I kechheh a rualrem tha em?

C. Lalmuankima

Slough, United Kingdom

Pathian nena hun hmang tam tur chuan kan ke pen tin mai hian awmzia a nei a, kan vawi khat ke penin kan hringnun min tihchhiat vek theih laiin kan vawi khat ke pen bawk hian nun hlimna tam tak min thlen thei ve bawk a ni. Chuvangin kan ke pen tinte hi awmze nei taka pen fo a pawimawh. 'He kawng hi zawh dawn ta ila, Lal Isuan a zawh ve duh ang em?' tih hi kan ke pen hmain vawi tam tak ngaihtuah hmasa thin ila, hringnunah hian ke kan lo pen sual lo nge nge thin a ni. Chuti ni lova Lal Isuan a zawh duh loh tur kawng zawh phet kan tum a nih chuan sual lam kawng kan zawh tan mek tihna a ni ang a, a tawpah phei chuan talchhuah leh harsa khawpin kan pil bo thei a ni tih hi kan hriat reng atan a tha hle mai.

Tuna ka kawng zawh mek leh zawh tum hi Lalpan a lo zawh thin kawng kha a ni em? Tuna ka kawng zawh tum hi zawh ta ila, Lalpa a lawm ang em? Tuna ka kawng zawh mek hi keima hamthatna nge a nih Lalpa Pathian hamthatna? Tuna ka kawng zawh mekah hian Lalpa a lawm em? Tih hi kan nuna kan inzawhna pawimawh tak a nih fo loh chuan kan hriat loh hlanin sual kawngah thui tak ke kan lo pen thei a ni. Chuvangin tuna kan kawng zawh mekah hian Lalpa a lawm leh lawm loh te, Lal Isuan a lo zawh thin kawng (kraws kawng) a nih leh nih loh te inzawtin ngaihtuah hmasa fo thin ila, kan kawng zawh mekah leh zawh lehzel turah pawh kal sual (kawng zawh sual) a lo awm lo nge nge dawn a lo ni reng mai.

Kalsan nun nei thin rawh

C. Lalmuankima 

Slough, United Kingdom 

Lal Isua Krista atanga kan nun chan, a lo thanlen a, mi dangte tan rah tha leh duhawm tak chhuah zel tur chuan he khawvel thil Isua hmel hliah thei thil hi kan kalsan fo a ngai a ni. Khawvel thil Isua hmel hliah thei thil nena inkaihkuah reng chung si chuan mi dangte tan malsawmna a nih theih loh. Chuvangin kan nun a lo thanlena mi dangte tana malsawmna ni zel thei tur chuan keimahnia Isua hmel hliah thei khawvel thil hi kan kalsan ngam zel a pawimawh a, chutianga keimahnia Isua hmel hliah thei khawvel thil kan kalsan tamna hmun apiangah miten keimahniah Isua hmel an hmu ang a, kan nun chu mi dangte tan malsawmna luankawrah Lalpan a hmang zel dawn a ni. 

Pathian hmaah i fate thingthitpui thin rawh

C. Lalmuankima 

Slough, United Kingdom 

I fate tan tawngtai hman lo khawpin thil dangah i intibuai thin em ni? I fate Pathian hmaa thingthitpui hman lo khawp leh thingthitpui nachang hre lo khawpin khawvel thilah i inham buai thin em? Chutiang thil i lo ti thin a nih chuan tun atanga bansan turin thurawn ka pe duh che. I fate i hmangaih tak tak a nih chuan Pathian hmaa thingthitpui hman lo khawp chuan khawvel thilah intibuai thin suh. 

Photo ; cloudfront.net

Nu leh pa tam tak chu an fate ngaihsak hman lo leh an fate tan tawngtaia thu tha hla tha zirtira hrilh hman lo khawpin khawvel thilah an buai a, chung mite chuan nakin hnua an fate nunkawng awm dan tur an ngaihtuah ngai hauh lo tihna a ni. Kan hna leh thiltihnaah kan buai a, mahni fate ngaihsak thulh thak khawpin kan intibuai thinte hi fate hma lam hun tur kan ngaihsak tawk loh vang a ni duh khawp mai. Mihring nih chhung chuan damchhungin buaipui tur neuh neuh hi chu a awm zel dawn, mahse kan fate zirtir an ngaih hun rei loteah hian kan fate thu tha leh hla tha zirtir hman lo khawp chuan khawvel thilah i inham buai thin lo vang u.

