Kan tuk tho (zing tho) Pathian biak thlakhlelhna kan nei thin em?

C.Lalmuankima

Newcastle, United Kingdom

 

I zing tho kha tu nge i biak hmasak ber ngaihtuah thin la, Pathian biak i thlakhlelh leh thlakhlelh loh a hriat mai ang.



Photo: Google Image



Martin Luther chuan, 'Ni khatah darkar thum tal ka tawngtai loh chuan ka thil tih tur ka thawk zo thei ngai lo...' zu han ti a....! Han ngaihtuah mai chuan a hun hlu zawng zawng tawngtainaah a hmang zo vek a ni lawm ni kan ti mai thei a ni. Khawvel mita thlira khawvel benga ngaihthlak chuan zaah za thil atthlak tak a ni kan ti thei ang. Mahse van lam mita thlira van lam benga ngaihthlak erawh chuan zaah za a dik thlap thung. Miin Lalpa tan hna tam tak an thawh duh avangin tawngtaina hau tak zetin bul an lo tan thin a ni.

Miin Pathian nena inpawlna an neih tak tak chuan ni khata darkar 24 pawh hi an kham lo lam a ni. Ni khatah hian hei aia darkar tam zawk hi awm thei se la an

duh thin a ni. Engvang nge kan tih chuan Pathian nena inpawl nawmzia an hria a, Lalpa biak hi an thlahlel ngawih ngawih tawh mai a, amah be hmasa lo leh amaha inhlan hmasa lovin engmah an ti ngai hek lo. An tih loh palh ni apiangah an nun a khawhar ngawih ngawih hlein an hria a ni. Keini hi i han in en teh ang u, ni khatah Lalpa tan darkar khat chu sawi loh, minute 10-15 lek pawh kan pe phal ngai meuh lo va, chuti chung chuan a malsawmna tam tak dawn kan beisei leh lawi si hi a kawng kal lo hrim hrim a ni.

Thil rim tui ka tih ber mai chu….

C. Lalmuankima

Newcastle, United Kingdom

 



Kan naupan laiin ka u nen hian ka pa hnathawhna kawr, thlan tuiin a bual chhuah vek mai, balbawma suk tura ka nuin a dah that hi kan hnim thin a, ka pa thlan tui rim chu a rim tui kan ti em em thin a, ka u nen kan inhnim chhawk thin a ni. Chu rim chu midang tan chuan thlan rim chhe tak a ni mai thei, kei ka tan erawh chuan vawiin thlengin ka hnarah a la cham reng a, vawiin thlengin a la rim tui reng a ni.

Thil rim han sawi takah chuan thil rim thliartu ber kan hnar hian rimhriatna a neih that a pawimawh em em a, kan hnar berin a rimhriatna a hloh tawh chuan a bula engtiang khawpa rim tui pawhin awmzia a nei thei tawh lo thin. Pangpar rim tui tak tak te, theirah leh thlai rim te, mihring leh rannung thlengin an rim tui dan a in ang lo theuh va, siamtu Pathianin a siam ang theuhvin rim an neiin an chhuah thin a; a then te phei chu han hnima hnara cham vang vang te a awm a; a then erawh chu vawi khat hnima luak tichhuak em em leh kaw let nghal tawp tawp theia min siamtute pawh an awm ve bawk a, kan rim ngai nat zawng te pawh a in ang vek hek lo. Thenkhatin rim no tak an ngainat laiin a then erawh chuan rim thip tak leh rim na tak an ngai na ve thung a, mi thenkhat lahin perfume rim te hi rim tui an tih viau laiin thenkhat tan chuan luak tichhuaktu thil rimchhia a ni ve thei thung. Pangpar leh theirah leh rannungte pawhin anmahniah rim an nei thin a, chutiang bawkin mihringte pawhin rim kan nei thin.

Photo : Google Image

Mihring pawh hian rim chi hrang hrang kan nei a, a then chu an bula awm hrehawm khawpin minute hnih khat lek awm pawh hrehawm khawpa rim chhe tak leh rim na tak nei an awm laiin a then erawh chu rim chhe hran lova an bula awm nuam em em an awm ve bawk. Mingo rim leh mihang rim te pawh a in ang lo va, Pathianin min siam zia rengah rim hran hran neiin min siam a ni tihah hian lungawi tlang ila a hahdam ber zel a ni.

Kan unauvin kan tet te atangin ka pa hnung hi kan zui nasa em em a, thal sikul chawlh a lo thlen tawh hi chuan ka pa hnung zuiin in sain kan inhlawh ve chawt thin a; thal nipui chhungin sikul kaina tur daih kan inhlawh chhuak ve thin a ni. A changin sikul chawlh ni apiangin kan inhlawh ve thin bawk. Kha khan hringnun hmasawnna kawng tinrengah mi puitling ni turin min lo chher hriam a ni tih hi tun hnuah hian ka hre chhuak dawn chauh a ni. Ka pa hnung kan zui thinna khan kawng engkimah hringnun hmasawnna kawng zawh turin min lo chher hriam a, pawisa tam takin a lei zawh theih loh nunkawng puitling min lo zirtir a ni tih han hmuh chhuah meuh chuan pa te hnungzui man to zia kan hmu chhuak uar uar mai a ni. Ka pa hnung ka lo zui thin kha vawiin thlengin ka la inchhir hauh lo, inchhir a hnekin a man tamzia ka hmu chhuak telh telh zawk. Thalai zawk nih chuan a changin pa te nena rilru inhmuh vak loh chang te awm ve bawk thin mah sela tawnhriat lo ngah tawh zawk na na na chuan thil awmzia min hrilhfiah leh thin kha ka tan chuan a hlu ka ti lo thei lo.

