaah za a ni a, a pa thu erawh a thih thlengin a hnial lo va, '....nimahse keima thu ni lovin, nangma thu ni zawk rawh se.' (Lk. 22:42) tiin a thlaphan mangan vawrtawpah pawh a pa Pathian thu a awih tluan thak a nih kha.

Ka mi ngaihsan zawng Part I

C.Lalmuankima

Newcastle, United Kingdom

Thuhmahruai

Khawvelah hian mi ropui tak tak te, mi neinung leh hausa tak tak te, mi thiltithei tak tak leh ngaihsanawm tak tak te, mi ropui, tlawmngai leh entawntlak tak tak te an awm a, amaherawhchu mi mal tin ten kan mi ngaihsan zawng te chu a in ang vek kher lo mai thei. Kristian kan nih angin Biblical view atanga thlirin kan nitin nuna kan entawn fo tura ka duh leh ka mi ngaihsan zawngte chu a hnuaiah hian ka han tarlang teh ang. An nun hi a awhawm mai ni lovin an ngaihsanawm a, an entawntlak hle bawk. Anmahni nun atang hian ringtuten zir tur tam tak kan nei a ni.

Abrahama

Abrahama angina Pathian i ring ngam ang u (Genesis 12:1,7) Abrahaman Pathian kohna a chhan khan, “LALPA, chumi chu ka va ti phawt ang e, khami kha ka va ti phawt ang e, ka unaute ka va hrilh ve phawt ang e,” a ti reng reng lo. Amah kohtu Pathianah a chiang a, a kalna tur lam pawh hre hawt lovin Pathian a ring tawp a; a zui nghal tawp a ni. A rin Pathian ngei chuan a tithlawn dawn lo tih a hrechiang hle a, chu a rinna chu ama felnaa ruatin a lo awm ta a ni. Keini hi engnge kan an ve le…? Min kohtu Pathian khi kan hrechiang em? Hrechiang hlei lo hian miten an zui/biak avangin kan lo zui/be ve mai a ni ang e. Sakhaw rawng hi kan bawl ang a, min kohtu Pathian rawng bawl lo hian kan awm pal hang tih a hlauhawm hle a ni. Pathian rawng bawl lo hian sakhaw rawng hi thui tak a bawl ve theih a nia.

Photo: Google Image

Vision (hmathlir) nei thin rawh

C. Lalmuankima

Newcastle, United Kingdom

Vision leh target nei lo mihring reng reng chu mi hlawhtling an awm ngai lo...an lo tih angin vision (hmathlir) i neih loh chuan i hringnunah khan engtik lai mahin i hlawhtling ngai lo vang. A chhan chu i tum ram ngeia hruai thleng theitu che awm chhun chu i vision kha a ni.

Photo: Google Image 

Vision nei lo chu lawng karfung nei lo angin an lo tehkhin fo thin a. Lawng karfung nei lo chu thliin a chhemna lam apiangah a kal thin a, a tum ram a thleng ngai lo angin vision nei lo mihring chu lawng karfung nei lo angin miten an sawi apiangah an awih mai zel a, an rilru a nghet lo va, engtik lai mahin an tum ram an thleng ngai lo a ni. Chuvangin i tum ram ngeia i thlen theih nan vision nei thin ang che.

I hlutna i ngaihtuah ngai em?

C. Lalmuankima

Newcastle, United Kingdom

‘Kan rinawm phawt chuan thil dik tak kan ti tih kan hria a ni.’

Rinawmna hi mihring hlutna leh zahawmna min siamsaktu pawimawh tak a ni a, chu rinawmna chuan mihring a luah khah loh chuan mihring hian a nih ang turin a ni lo thin a, mi rinawm lo chu an hlu lovin an zahawm lo tel bawk. Mahni hlutna leh pawimawhna lam ngaihtuah nachang hre lek lova eng emaw ni thil ho teah kan rinawmna hloh khawpa thil kan ti a nih chuan a pawi hle ang. Rinawmna hi mihring zahawmna min siamsaktu pawimawh tak a ni kan tih tawh angin mi rinawm lote bula awm tluka thil nuam lo a awm awm lo ve. Mahni hlutna ngaihtuah nachang hre miah lote hi mi rinawm lote an ni duh khawp mai.