Ka pa fuihna leh zilhna tawngkam khat kha

C. Lalmuankima

Slough, United Kingdom

Nu leh pate zilhna leh fuihna tawngkam khatah hian an fate tana an hmakhua hun tur hi thui tak a innghat a ni.

Ka pa fuihna leh zilhna tawngkam khat kha ka tan hian a hlu zual bik em ni aw tih tur khawpin ka rilru chhungril ber thlengin min fan a, vawiin thlengin ka theihnghilh thei tawh lo va, chu chuan ka nun hi min fuihin min khalh kal nasa hlein ka hria. 

Photo: Google Image 

Chawmhlawm Thalai

C. Lalmuankima

Slough, United Kingdom

Kut ke kim biai, pian phunga rualbanlo pawh ni si lo, an duhna zawnah chuan zah nachang hre lo khawpa artial nghal khawpa nghal thiam, an duhlohna zawnah erawh chuan nawrluih chung pawha kal tha duh lo leh chet lak tum hauh lo thalaite hi chhungkua, kohhran leh khawtlang tan hian an va manhla lo tak em! Chhungte chawmhlawm ringawt a hun khawhral thak thak thin thalai kan la kawl teuh chhung chuan kan hnam hian hma a sawn mawh hle ang.

Windsor Castle
Photo : Martin (Zo Vapual) 

Tunlaiah khawvel hmasawnna leh changkannain a thopa zuana a chak thei ang bera min thlawhpui dawr dawr lai hian awmhmunah chhungte chawmhlawm chawpa kan lo in la champ vel mai mai a nih chuan a pawi ngawt ang. Mahnia hna chhe te neih hi hna nei lova awm awl aiin mi zahawmah min siamtu pawimawh tak a ni tih hi kan inhrilh hriat nawn awn awn atan a tha a ni. Kan thalaite zingah mahnia hna neih chu sawi loh, chhungten an biak rem sa pawh thawk tha peih hauh lo sawi tur an awm fo thin hian ka lung an tichhe thin tak zet a ni. 

Windsor Castle leh the Long Walk
C. Lalmuankima
Slough, United Kingdom

Ni 6 March 2020 khan Lalnu (Queen Elizabeth II) castle duh leh ngainat ber tlawhlohna a rei tawh alawm le tiin Slough atangin kein ka kal a. Eton College (Royal family ten lehkha an zirna hmun, politicians lar tak tak David Cameron te, Boris Johnson te leh midang hming lar tak takte inzir chhuahna hmun) ka paltlang a, tichuan Eton Village ka paltlang leh hnuin a ral lehlam lawk Lalnu kulh ngainat ber Windsor Castle chu ka thleng ta a ni. Lalnu leh a chhungte pawh an lo dam tlang a ni ang, lal in chhung atangin thu lungchhiatthlak kan hre bawk si lo va 😅, tunlai tak erawh Megxist boruak vel avangin Lal Chhungkua an buai hle a, an rilru pawh an seng hle ang tih a rinawm. Kha lam chu kan sawi tum a nih loh avangin sawi lohva lumah dah ta mai ila.....

Photo : Zo Vapual

I vanneihzia hi i ngaihtuah ngai em....? 

C. Lalmuankima 

Slough, United Kingdom 

Pathian khawngaihna zarah pianphung fu ke kim biaia i lo piang chhuak te, i tawng thei a, ri i hre thei a; thil tui leh tui lo i leiin i thliar thei a, i pangtiin i feel thei a; i ngaihtuah thei a, i kal thei ringawt te hi mi vannei bik i nihzia i ngaihtuah ngai em? 

Hetianga kan hmu thei, kan ei leh in thei te, kan khawih thei te, kan kal thei te hi a nih dan tur rengah kan ngai a, mi vannei bik kan nihzia hi kan ngaihtuah ngai reng reng thin lo. Damdawi inah han kal mah teh, Pathian fak chaka tawng theih chak em ema tawng thei lo te, khawvel parmawina hmuh chak em ema hmu thei lo te, ei leh in tui tak tak ei chaka chu ei leh in tuina hre thei map lo te, mite zinga awm ve a rual pawl chak ngawih ngawih te, pianphunga rualbanlo te  an awm teuh asin.....! Chung mite chu i hmuh changin i rilruin Pathian hnenah lawmthu i sawi thin em? (Heng mite hian an vawiin khawvel hi an duh vangin an thlang bik hauh lo asin.....Mahse, Pathian remtihna tel lo chuan a thleng bik hauh si lo a ni. Chuvangin Pathianin tun hun tun darkara i duh duh ti thei leh i nuam tih zawng ti theia a siam che kha lawmthu sawina tlak a tling a ni.) I vanneihzia hriain Pathian hnenah lawmthu i la sawi ngai lo a nih chuan vawiin atang hian lawmthu lo sawi tawh ang che. 