Thlarauvah awm rawh u (Pentikost Pual)

(Joh 4:24; Tirhkohte 2:1-13; Gal 5:16)

C. Lalmuankima
Newcastle, United Kingdom

Pentikost ni hlimawm chibai ka buk a che u. In awmna hmun theuhvah he hun pawimawh tak hi hlim taka in hman ka beisei bawk. He ni hi kan hriat theuh angin Isua a thia a thawhleha vana a lawn hnu ni sawmnganaa zirtirte hnena thil thleng a ni a, kohhran din tanna ni ti pawhin an koh thin a ni.

"Pathian chu Thlarau a ni; a chibai buktuten thlarau leh tih tak zetin chibai an buk tur a ni." Johana 4:24

Photo: Google Image

Zofaten Kristianna kum 100 chuang kan hmel hriat tawh hnu pawha kan thlarau chan sawngnawi tak sawi tur a la awm fo mai hian ngaihtuahna a ti tamin lung a tichhe hle a ni. Mi tam takin thlarau kan hmel hriat danah kan chiang thin lo ni tlatin a lang. Thlarau tih avanga ti deuh riai ruai leh eng emaw ni kan taksaa rawn lum deuh pup, tek deuh sawk, hit deuh chuai, nu deuh bulh, leh rim hial nei tur ang hrima kan rinna hian kan ngaihtuahna a hruai kawi thin hle a, nu deuh bulh bulha awm tumna hian min neihtir thin a ni. Chutiang anga nu deuh bulha awmte chu thlarau mi viau ta angah kan ngai leh ta nghal a, an thlarau chan kha a dik leh dik loh lam kan ngaihtuahpui thin lo bawk.

Zir hi zir miah loh aiin a hlawk

C. Lalmuankima

Newcastle, United Kingdom

“Eng zirnaah pawh hian hlawkna a awm vek a, ngai awhtir aiin dinhmun leh ngaihtuahna a tisang zawk hrim hrim a ni.”

Mihringten Pathian hnen atanga kan rochung tha ber ber te zinga mi chu finna, hriatna leh thiamna te hi an ni. Heng Pathian thil thlawnpek hlu tak hi miin a hluta a ngaih pawimawha a zir loh chuan ransa te angin mawl takin a awm thei a ni. Chuvangin miin zirna leh thiamna hi a ngaihhlut lohva a ngaih pawimawh loh chuan a dinhmun chawikangtu a nih theih laiin a dinhmun hnuk hniamtu a ni thei bawk a ni.

Photo: Google Image

‘Zirna leh thiamna chu hringnun nena inkungkaih a ni a, hmasawnna a ni.’ tiin John Dewey chuan a lo sawi angin hmasawnna thlenlo zirna leh thiamna a awm thei lo. A zirtuin a ngaih pawimawh azira hmasawn thei leh hmasawn lo thei a ni bawk. Thil reng reng chu kan ngaihhlut leh ngaihhlut loh azirin keimahniah hmasawnna min thlenin min thlen lo thei a ni.

Khawvela zirna leh thiamna tha ber berah (College leh University tha ber ber) indahin kai thei mah ila, a zirtu berin a zir miau si loh chuan zirna leh thiamna tha chuan hmasawnna a thlen mawh hle a, a zirtu hi an pawimawh hle a ni. Zir hi zir loh ai chuan a hlawk tawh hrim hrim a, hringnun hmasawnna min thlentu pawh zir thiamna hi a ni. Zir thiamna tel lo chuan mihring thluak hi mawlnain a khat a, chu zir thiamna chuan mihring thluak mawl tak chu silfaiin mawlna zawng zawng a um bo thin a ni.

I Nu Chu….

C. Lalmuankima

Newcastle, United Kingdom

Thuhmahruai

Photo; Google Image 

In awmna hmun theuhvah Nute Ni hlimawm tak hi hlim taka in hman ka beisei a, duhsakna ka hlan a che u. Nute Ni pualin he thu ziak tawi hi ka han dah ve ang e. Nute hi an pawimawh em em mai a, an pawimawhzia pholang thei tura ka’n ziak chhuak thiam thin lo erawh a pawi ka ti hle a ni.

