I fate hnenah engnge i zirtir ve thin le?

C. Lalmuankima 

Newcastle, United Kingdom

Nula pakhat thi tur pawhin a nu hnenah, ''Ka nu, ka pa nena in inhauna tawngkam chanve tal pawh hian chhandamna thu hi min lo hrilh ni ula, hlim takin ka thi ve thei tur," tiin thlabar chungin thlan a pan ta a ni (Rev. Vanlalzuata). 

He thu atang hian nu leh fate hian kan fate kan enkawl dan chungchangah kan inenfiah a pawimawhzia kan hmu thei a ni. Nu leh pa tam takin fa fel leh tha kan duh a, tu nu leh pa mahin fa fel leh tha duh lo kan awm awm lo ve. Amaherawhchu fa fel leh tha nei tur erawh chuan enkawl leh zirtirna pek lamah kan thatchhe leh tlat lawi si hi kan duh leh duh lohvin fa sual leh tha lo kan lo nei ta thin a ni. 

Photo: Google Image 

D.L. Moody thu sawi kan hman rim em em leh ngaihthlak zin deuh mai hi i han zep tel teh ang. "Ka nuin min enkawl ang hian mi nu te hian an fate enkawl sela chuan Lung In hi a awm lo vang." tiin nuten an fate an enkawl chungchanga an pawimawhzia tarlangin Lung In awm ngai lo khawp hiala an fate enkawla kawng thaa an kawhhmuh theih thu kan hmu a ni. 

John Rondalph pawh khan fa enkawl chungchanga nute pawimawhzia hriain heti hian a lo sawi ve bawk a, ''Ka naupan laia ka nuin ka kut vuana a bula min thingthittira, 'Kan pa vana mi i hming zahawm rawh se, ' tih min zirtir hre chhuak hauh lo ila chuan, Pathian awm ring lo mi, Pathian a awm lo ti pawl ka ni ang." tiin. 

'Tun' hi Lalpa ta a ni

C.Lalmuankima

Newcastle, United Kingdom

"Tun' hi Lalpa Pathian chan a ni a, 'nakin' erawh Setana chan a ni ve thung."

Hunpui pathum zinga hun tha ber leh pawimawh ber mai chu 'Tun' hun hi a ni. Hun kal tawh 'Nichin' hun kha i siam thain i siam danglam thei tawh lo va, hun lo kal tur 'Nakin' hun pawh i tan thil chiang a ni lo mai thei bawk. 'Tun' hun erawh Lalpan a pek phal avang che khan i tan hun tha a ni a, i tan hun pawimawh tak a ni bawk.

Lalpa Pathian tana Chanchin Tha hril leh thil tha tih pawh tun hun aia tha a awm chuang lo. I tun hunah khan Lalpa tan engnge i tih thin tih hi nangmah leh nangmah inzawt nawn fo thin ang che. Kan tun hunah Lalpa tana engmah kan tih loh chuan nakin hun lo thleng tur lah thil chiang sa a ni bawk si lo nen, vanah lawmman kan dawng ve lo hlauh palh ang e.

Photo: Workingwomenoffaith.com 

Vawiin hun lawmawm hi a herchhuak leh tawh dawn lo va, kan vawiin hunah hian Lalpa tan thil tha kan ti nge keimahni hlimna kan zawng zawk? Chutianga kan tih chuan nakinah chan tur kan nei ve tawh lo vang. I tun huna Lalpa tana i thahnemngaihna khan i nakin hunah nasa taka hlimna leh lawmna a la siamsak dawn che a ni. Vawiin huna Chanchin Tha kan hril hian nakinah Pa Pathian hnen kan thlen hunah kan lallukhum timawitu leh tiropuitu an la ni dawn a ni.

Han ti ve chhin phawt teh le….

C. Lalmuankima

Newcastle, United Kingdom

Photo: We Heart It

'Try is key of success....' an lo tih angin han ti chhin ve phawt ila, chutah kan try hard (taihmak) dan azirin a rah chhuah kan hmu mai thin a ni. I tih chhin phawt loh chuan a result i hmu dawn lo tihna a ni mai a, han tih ve chhinna atang chauh lo chuan hlawhtlinna pawh hi a thleng ngai lo. Tih chhin han tih hian a tha lam kawngah pawh a chhe lam kawngah pawh result a nei vek a, a tha lam ti chhin tam chuan thil tha bawk a hmu thin a ni. Thil tha lo ti chhin turin tuman kan induhsak a rinawm loh.