Photo: Google Image

I hlutna i ngaih pawimawh leh ngaih pawimawh loh azirin i rinawm leh rinawm loh a hriat theih a ni ti ila mi tam takin min hnial ngei ang. Mahsela kawng tam takah chuan a dik tlat si a nih hi. Mahni hlutna leh pawimawhna ngai pawimawh hauh lova rinawm lohnain kan nun min suamsam dan leh ei chhiat dante hi ngaihtuah thleng thin ila chuan kan rinawm leh rinawm loh hi kan hlutna kan ngaih pawimawh leh ngaih pawimawh lohvah tam tak a innghat a ni tih hi kan tawmpui thei ngei ang.

Mi rinawm lo chuan a hlutna lam ai mahin ama hlawkna tur lam a ngai pawimawh zawk thin a, a hlawkna tur a nih dawn phawt chuan kut tling lova sum lak mai te, mi chanchin a chhe zawnga sawi leh rel te a tihreh thin lo a ni. Mi rinawm erawh chuan a hlutna a ngai pawimawh fo thin a, kut tling lova thiltihin a nghawng pawi turzia leh ama nun ngei pawh a chhe liam kawna a hnuhthlak theih thute thlengin a ngaihtuah hmasa thin a, chutianga kawng tam taka a ngaihtuah hnuah chuan a hlutna hloh thak tur a nih dawn ai chuan thil tha lo lakah a insum thin a ni. Thil tha lo laka insum thei te hi mahni nuna rinawm te an ni duh khawp mai. Kan rinawm loh chuan eng emaw ni hlekah hlawk tumna emaw midang laka hlawk tumna emaw kan nei fo thin.

I fate hnenah engnge i zirtir ve thin le?

C. Lalmuankima 

Newcastle, United Kingdom

Nula pakhat thi tur pawhin a nu hnenah, ''Ka nu, ka pa nena in inhauna tawngkam chanve tal pawh hian chhandamna thu hi min lo hrilh ni ula, hlim takin ka thi ve thei tur," tiin thlabar chungin thlan a pan ta a ni (Rev. Vanlalzuata). 

He thu atang hian nu leh fate hian kan fate kan enkawl dan chungchangah kan inenfiah a pawimawhzia kan hmu thei a ni. Nu leh pa tam takin fa fel leh tha kan duh a, tu nu leh pa mahin fa fel leh tha duh lo kan awm awm lo ve. Amaherawhchu fa fel leh tha nei tur erawh chuan enkawl leh zirtirna pek lamah kan thatchhe leh tlat lawi si hi kan duh leh duh lohvin fa sual leh tha lo kan lo nei ta thin a ni. 

Photo: Google Image 

D.L. Moody thu sawi kan hman rim em em leh ngaihthlak zin deuh mai hi i han zep tel teh ang. "Ka nuin min enkawl ang hian mi nu te hian an fate enkawl sela chuan Lung In hi a awm lo vang." tiin nuten an fate an enkawl chungchanga an pawimawhzia tarlangin Lung In awm ngai lo khawp hiala an fate enkawla kawng thaa an kawhhmuh theih thu kan hmu a ni. 

John Rondalph pawh khan fa enkawl chungchanga nute pawimawhzia hriain heti hian a lo sawi ve bawk a, ''Ka naupan laia ka nuin ka kut vuana a bula min thingthittira, 'Kan pa vana mi i hming zahawm rawh se, ' tih min zirtir hre chhuak hauh lo ila chuan, Pathian awm ring lo mi, Pathian a awm lo ti pawl ka ni ang." tiin. 

'Tun' hi Lalpa ta a ni

C.Lalmuankima

Newcastle, United Kingdom

"Tun' hi Lalpa Pathian chan a ni a, 'nakin' erawh Setana chan a ni ve thung."

Hunpui pathum zinga hun tha ber leh pawimawh ber mai chu 'Tun' hun hi a ni. Hun kal tawh 'Nichin' hun kha i siam thain i siam danglam thei tawh lo va, hun lo kal tur 'Nakin' hun pawh i tan thil chiang a ni lo mai thei bawk. 'Tun' hun erawh Lalpan a pek phal avang che khan i tan hun tha a ni a, i tan hun pawimawh tak a ni bawk.