"Ka nu ziak leh chhiar thiam lo khan, a fate hi lehkhabuin a zirtir theih aia nasa mi zirtir a ni." (Cardinal Cracius)

Vawiina i nu hmangaihna ang hmangaihna hi khawvel hmun kir khawr berah pawh zawng mah la, i nu’n a hmangaihna che aia hmangaihna nasa hi i hmu chuang lo vang. Chuvangin i nu hmangaihna hi a chhanlet dan i thiam loh phawt chuan nakinah lungchhirin i la kun ngawih ngawih mai thei asin….??? Chutih hunah chuan koh kir leh tum mah la a sawt tawh lo vang a, inchhirin awmzia a nei tawh bawk lo vang. Vawiin thlenga 'Ka Nu' tia koh tur i la neih avang pawh khan Pathian hnenah lawmthu sawi mawlh mawlh ang che. Vawiin thlenga nangmah anga 'Ka Nu' tia koh tur neilote hian an nute an ngaih thinzia hnukulh teuhvin an sawi thin asin... Chuvangin 'Nu' koh tur i la neih avang pawh khan Pathian hnenah lawmthu sawi mawlh mawlh ang che.

Hmeichhiate khawvela hmeichhe hlutna leh pawimawhna

C.Lalmuankima

Newcastle, United Kingdom

Vawiin khawvel hi hmeichhiate khawvel a ni tawh mai lawm ni tih tur khawpin hmeichhiate hian kawng engkimah hmun pawimawh tak tak te changin dinhmun sang tak tak an chelh a, an tel lo chuan khawvel hmasawnna leh changkanna hian kal zai a rel thei tawh lo a ni lawm ni a tih theih hial ta a ni. Sawrkar office hmun pawimawh tak tak te, zirna sikul/college/university leh factory/industry hmun pawimawh tak tak te, infiamna leh eizawnna hmun thlengin hmun pawimawh tak tak an lo luah ta reng mai...!

Photo; Google Image

Hmanlai kan piputen hmeichhe chungchanga an ngaihdan mawl tak leh hrisel lo tak tak 'Hmeichhia leh palchhia chu thlak ngai....' tih te, 'Hmeichhe finin tuikhur ral a kai lo..' tih te, 'Hmeichhe thu thu ni suh, chakai sa sa ni suh....' tih te khan mual an liam zo ta a, a lo inletling thawp bawk a, vawiin khawvelah chuan sum leh pai zawnna hmun tinah te, finna leh hriatna, thiamna kawngah te hmeichhiate chuan dinhmun sang tak tak thlengin an invawrh chho ta a. Kan pipute mai ni lo, khawvelin hmeichhiate dinhmun a rah behna kulhpui chu tihchimin a awm ta a (sakhaw thenkhat chuan hmeichhe dinhmun la rap bet viau mah sela....), hmeichhiate hmangin vawiina khawvel tluchhe mek hi tundinin a awm mek zel a ni.

Fate malsawm thin Pa kan mamawh….!!!!

(II Samuela 6:20; Genesis 49:1-28; Johana 15:1-ff)

C.Lalmuankima

Newcastle, United Kingdom

 

Kan ram leh hnam hian Lal Davida anga fate leh chhungte malsawm thin pa kan mamawh a ni. Pate malsawmna atang hian faten malsawmna an dawng chhawng thin a, an hmuingil bawk thin. Fate an pate malsawmna dawng thin leh fate an pate malsawmna dawng ngai reng reng lo te hi khua reiah an lo inthlau thei dawn khawp mai.

Photo: Google Image

Fate hrawk nan chuan aw theih tawp kan chhuah a, fate malsawm nan kan aw hi engvangin nge a thawp leh sut thin ni? In ngaihtuah chian a ngai khawp mai. Pate malsawmna hi faten an dawn chak ber a ni a, pate malsawmna avangin fate hian malsawmna tam tak dawngin an hmuingil thei bawk. Thenkhat chuan, ‘‘Kei chu mipui hmaah pawh ka ding chhuak ngam ngai lo va, tawngkam ka thiam lo em mai, ka fate malsawmna pe thiam khawpin tawngkam ka thiam lo.’’ tiin zah na tur dik lovah kan zak thin a, hei hi kan tihsualna lian tak pakhat a ni reng a ni. Fate malsawmna hlan turin tawngkam thiam a pawimawh ber lo va, pek thiam hle pawh a ngai hek lo. I fate tana i duhsakna i tihlana malsawmna tawngkam i pek tluka tha kha a awm chuang lo va, chu tawngkam hnih khat lek chuan an damchhungin a hruai tawh mai dawn a ni. ‘Ka fate u, ka hmangaih che u a, Lalpa hmingin mal ka sawm a che u, in damchhungin lo hmuingil zel ula, in tuchhuan thlengin malsawmna tam tak lo dawng zel ang che u…..’ han tih mai kha mi tam tak chuan sawi chhuah harsa kan ti thin a, fate malsawm ngam lo leh fate malsawm ngai lovin mual kan liam leh mai thin hi a pawi tak zet a ni e. Thil tha tih na chang hre reng si a, kan tih loh hian a sawhkhawk lam lo thleng leh tur kan ngaihtuah thlen ngai loh vang a ni duh chawk reng a ni.

I phak tawk rawngbawlna kha i hlen thin em?

C. Lalmuankima

Newcastle, United Kingdom

Mahni phak tawka rawngbawlna kan hlen thin hian Lalpa tan hna ropui tak kan lo thawk a lo ni reng mai. Mahni phak tawk pawh ti duh lova phunnawi tauh tauhva kan awm hian awmzia a nei chuang lo. Lalpan kan rawngbawl theih tawk hi a hai lo, rinawm taka thawh hmiah hmiah zel kha a lo hlawk ber thin a ni zawk. Rawngbawlnaa phun tauh tauh te nun hi a hlim ngai lo va, midangte tana ei tlak khawpin a par chhuak ngai lo.

