Lalpaah i tlan lut thin ang u

C.Lalmuankima

Newcastle, United Kingdom

Nimin 5th September 2015 (inrinni) khan thil mak deuh mai ka hmu ve tlat mai pek a, (thenkhat tan chuan a ho viau vang a) mahse ka tan chuan thil mak ve deuh a nih avangin ka han share ve teh ang.

Photo : Google Image

Ka inluahpui (room leh lama mi...a hming chu ka sawi lo mai ang a...) hian ka tuk tho kitchen lama breakfast ka siam mawlh mawlh laiin mangang lungchhe tak mai hian min rawn pan a, good morning hlei thei lo khopin a rilru a mangang a, a lungngai a ni. Naupang tap leh Hmeichhe mangang lungchhiatthlak taka tap hi ka lo hmu ve fo tawh thin a, patling (tlangval) lungchhiaa tap erawh ka lo hmuh ngai meuh loh avangin ka rilru a khawih hle mai a, (video/movie ah te chuan hmu ve bawk thin mah ila, hmaichhana hmuh nen chuan a dan a dang kher mai.....) tichuan ka han zawt chiang a, ni hnih kal ta khan medical report lamah a pum lam chianlohna endoscopy (kawchhung lam en ngai....) khopa a awm avanga lungngai leh a ekah thisen a tel thu hi niin. A mangangin a mitmeng te hi a dul ruih a, ka thiam ang tawk chuan ka han thlamuan ve a, tichuan a darah kut nghatin ka tawngtaisak nghal a......A rilru hahna chu tawk fang chu a chhawk zangkhai ta a......

Ka han sawi tum tak zawk chu..... kan awmna hmun theuhvah hian kan chheh vela thil thleng leh kan nuna thil thlengah hian chanchin chhia kan dawn/hmuh chang a awm thin, (mihring kan la ni miau si a, chanchin thalo hriat chang kan nei thin ang....) chutih hunah chuan Lalpaa kan tlan luh vat hi a lo pawimawh ber dawn a ni tih hi ka sawi uar duh hle a ni. Lalpaa kan tlan luh phawt chuan a ni chuan kan harsat, manganna te leh kan phur te min chhawk zangkhai turin a inpeih reng a, a hnena pek mai leh a chunga nghah mai hi kan tih tur hmasa ber chu a ni. Chuti lova mahnia chin fel kan tum chhung chuan kan nun hi a thlamuang thei chuang lo vang. Hmelma lah hi a fing em em mai si a, thu dik zat ve hmangin mi rawn thlem leh ang a; a ni dawn tak e tiin khawvel lam thilah kan rilru kan pe leh ang a, thu dik tluan tling ni lo na na na chu a tawpah lungngaihna min siamsaktuah a chang leh dawn a ni. Chuvangin mihring kan nih chhung chuan kan chunga thil lo thleng te hi (a bik takin harsatna, lungngaihna, manganna....) keini chuan kan dang zo lo vang, mahse a lo thleng chung chung pawha Lalpaa kan tlan luh phawt chuan heng harsatna zawng zawng hi a chinfel dan a lo awm zawk a ni.

LALPA chunga lawmna chu chakna
(Neh 8:9,10; Sam 4:7; 1:2; Heb 3:17-18; I Thes 5:16-22; Phil 4:4;)

C.Lalmuankima

Newcastle, United Kingdom

Photo : Google Image

Bible-ah hian 'Lawmna' tih thu mal hi hmuh tur a awm nual a, a bik takin LALPA A lawmna, LALPA avanga lawmna, LALPA chunga lawmna leh adt...a ni deuh zel a; kan thupui sawi tum pawh chu ti lam hawi zawng chuan sawi kan tum dawn a ni. 'Lawmna' tih thu mal hian pawimawhna riau a nei a, mihring kan nih chhung chuan kan tlansan theih hauh loh tur, kan nuna bet tel tlat, mahse pawimawh em em si a ni. Lawmna hi a chi neuh neuh va kan then dawn chuan then hran tur tam tak a awm thei ang a, kan thu sawi tum a fiah lehzual theihnan chi hnihin then hran kan tum dawn a ni. Lei lam thila lawmna (LALPA tel loa lei lawmna ) tih leh LALPA A lawmna....tiin.

'Lawm' han tih hian LALPA tel miah lo pawhin he khawvel thilah hian a lawm theih teh meuh a. Mahse lawmna ze dik leh tluantling a nih tlat loh avangin a rah chhuah erawh a tha lem lo a ni. LALPA tel lo a khawvel thila lawmna hi chuan kan lawm zat chiah min titap leh thin. Lei lam thila lawmna hi chuan mihring min tichapo va, chumai ni lovin nei ve lo te leh hre ve lo te chaldelh leh hmuhsit nan kan hmang fo thin. Entirnan: kan sumdawnna a lo hlawhtlinin emaw, thil thar motor, bike, thawmhnaw thar kan neih in emaw te hian nei ve lo te chunga intih theihna leh inlak khum kan ching thin a ni.