Lalpa Pathian tana Chanchin Tha hril leh thil tha tih pawh tun hun aia tha a awm chuang lo. I tun hunah khan Lalpa tan engnge i tih thin tih hi nangmah leh nangmah inzawt nawn fo thin ang che. Kan tun hunah Lalpa tana engmah kan tih loh chuan nakin hun lo thleng tur lah thil chiang sa a ni bawk si lo nen, vanah lawmman kan dawng ve lo hlauh palh ang e.

Photo: Workingwomenoffaith.com 

Vawiin hun lawmawm hi a herchhuak leh tawh dawn lo va, kan vawiin hunah hian Lalpa tan thil tha kan ti nge keimahni hlimna kan zawng zawk? Chutianga kan tih chuan nakinah chan tur kan nei ve tawh lo vang. I tun huna Lalpa tana i thahnemngaihna khan i nakin hunah nasa taka hlimna leh lawmna a la siamsak dawn che a ni. Vawiin huna Chanchin Tha kan hril hian nakinah Pa Pathian hnen kan thlen hunah kan lallukhum timawitu leh tiropuitu an la ni dawn a ni.

Han ti ve chhin phawt teh le….

C. Lalmuankima

Newcastle, United Kingdom

Photo: We Heart It

'Try is key of success....' an lo tih angin han ti chhin ve phawt ila, chutah kan try hard (taihmak) dan azirin a rah chhuah kan hmu mai thin a ni. I tih chhin phawt loh chuan a result i hmu dawn lo tihna a ni mai a, han tih ve chhinna atang chauh lo chuan hlawhtlinna pawh hi a thleng ngai lo. Tih chhin han tih hian a tha lam kawngah pawh a chhe lam kawngah pawh result a nei vek a, a tha lam ti chhin tam chuan thil tha bawk a hmu thin a ni. Thil tha lo ti chhin turin tuman kan induhsak a rinawm loh.

Tih chhin hmaa a rah chhuah tur lam rin hmanga sawi vak aiin mahni ngeiin tih chhin hnua a rah lo chhuak hmuh hian a mi deh dan a dang a, min tihlim bawk. A thu chuan thlawhna pawh siam chhuak thei mah ila, a tak ram kan thlenpui loh chuan a thua kan thil siam chhuah theihna khan kan nunah awmzia a nei lo tihna a ni. Chuvangin i nunah khan han ti ve chhin phawt teh le, thil tha han ti ve chhin phawt la, a rah chhuak tur pawh i hlimpui ngei ang. I la ti ngai lo a nih pawhin a dawnsawn dan i thiam phawt chuan i tih chhun apiang mai kha Bonus a ni vek tawh mai dawn a ni. Thil reng reng chu a dawnsawn dan kan thiam phawt chuan nun hlimna min thlentuah an chang thin. A dawnsawn dan kan thiam loh erawh chuan rangkachak leh lunghlu hlawm lian tak te pawh hian nun hlimlohna min thlen thei ve bawk a ni.

Chhungkua kan bul tanna a fuh thin em?

C.Lalmuankima

Newcastle, United Kingdom

"Chhungkua ber a fuh tawh loh chuan khawvela eng pawl mah hi a fuh tak tak thei tawh lo." tia Rev. Dr. Kenneth Chafin thu sawi hi chuan chhungkaw pawimawhzia leh chhungkua atanga bul tan fuh a pawimawhzia a va tilang chiang tak em! A thu hrimah thil tih dawna bul tanna a fuh loh chuan a hlawhtling mawh khawp mai. Sap thufing pawhin, ‘A bul tan that chu a zatve zo ang kan ni…..’ tia a sawi angin a bul tan that hian a hnu leh lo awm turah pawh hlawhtlinna kawng thui tak min sialsak a ni.

Photo: Google Image

'Chhungkua hi sawrkar tê ang a ni...' tiin an lo tehkhin fo tawh thin a, chhungkaw inawp dan leh inrelbawl dan a fuh tawh loh chuan pawl, kohhran leh khawtlang, ram leh hnam thlengin kan tuar thin. Chhungkua atang hian inawp dan leh inrelbawl dan chi hrang hrang kan zir chhuak thin a, chhungkaw inawp dan leh inrelbawl dan fel tak hnuaiah chuan chhungkaw hlawhtlinna a awm thin a, chhungkua a hlawhtlin chuan khawtlang leh kohhran, ram leh hnamin a zar a zo thin a ni. A chhunga chengten pakhat leh pakhat dinhmun inzah thiam tawn a, hmangaih leh duhsak taka kan inenkawl phawt chuan chhungkaw ngel nghet kan din ang a, kan chhungkua chu engtik lai mahin a tlu chhe ngai lo vang. Chuti ni lova a chhunga chengten pakhat leh pakhat inzah tawn nachang kan hriat loh va, hmangaihna leh duhsakna kan tlakchham viau chuan chhungkuaah hri tha lo a lo lut ang a, chu chuan kan chhungkaw hlimna chu min lak sakin a tawpah min thendarh vek thei a ni. 