Photo: Google Image

Kan phak tawk tawka mite kan tanpui a, keimahnia hlimna lo awm thin hi sum leh pai tam tak pawhin a lei theih loh hlimna a ni. Kan phak tawk ni lo tanpui ngai hi Pathian hian kan hmaah a rawn tirh ka ring lo. Kan hmaa rawn thleng chin hi chu Pathianin kan phak tawka kan tanpui ve theih tura a rawn tirh a ni duh khawp mai. Pathian hian kan hmaah hian kan phak tawk tur tanpui ngaite hi a rawn tir thin a, chu chu kut kuangkuahsan mai lova kan lo tanpui hian kan va tanpuiate an lawm mai bakah a tanpuitu pawh kan lawm a, Pathian pawh a lawm bawk a ni.

Kan lei taksa a boral ruala boral ve leh mai tur, kan thih hnua vanrama kan chhawm tel theih loh tur kan sum leh pai hmanga Pathianin a rawng kan bawl min la phalsak leh van ro kan khawl min la phalsak hi chu kan vannei ngawt mai....! Kan sawi tawh angin kan hmaah hian kan tanpui theih loh tur khawp khawp chu Lalpan tanpui ngaite a rawn tir hauh lo vang. Kan tanpui theih ngei tur hi rawn tirin keimahni fiah nan a rawn tir thin a ni.

I part i hre chiang em?

C. Lalmuankima

Newcastle, United Kingdom

Mahni part lova kan sak hian zaipawl kaltluang lai a tibuai nuaih thei a, kan bula awmte tan kan hnawksak thei bawk. Zaipawlah chuan soprano te, contralto te, alto te, tenor te, leh a bass te a awm thin a, chung zawng zawng infinkhawm chuan zaipawl mawi tak a siam chhuak thin a, ngaithlatute tan ngaihthlak nuam tak chhuahin ngaihthlak nawn leh fo kan chak thin.

Photo: Google Image

Chutiang chiah chuan chhungkua pawh hi zaipawlin an lo tehkhin fo thin a. Chhungkuaah hian pa dinhmun te, nu dinhmun te, fate dinhmun te, mo leh makpa dinhmun te a awm thluah mai a, chung zawng zawng chuan mahni dinhmun theuh hriaa an tih tur an tihin chhungkaw duhawm leh entawntlak tak a siam chhuak thin a ni. Zaipawlah chuan mahni part ni lova kan sak chuan zaipawl a buai nuaih thin a, zaipawl a buai mai ni lovin ngaihthlak tlak lohvin a awm thin a, a tawpah zaipawl hlu lovah a chhuak thin. Chutiang bawkin chhungkua pawh hi mahni part theuhva kan sak lohva midang part-a kan va sak khan chhungkua inrelbawl dan a buai nuaih thin a, chhungkaw inpumkhatna tihbovin a awm vat thin a, a tawpah chhungkaw kehchhiatna hial thlengin rah tha lo tak a chhuah thin a ni. Chuvangin mahni part ni lova sak hi a pawi em em a, part dang kan tibuai nuaih thin angin chhungkuaah pawh mahni dinhmun theuhvah kan din chiah khan chhungkaw duhawm, mite ngaihthlak kham theih loh khawpa zaipawl mawi tak ang chhungkaw entawntlak tak kan lo siam ta thin a ni.

Chawlhna nuam Krista nunah

(Sam 23:1-3; 62:5-7; 127:1,2; 4:8; Matthaia 11:28-30; Hebrai 4:9-11)

C. Lalmuankima

Newcastle, United Kingdom

"Kristaa chawl reng reng te chu taksain an chawl lo va, thlarauvin a ni an chawlh zawk ni."

Evan Hmingsawia

Krista atanga chhuak chawlhna nun ni lo hi chuan taksa leh rilru leh thlarau chawlhna famkim a thlen tak tak thei lo va, chawl ti siin kan hah tun tho a ni. Taksaa chawlhna piah lamah hian rilru leh thlarau chawlh hahdamna a la awm a ni, chu nun chu Kristaa chawlhna hi a ni. In ropui leh nuam tak takah inkhunga chawlin silh leh fen, ei leh bar lungkham ngai hauh lovin insiam thei mah ila kan taksa tan chuan a lo tha viau mai thei, mahse Krista nuna chawlhna tak takah kan chawlh loh erawh chuan in ropui leh nuam taka inkhung si hian nun khawhar takin kan awm ve thei thung.

Photo : Google Image

Lal Isuan Kalvari kraws-a min chhandamnaah khan taksa leh rilru leh thlarau chhandamna famkim a tel nghal vek a, kan thlarau chauh a chhandam lo va, kan rilru leh taksa pawh a chhandam tel a ni. Chuvangin Lalpaa chawlte chuan taksa leh rilru leh thlarauvah nun hahchawlhna famkim an nei thin. 'Ka thlarau a chhandam tawh tho alawm, duh duh ti mah ila a pawi tawh chuang lo...' kan tih chuan Chhandamnaah kan la chiang meuh lo tihna a ni ang. Pathian chhandamna chuan sual lam kawnga zalen turin min chhandam lo va, ama tana zalen taka nung tawh turin min chhandam zawk a ni.