Kan pulpit hi ba thinna a ni em...?

C.Lalmuankima

Pathian hi a zahawm teh reng nen, thahnem ngaih luat vang kan ti dawn nge kan at/mawl vang? Kan pulpit te hi ba thin nan kan hmang ta zawk a ni lawm ni...tih mai turin kan inphut nasa ta mai le. Dan thu hnuaia awm kan ni tawh lo va, khawngaihna hnuaia awm kan ni tawh zawk. Thuthlung Hlui Dan hmanga fel, that, thianghlim famkim tura in phut vak hian awmzia a nei tawh lo. A khawngaihna Dan hnuaia awm kan nih angin a khawngaihna ropuizia puan chhuah mai hi kan tih tur awm chhun a ni.

Photo : Google Image

Pathian thilsiamnaah kan tel lo va, a remruat leh tha a tih angin min lo din zawk a; chu chu nang leh keia han complaint theih zia zang a ni lo. A remruatnaa lawm thiam mai hi a lo hahdam ber zawk. Chuti ni lova Lalpa remruatna a lawm tum lova kaw dang hreuh kan tum chhung chuan kan nunah hian in enfiah tur kan nei tihna a ni.

Mi fel aiin mi sual thihna thu, Kalvari tlanga misualte aia a thihna thu hi Chanchin Tha chu a ni a, Lal Isuan misual hi a en kham thei reng reng lo. A hmaia an ben dukna te, an hnekna leh a hmaia chil an chhaka hrehawm tinrenga an sawisakna te chuan min hmangaihzia a tilang a, fakna hla siamtu in ' min hmangaih hi tuman an dang zo lo ve' a tih angin misualte min hmangaihna hi dan a hnekin a zual zel zawk a ni.

Tehna dik lo thei lo Isua (Pathian thu)
Martin L. Chhakchhuak

'Nupui/pasal kan inneih ni atanga tehna sang tak hmanga kan inteh thinna hian inthenna a chawk chhuak fo thin a, hmangaih luat vangin kan inthen chawk thin....' 

Hmangaih luat vangin kan inthen... han tih chu,a ti mah mah in ti mai thei. Mahse a nihna a ni tlat si a ni. Huat vangin kan inthen.... ti ila chuan thu dik awm sa a sawi a nih hi min ti mai thei, mahse kei chuan heti zawng hian ka thlir ve tlat. Nupaa kan insiam hma atangin he Hmangaihna hi a lo piang a, chu chu a vawn nun dan kan thiam loh thin avangin chu hmangaihna chu huatnaah kan chantir fo thin. Huatnaa kan chantir chinah chuan pakhat leh pakhat inkarah lak tlak awm lo khawpin kan inchhuah a, chu chuan nupui/pasal inthenna hi a lo chawk chhuak ta thin a ni. Nupui/pasal inthen ta te hi han zawt hlawm ila, an chhanna tam zawk chu an inhuat vang a ni hauh lo vang. 

Photo : Google Image

Kristian Chhungkua 

Chhunzawmna

C.Lalmuankima

Newcastle, United Kingdom

Kristian Chhungkua chuan Goal Setting (tumna) a nei tur a ni. Goal tih tawngkam hi mizo tawng emaw tih mai tur khawpin kan hmang rim a, a tawi fel thei ang bera sawifiah dawn chuan Thlen Tumna ti te pawhin sawi ta ila, a thu tum kan sawi bo em lo vang chu maw. (Thlen tumna hi goal tiin kan sawi zel tawh ang.) Kristian Chhungkua chuan goal setting tha tak kan nei tur a ni. Tum bul bal nei lo chhungkua chuan thlen tumna a neih miau loh avangin a hmabak chu thim chhah tak a ni ringawt.

Photo : Google Image

Mihring tum bul bal nei lo chu lawng karfung nei lo nen an lo tehkhin thin a, an tehkhin fuh hlein ka hria. Lawng karfung nei lo chu thliin a chhemna lam apiangah a kal a, a thlen tumnaah a thleng thei lo ang hian mihringah hian tumna bul bal nei lo te chu thli chhem len kan sawi ang khan miten an tih avanga tha ber ta emaw tiin leh mite sawi apiang leh tih apiang awiha phar buai a awl duh hle a, chu chuan kan tum ramah min hruai thleng thin lo a ni. Chuvangin Kristian Chhungkua pawh hian tum bul bal tak a nei tur a ni.

Mahni i in el thin ang u.....( Mahni i in teh thin ang u.....) 

Japan thufing chuan,'Mite er suh la, mite el hek suh,' 'Nangmah zawk kha in el ang che' a lo ti a. Vawi tam tak ka ngaihtuah nawn leh thin pawhin a lo tha hlein ka hria. Bible-a Tirhkoh Paulan,' boruak mai hnek lova mahni inhnek thin...' a sawi nen khan a inhnaih hlein ka hre bawk.