Tih chhin hmaa a rah chhuah tur lam rin hmanga sawi vak aiin mahni ngeiin tih chhin hnua a rah lo chhuak hmuh hian a mi deh dan a dang a, min tihlim bawk. A thu chuan thlawhna pawh siam chhuak thei mah ila, a tak ram kan thlenpui loh chuan a thua kan thil siam chhuah theihna khan kan nunah awmzia a nei lo tihna a ni. Chuvangin i nunah khan han ti ve chhin phawt teh le, thil tha han ti ve chhin phawt la, a rah chhuak tur pawh i hlimpui ngei ang. I la ti ngai lo a nih pawhin a dawnsawn dan i thiam phawt chuan i tih chhun apiang mai kha Bonus a ni vek tawh mai dawn a ni. Thil reng reng chu a dawnsawn dan kan thiam phawt chuan nun hlimna min thlentuah an chang thin. A dawnsawn dan kan thiam loh erawh chuan rangkachak leh lunghlu hlawm lian tak te pawh hian nun hlimlohna min thlen thei ve bawk a ni.

Chhungkua kan bul tanna a fuh thin em?

C.Lalmuankima

Newcastle, United Kingdom

"Chhungkua ber a fuh tawh loh chuan khawvela eng pawl mah hi a fuh tak tak thei tawh lo." tia Rev. Dr. Kenneth Chafin thu sawi hi chuan chhungkaw pawimawhzia leh chhungkua atanga bul tan fuh a pawimawhzia a va tilang chiang tak em! A thu hrimah thil tih dawna bul tanna a fuh loh chuan a hlawhtling mawh khawp mai. Sap thufing pawhin, ‘A bul tan that chu a zatve zo ang kan ni…..’ tia a sawi angin a bul tan that hian a hnu leh lo awm turah pawh hlawhtlinna kawng thui tak min sialsak a ni.

Photo: Google Image

'Chhungkua hi sawrkar tê ang a ni...' tiin an lo tehkhin fo tawh thin a, chhungkaw inawp dan leh inrelbawl dan a fuh tawh loh chuan pawl, kohhran leh khawtlang, ram leh hnam thlengin kan tuar thin. Chhungkua atang hian inawp dan leh inrelbawl dan chi hrang hrang kan zir chhuak thin a, chhungkaw inawp dan leh inrelbawl dan fel tak hnuaiah chuan chhungkaw hlawhtlinna a awm thin a, chhungkua a hlawhtlin chuan khawtlang leh kohhran, ram leh hnamin a zar a zo thin a ni. A chhunga chengten pakhat leh pakhat dinhmun inzah thiam tawn a, hmangaih leh duhsak taka kan inenkawl phawt chuan chhungkaw ngel nghet kan din ang a, kan chhungkua chu engtik lai mahin a tlu chhe ngai lo vang. Chuti ni lova a chhunga chengten pakhat leh pakhat inzah tawn nachang kan hriat loh va, hmangaihna leh duhsakna kan tlakchham viau chuan chhungkuaah hri tha lo a lo lut ang a, chu chuan kan chhungkaw hlimna chu min lak sakin a tawpah min thendarh vek thei a ni. 

Kristian Chhungkua chu an tawngtaiho thin

C. Lalmuankima

Newcastle, United Kingdom

Photo: Google Image

Kohhran din tirh laia ringtu hmasate kha an inhmu hovin an tawngtaiho thin a. An harsatna leh lawmnate in share tawnin an tawngtaiho thin a ni. Chu chu vawiin thlengin kohhranho leh Kristiante pawh hian chhawm chhunzawmin kan harsatna leh lawmnate kan in share tawn thin a, chhungkua leh kohhran tan a sawt hle a ni. Mahni in chhungah pawh kan harsatna leh manganna te kan share ngam loh va, kan lawmna pawh kan inhrilh ngam loh chuan kan in chhungah Pathian Thlarau Thianghlim tihharhthar lehna kan mamawh tihna a ni ang.