Mahni inhnehtute hi hnehtu ropui ber te an ni

C. Lalmuankima

Newcastle, United Kingdom

 

Photo : Google Image

Ziaktu pakhat chuan, "Mahni inhnehtute hi hnehtu ropui ber te an ni...." tiin a ziak mauh mai le....! Thil azawnga thil harsa ber te zing ami chu mahni inhneh hi a ni awm e. Mahni inhneh hi thil harsa tak chu a ni phawt mai a, indonaa hnehtu ropui ber ber te pawh hian ral hlauhawm tak tak hneh thin mah sela anmahni chu inhneh theih loh chang an nei ve fo thin a, dai pelh rem rum chang an nei ve thin a ni.

Midang chu i thu hnuaiah dahin i hrual thiam dan azirin hun rei tak i hling bet thei a ni mai thei. Mahse mahni meuh inhneh tur chuan a dan a dang daih mai. Mahni inhneh a harsatna em em nia lang chu kan chakna leh chaklohna zawn kan hre lo thin hi a ni. Mahni chakna leh chaklohna zawn kan hriat thin loh avangin mahni kan inhneh thei thin lo niin a lang. Kan chakna leh chaklohna zawn hi ziak chhuak thin ila, tichuan midangte hnen atang pawhin thurawn lak hreh lo bawk ila, keimahniah eng hi nge thlak thleng ngai awm nia kan hriat te ziak chhuakin bitum ta thin ila chuan kan mu tanna tam tak hi chu kan su kiang thei ngeiin a rinawm. I hlimthla rethei takah khan engvangin nge i inhamtan reng? Nangmah ngei i inrintawk loh chuan tu in nge ring ang che? Mahni insitna leh inkhawngaihna hlimthla rethei tak hian kan nuna kan hlawhtlinna tur a dal fo thin reng a ni. Chuvangin mahni insitna leh inkhawngaihna hi hlawhtlinna min daltu hlauhawm tak a ni a, hemi lak atanga kan tal chhuah vat loh chuan engtik lai mahin hlawhtlin ni hmel kan hmu ngai lo vang.

Mahni inhneh fo thei turin nangmah leh nangmah kha infuih fo thin ang che. Mahni insitna leh inkhawngaihnaa i chen reng chuan i hlawhtling ngai lo vang. Chumi hmun atang chuan tal chhuak fo thin la, tichuan i hringnuna hlawhtling turin nangmah ngei kha i tling tawk a ni tih hi chhinchhiah fo thinin infuih fo thin la, hlawhtlinna chuan i lam a rawn pan tawh zawk mai dawn a ni. Chumi thleng thei tur chuan mahni ngei inhneh hmasak a pawimawh ber a, nangmah i inhneh hmasak phawt chuan i hmaah i kawng dal theitu an awm tawh ngai lo vang. Mahni ngei inhnehtute hi hnehtu ropui ber ber te an lo ni.

Kan pekna thinlung hi dik hmasa thin rawh se

C. Lalmuankima

Newcastle, United Kingdom

Kan pekna thinlung a dik phawt chuan a dawngtu tan hlimna a nih mai bakah a petu tan a let tam taka malsawmna dawn letna pawimawh tak a ni. Kan pekna thinlung a dik phawt chuan kan pek tlem leh tamah a innghat lo va, kan pe tlem emaw pe tam emaw kan nun a hlim tlat a ni. Mi thil kan pek dawnin kan pekna thinlung a dik leh dik loh hi kan inenfiah hmasak a pawimawh hle mai. Kan pekna thinlung a dik loh chuan cheng nuai tam tak pawh pe chhuak mah ila, kan nunah hlimna min thlen belh chuang hauh lo nia. Chuvangin kan pekna thinlung hi a dik tawk em? Lalpa lawm zawng a ni em? tih te hi ngaihtuah tel fo a tha a ni.

Photo Google Image

Kan rilruin thilpek leh zel zelah chutianga thinlung dik hmasak a pawimawh kher chuang em ni kan ti mai thei. Hei hi a pawimawh khawp mai, kan pekna rilru leh thinlung a dik loh chuan cheng nuai tam tak pawh pe chhuak thei mah ila, keimahniah hlimna thuruk min thlen chuang hauh lo nia. Kan pekna rilru leh thinlung a dik erawh chuan dere pakhat chauh emaw pawh pe ila nun a hlim tel tlat a ni. He thil hi mi hausa leh hmeithai pakhat thawhlawm thawh atang khan a hriat thei a, entawn tur pawimawh tak kan hmu thei [Mk 12;41-44; Lk 20;1-4]. Lal Isuan mi hausate aia hmeithai rethei te tu emawin dar tangka dere a thlak kha a tam zawk a tihna chhan hi a hnuai lama kan chhiar thlak zel chuan kan hmu thei a.Mi hausate kha chuan an neih aliama mi thawhlawm bawmah an rawn chhung lut ruih ruih a, inkhawmte mithmuhah chuan a tam na ngiang mai, mahse in lamah an la kawl teuh thung. Hmeithai rethei te erawh chuan in lamah pawh kawl nei tawh lovin a intunnunna tura a neih chhun a thlak a, kha kha Lalpa tan chuan a tam em em a, inpekna sang tak a ni zawk a ni.