A ni tak e..... mi er chu a tha lo law law a, ringtute tan phei chuan tih hauh loh tur a ni a, mi i el erawh chuan,'i el hnehin i hmusitin i chapo khum ang a, i el hneh loh chuan i itsik thung ang' tih hi ka rilruah a rawn lang hlawl mai. Hei vang hian a nih ka ring, tirhkoh Paula ten intihsiakna thianghlim bei zawk tura min lo chah ni. 

Photo : Google Image

Mihring nih chhung hi chuan kan mihringpui te nen a huhovin kan chengho lo thei lo va, chu a huhova kan chen ho chhung chuan nitin mai hian zir tur hi kan nei zel a ni. Mi tumahin ka zir zo tawh, ka hre vek tawh, ka thiam vek tawh a tih theih loh va; apui apang alian atein tungchhova kal mihringte hian Hringnun Zirlai hi kan zir vek a ni. Kan hringnun zirlaiin min chim chin chu a in ang lo mai thei, mahse Zirna zawng zawnga Zirlai hnuk sei ber mai Hringnun Zirlai hi chu tumahin thiam zawh, hriat zawh, zir zawh a awm thei lo va, hriat belh zel a ni a, kan hringnun a tawp hun hi kan zir zawh hun chu a ni tawp mai. Rangon pa ti ti thiam leh fiamthu thiam Pu Kawlvelan, 'Mi zawng zawng hi Zirtawpniah kan thi vek dawn....' a tih hian fuihna leh finna thu a va keng tel nasa teh reng em....! Kan Hringnun Zirlai kan tawpsan hun tur chu kan hringnun a lo tawp hunah chiah hian a ni, chu tak chu Zirtawpni dik tak zawk chu a ni.

Kan ram (Myanmar) ram hrang hrangah tui lian

 

 

A pawi tih hian a hrilhfiah zo lo a ni ber e, chhiatna zawnga chhiatna rapthlak ber te zinga mi, mite tawrh tur chauh emaw tia kan lo ngaih thin kha Khawchhak Zofate chungah a thleng ve ta tlat mai le; a pawi tih tawngkam aia thuk zawk hi awm thei se la chuan chu ngei chu kan hmang duh zawk ngei ang.

 

Khawchhak Zofate chunga thil thleng hi a rapthlak tak meuh meuh va, Pathian hnena tanpuina dila tawngtai ngawt loh chu kan tih theih a tlem hle mai.

 

Photo : Facebook Image

Tui lianin a tih chhiat buh... leh bal, in leh lo, kawng pui inkalpawhna te hi cheng man tam tak man tur a ni. Hmun tam takah zirna sikul in thlengin khar a ni a, thil man a let eng emaw zatin a sang nghal a,...... Heng zawng zawng aia pawi ber leh rilrua lo lang lian ber mai chu, tui lianin a ken tel natna hrithalo chi hrang hrang hi a ni. Heng natna hrithalo te hian tui lian a reh hnuah pawh min la nuai dawn chauh va, mipuite pawh kan fimkhur hle a pawimawh dawn a ni.

 

Sawrkar tha ah chuan ramdang tanpuina te hi, chhiat tawk te hnenah a thleng pha thin a; kan sawrkar hian ram changkangte tih danin chhiat tawk te chungah hmalakna runpui nei ve thei thin se la aw....tih hi rilruah a rawn lang nghal vat a. Kum 2008 Nargis thlipui kan tawh kha kan hre theuhvin a rinawm, khatih hun laia an thiltih anga an kalpui leh a nih ngai chuan tuilian tuartute chunga harsatna lehzual lo thleng tur hi a sawiin a suak loh a ni ber mai.

Lalpa tellohna hmun apiang hi Hremhmun a ni a, Lalpa telna hmun apiang erawh Vanram a ni ve thung. .....tih thu hi.



I nunah khan Lalpan Lalna a chang thin em? Nge Lalpa khi chhiahhlawh ang leh inhlawhfa ang lekah kan ngai zawk? Chhiahhlawh anga duh hun huna tirh phar tawk lekah leh inhlawhfa anga kan mamawh hun chauhva koh leh thawhsak turin rawih/koh kan ching zawk...? I nunah khan Lalna a chang tak tak em...?



Photo : Google Image

Lalpa khi i nuna Lalna a chan dawn tak tak chuan Nangmahah ngei pawh sawithiah tur (paih ngai) tam tak a awm a ni. Lal Isua ngeiin tu pawh a kraws pua mi zui duh chuan nitin hrehawm pawi sa lovin a kraws puin mi zui rawh se...a tih ah hian mahni nun inphatna a tel nghal a, rawngbawlnaa ke kan pen tak tak dawn hian kan chenpui chhungte ngei ngei pawhin min daltu an ni tel ve leh tlat thin. Chu aia min daltu, pal tlang harsa ber mai chu keimaha Keimah hi a ni fo thin. He kan pianpui tisa thinlung mizia hian min hnuk bet tlat thin a, chu ngei chu Lal Isua Krista thisen hmanga nitin Hnehna puan khum a ngai ta thin a ni. Chumiah chiah chuan nitin a kraws put theihna a awm. Hei ngei hi a ni Tirhkoh Paula ngei pawhin,"Nitin ka thi thin...." a tihna hmun ngei kha a ni.