Chhungkaw tawngtaiho thinte hi an zahawm a, sual leh ramhuaite pawhin an bei ngam ngai lo. Vawiina kohhranhote leh chhungkua kan tawngtaihona hian kan chhehvela ramhuai inlar thei zawng zawng a um kiang dawrh thei a ni tih hi kan hriat reng a tha hle mai. Chhungkaw tawngtaihona hian nasa takin hna a thawk thei a ni tih hriain kan harsatna te inhrilh tawnin kan intawgtaisak tawn hi a pawimawh hle a ni.

Kristian Chhungkaw Nun Zirhona Part VI

I chhungkua kal pelin midang vei hmasa suh

C. Lalmuankima

Newcastle, United Kingdom

Mahni fate vei hmasa lova mi fate va vei hmasak thin hi a tha lo va, rah tha a chhuah hek lo. Mahni fate vei hmasa lova mi fate vei hi awmzia a nei lo bawk. A tawpah mahni inchhungkhur boruak a lo pawih a, chhungkuaah fa sual leh tha lo kan dah pung teuh ting a ni.

Photo: Google Image

Fanu leh fapa enkawl that hleih theih loh kan kawl tun mai te hi kan enkawl dan nen a inmil tawk vel a tih theih awm e. A chhan chu nu leh pa tam tak te hian fate enkawl leh zirtir kawngah hian mahni fate vei hmasa lova midang fate kan vei hmasak thin vang a ni. Fate enkawl leh zirtir kawnga kan inthlahdah chhung hi chuan fa fel leh fa tha kan nei ngai lo vang tih hi ka hmuh dan a ni. 

Mahni in chhung ramthim kal pel zawnga ramthim vei hi a hlawkthlak loh hle a, a tawpah chhungkaw chhiatna thlentu a ni fo thin a ni. Chuvangin mahni in chhung ramthimna hi tieng hmasa ila, tichuan kan rawngbawlna pawh tun aiin a alh tha lehzual ngei ang. Ramthim vei hi a sual a ni lo, mahni in chhung ramthim kal pela hmun dang va vei daih hi a tha lo mai ni lovin kohhranah pawh rah tha a chhuah mawh hle kan tihna zawk a ni. Mahni in chhung vei kanin thenawmte kan vei fo thin te hi ngaihtuah chian a ngai ta hle mai.

Mi hlawhchham Petera

(Tirhkohte 7:22-34; Luka 5:8; Sam 51:17)

C. Lalmuankima

Newcastle, United Kingdom

"Pathian aia mahni kan la inhmuh lena kan indah san zawk chhung hi chuan Pathian inpuanna kan chang tak tak thei ngai lo vang."

Photo: Google Image

Han ngaihtuah mai chuan he khawvela mi hlawhtling ber ber te, mi hausa leh thiltithei tak tak te hi Pathian hian han thlan zawk awm tak hi a nia! A ram tan an tangkai dawn teh reng nen i ti ve thin em? Sawrkar mi lian leh mi thiltithei tak tak te hi a rawngbawl turin han thlang zawk se la chuan a lalram hi a darh zau duai duai ngei ang le. Mahse chutianga khawvel thila hlawhtling nazawng chu zu han thlang hauh lo va! Thil mak tak a tling reng a ni.

Engvanga chutianga khawvel thila hlawhtling leh thil tithei leh ropui zawk te chu thlang lova thil hmuhsitawm leh thil awm lo te hial thlang tlat thin Pathian nge a nih le....tih hi i han ngaihtuah dawn teh ang. A chhan dang engmah a lo awm chuang lo ve, keimahnia ti ve thei nia kan inhriatna hian Pathian mamawh lohna min siamsak a, chu mai bakah min siamtu Pathian dodalna thlengin min lo bum thin a, mihring lama kan beidawn hnuah chiah Lalpa inpuanna a lo thleng thin a lo ni. Kan theihna sang ber pawh hi Pathian hmaah chuan engmah lo mai a lo ni thin a, keimahni lam kan la hlawhtlin chhung hi chuan Pathian khi keimahniah a la hlawhtling tak tak thei ngai lo thin a ni.