Kristian Chhungkua chu an tawngtaiho thin

C. Lalmuankima

Newcastle, United Kingdom

Photo: Google Image

Kohhran din tirh laia ringtu hmasate kha an inhmu hovin an tawngtaiho thin a. An harsatna leh lawmnate in share tawnin an tawngtaiho thin a ni. Chu chu vawiin thlengin kohhranho leh Kristiante pawh hian chhawm chhunzawmin kan harsatna leh lawmnate kan in share tawn thin a, chhungkua leh kohhran tan a sawt hle a ni. Mahni in chhungah pawh kan harsatna leh manganna te kan share ngam loh va, kan lawmna pawh kan inhrilh ngam loh chuan kan in chhungah Pathian Thlarau Thianghlim tihharhthar lehna kan mamawh tihna a ni ang.

Chhungkaw tawngtaiho thinte hi an zahawm a, sual leh ramhuaite pawhin an bei ngam ngai lo. Vawiina kohhranhote leh chhungkua kan tawngtaihona hian kan chhehvela ramhuai inlar thei zawng zawng a um kiang dawrh thei a ni tih hi kan hriat reng a tha hle mai. Chhungkaw tawngtaihona hian nasa takin hna a thawk thei a ni tih hriain kan harsatna te inhrilh tawnin kan intawgtaisak tawn hi a pawimawh hle a ni.

Kristian Chhungkaw Nun Zirhona Part VI

I chhungkua kal pelin midang vei hmasa suh

C. Lalmuankima

Newcastle, United Kingdom

Mahni fate vei hmasa lova mi fate va vei hmasak thin hi a tha lo va, rah tha a chhuah hek lo. Mahni fate vei hmasa lova mi fate vei hi awmzia a nei lo bawk. A tawpah mahni inchhungkhur boruak a lo pawih a, chhungkuaah fa sual leh tha lo kan dah pung teuh ting a ni.

Photo: Google Image

Fanu leh fapa enkawl that hleih theih loh kan kawl tun mai te hi kan enkawl dan nen a inmil tawk vel a tih theih awm e. A chhan chu nu leh pa tam tak te hian fate enkawl leh zirtir kawngah hian mahni fate vei hmasa lova midang fate kan vei hmasak thin vang a ni. Fate enkawl leh zirtir kawnga kan inthlahdah chhung hi chuan fa fel leh fa tha kan nei ngai lo vang tih hi ka hmuh dan a ni. 

Mahni in chhung ramthim kal pel zawnga ramthim vei hi a hlawkthlak loh hle a, a tawpah chhungkaw chhiatna thlentu a ni fo thin a ni. Chuvangin mahni in chhung ramthimna hi tieng hmasa ila, tichuan kan rawngbawlna pawh tun aiin a alh tha lehzual ngei ang. Ramthim vei hi a sual a ni lo, mahni in chhung ramthim kal pela hmun dang va vei daih hi a tha lo mai ni lovin kohhranah pawh rah tha a chhuah mawh hle kan tihna zawk a ni. Mahni in chhung vei kanin thenawmte kan vei fo thin te hi ngaihtuah chian a ngai ta hle mai.

Mi hlawhchham Petera

(Tirhkohte 7:22-34; Luka 5:8; Sam 51:17)

C. Lalmuankima

Newcastle, United Kingdom

"Pathian aia mahni kan la inhmuh lena kan indah san zawk chhung hi chuan Pathian inpuanna kan chang tak tak thei ngai lo vang."