Nitin a kraws puin mi zui rawh se....a tih avangin put zeuh zeuh leh ni kar thlak a put a kawk lo va, nitina kan tisa thinlung mizia rawn in lar thin kan tih thihna hmunah chiah hian kan hriat loh hlanin nitin a kraws kan lo pu ta thin a ni. (Keini zawng, ni khat kan pu a, kan sim ti tih mai emaw ni tih turin kan kraws put lai hi kan hlamchhiah fo thin......) Mahni nun theuh i in enfiah ang u. Nitina a kraws putna hmunah chiah hian a ni Lalpan kan tana a buatsaih, kan chan tura a ruat chu kimchang taka kan lo chan thin ni.

Kristian Chhungkua 

Chhunzawmna

C.Lalmuankima

Newcastle, United Kingdom

Kristian Chhungkua chu zavaia Kristian a nihna ni mai lovin Chhungkuaa Kristian nuna chenhona a ni. Kristian nuna chenho hi a va pawimawh tak em...! A hmingin Kristian kan ni ang a, Kristian nuna cheng pha lo ringtu kan nih vaih chuan ringtu azawnga mi khawngaihthlak ber kan ni ang tih hi a hlauhawm hle mai. Ringtu ni ve si, Lalpaa beiseina pakhat mah nei hauh lo ringtu i/kan nih phei chuan i/kan nun chan hi inenfiah nasat a ngai hle tihna a ni. Chung mite chu an damlai pawhin an thi a ni.

Photo : Google Image

Kristian Chhungkua hi zir mai a tawk lo va, inzirtir leh inkaihhruai tel a ngai a ni. Dr Billy Graham-a chuan,"Tunlai in tha, bungraw famkim leh cheimawina kim hian Chhungkua a siam thei lo. In chhung hi Hotel emaw, mite chawlhna leh chaw eina hmun a ni mai lo va; Thlarau lam thiltihtheihna leh inzirtirna hmun he leia awm, van hnaih ber chu a ni." a ti a. He evangelist ropui tak thu sawi hi a va ropuiin tha ka va ti tak em...! Mi tam takin chhungkua kan din dawna kan tih fuh loh fo mai chu, in tha pui pui, building lian leh changkang tunlai tak taka sak, a chhung bungrua pawh changkang, nalh leh manto tak taka chei mawi, pangpar huan (garden) mawi tak leh tui chenna (swimming pool) pawh nei thlap, car nalh leh manto tak tak hung tlar thei leh nei tha te chu chhungkaw hlawhtling leh ropui ber berah kan ngai fo thin hi a ni. Chu chu a ni hauh lo.

Lalpaa beiseina

Chhungkuaah hian Chair latu (chairman thawktu) chu LALPA a nih phawt chuan, chu ngei chu tehna puitling dik lo thei lo a ni a; engkim mai hi a fel vel vek thin. Keini chu LALPA khi chairman thawhtir lovin tirhkah ah hman kan tum zawk thin a, keimahni ngeiin chair (chairman hna) lak kan tum thin avangin kan chhungkaw din hi a buai nuaih ta thin a ni.

Photo : Google Image

Engkim kan tihna apiangah Lalpa khi dah lal zel ila, Lalpaah khian innghat ngam zel ila, kan nun hi a hah chawl ve tawh ang. Nang leh keia chhungkaw mamawh chu nang leh kei aiin Lalpa khian a hre zawk daih a, nang leh keia chhungkaw tana tha tur pawh a hre zawk a ni. Amahah khian beiseina nghat zel ila, rinna chu thil beiseite awm ngeia hriatna, thil hmuh loh te hriatfiahna a ni (Heb 11:1) a tih angin kan beiseinate min tihhlawhtlinsak turin kan Pathian khi a inpeih reng a ni.

Thlarau Thianghlim tihharh tharna dilin i tawngtai ang u

C.Lalmuankima

Newcastle UK

Lalpa tan i hun engzatnge i pek ve thin tih leh Thlarau Thianghlim tihharh tharna a lo thlen leh theihnan i tawngtai ngai em...tih hi mimal tin te i han inzawt teh ang u....

Thlarau Thianghlim hi min pawl harh leh turin i au fo vang u..... A bik takin he kumpinu leh khawthlang ram tan hian i au lehzual ang u. Thlarau Thianghlim tihharh thar lehna kan mamawh a ni.