Kristian Chhungkaw Nun Zirhona Part V

I chhungkaw ke chheh tirualrem thin ang che

C. Lalmuankima

Newcastle, United Kingdom

Chhungkaw tlakbalna leh kehdarhna intanna hi a chhunga cheng member tinte thawhhona a that leh that lohvah thui tak a innghat a ni a tih theih awm e. Chhungkaw member tinte hian mahni dinhmun theuhva kan tan ho hian chhungkaw hlim leh nuam kan din thin a, chutianga tanho nachang hre lo chhungkua apiang chu a tawpah a lo kehchhiain a lo kehdarh thin. Chhungkaw kehdarh lai leng chu thlawhna kehdarh ai pawhin a chhe hneh zual a, a part pakhat mah lak tlak awm lo khawpin a kehdarh thei a ni. Chutianga chhungkaw kehdarh tur indanna/invenna tha ber mai chu a chhunga cheng member tinte inlungrual taka an thawhhona hi a ni.

Photo: Google Image

"Khawvel hi engtianga awm nge a nih tih mai pawh ni lo, tun hnaiah leh nakina a awm zel tur enna khawl chu Chhungkua hi a ni." tiin Garner Murphy chuan a lo sawi a. Kan chenna leilung khawvel tana X'Ray tha ber mai chu Chhungkua hi a ni a tihtheih awm e. He Garner Murphy thu sawi hi vawiin thlengin a la dik chho zel chu a nih hi maw. Chhungkua ber a tlakbal a, a tlakchhiat tawh tawh chuan a siamthat lehna leh a tihdam lehna a vang tawh khawp ang a, khawvel hian beiseina pakhat mah a nei tawh lo tluk a ni. Chu chhungkaw tlabal leh kehchhia chuan thil tam tak nghawng chhiat a nei thin bawk.

Kristian Chhungkaw Nun Zirhona Part IV

Kristian Chhungkua chuan goal-setting a nei tur a ni

C. Lalmuankima

Newcastle, United Kingdom

Photo: Google Image

Chhungkua hi tum bulbal nei lo pawhin thui tak chu a kal ve theih a, tum bulbal nei lo na na na chu a kal kawng a bo thin. Chhungkua hi tum bulbal nei lova a kal a nih chuan a dinchhan a tihlawhtling lo tihna a ni. Tum bulbal pawh nei lova chhungkua a kal phawt chuan a chhunga awmte an ngaihtuahawm hle dawn tihna a ni bawk ang. Chutiang chhungkua chuan engtik lai mahin a tum ram a thleng ngai lo bawk ang.

Tehkhin thu pakhat han zep tel lawk ila, lawng karfung nei lo chu thliin a chhemna lam lamah a tawlh thin a, a tum ram a thleng thei ngai lo ang hian chhungkua pawh hian tum bulbal tak nei lova a awm hian engtik lai mahin a dinchhan a tihlawhtling ngai lo vang a, a tum ram a thleng ngai lo bawk ang. Chuvangin chhungkua chuan tum bulbal nghet tak a nei tur a ni.

Kristian Chhungkaw Nun Zirhona Part III

Kan fate hi anmahnia an awmin an him tawkin kan hria em?

C. Lalmuankima

Newcastle, United Kingdom 

Photo: Google Image

Tunlai khawvel hmasawnna leh changkannain a thopa zuana min thlawhpui vawn vawn lai hian kan fate hi anmahnia an awm hian an him tawk em tih hi zawhna pawimawh tak awm thei a ni ve leh tlat mai. Nu leh pa thenkhat chuan an fate ei leh bar tui tak tak an pek theih avang te, silh leh fen manto leh tha tak tak an beltir theih avang te, zirna sikul tha ber ber leh an infiamna tur material an leisak theih avang ngawt te hian an fate chunga mawhphurhna hlen viau taah an inngai thin a, an tisual fo thin reng a ni. Kan fate mamawh zawng zawng kan pek theih avang hian kan fate chunga kan mawhphurhna kan hlen a ni lo va, an himna kan ngaihtuahsak tel bawk a ngai. Kan fate himna lam hi kan ngaihtuah ngai em? Sum leh pai hnianghnar taka kan support theih avang ngawt hian an himin kan hria em? Hei hi ngaihtuah tur tam tak a awm a ni.