Photo image: Google 

Chhungkaw inlaichinna nghet i ngai pawimawh ang u

C. Lalmuankima

Slough, United Kingdom

Chhungkua hi inlaichinna nghet sawi em em tur pawh awm lovin a din ve theih a, amaherawhchu chutiang chhungkua chuan engtik niah emaw ni chuan tlukchhiat/tlakchhiat hun a nei leh thin. Chhungkuaah hian inlaichinna nghet a awm loh chuan pakhat leh pakhat inrintawkna a bo nghal a, inrinhlelhnain kan khat a, a tawpah chhungkaw kehchhiatna a lo thleng thin a ni.

Nu leh pate leh fate inkarah kan inlaichinna hi a tha tawk em tih hi kan inzawhna pawimawh tak ni fo rawh se. Pa leh fate, nu leh fate inkarah inlaichinna tha a awm loh chuan chhungkua hi a hlim thei lo mai ni lovin a hmalam hun kal lehzel turah pawh a thim chhah tawp a ni. Chu chhungkaw hmalam hun tur thim chhah tak mai su kiang tur chuan a chhunga chengten inlaichinna nghet kan siam a pawimawh a, inlaichinna nghet kan neih phawt chuan kan hmaa thim chhah tak anga lang pawh sutkianin a awm zel dawn a lo ni reng mai. A pawimawh ber chu chhungkuaa cheng member tinte inlaichinna hi a ni. 

Photo: Google Image 

Chhungkuaah inlaichinna nghet kan siam lohva kan ngaih pawimawh loh phawt chuan a chhunga cheng member tinte pawh hian chhungkua hi ngainat nachang kan hre lo ang a, hotel leh restaurant ang lekah ngaiin ni rei lote chamna tawk lekah kan ngai mai ang. Chhungkua hi chutiang dinhmuna kan din loh nan chhungkaw inlaichinna nghet hi kan siam fo a pawimawh. 

I thawhpuite malsawm thin rawh

C. Lalmuankima 

Slough, United Kingdom 

Kan thawhpui te, kan rawngbawlpui te, kan zirpui te, kan zinpui te, kan chenpui te hi mal kan sawm thin em aw? Mal kan sawm ngai lo a nih chuan han ti chhin mah teh, a hlawkzia chu i nunah khan hmuh theihin a rawn lang chhuak nghal mai ang. Mi tam tak hian kan thawhpui te hi malsawm nachang kan hre thin lo va, a then phei chu malsawm a hnekin an fel loh lai sawi nuam ti tlat hi kan awm a, chutiang rilru kan put chhung chuan kan thawhpuite nena kan inkar inlaichinna hi tihnghehin a awm ngai lo vang. Mite dik lohna ringawt hmuh tuma zawngtute tluka mi vanduai hi khawvelah hian an awm awm lo ve. Chutiang mite nun chu a khawngaihthlak hliah hliah bawk a ni. 

Photo: Google Image 

I thawhpuite laka i rilru put dan hmang a dik phawt chuan i thawhpuite nena in inkar inlaichinna hrui chu eng emaw ni avang maiin tihchah a ni ngai lo vang. Thawhpuite laka kan rilru put hmang a dik hi a pawimawh a, kan inkar inlaichinna tinghettu pawh a ni. I thawhpuite laka i rilru put dan hmang khan anmahniah nasa takin hna a thawk thei a ni tih hi hre reng thin ang che. 

Engkima min hrechiangtu LALPA

(Sam 139:1-11; Matthaia 10:30; 28:20; Isaia 43:1)

C. Lalmuankima 

Slough, United Kingdom 

Keimah leh keimah ka inhriatchian aiin ka rin Pathian khian min lo hrechiang em em a, ka ngaihtuahna chhungril ber thleng pawhin min lo hriatsak a, a lak atang hian thil zep ruk theih pawh a ni lo, min lo hrechiang em atin a ni.