Tum khat chu kan tawngtai zawh zanlai thingpui ina kan break laiin tlaivar tawngtainaa min hotu an pastor - nu leh kohhran member dangte nen chuan tawk fang kan ti ti a; anni pawhin an sawi ber chu.... engtinnge he kohhranah hian mi tam zawk kan hip theih ang? Engtinnge UK a harhna lo thleng leh tur hian hma kan lak ang.....tih te a ni a. Kan ti ti a kal chho zel a, kum 1950-70 inkar vel kha chuan tuna Brunswick Methodist Church ah hian Pathian thlarau kaihhruaina changa member sang tel in biak in an pan mup mup thu an sawi a, inkhawm tur pawhin inkawm tan hma darkar hnih/thum vela kal lawk a thutna lo va hauh lawk sa a ngaih thin thu te an sawi chhuak a..... kum 40-50 bak a la liam lo, tun hmaa kohhran dinhmun an sawi leh vawiin ni a kohhran dinhmun chu a va inthlau ta em..?? Chawh rualin member 100 pawh kan/an inkhawm ang em.. tih khawpin kohhran dinhmun hniamzia an sawi hian ka ngaihtuahna lung a tichhe tak meuh meuh va, ka rilru a rum a ni ber mai...! Tawngtai nasat a va tul tak em....! tih hi ka ngaihtuah nawn fo thin.

Kristian Chhungkua Chhunzawmna

C.Lalmuankima

Newcastle UK

Mahni part lova kan luh phawt chuan zaipawl a buai nuaih thin angin Chhungkua pawh hi kan dinhmun tur ni lova din phet kan tum hian kan buai nuaih ta thin a ni. Pain nu dinhmun chuh phet tum se la emaw, nuin pa dinhmun luah lam phet tum se la emaw, faten nu leh pate dinhmun lak sak phet tum se la emaw, movin a pi dinhmun luah lan tum se la emaw a nih chuan chhungkua hi a buai ta nuaih thin a; mahni part lovah kan sa tihna a ni a; mahni part ni lo na na na chu kan zaipawl a buai ta nuaih thin a ni.

Photo : Google Image

Thil reng reng chu mawhphurhna nei ve nia inhriatna hian nun a tihlim a, neitu chan a chantir a; taihmakna bul pawh a ni a; chu mai ni lovin nun a khalh kal a ni. Mawhphurhna nei ve nia inhriatna hian mi a tihuaisen a, mi puitling nihna leh mi zahawmah min siam bawk. Chuvangin tun dinhmuna i mawhphurhna kha engnge ni le? I mawhphurhna hlen zo thei lo khawpin eng enginnge dal thin che? I mawhphurhna hlen ngam lo khawpin i dawihzep thin em? Kan thu sawi tum te a fiah theihnan chhungkuaa mimal tinte dinhmun i han sakhi chul ram fan thuak thuak dawn teh ang.

Lalpa malsawmna chhiar thiam ringtu

C.Lalmuankima

Newcastle UK

Photo : Google Image

Kan neih chhun te te pawh hi Lalpan a khawngaihna a min humsak loh chuan a ni lo lamah an peng fo thin. Bible - a Zawlnei Hagaian a sawi 'ip mawng pawp...' kha a lo thleng ta thin a ni. (Hagaia 1:6) Tam tak ching a, tlem te chauh seng a, ei teuh si a puar leh tlai si lo hian a awm theih a ni.

Lalpaah zel hian kan neih ang ang te hi i kawltir ang u, tichuan anin eiraltu leh rawk hmang leh suamhmangte lakah min lo humhimsak zel dawn a ni. Chuti a nih lohva ni khatah pawh cheng eng emaw zat hai chhuak (la lut) thei ni mah ila, chung lamin eiraltute leh rawktute laka min venhimsak si loh chuan ip mawng pawpa thil thlak ang maiin a tla hiau hiau mai dawn a ni.

Kristian Chhungkua

Kristian Chhungkua

Bible bung leh chang : Sam 127:1; Matthaia 7:24; Sam 68:6

By C.Lalmuankima

Newcastle UK

Photo : Google Image

Tunlai chu 'Kristian Chhungkua' tih thupui hi ka rilruah a khat liam ve teh tlat a, lei danin mahnia chhungkua pawh la din si lovin a Kristian Chhungkua thupui han sawi chu....tiin ka inthiam lo hle mai a, ka sawi ngam lawk lo zawk a ni. Mahse zawlnei Jeremian, 'Ani chu ka lam lo vang a, a hmingin thu ka sawi tawh hek lo vang..ti mah ila, ka ruh chhunga mei kang inkhung ta ang mai hian ka thinlung chhungah hian a awm si thin; ka pai hle hle zo lo va, ka chelh ngang lo a ni....' a tih ang deuh hian ka rilruah a thi thei tlat lo mai a, ka han au chhuahpui ve leh thawr mai a ni e. (Kristian Chhungkua hi nu leh pa, chhungkaw din tawh te tan chauh a ni tih a lo awm lo kher kher hian sawi chhuahna hun remchang min siamsak a, min tihuai sawt bawk.... hehe )

'Kristian Chhungkua' tih thupui hi kohhran ho leh khawtlangah te seminar leh consultation te neiin kan lo nei fo tawh thin a, a hming han lam rik atang ringawt pawh hian kan rilruah a ruangam tur chu kan mitthla thei nghal maiin a rinawm a, kan zingah a mikhual tawh lo hle mai a ni. Chutia kan zinga mikhual lo hle e ti lo chuan....Kristian Chhungkua din erawh zu har fu a maw le.....! A har em avanga tlanchhiatsan mai chi lah ni hek suh, Kristian kan nih angin Kristian chhungkaw din erawh kan mawhphurhna a ni miau si a, a bik takin Lalpain a luah chhungkua emaw Lalpain a awmpui, a pawl thin chhungkua emaw nih hi kan thupui innghahna tur chu a ni e. 