Kristian Chhungkaw Nun Zirhona Part II

I pawisa aia an mamawh i hun chu

C. Lalmuankima

Newcastle, United Kingdom

Photo: Google Image

Kan fate hian kan pawisa aia an mamawh ber chu kan hun hi a ni. Nu leh pa tam tak hian an fate tan hian an hun pek nachang an hre thin lo va, an fate nena an inkar inlaichinna hi a chhiat phah fo thin reng a ni. Chuvangin i fate nena in inlaichinna tihngheh reng i duh chuan i hun pe tam thin ang che. I fate bulah cheng tam thin ang che. I faten an mamawh chhung che kha a rei dawn lo, an rawn puitling chho ang a, naupan laia an mamawh tluk che khan an mamawh tawh dawn lo che. Chuvangin tuna kaihhruai awlsam taka an awm lai, thu tha hla tha hrilh an awlsam lai, nu leh pate angchhunga an awm lai hian an mamawh lai bera an bula awm thei turin i hun pe tam thin ang che. I faten an mamawh lai ber pawha an bula awm hman lo khawpa thil danga i buai thin a nih chuan i fate nena in inlaichinna kha a tha viau thei lo vang. Nu pa thenkhat chu an fate pawisaa thlema len botir daih te hi an ching thin a, hei hi thil tha ber a ni lem lo a ni. 

Kristian Chhungkaw Nun Zirhona

C. Lalmuankima

Newcastle, United Kingdom

Thuhmahruai

‘Kristian Chhungkaw Nun Zirhona’ han tih ngawt mai pawh chu thupui vuah tur hriatlohthlak ang reng hle mai a, a pawimawh hlea ka hriat ve avangin a thupui inhmeh tur leh inhmeh loh tur lam pawh ngaihtuah chuang lovin ka han pem buh bel ve chawt mai a ni e. Thupui dang han thlan ka tum ngial pawhin he thupui bawk hi a rawn lang leh thin a, thupui rawn lang zingah a buk a rit deuh bera ka hriat avangin mahni insit tak chungin ka han vuah lui hram a ni.

Photo: Google Image

‘Kristian Chhungkaw Nun Zirhona’ tih thupui ber kher hi chu tlema phanchang deuh leh tawnhriat nei tam deuh te, kum thuah pawh tlema chal deuhte han sawi atan a mawi teh reng nen. Chu mai bakah chhungkua lo din tawhten an tawnhriat atangin han sawi zawk se la kan hlawkpui zawk awm mang e aw…tia ka inbuk mek laiin ‘Kristian chhungkaw nun hi chutiang mite chauhvin sawi rawh se…’ tih a awm lo hian min tingampa ve leh deuh va, mahni insitna chu dah thain a pawimawhna hian min uai rih tak siah chuan theihtawp chhuah ve thawr turin ka rilru ka siam fel ta a ni.

Kristian Chhungkaw Nun Zirhona hi kan sawi duh dan azir leh kan uar duhna lam azirin zir tur leh sawi tur tam tak a awm thei ang a, chung zir tur leh sawi tur tam tak awm thei zingah chuan rilruin a ngaih pawimawh zualte la chhuakin kan zirin kan sawiho dawn a ni.

Engin nge Pathian hnaihtir che?

C. Lalmuankima

Newcastle, United Kingdom

Pathian min hnaihtirtu hi a in ang lo theuhvin a rinawm. Thenkhatin harsatna khur thuk tak atanga Lalpa an hnaih laiin a then erawh chuan thihna hial an tawh chiahin Lalpa an hnaih ve thung. A then erawh chu thununna leh zilhhauna tawh phawt loh chuan emaw mahni chunga eng eng emaw a lo thlen phawt loh chuan Pathian lam hnaih tum reng reng lo te pawh an awm ve bawk a. Eng dinhmunah pawh awm mah ila, Lalpa min hnaihtirtu a nih phawt chuan a tha vekah i ngai ang. Amaherawhchu chu aia pawimawh zawka lang chu Lalpan a khawngaihna kan chunga a lantir avanga a khawngaihna haidera kan awm erawh a pawi hle thung ang.