Photo : Google image

Mihring taksa ruangam pianhmang leh a kaihhnawih zirmi Daktawrte chuan kan taksa bung hrang hrang invuah dan leh kawchhung lam thlenga hai let vek thei khawpin khawl finna hmangin kan taksa chhunga thisen zungzam kal dan thlengin min luhchhuahin min hrethei a ni mahna, kan rilru chhungril ber thlenga rawn lut thei erawh an awm hauh lo. Kan rilru ngaihtuahna chhungril ber thlenga rawn lut thei chu Pathian chauh a ni. Keinin kan taksa peng pawh kan hriat kim theih loh laiin Ani chuan kan sam zai lam pawha min lo chhiarsak vek thu min hrilh a (Matt 10:28), hei tluka inhriatchianna hi a awm thei chuang lo vang.

Masi rim

C. Lalmuankima 

Slough, United Kingdom 

Photo Image: Reader's digest

Masi rim hi kan ti teh chawk thin a, a hranpa taka chawhmeh rim leh pangpar rim leh thil dang rim anga hnara han zawn chhuah tur awm lo a ni a, chutih rual rual chuan Kristianten kan hunpui pakhat, khawvel misualte chhandam tura Pathian fapa meuh mihringa a rawn chana a lo pianna ni pawimawh tak denchhena kan thiltih vel hi a kawk tel a ni ti ila kan sawi sual tam viauvin ka ring lo. A hranpa taka hnar rim hriatna atanga zawn chhuah tum kan nih chuan engtikah mah kan hmu bawk hek lo vang.

Malsawmna chhiar dan

C. Lalmuankima

Slough, United Kingdom

'Malsawmna chhiar dan' ka han ti ve leh thawr a. Malsawmna chhiar dan thiam lo ber te zinga miin he thupui hi han chilh pawr ve leh ka tum a ni. A nih leh malsawmna chhiar dan hi a lo awm tak tak emaw ni le, inbumna mai a ni lo maw?  Chhiarkawp chawh anga chawh chhuah mai chi lah ni hek suh...! Heti hian i han sawi tan dawn teh ang.

Photo : Google Image

Malsawmna hi a chhiartu azira malsawmna ni thei emaw ni lo thei emaw a ni a, a chhiartuin a chhiar thiam dan azira hlua hlu lo thei a ni bawk. Kristian kan nih angin Bible - in min zirtirna thu hi kan dah lal ber zel ang a. Zawlnei Hagaia lehkhabuah chuan he ti hian kan hmu a. "Tam tak in ching a, tlem te in seng si; in ei a, in tlai si lo; in in a, in kham si lo; in sin a, in lum chuang si lo; inhlawhfa chuan ip pawpa thlak atan mai a hlawh a ni." (Hagaia 1 : 6 ) He Bible bung leh chang atang ringawt pawh hian kan sawi tum chu a lang sa ruah mai le. ........!

Chhungkaw hrisel tak nei thin ang che

C. Lalmuankima

Slough, United Kingdom

Mi tam tak chuan chhungkaw hung tak leh chhungkaw in leh lo tha pui pui inhung khup theiha silh leh fen mawi tak tak inbel theiha ei leh bar tui tak tak eiin theih avangin chhungkua hi ropui viauvah kan ngai thin a, kan tisual fo thin reng a ni. Chhungkaw ropui berna lai chu in leh lo tha tak tak neih theiha silh leh fen mawi tak tak inbel theiha ei leh in tui tak tak ei theihah a awm lo va, chhungkuaa Pathian pawlna maicham (altar) kan hun thinnaah hian a innghat zawk a ni.

Chhungkuaa tu leh fateah lehkha thiam leh nihna sang tak tak neiha sawrkar mi lian tak tak neih avang ngawt pawh hian chhungkua a ropui a ni lo. Heng zawng zawng hi Pathian tihna tel lo a nih phawt chuan ropuina khingbai tak a ni zawk. Chuvangin, Kristian kan nih angin chhungkaw ropuina kan tehna tur dik tak zawk chu 'Chhungkaw Maicham' hung thin an/kan nihnaah hian tehna fung kan lek zawk tur a ni. Chuti ni lova khawvel ropuina lam zawnga kan tehna fung kan lek a nih chuan kan teh sual fo bawk ang.