Engvangin nge Chanchin Tha hi hril a tul?

C. Lalmuankima

Newcastle, United Kingdom

Bible bung leh chang : Mark a 16:15; Tirhkohte 1:6-8; 17:11; Matthaia 28:18-20.

Chu zawhna chu a van mawlthlak deuh ve in ti mai thei. Mahse a mawh lo ve.... kohhranin a nih dan tur leh a tih tur a tih loh chiah hian kohhran chuan a thanmawh phah a, Thlarau lamah a chauh phah a; kohhran nunglo kohhran thi kan tih phah thin. Pathian ringtute, Pathianin ringtu hnena a hnathawh tura a thupek ropui ber leh ngaih pawimawh ber mai chu Chanchin Tha hril hi a ni miau si a. Chu chu ringtu hna tur reng a ni. Chu hna chu ringtuin a tihpuitloh ni apiangah kohhranho te zingah ngetna leh hri tha lo tak tak a lo thleng thin a; kohhran thi leh ro a lo awm phah thin a ni.

Photo : Google

"Zalenna Famkim"

C.Lalmuankima

 Bible bung leh chang : Ezekiela 36:27; Rom 7:6; II Korinth 3:17ff

 

Photo : Google Image

'Lalpa thlarau awmna apiangah zalenna a awm thin ' tiin Bible chuan min hrilh a. Lalpa thlarau awp behna hnuaiah chuan Zalenna Famkim a lo awm ta thin a ni. Chu zalenna famkim chu tu dang ni lovin amah Lal Isua ngei chu kan zalenna famkim leh min thlentu chu a ni. Pa thinlung hliam hnu chu ama (Isua) thisen hmangin a han thawi dam a, chumi azarah chuan lei leh van inrem tawh lo chu, Isua Krista thisen avangin kan lo inrem leh ta a, Isuaah chuan Remna Thuthlung kan siam ta a ni. Chu Remna Palai Isua nun neitu apiangte chu, mi zalen an/kan lo ni ta a, Isua zarah Pathian chu 'Ka Pa' 'Ka Pathian' kan lo ti ve thei ta a ni. (Johana 20:17)

 

Chu zalenna famkim min siamsaktu Isua avang chuan Pathianin ni tura min tih chu kan lo ni thei ta a, dawng tura min tih leh chang tura min tih chu Isua zarah a ro luahpuitute kan lo ni ve thei ta......!

Kan thupui lamah khan kir leh dawn ta ila; zalenna famkim kan tih angin zalenna hi chi khat chauh a awm lo tih chu a hriat mai a. Kan nitin nuna kan thil tawn atanga zalenna kan neih hi a pawimawh hle a ni. Zalen tih avanga nun thaw veng, thil engpawh ti ila a thiang vek, thiangzau zirtirna lam kha kan kalpui tum dan a ni lo va, Zalen takin Lalpa rawng hi a lo bawl theih a ni tih leh engthawl taka nun hi a theih a ni tih hi kan sawi uar tum zawk chu a ni e.

A eng zawnga thlir thiam

Martin L. Chhakchhuak

Newcastle, UK

Photo : Google Image

‘A eng zawnga thlir thiam’ han tih rikngawt mai pawh chu, chu pa chu thupui vuah tur a van hle mai in ti mai thei a. A dik reng a ni, thupui han vuah mai tur ka hre lo va, ‘a eng zawnga thlir thiam’ tiin ka han vuah ve tawp a, a dik emaw chu…..

Kan thupuia a landan atang chuan thlir dan chi khat chauh a awm loh thu a lang sa nghal pang mai a, thuziak thiam leh mi ningkhawng hre thiam thin/chin tan chuan kan thupuiin a sawi tum chu a rin zawn theihin a nih dan tur a hmuh tlang ruah theih mai awm e. Thuziak thiam chuan eng eng emaw ni hmangin a behbawm an han phuah khawm/fawmkhawm a, thuziak ngaihnawm takah a lo chang zel thin a; keini ang tualto pa mawl tan erawh chuan a behbawm leh ngaihnawm dan han phuah chuan vak ngaihna kan hriat ve dawn loh avangin a nihna ang ang leh mawlmang takin kan at thlasik mauchang puah ve phawng phawng mai dawn a ni.