Photo: Google Image

Han ngaihtuah mai chuan he khawvela mi hlawhtling ber ber te, mi hausa leh thiltithei tak tak te hi Pathian hian han thlan zawk awm tak hi a nia! A ram tan an tangkai dawn teh reng nen i ti ve thin em? Sawrkar mi lian leh mi thiltithei tak tak te hi a rawngbawl turin han thlang zawk se la chuan a lalram hi a darh zau duai duai ngei ang le. Mahse chutianga khawvel thila hlawhtling nazawng chu zu han thlang hauh lo va! Thil mak tak a tling reng a ni.

Engvanga chutianga khawvel thila hlawhtling leh thil tithei leh ropui zawk te chu thlang lova thil hmuhsitawm leh thil awm lo te hial thlang tlat thin Pathian nge a nih le....tih hi i han ngaihtuah dawn teh ang. A chhan dang engmah a lo awm chuang lo ve, keimahnia ti ve thei nia kan inhriatna hian Pathian mamawh lohna min siamsak a, chu mai bakah min siamtu Pathian dodalna thlengin min lo bum thin a, mihring lama kan beidawn hnuah chiah Lalpa inpuanna a lo thleng thin a lo ni. Kan theihna sang ber pawh hi Pathian hmaah chuan engmah lo mai a lo ni thin a, keimahni lam kan la hlawhtlin chhung hi chuan Pathian khi keimahniah a la hlawhtling tak tak thei ngai lo thin a ni.

Kristian Chhungkaw Nun Zirhona Part V

I chhungkaw ke chheh tirualrem thin ang che

C. Lalmuankima

Newcastle, United Kingdom

Chhungkaw tlakbalna leh kehdarhna intanna hi a chhunga cheng member tinte thawhhona a that leh that lohvah thui tak a innghat a ni a tih theih awm e. Chhungkaw member tinte hian mahni dinhmun theuhva kan tan ho hian chhungkaw hlim leh nuam kan din thin a, chutianga tanho nachang hre lo chhungkua apiang chu a tawpah a lo kehchhiain a lo kehdarh thin. Chhungkaw kehdarh lai leng chu thlawhna kehdarh ai pawhin a chhe hneh zual a, a part pakhat mah lak tlak awm lo khawpin a kehdarh thei a ni. Chutianga chhungkaw kehdarh tur indanna/invenna tha ber mai chu a chhunga cheng member tinte inlungrual taka an thawhhona hi a ni.

Photo: Google Image

"Khawvel hi engtianga awm nge a nih tih mai pawh ni lo, tun hnaiah leh nakina a awm zel tur enna khawl chu Chhungkua hi a ni." tiin Garner Murphy chuan a lo sawi a. Kan chenna leilung khawvel tana X'Ray tha ber mai chu Chhungkua hi a ni a tihtheih awm e. He Garner Murphy thu sawi hi vawiin thlengin a la dik chho zel chu a nih hi maw. Chhungkua ber a tlakbal a, a tlakchhiat tawh tawh chuan a siamthat lehna leh a tihdam lehna a vang tawh khawp ang a, khawvel hian beiseina pakhat mah a nei tawh lo tluk a ni. Chu chhungkaw tlabal leh kehchhia chuan thil tam tak nghawng chhiat a nei thin bawk.

Kristian Chhungkaw Nun Zirhona Part IV

Kristian Chhungkua chuan goal-setting a nei tur a ni

C. Lalmuankima

Newcastle, United Kingdom

Photo: Google Image

Chhungkua hi tum bulbal nei lo pawhin thui tak chu a kal ve theih a, tum bulbal nei lo na na na chu a kal kawng a bo thin. Chhungkua hi tum bulbal nei lova a kal a nih chuan a dinchhan a tihlawhtling lo tihna a ni. Tum bulbal pawh nei lova chhungkua a kal phawt chuan a chhunga awmte an ngaihtuahawm hle dawn tihna a ni bawk ang. Chutiang chhungkua chuan engtik lai mahin a tum ram a thleng ngai lo bawk ang.

Tehkhin thu pakhat han zep tel lawk ila, lawng karfung nei lo chu thliin a chhemna lam lamah a tawlh thin a, a tum ram a thleng thei ngai lo ang hian chhungkua pawh hian tum bulbal tak nei lova a awm hian engtik lai mahin a dinchhan a tihlawhtling ngai lo vang a, a tum ram a thleng ngai lo bawk ang. Chuvangin chhungkua chuan tum bulbal nghet tak a nei tur a ni.

Kristian Chhungkaw Nun Zirhona Part III

Kan fate hi anmahnia an awmin an him tawkin kan hria em?