Photo: Google Image

I hmaa tanpui ngai Lalpan a rawn hruai kha tanpui lovin chhuah mai suh

C. Lalmuankima 

Slough, United Kingdom 

Tum khat chu London Victoria Station-ah Slough lam pan tura rel ticket ka lak mek laiin Spanish tlangval pakhat hian min rawn pan chawt mai a, tah aw deuh tuau hian ka hnenah tanpui min rawn dil a. A harsatna ka zawhin a wallet a tihbo thu leh a nau hmeichhia Ilford a awm hnen thlen a duh thu min hrilh a. A nau hnen thleng turin a pawisa bawm ber a tihbo avangin harsatna a tawh thu min hrilh a ni. A tirah chuan ngawih liampuia hnar mai ka tum a, tichuan ka bulah min dinchilh reng bawk si a, a tawpah chuan 'Tikhan lo nghak lawk rawh, ticket hi ka han lei hmasa phawt ang e....' tiin ka hrilh a, min nghak ve ta ran a, tichuan Ilford lam kal tur train ticket chu ka leisak ta a.

Photo: Google Image

A lawm lutuk kha min chibai lawp lawp a, 'I zarah ka nau nen kan inhmu thei dawn a, ka lawm tak zet a ni. Ka phone no hi la ta che, tichuan ka nau hnen ka thlen velah i pawisa hi ka pe leh ang che...' a ti chung mai a, mahse kei chuan, 'Ekhai... Ni lo ve a, i nau nen hlim takin in inhmu dawn nia, Pathianin malsawm che rawh se.' tiin ka thlah liam ta a. In lam pana ka hawn mek laiin kha tlangval hmel kha ka mitthlaah a lo lang a, a lawmzia ka hmuh khan ka rilru chhungril takin ka hlim a ni. Kha tlangval tana ka tihsak ve theih thil te tak te avang maha hetianga ka rilrua hlimna ka chang a nih chuan midangte tana thil tha tithinte hian hlimna nasa tak an lo chang thin dawn a nih hi....tih hi min ngaihtuah chhunzawmtir a, ka lawm tak zet a ni.

Neitu rilru pu thin ang che

C. Lalmuankima 

Slough, United Kingdom

Kan thiltihnaa kan hlawhtlin theih lohna chhan hi han ngaihtuah chiang ila, neitu rilru kan put thin loh vang a ni duh khawp mai. Neitu rilru i put phawt chuan i chhugkaw hlimna leh hlimlohna te, i chhungkaw hmingthat leh hmingchhiatna te kha i kutah a awm tih i hria ang a, chu chuan thil tha ti turin a khalhkal fo vang che.

Photo: Google Image

Neitu rilru kan pu a nih chuan kan ram tana tha tur hi kan ngaihtuah ve tur a ni. Kan ram chhunga hnam dang va huata va velh chiam tum lam a ni lo va, neitu rilru kan pu tak tak a nih chuan kan khawtlang tana thil tha tur hi kan ngaihtuahho zawk tur a ni. Khawtlang siamthat hna thawktute sawisel fo chin te hi a tha lo va, kan khawtlang kan hmangaiha neitu rilru kan pu tak tak a nih chuan kan khawtlangin a mamawhna zawna a kila lung tangkai tak kha nih ve mai tum tur a ni. Neitu rilru pu tlat chunga ram leh hnam, kohhran leh khawtlang kan hruai a nih loh chuan ram leh hnam, kohhran leh khawtlang hmangaihna tak tak kan nei lo tihna a ni ang. Chuvangin ram leh hnam, kohhran leh khawtlang hmangaihtu tak tak te chuan a sawia sawi that piah lamah hian neitu rilru puin a takin an thawk tak tak thin a, chutianga thawktute zarah chuan vawiin thlengin ram leh hnam sawi tur kan lo nei ve thei chauh a ni.

Thiam thar nei ringtu nun chu

C. Lalmuankima

United Kingdom

Rev. Vanlalzuata chuan, 'Ringtute chu Isua kan zui rei tial tial a, thiam thar kan nei tam tial tial thin.' tiin a sawi a. Ringtu ni ve si, hmasawn miah lo kan nih chuan kan pianna hmun a fuh tawk lo tihna a ni ang. Ringtu chuan thiam thar a neih thin avangin a thlen chin atangin hma a sawn thin (Phil 3:16). Thlen chin chin atanga hmasawn hi ringtu nun puitling neihna pawimawh tak a ni.