Hnam Rohlu Thalaite

C. Lalmuankima

Newcastle UK

Photo : Google

‘Thalaite hi khawtlang tizahawmtu, tithlamuangtu, ral hlauhawm leh sapui laka khawtlang humhimtu, in lam leh ram lama hnathawktu ber, tanpui ngaite tanpuitu, mi harsa zawk leh mi chhumchhia zawk te khaidingtu..’ tiin lehkha ziaktu pakhat chuan thalaite pawimawhzia a lo ziak lang tawh a. A dik hlein ka hria. Thalaite hi khawtlang nun innghahna kulhpui/kulhbing (lungpui) an ni tak meuh meuh va, hmanlai pipute atang pawha khawtlangin innghahna lungpui atana a hman, nu nau leh tar leh upa te pawhin an lo thlamuanpui thin te an ni. Chuvangin thalaite hian ram leh hnam siamthatna kawngah hian mawh an/kan phur nasa em em a, ram leh hnam siamthatna kawngah thalaite hian mawh an phur angin ram leh hnam tlakchhiatnaah pawh a mawh phurtu chu thalaite an/kan ni.

Photo : Google Image

Vawiin khan Tynemouth, Newcastle ah World War I atanga kumza tlinna Centenary Memorial Service kan hmang. Indopui I na atanga kumza champha (1914-2014) hriatrengna hunserh Tynemouth ah kan hmang a, mipui kalkhawm kan thahnem hle a ni. He Indopui I na, kum 100 tlin hriatrengna hi Tualchhung kohhran puithiamin (priest) min kaihruai a, tichuan Military lam atang leh Civil lam atangin mipui thahnem tawkin urhsun takin kan hmang a ni.

Sam 23:1,2 atanga ringtu nun zirna

C. Lalmuankima

London

Lalpa chu mi vengtu a ni a, ka tlachham lo vang. Ani chuan hlobet hring dup hmunahte mi bawhtir thin a, chawlhna tuikamahte mi hruai thin. (Sam 23:1-2) 

Photo : Google Image

He Bible chang tawi te hian Pathian thlamuanna thuchah a van pai hnemin a van pai ropui tak em....! He Bible chang tawi te hi ka naupan laia (Upa dan takin kan naupan lai chuan i han ti ve khanglang i la....) ka Bible chang by-heart (memorized) hmasak ber te zinga mi a ni a. 'Naupangte u, Lalpaah chuan in nu leh in pate thu zawm rawh u..... Ephesi 4:1) tih loh vekah chuan ka by-heart hmasak pawl a ni.

Naupan lai chuan a chhan leh vang pawh hrethiam chuang lovin nu leh paten a tha an tih avangin kan zir a, kan chham liam satliah mai mai a; kan ngaihtuah zui lem chuang hlei lo va; thu tha hla tha a pai tam hle a ni tih lam chu a lang lo hle a ni. Pathian thu, chanchin tha hmanga ka thlarau mit tihmen a lo nih ve hnua ka ngaihtuah let hian...." Aw...... he Sam ziaktu Lal Davida hian Pathian khi a lo van hrechiang teh lul em....!" tih te min ngaihtuah chhuahtir a,... Lalpa, Amah vengtu Lalpa khi a hriatchian em avangin,' Ka tlachham lo vang.....' a ti tawl mai a ni!

Lalpaa lawmna

( Sam 4:7; Phil. 4:4; Hab 3:17-18; 1 Thes. 5:16-22; Neh. 8:10)

'Lalpaa lawmna' han tih rikngawt mai pawh chu thupui thlan tur hriatlohthlak mang e in lo ti pawh a ni mai thei a, thupui dang han thlan chhuah ka tum tak ngial pawhin he thupui bawk hi a rawn lang leh thin a; tun tum atan chuan a pawimawh a ni ang e.... tiin 'Lalpaa lawmna' tih hi ka han bel ve chawt mai a ni e. Kan thupuiin a sawi tum kan phawk zo lo vang tih erawh rilruin a phang deuh hlek a......

Photo : Google Image

Heti hian ka ngaihtuah a : Pathian hian a mah tiha lawmna nasa zawk chang zel tur hian min duh si a, keini lah chuan heti zo zai a malsawmna, damna, hriselna, hausakna, leh hmuingilna chi hrang hrang kan chang/dawng chung pawhin a hnena lawmthu sawi na chang kan hre thin lo erawh hi chu a hrilh hai ve thei ngawtin ka ring a lawm le.

Kan thupui kha hre rengin 'Lalpaa lawmna' tih a nih kha. Kan thu sawi tum a fiah theihnan 'Khawvela lawmna' tih hi i han sawi hmasa dawn teh ang. Khawvela lawmna han tih ngawt mai pawh chu kawng tam takin sawi tur a awm ang a, eg. kan sumdawnna a lo hlawhtlin changa lawmna, kan faten an zirna an pass avanga lawmna, motor thar neih avanga lawmna leh adt..... thil dang tam tak avanga lawmna te a awm ngei ang. Heng zawng zawng hi he khawvela kan cham chhung hi chuan an tha vek a, anmahni mai chuan sualna an nei hauh lo. Amaherawhchu Lalpaa lawmthu kan sawina atana hmanruaa a tlin loh phawt chuan kan mittui min titla tamtu mai an lo ni thin. 