Nun thiltithei - Tho leh Krista Nun [2018 Easter Sunday Pual]

(Rom 14:9; Joh 3:16-17; 11:25; Mk 16:5-6; Mt 28:5-7)

C.Lalmuankima

Newcastle, United Kingdom

"Isua Krista hi Pathian a nih a, ka tan a thi tak zet a nih si chuan a hnena inpumpek hi ka tan a ropui lutuk thei lo."

C.T. Studd

Kristiante hi sakhaw dang laka kan danglamna leh ropuina chu kan rin Pathian hi mitthi zing ata tho leh Pathian a nih vang a ni. Sakhaw dangten an biak pathiante chu vawiin thlengin an tho leh tih kan hre ngai lo. Keini rin Pathian erawh chu thihna hnehin thlan thim hnehin a tho leh a, a tho leh mai ni lovin chu a thawhlehna nun tawmpuituah min lo thlang ta zawk hi a ropui tawp thei lo a ni. 'Chu Krista thihna leh a lo nun lehna chhan chu, mi nung leh mitthi Lalpa a nih theihna hi a ni....' tiin Rom lehkha thawnah kan hmu a (Rom 14:9), chu nun thiltithei chu changtute kan ni hi a ropui tawp thei lo a ni.

Photo Google Image

Hmelma Setanan a hlauh ber mai chu a tho leh Krista nun hi a ni. Lal Isua a hring chan laia a taksa erawh kha chu a hlau lo nasa mai a, a changin a thlem a (Mt 4:1-11), a changin thiam thu ngei pawh sawi thei lova siamin puithiam lalte leh mipui hmangin sawichhiatna chi hrang hranga sawichhiain a velin a hnek a (Mt 26:67), a tawpah kraws lerah hial a khengbet a (Joh 19:18). Mihring a nihna a taksa thi thei chin zawng kha chu a duh tawkin a sawisa thei a, kraws lerah hial pawh khengbetin thlan thuk thim takah a phum a, ti fuh a inti hle a ni. Mahse nun thiltithei tho leh Krista nun zawk chuan thlan thuk thim ber leh thihna atangin a kai tho va, hmelma Setanan a dan beh zawh rual lohvin thihna te, thlan thim te, hremhmun te hnehin a tho leh ta a, chu nun thiltithei tak mai chu nang leh keia chan atan min lo hlan ta zawk a ni.

Kan nun chan ropuizia hi kan ngaihtuah ngai em? Hmelma Setanan a hlauh ber mai a tho leh Krista nun thiltithei changtute kan ni hi a ropui tak zet a ni. Chu tho leh Krista nun ngei mai chu ramhuaiten an hlauh ber a ni bawk. Amah ngei pawhin, 'Kei hi thawhlehna leh nunna chu ka ni; tupawh mi ring chu thi mah sela a nung reng ang....' tiin a lo sawi a (Joh 11:25).

Kalvari Ennawm [2018 Good Friday Pual]
(Isaia 53:4-6; Luka 23:47-49; 1 Korinth 1:18; Kolossa 3:1-4)

C.Lalmuankima

Newcastle, United Kingdom

"Hmangaihtu tan chuan hmangaihte che vel hi thil dang zawng aiin a hmuhnawm ber a ni."

Photo Google Image 

Hmangaihtu Pathian tana hmuhnawm ber leh a en kham theih loh chu a fapa Isua Kristan a thu zawma Kalvari krawsa a thisen luang ral raiha misualte min tlanna hi a ni. Khawvelah hian mihringte ngaiha ennawm leh thilmak leh ropui tak tak sawi tur a awm teuh mai thei. Kan Pathian tan erawh chuan a fapa thiltih tluka Pathianin a lawm leh ennawm a tih thil dang a awm chuang lo (Matt 3:17; 17:5).

Rev. Vanlalzuata chuan heti hian a lo sawi a, "Thil reng reng keimahni kan inhmuhna hi chu ennawm a tling thin." tiin. A dik hi ka ti teh e. Thlalakhonaah te, chanchinbua hming list-ah te, video-ah te kan tel vena chu ennawm kan tizualin kan hlut thin a, mi tam tak karah pawh mahni awmna zawn kan zawng tang tang thin a, kan rilruin kan chhinchhiah deuh bik thin a ni. He Kalvari Ennawm danglam bikna pawh tuna kan sawi tak hi a ni, he ennawmah hian nang leh kei kan tel ve a; Isuaah khan (Kraws lera a thihnaah khan) keimahni ngei kan inhmu tel tlat hi a ni. Chu chu a en thiam ve lo tan chuan a atthlak em mai lah tak a, sawichhiat bak loh chu tih tur dang awm hek lo le. Mahse a en thiam tan erawh chuan a hmuhnawm em em thung a, en tawh hnu pawhin ennawn leh fo kan chak thin. Chu chu fakna hla siamtu Rev. Liangkhaia hian a hmu chiang hle a ni ang, ‘I Lalpa kraws lera awm chu nungin i va hmu ang…’ tiin a lo auchhuahpui hial a nih kha. Kraws thiltihtheihna hrechiangtute chuan Lal Isua kraws lera a thihnaah khan anmahni an inhmu let a, an thih aia thia khan a nunsak leh zawk thu an hmuh tlang thiam avangin Lalpa chu nungin an hmu ta thin a ni. Thil danglam tak hmuh tum ngai suh ang che, nangmah ngei kha inhmu thin la; Lalpan i aia a tawrhna hlutzia hi i hmuh thiam ni apiangah Kraws lerah khan Isua thi tawh lovin nangmah ngei i thinzia thu kha i hmu thiam tawh ang.