Photo: Google Image

Nu nau pawm chuan an faten thiam thar an neihin hahipin an sawi thin a, an lawm em em thin. 'Ka fa chuan lawm a hre tan...' 'Ka fa chu a thu thei tan... ' 'Ka fa chu a kal thei tan...' tiin an fate thil thiam tharah khan an lawm em em thin a ni. Chutiang chiah chuan ringtute pawh hi kan nitin nunah hian thil thiam thar kan neih hian van Pathian khi a va lawm dawn tak em! Kan nitin nunah hian tawngtai taimak kan thiam thar em, mite rel chin thin bansan lamah kan nun a thanglian em, mite chunga rilru tha putah thiam thar kan nei em, kan chhehvela mite chunga that chhuah kawngah hma kan sawn em....etc. mahni leh mahni kan inenfiah fo a pawimawh a ni.

Sakei hliam aia hlauhawm - Fa duat sual

C. Lalmuankima

Slough, United Kingdom

Fa duat dan chin tawk kan thiam loh chuan kan fate hi sakei hliam ai pawha hlauhawmah kan chhuah thei a ni. Hei hi mi tam tak chuan kan hrethiam thin lo va, kan fate duhzawng tihhlawhtlinsak hi hmangaihna dik takah kan ngai a, kan tisual fo thin reng a ni. Fate duhzawng tihhlawhtlinsak theih hi hmangaihna a ni kher lo va, an duh ang apiang kan tihsak theih avang hian kan fate chunga kan mawhphurhna kan hlen tihna a ni hek lo. Chu chu kan hrethiam thin lo va, fate duhzawng apiang tihhlawhtlinsak theihah kan inel a, a tawpah fa sual kan nei teuh thin a ni.

Photo - Google Image

Nu leh pa tam takin an fate duhzawng apiang tihhlawhtlinsak theih avang hian an fate chunga an mawhphurhna tihlawhtling viauvah an ngai a, an tisual fo thin reng a ni. Fate duhzawng apiang pek theih avang hian fate chunga kan mawhphurhna kan hlen a ni lo. Chumi piah lama kan hmaih fo thin chu engtia khawsak tur nge tih zirtir hi a ni. Kan fate hian an nakin hun kal lehzel turah engtia khawsak tur nge tih hi an zir chhuah tel loh chuan sual lam kawng an zawh thuai thin. Chuvangin nu leh pate hian kan fate mamawh leh duhzawng kan tihhlawhtlinsak piah lamah hian nun dan tur kan zirtir tel a ngai a ni. Chutianga kan tih phawt chuan an damchhungin an thlah tawh ngai lo vang. Bible-ah pawh, ‘Naupang chu a kalna awm kawngah zirtir ula, a upat hun pawhin a thlah lo vang.’ tih kan hmu a (Thufingte 22:6), an kalna awm kawng zirtir hmasa si lova, an duhzawng chauh kan pek hian anmahni tan pawh thil hlauhawm tak a thlen thei a ni. ‘Kalna awm kawng...’ han tih hian an nun puitlin thlenga an thlah tawh ngai loh tur nunkawng tha hi a kawhtir theih ang a, Kristian kan nih angin Kristian nun hi an puitlin thlenga an nun khalhngiltu atan kan zirtir hmasa tur a ni. Chutianga an naupan lai atanga an kalna awm kawng kan zirtir phawt chuan an puitlin hnuah pawh an bo leh tawh ngai lo vang.

Hmangaihna mitin i mihringpuite en thin ang che

C. Lalmuankima 

Slough, United Kingdom

Hmangaihna mita ena Lal Isua atanga mi kan teh thin loh chuan mi tumah kan teh tling ngai lo vang. Keimahni ngei pawh hi Lal Isua avanga tling, Lal Isua avang veka chatuan nunna nei, Lal Isua avanga Pa Pathian hmaa mi tling kan ni si a, Lal Isua atang zel hian teh thin ila a lo fuh ber a; a hahdam ber bawk a; mi tumah teh tlinloh kan nei ngai tawh lo vang.