Isua chuanna sabengtung no kha....

Isua chuanna Sabengtung no kha…. (Mt 21:1-11, Mk. 11:1-11; Lk. 19:28-40; Joh 12:12-19)

Photo : Google Image

Kumin Tumkau (Pathian ni) ni pawh a lo thleng leh ta reng mai….. rilru mitthlaah Lal Isua leh a zirtirte leh mipui sang tam tak ten Jerusalem kawt dung velah an inzui lut dur dur lai a rawn lang nghal a. Chu mai bakah Rome sipai then khat leh sakhaw mifel Pharisai leh Sadukai ten el ran leh thik ranin an lo zui ve bawk a….? Tichuan Lal Isua chuanna tur sabengtung no leh mipui lo kal khawm ten an puan leh chhawl hnah (tumkau hnah) te kenga Lal Isua Jerusalem khawpuia ropui taka lut tur lawma au thawm “Hosanna! Lalpa hminga lo kal chu fakin awm rawh se, ram lo thleng tur, kan pa Davida ram chu chawimawiin awm rawh se, Chungnung berah khian Hosanna!” tih ri te chuan Jerusalem khawpui dung leh vang chu a khawk phei rum rum turah ngai ila……. Khai le, a thawnthu chu kan hriat sa vek a nih avangin sawi thui tawh lo mai i la,….

Kumthar chibai....!

In zavaiin kumthar chibai mawlh mawlh u le. 

Photo : Google Picture

Kan Lalpan kum, kum 2013 kan chuangkai leh thei hi a lawmawm tak meuh meuh va; rilru leh thinlung takin lawmthu i sawi mawlh mawlh ang u. Tichuan he kumthar hun hlimawm tak mai hi mimal tinte inhlan thar nan hmang i la, he kum 2013 chhung hian Lalpa tan thil tangkai tak tih i tum bawk ang u. Lalpa tan kan thinlung hi buatsaih thar leh i la, he kumtharah hian ram leh hnam tan thil ropui tak leh chhinchhiahtlak tak tih i tum ang u hmiang. 

He kum thar hi i tan malsawmna lo ni se la, midangte tana malsawmna i nih theih ngei ka beisei a ni. He kumthar hian i nunah malsawmna te, hlimna te, lawmna te, damna te, hriselna te, hmuingilna chi hrang hrang rawn thlen che se la, midangte tana malsawmna i nih kum lo ni rawh se.

Kumthar hlimawm chibai mawlh mawlh le.....!

Ringtu nun zirhona 

by C. Lalmuankima

London

Vawiin chu hna ka chawl a, inah awmin Computer ka khal nileng ti tih a, thu ziak han buatsaih ka tum ngial pawhin mood ka nei tlat lo mai. A tawp atawpah chuan ka Note bu pakhat ka keu ka keu ta mai a, tichuan Bible sikul kan kai laia ka note thenkhat ka hai chhuak hlauh mai a, a lawmawm ngei mai.! Thil dang teh chiam ni lovin.... kan zirtirtu pakhatin 'Ringtu nun ' min zirtir laia ka lo chhinchhiah ni ngei tur a ni. Hetiang hian ka lo chhinchhiah a,'Ringtu nun chu changpat nun nen a in ang tur a ni. Changpat chu kan dahna hmun apiangah nun khawchhuahna an zawng a, mihringten kan kuta duh tawka kan khawih pawhin kan duh ang angin an awm. Chutiang chiahin ringtu nun chu changpat nun angin Pathianin min dah dan ang anga awm tur a ni' tih thu hi ka va hai chhuak a, a tha ka ti khawp mai. 

CNF leh Chin State-in Inremna Thuthlung An Ziak Ta....!

CNF leh Chin State sawrkar inbiakna chuan rah a chhuah ta e. An inbiak ni; Jan 5—6, 2012 ah chuan inkahhaina siamin thuthlung an sign thei ta. An thuthlun 9 (a tlangpui lak tawi) te chu hetiang hi a ni:

Chin State sorkar – State level palai-te leh CNF/A State level palai-te chuan:

1. He thuthlung ziah ni atangin indo titawp turin an rem ti.

2. Thantlang khuaah CNF liaison office (Set-tuai-yi yon) hawn rem tih a ni a, Matupi leh Tidim-ah pawh hawng tura hmalak a ni ang. Inkahhai chhungin Thlantlang township chhung bial (Auk-su) 3 ah CNF/A te awmhmun khuar turin rem tih a ni a. Tidim leh Paletwa township chhunga bial thenkhatah pawh awmhmun khuar tura hmalak a ni ang.

CNF leh Sawrkar thar inbiakna thuthlung

CNF leh Chin State sorkar chuan inkahhai-na thu December 6,2012 ah Hakha ah hming an ziak ta. CNF aiawh in Dr. Sui Khar leh member 10 in hming an ziaka, Chin State sorkar aiawh in Colonel Zaw Min Oo (security and border affairs minister) leh Chin State officer mi 5 in hming an ziak.

Photo : DVB