C. Lalmuankima

Newcastle, United Kingdom 

Photo: Google Image

Tunlai khawvel hmasawnna leh changkannain a thopa zuana min thlawhpui vawn vawn lai hian kan fate hi anmahnia an awm hian an him tawk em tih hi zawhna pawimawh tak awm thei a ni ve leh tlat mai. Nu leh pa thenkhat chuan an fate ei leh bar tui tak tak an pek theih avang te, silh leh fen manto leh tha tak tak an beltir theih avang te, zirna sikul tha ber ber leh an infiamna tur material an leisak theih avang ngawt te hian an fate chunga mawhphurhna hlen viau taah an inngai thin a, an tisual fo thin reng a ni. Kan fate mamawh zawng zawng kan pek theih avang hian kan fate chunga kan mawhphurhna kan hlen a ni lo va, an himna kan ngaihtuahsak tel bawk a ngai. Kan fate himna lam hi kan ngaihtuah ngai em? Sum leh pai hnianghnar taka kan support theih avang ngawt hian an himin kan hria em? Hei hi ngaihtuah tur tam tak a awm a ni.

Kristian Chhungkaw Nun Zirhona Part II

I pawisa aia an mamawh i hun chu

C. Lalmuankima

Newcastle, United Kingdom

Photo: Google Image

Kan fate hian kan pawisa aia an mamawh ber chu kan hun hi a ni. Nu leh pa tam tak hian an fate tan hian an hun pek nachang an hre thin lo va, an fate nena an inkar inlaichinna hi a chhiat phah fo thin reng a ni. Chuvangin i fate nena in inlaichinna tihngheh reng i duh chuan i hun pe tam thin ang che. I fate bulah cheng tam thin ang che. I faten an mamawh chhung che kha a rei dawn lo, an rawn puitling chho ang a, naupan laia an mamawh tluk che khan an mamawh tawh dawn lo che. Chuvangin tuna kaihhruai awlsam taka an awm lai, thu tha hla tha hrilh an awlsam lai, nu leh pate angchhunga an awm lai hian an mamawh lai bera an bula awm thei turin i hun pe tam thin ang che. I faten an mamawh lai ber pawha an bula awm hman lo khawpa thil danga i buai thin a nih chuan i fate nena in inlaichinna kha a tha viau thei lo vang. Nu pa thenkhat chu an fate pawisaa thlema len botir daih te hi an ching thin a, hei hi thil tha ber a ni lem lo a ni. 

Kristian Chhungkaw Nun Zirhona

C. Lalmuankima

Newcastle, United Kingdom

Thuhmahruai

‘Kristian Chhungkaw Nun Zirhona’ han tih ngawt mai pawh chu thupui vuah tur hriatlohthlak ang reng hle mai a, a pawimawh hlea ka hriat ve avangin a thupui inhmeh tur leh inhmeh loh tur lam pawh ngaihtuah chuang lovin ka han pem buh bel ve chawt mai a ni e. Thupui dang han thlan ka tum ngial pawhin he thupui bawk hi a rawn lang leh thin a, thupui rawn lang zingah a buk a rit deuh bera ka hriat avangin mahni insit tak chungin ka han vuah lui hram a ni.

Photo: Google Image

‘Kristian Chhungkaw Nun Zirhona’ tih thupui ber kher hi chu tlema phanchang deuh leh tawnhriat nei tam deuh te, kum thuah pawh tlema chal deuhte han sawi atan a mawi teh reng nen. Chu mai bakah chhungkua lo din tawhten an tawnhriat atangin han sawi zawk se la kan hlawkpui zawk awm mang e aw…tia ka inbuk mek laiin ‘Kristian chhungkaw nun hi chutiang mite chauhvin sawi rawh se…’ tih a awm lo hian min tingampa ve leh deuh va, mahni insitna chu dah thain a pawimawhna hian min uai rih tak siah chuan theihtawp chhuah ve thawr turin ka rilru ka siam fel ta a ni.

Kristian Chhungkaw Nun Zirhona hi kan sawi duh dan azir leh kan uar duhna lam azirin zir tur leh sawi tur tam tak a awm thei ang a, chung zir tur leh sawi tur tam tak awm thei zingah chuan rilruin a ngaih pawimawh zualte la chhuakin kan zirin kan sawiho dawn a ni.