Photo: Google Image 

Nangmah atanga i teh chuan nang aia fel anga lang leh khawvela mifel ber pawh a sualna leh thil tihsual zawngin i mitah chuan a tling chuang lo vang a ( nang aia sual anga lang chu sawi lohva lumah dah ta ila....), an tih that poh leh an fellohna lai hmuhchhuah tumin tan i la nasa ting mai ang....!!!

Chhungkaw hlawhtlinna chu pawl hlawhtlinna a ni

C. Lalmuankima

Slough, United Kingdom

Ziaktu pakhat chuan heti hian a lo ziak tlat mai, ‘‘Chhungkaw hna hi hun awl hnawh khah nana hman tur a ni lo va. Chhungkaw enkawlna baka hun awl chu hna dang thawh nana hman ve chauh zawk tur a ni. I sum deh chhuah khawl khawmtu atan i fate chu ngun taka i kaihhruai a tul a, chuti a nih loh chuan i deh chhuahsa tiraltu mai an ni ang.’’ Tiin a lo sawi a, a tha ka va ti ve aw. Mi tam takin chhungkaw enkawl that hmasak a pawimawh laia sum leh pai kan dah lal tlat zel mai leh chhungkaw enkawl hman lo khawpa sum leh pai kan um ta lutuk te hi chhungkaw tlakranna bul intanna a ni kan ti lo thei lo vang. Sum leh pai hi duh lo chu kan awm hauh lo vang, amaherawhchu chhungkuain a chhiatpui thak khawpa a hnungzui erawh thil tha ber a ni chuang hauh lo a ni.

Photo - Google Image

Hun awl hnawh khah nana hman tuma ralsai ngawt hian kan in chhungkhur nun hian hma a sawn dawn lo va, siamthat a ni ngai dawn lo a ni tih hi kan hriat reng a tha. Chhungkaw enkawl hna hi inzirtir mai a tawk loh avangin a taka inkaihhruai chhunzawm a ngai a ni. Chhungkaw enkawlnaah hian inkaihhruaina a tel chuan si loh chuan chhungkuain a nih dan tur angin ke a pen ngai lo va, chhungkaw thangduang tak a ni thei ngai hek lo. Chuvangin chhungkua chu inzirtir maiah a tawk lova a taka inkaihhruai tel a ngai a, a taka inkaihhruai telnaah hian chhungkuain a tum ram a thleng thin a ni. Chhungkua chuan inawp dan fel tak a nei tur a ni a, chu inawp dan fel tak hnuaiah chuan an inzirtirin an inkaihruai thin. Inzirtirna leh inkaihhruaina tha awmlohna hmunah chuan chhungkua chu a tlaran/tlabal thuai thin a ni.

Mawhphurhna hlen ngam khawpin huaisen thin ang che 

C. Lalmuankima

Slough, United Kingdom

Ziaktu pakhat chuan heti hian a lo ziak tlat mai, 'Mawhphurhna nei vea inhriatna chuan mi a tihuaisen a, mi puitling nihna leh finna leh remhriatna min pe bawk.' tiin.

Mahni mawhphurhna hlen ngam lote tluka mi dawihzep hi an awm chuang awm lo ve. Miin min ring tawk a, mawhphurhna min pe ngam a nih chuan an mi rin ang ngeia tihhlawhtlinsak hi mi puitlingte miziaa be nghet tlat a ni. Chhungkua, kohhran leh khawtlang, ram leh hnam thlengin miin mawhphurhna nei ve tlaka min ruat a nih phawt chuan huaisen taka tihhlawhtlinsak kha mi puitling nihna a lo ni reng mai.

Photo: Google Image

Mi puitling kan teh dan hi a in ang lo ve thei viauvin ka hria. 'Mi puitling' han tiha rilrua lo lang hmasa ber mai chu awmhmunah zahawm taka awm deuh khep khep emaw puipun nikhua leh thil tih ilo vela mipui hmaa ding emaw te hi an lo lang a, kawng tam takah chuan a dik mai thei. Mahse mi puitling nihna title pek awm tak zawk hi kan hmuh kan tlat zel em aw a tih theih bawk. Mi puitling chuan a chunga thil thlengah a lian a ni emaw a te a ni emaw a mawhphurhna a hlen ngam thin a ni. Mi puitling chuan a chunga mawhphurhna tla apiang a te emaw a lian emaw hlen ngei a tum thin a, chung mite chu mi puitling nihna pek awm hliah hliah an ni thung.