Photo: Google Image

Kan harsatna te leh mangan lusunna te hi Lalpa min hnaihtirtu an ni thei bawk a ni. Lalpa hnaihna a nih dawn phawt chuan eng dinhmunah pawh ding mah la a pawi reng reng lo turah ngai ila. Mahse thununna leh zilhhauna a lo thlen phawt loh chuan that tum hauh lo leh Lalpa hnaih tum hauh loh hi thil tha ber a ni chuang lo va, zilhhau fo pawha ring tihkhawng tlat leh luhlul chhuah fo phei chu vawi leh khata boralna thlen theihna a ni (Thufingte 29:1). Thununna leh zilhhauna kan nghak kher thin a nih chuan kan ti fuh hauh lo vang. Chuvangin thil zawng zawng hi Lalpa min hnaihtirtu a nih a, a that vek rual rualin thlahdah taka awm erawh chu a rem leh hauh lo a ni (Jeremia 48:10). Ringtuten kan nun kan hman danah kan fimkhur hle a tha hle mai. Keimahnia Lalpa hlawkna tur awm lovah hi chuan i inham tang thin lo vang u.

Fak leh chawimawi ninawm loh Pathian

(Sam 150:1ff, Galatia 6:9)

C. Lalmuankima

Newcastle, United Kingdom

Pathian fak leh chawimawi thangte chuan a hun leh a hmun hi an lo thliar lem lo khawp mai. Pathian fak leh chawimawi thangte chuan nitin an mita an hmuh leh an benga an hriat te hmangin an fakin an chawimawi mawlh mawlh mai a ni. An siamtu Pathian fak leh chawimawi an ning ngai lo.

Photo: Google Image

Thenkhatin Biak inah chauh emaw Pathian fak leh chawimawi tum ni awm ang taka kan rilru kan siam a nih chuan a fuh ber chuang lo vang. Kan thlenna chin chinah hian siamtu Pathian thilsiam mawizia leh ropuizia fak leh chawimawi tur a lo awm khat tlat a ni tih hi kan hriat a tha hle mai. Pathian fak leh chawimawi hi a hun leh a hmun thliar hran a awm chuang lo va, Lalpa nena kan inpawlna hmun apiang mai kha kan tan chuan hmun thianghlim a lo ni vek zawk a ni. Biak inah kan kal khawma Lalpa kan faka kan chawimawi hi kan sawi sel lo va, Biak in chauh hi Amah Lalpa fak leh chawimawina hmunah chauh kan ngai palh ang tih hi ka hlauh vang zawk a ni. Kohhranho chu pakhat leh pakhat intiharh/inchawkharh tawn tura tih kan nih angin kan testimony kan in share te leh pakhat leh pakhat rawngbawlna kan inhriat tawnsak hi a tha hle a, chakna tha hrui kan inpe phah a ni tih hi i hre reng ang u.

Inrintawkna nei thin rawh

C. Lalmuankima

Newcastle, United Kingdom

Mahnia inrintawkna kan neih loh hian kan thiltih a bahlah thin a, hlawhtlin a har hle bawk. Mahni tawka inrintawkna neih loh hi kawng engkimah kan hnufual a, kan che zia a khawr a, mahni leh mahni kan inrin zawhlohnain a ken tel mahni leh mahni lak tlak lo leh tlaktlai lovah min chhuah ta thin a ni.

Inrintawkna nei tur hian thil tih tur pawimawh tak tak sawi tur a awm thei ngei ang. Chu lam chu kan sawi tum a ni lo va, mahni inrintawkna nei tura kan inzirtir dan lam hi kan sawi tum tak zawk chu a ni.

Photo: Google Image

Zofate hi mahnia inrintawkna kan tlachham hle a, chutianga inrintawkna inzirtirna phei chu kan tlachham lehzual a ni. Chutiang lamah chuan inzirtirna leh infuihna tha kan neih loh avangin mahnia inrintawkna kan tlachham lo thei lo va, mahnia inrintawkna kan tlak chham na na na chuan thiltih kan zuam loh phah nge nge thin. Thiltih kan zuam loh chuan hnathawhna leh kawng engkimah kan khawrin rual kan pawl lo nghal a, a tawpah inkiltawihna min siam a, mi hlawhchhamah kan chhuak ta thin a ni. Mahni leh mahni inrintawkna neih lohvin a hrin chhuah chu mahni leh mahni tlaktlai lova inngaihna a hring nghal a, a tawpah hlawhchham bik tura inngaihna tha lo takah min hnuk lut thin.

A theih loh….tih hi tehna puitling a ni ngai lo!