Him taka min awmtir thintu Pathian thu

(Sam 4:7,8; 46:1-3; 18:2,19; Kolossa 3:1-3)

C. Lalmuankima

Newcastle, United Kingdom

"Pathian chu kan inhumhimna leh kan chakna, mangan laia tanpui vartu hnai reng a ni." (Sam 46:1)

Khawvelah hian himna tluantling hi a lo va awm lo tak em! Kan himna leh innghahna atana kan hman mek te hi eng eng emaw vang chauhva inhamtang ve tang tang te kan la ni a. Heng kan eng eng emaw vanga kan innghahnate hi a boral ruala chhe vek thei kan ni tlat mai!

Photo Google Image

Tunlai khawvel finna leh thiamna a sang tual tual a, hriatna a pung tual tual bawk a, a ralmuang lo tual tual a, himna a awm lo tual tual bawk a ni. Ram pakhat leh pakhat inngurin intichhe thei vek dinhmunah kan ding ta reng mai. Ralthuam nei tha ramten hmun hrang hrangah an ralthuam thatzia entirna remchanga hmangin kut an thlak a, kan chenna khawvel hi a tiralti sawt em em bawk. Chuvangin tunlai khawvel finna, thiamna leh hriatna changkang ber ber te hi inhumhimna leh innghahna atan a tlak loh va, ram pakhat leh pakhat inlaichinna a derthawn ni apianga intichhe thei vek te kan ni ta.

Hlawhchhamna chu a hmaichhanah ngei en thin ang che....!

C. Lalmuankima

Newcastle, United Kingdom

Kan kawng zawhah hian inchhuih palh chang te kan nei thin a, tluk palh chang te kan nei thin. Chumi atanga thawh leh nachang hre lo te chuan an tum ram an thleng ngai lo vang. Kan hringnunah hian hlawhchhamna chi hrang hrang kan tawk thin a, kan hlawhchhamna tawh dan te chu a degree a in ang lo theuh mai thei. Chung hlawhchhamna chi hrang hrang chu min bawituah kan neih palh ang tih hi a hlauhawm a, chumi lak atang chuan tlan chhuak thin ang che.

Photo image; Google Image

I hringnunah khan vawi tam tak insawhin i lo tlu palh a ni mai thei e, chumi atang chuan tho leh thin la, a tawpah i tum ram ngeiah hruai thlenin i awm mai ang. Vawi khat i tluk avang khan tlu hlen vang vang turah in ngai ngai suh ang che. Tlukna hmun atanga thawh tawh loh hi a pawi em em a, tlukna hmun atanga kan thawh tawh loh chuan beidawnnain a salah min man nghal a, engtikah mah tho leh thei tawh lo turin hlawhchhamna khurah min hnuk lut ta thin a ni.

Tlangsam par rinawmna

C. Lalmuankima

Newcastle, United Kingdom

Tlangsam par ( Google Image )

Tlangsam par hian Lal thar lo piang tur lawmin kum tin par hun bi neiin an par thin a, mihring thinlung hi chu kum a zirin a danglam thei thin a; a kum a tel mai ni lovin darkar tin, minute tin, second tin maiin a danglam thin a ni. Tlangsam par erawh chuan a par hun a theihnghilh ngai lo va, a danglam ngai bawk hek lo va. Khawvel mihringte chhandam tura Lal thar lo piancham phaphak a lo thlen dawn apiangin a par hun theihnghilh lovin mawi takin a rawn par chhuak thin a ni.

Pangpar dang angin rimtuina leh mawi chungchuanna a nei lo va, tlangsam par hmu thin chuan kan hre vekin a rinawm, amahah hian pangpar dang anga rintuina nei lo mah sela, a par hun bi thulh lovin vawiin thlenga rinawm taka Lal thar lo piang tur lawma a mawi thei ang bera a rawn par chhuak thin hian pangpar dangte aia a rimtui loh bikna leh mawi loh bikna a awm hauh lo, a par hun hi a hre em em a, a par hun hi a fuh bawk a, Lei leh van lalber piancham phaphak a lo thlen dawn apianga rinawm taka a rawn par chhuak thin hian a tihlu lehzual a, pangpar dangte aiin par hun a hria kan ti lo thei lo vang.