C. Lalmuankima

Newcastle, United Kingdom

A nih theih loh dan vawi sang tel sawi leh ngaihtuah aiin a nih theih dan tur vawi khat ngaihtuahna sen hian hringnun hmasawnna a thlen thin a, tih hma hauhva tlanchhiatsan chingte hi mi dawihzep tak te an ni. A nih theih lohna lam ringawt ngaihtuah chingte hian a tawpah anmahni hial pawh an intichhe thin.

Mi tam tak hlawhchhamna hi han chhuiin han zir chiang ila, a tih theih lam aia a tih theih loh lama tang thin leh rilru pe thin leh thutlukna siam thinte an ni duh khawp mai. 

'A theih loh....' tih hi kan Dictionary atanga kan chawh reh ngam ni apiangah kan hringnun hi 'A theih....' tiin kan thlak ang a, chu chuan hlawhtlinna kawngpuiah min hruai thleng ang. Kan ngaihtuahnaa thil theih loh kan ngaihtuah chhung chuan kan hringnunah hian engtik lai mahin thil kan ti thei lo vang a, hlawhtlinna a thleng ngai lo bawk ang. Chuvangin kan ngaihtuahna hi 'A theih a ni....' 'A ni thei a ni....' adt. tih thu tein thuam khat tlat thin ila, tichuan chu chuan kawng dikah min hruaiin thil tha ngaihtuah chhuak thei turin rah tha min chhuahpui mai dawn a ni.

Chanchin Thain i kum bul chhiar tan ang che

Photo : Google Image

Khai le, Pathian khawngaihna leh zahngaihna azarah kum 2019 kum bul kan lo tan ve leh ta reng mai. Chu kum bul tanna atan chuan Pathian Thu hi kan hmang em tih erawh mimal tinten mahni leh mahni inzawt theuh ila a tha awm e. Kan chhungkua hi Chanchin Tha (Pathian Thu) hmanga kum bul kan tan lo a nih phawt chuan kum tawpa a rah chhuah tur hi entlak awm lo khawpin a chhe thei a ni. Kan chhungkaw nun min kaihruaitu atan Pathian Thu hi kan hman loh phawt chuan a hnu lo kal leh tur hi kan en ngam hauh lo vang. Chuvangin Pathianin a khawngaihna avanga hun thar min hmuhtirah hian a duh ang taka Chanchin Thaa kum bul kan tan a pawimawh a, chutianga Chanchin Thaa kum bul kan tan phawt chuan engtik lai mahin kan tisual ngai lo vang. Chanchin Tha avanga kum bul min tansaktu chuan kum tawp thleng pawhin hlim takin min hruai thleng leh dawn a ni. I kum bul tan kha Chanchin Thaa bul tan ni rawh se. Tichuan i chenpui, i thawhpui, i zirpui leh i mihringpui te tan pawh malsawmna luankawr atan Lalpan a hmang zel ang che.

Chanchin Thaa kum bul i tan phawt chuan i harsat leh mangan huna tanpui tur chein Lalpa khi i bulah a awm reng a ni. Chanchin Thaa kum bul tan hi a inchhirawm loh va, inchhir ahnekin i nitin nun tihlimtu a ni zel tawh mai ang. He kum thar tan hian duhsakna tam tak hlan duh che ka nei ve teuh mai thei, chung zinga ka duhsak ber che chu 'Chanchin Tha (Pathian Thu) in i kum bul chhiar tan rawh' tih hi a ni. Chanchin Thaa i kum bul i chhiar phawt chuan i kum tawp lo thleng tur pawh malsawmin a awm zel dawn a ni.

Chanchin Thaa kum bul chhiar nachang hre lote bawk hi kan buai leh dawn a, kum tawpah kan la inchhir leh dawn a ni. Chuvangin he kum 2019 hi Pathian khawngaihna leh zahngaihna azara i chhiar thleng ve a nih chuan i kum bul tan pawh Chanchin Thain kum bul chhiar tan ang che. I inchhirna hun a lo thlen hma hian he kum bul hi Chanchin Thain han chhiar tan teh le.

Kohhran leh Politics

C. Lalmuankima

Newcastle, United Kingdom

Kohhran leh politics hian inzawmna thuk tak a nei a, kan kalpui thiam dan azira hlawkpui thei leh hlawkpui lo thei a ni. Mihring kan nih chhung chuan a mala khawsa thei kan ni lo va, a huhova khawsa thin kan nih avangin hruaitu emaw hotu emaw kan neih a ngai a ni. Ramsa tak ngial pawh a huhova khawsain hotu/hruaitu an nei thin a, ran a zawka kan ngaihte mahin hotu/hruaitu an neih chuan mihringte chuan hotu/hruaitu kan neih a ngai a ni. Hotu/hruaitu kan neih chhan erawh kan hriat a tha hle ang, hotu/hruaitu kan neih chhan chu tuna kan dinhmun atanga dinhmun tha zawka min hruai thei tura kan rin avangin hotu/hruaitu kan nei thin. Kohhran leh ram inrelbawl danah pawh dinhmun ngaia ding reng lova hmasawnna rahbia kai chhoh zel kan duh avangin hotu/hruaitu kan in ruat/tlang ta thin a ni. Chu dinhmun chu a zahawm piah lamah a hau tak em avangin chu dinhmuna ding tur chuan mipuiin kan rilru zawng zawng kan nghat tel bawk thin.

Photo: Google Image 

Kan thupuiah hian ‘Kohhran leh Politics’ tih a nih angin a hrilhfiahna tlem azawng han tarlang hmasa ila. Kohhran awmzia hrilhfiahna pakhatah chuan heti hian a inziak a, ‘‘Kohhran chu, Krista ringtute pawla indin, Pathian Thu-Thuthlung Hlui leh Thuthlung Thar, dik taka pawm a, dik taka zirtir; Lal Isua siam chhuah sakrament pahnih – Baptisma sakrament leh Lalpa zanriah, dik taka hmangtute hi an ni.’’ tiin (Fanai, 2016). Thuthlung Thar lama a lan dan chuan, kohhran chu Kristan Ama tan leh Amaha nghata a din a ni a, Mitthi Khawkulh kawngkharte pawhin an ngam loh tura a din a nih thu (Matt. 16:18) leh Amahah chuan thil engkim siam a nih thu leh engkim Ama ta tur a nih thu leh Ani chu kohhran lu a nih thu kan hmu a ni (Kol. 1:13-20). Kohhranho chu Krista taksa a nih thu leh engkim engkima tikhattu famkimna a nih thu Ephesi 1:22-23 hian a tarlang bawk a, chu kohhranho chu Krista thu tiam kaltlanga Pentecost ni atanga bul tan a nih thu kan hmu tel bawk a ni (Tirhkohte 2:1-ff).

Mitin ta tur Chanchin Tha lâwmawm êm êm

(Isaia 9:6,7; Luka 2:8-10)

C. Lalmuankima

Newcastle, United Kingdom

"Hlau suh ulang, ngai rawh u, mi tin ta tur chanchin tha lawmawm em em ka rawn thlen che u a ni. Vawiinah hian in tan Davida khuaah Chhandamtu a piang ta, Lal Krista chu. Tin, hei hi in tan chhinchhiahna tur a ni, nausen puana tuam, ran chaw pekna thlenga mu in hmu ang." (Luka 2:8-10)

Chanchin lawmawm thenkhat hi chu thenkhat tan lawmna a nih rual rualin thenkhat tan erawh lawmna a tling zo tlat thin lo. Chanchin lawmawm thenkhat te phei chu thenawmte leh thian thate tan pawh thinhrikthlak tak leh ngaihnawm loh tak a ni thei bawk. Engvang nge kan tih chuan khawvel atanga chhuak chanchin lawmawm a nih vang a ni. 

Photo: Google Image

Entirnan thil pakhat ka han zep tel lawk teh ang: Rawngbawltu thenkhatin mihring thinlung makzia an sawinaa tehkhinthu/entirna fiamthu ti tak deuhva an sawi thin angin 'Keini aia dinhmun hniam zawka kan ngaihte leh keini aia sumdawnnaa tlachhe zawka kan ngaihte an rawn len thur thur chinah chuan lawmpui a hnekin thiknain kan khat a, thenawmte lawmna kha tawmpui a har thin......' an tih hi vawiin thlengin kan thinlungah a la thleng dik zel chu a nih hi maw. Kan level-puite ai pawha hniam zawkten keimahni aia a ni atela an thanlen thur thur chuan muttui a har duh khawp mai an tih ang deuhvin. Thenawm te tana chanchin lawmawm kha keini tan chuan thikna avangin chanchin lawmawm lo a ni ve leh thei tlat a ni.