Mi tin ta tur Chanchin Tha
(Luka 2:8-20; Marka 13:10; 16:15; 1 Korinth 9:16-18)

Kan thupui hian a huam zau em em mai a, mi tin ta tur Chanchin Tha a tih avangin mi zawng zawng zingah kan tel ve chuan kan tan pawh a ni ve a ni tih hi hre hmasa ila a va tha dawn em!

Photo : Facebook

Mi zawng zawng zingah kan lo tel ve avang hian he 'Mi tin ta tur Chanchin Tha....' hi kan tan pawh a lo ni ve reng a ni. Kan retheih bik vang emaw kan hausak bik vang emaw kan hmel that loh vang emaw kan hmel that vang emaw etc...a nei tur kan ni lo va, mi tin ta tur Chanchin Tha tih a nih tlat avangin mi rethei berin a mamawh ang chiahin mi hausa ber pawhin a mamawh ve a ni. Mi fing berin a ta neih theih loh va, mi mawl ber a nih avanga duhsak bik a ni hek lo. Mi tin ta tur Chanchin Tha 'Lal Isua a lo piang a, a thi a, a thawhlehna thu lawmawm' hi mi hausa ber pumbilh theih a ni lo va, mi rethei ber hnen pawha thleng phak Chanchin Tha a nih tlat avangin vawiina nang leh kei pawh hian a zar kan lo zo ta zel a, Chanchin Tha lawmawm em em dawngtuah Lalpan min lo siam ta zel a nih hi.....!

Shopping Mall lian tak tak leh bazaar velah han kal ila, a thlawna neih theih hi zu han awm hauh lo va....! Thil tê ber leh ho bera kan ngaih pawh man chawia pek vek a lo ngai a, thil hi a thlawnin an zuar lo hrim hrim. Mi tin ta tur chu sawi loh, chhungkaw khat chauh tan pawh a thlawnin an zuar lo hrim hrim a ni. Lal Isua Chanchin Tha erawh chu mi tin ta tur Chanchin Tha a ni bawk a, a duh apiangte tan a thlawna neih theih a ni thung. Chu tluka Chanchin Tha lawmawm chu a awm chuang lo vang.

Social Media Hripui kan vei mek

C. Lalmuankima

Newcastle, United Kingdom

Khawvel changkannain a ken tel zinga a serh zinga a mei ang tih theih hial Social Media hian kan Thalaite nun min run mek a, a sang a sing telin nitin mai hian a kawlah kan tang mek zel a ni. Tunlai natna hlauhawm ber ber te ai pawhin a tai darh chak zawk a ni lawm ni tih tur khawpin a darh chak a, kan thalaite nun min va ei chhe na sa tawh tak em! Tun dinhmunah chuan bansan ai mahin a hluar telh telh bawk si a, a inven dan tha lah kan nei bawk si lo nen, a thim zawnga kan thlir chuan kawl a eng lo ve khawp mai. Khawvel changkanna leh Social Media-in a hrut phak loh chu tunlai lo riauva ngaihna leh rual pawl lo riauva ngaihna te a lo awm ta a. Social Media hmang ve lo chu awmhmunah khawhar taka kan awm mai bakah thil sual lian tak kan ti ta emaw tih tur khawpin mahni inthiamlohna nen rual kan pawl lo lam zel chu a nih hi maw….?

Photo Image : Google Image

Khawvel changkanna luipui lian anga luang dul dul mai chu nang leh keiin kan tap chhak zawl atanga lo dan beh theih zia zang a ni lo vang a, a laka kan fihlim theihna atana lo invenhim erawh kan tih theih awm chhun a ni ve thung. Tunlai thiamna leh changkanna sang zel khawvelah Media-in hma a lak chakzia leh thil a tih theihzia chu kan thalaite zingah inhrilh nawn ngai leh tawh lo khawpin kan chiang hlawm a, a hman tangkainaah a tha zawngin nge kan hman a chhe zawngin tih erawh hi mahni leh mahni kan inzawhna pawimawh tak atan kan hman fo a tha hle mai.

Mi puitlingte mizia/zia (Then khatna)

C. Lalmuankima

Newcastle, United Kingdom

Thuhmahruai

Mi puitlingte mizia/zia kan teh dan leh thlir dan hi chi hrang hrang sawi tur a awm teuh ang a, mihring kan ni a, ngaihdan thuhmunlo awm khawm kan ni a, chhul khat kuala thisen zawmpuite ngei ngei nen pawh hian kan ngaihdan leh duh dan a inthuhmun lo fo a ni.

Photo Image : Google Image

Chutianga ngaihdan leh hmuh dan in ang lo awmkhawm kan nih avang chuan kan awn lam (kan rilruin a awn lam) leh kan ngaihdan a buk rih zawng pawh hi a in ang vek lo thei a, kan ngaihdan a in anloh mai avanga mite ngaihdan pawisak loh pawh kha a puitling lo hle thei bawk. Chuvangin kan ngaihdan ang diak diaka thil a lo kal thin lo a nih pawhin mite ngaihdan va hluta va zah thiamsak fo hi mi puitlingte miziaa bet tel tlat leh anmahni tizahawmtu pawimawh tak a ni tih kan hriat reng atan a tha hle mai.