I hlut hun tha bawhpelh ngai suh…!

I hlut hun tha bawhpelh ngai suh…!

C.Lalmuankima

Frederick, USA

“Mihring hi kan hlut hun lai hi sawi dawn ila, miten min mamawh hun lai hi a ni a tih theih ang, miten min mamawh tawh loh chinah chuan kan hlutna pawh hi a lo tlahniam hle a tih theih bawk ang. Chuvangin miten min mamawh hun a rei loh em avang hian kan hlut lai hun rei loteah hian tu emaw ni tan tala tangkai thei turin i nun jbuatsaih ang che…”

Mihring hi kan hlut hun chhung a rei lo hle a. Chutianga hlut hun chhung rei lote kan neihah chuan miten min mamawh hun lai tak hi kan bawhpelh tur a ni lo. A chhan chu miten min mamawh hun chhung hi a rei loh vang a ni. Miten an mamawh tawh loh hunah che chuan engtiang khawpa mi thiam leh zirna sang tak pawh neiin finna leh hriatna lamah pawh van tawng hial khawpin sang mah la, an tan i hlu tawh lo tihna a ni. Miten an mamawh hun che rei lote hi mi dangte tan malsawmna nih tumin bawhpelh loh hram tum thin ang che.

Chanchin Thaa Inthlunzawm Chhungkua 

C. Lalmuankima 

Slough, United Kingdom 

Khawi hmunah pawh kalin khawi hmunah pawh thlengin khawi hmunah pawh awm mah ila, Chanchin Tha hi i vuan tlat zel ang u, Chanchin Thaah hian i inthlunzawm tlat thin ang u. Chhungkua hi Chanchin Tha (Pathian Thu) hi kan vawn tlat a, Chanchin Thaa kan inthlunzawm tlat chuan engtik lai mahin kan tisual ngai lo vang. Chanchin Thaa inthlunzawm nachang hre lo leh Chanchin Thaa inthlunzawm duh lo chhungkua bawk hi a ni tisual leh thin ni.

Thil danga kan inthlunzawmna hi chu khua a rei a, a changin inlaichinna a chhiain kan tichat fo thin. Chanchin Thaa kan inthlunzawmna erawh chu Amah kan zawmpui ber Lal Isua khian min thlah hma chu kan inlaichinna/inthlunzawmna hrui hi a chhe ngai lo ang a, a chat ngai lo bawk ang. Chuvangin Chhungkuaah pawh hian Chanchin Thaa inthlunzawmna hi a tlo ber a, khua rei a daih ber bawk thin. 

Chanchin Thaa inthlunzawm Chhungkua hi a va hlu tak em ka ti thin. Chhungkua hi khawvel thil eng eng emaw nia inthlunzawm aiin Chanchin Thaa inthlunzawm hi a lo nghet ber a, a inchhirawm loh ber bawk. Eng eng emaw ni hmanga inthlunzawm kan nih chuan kan inthlunzawmna kha kan duh anga a awm loh hunah chhungkaw kehdarhna a lo thleng thin ang. Chuvangin chhungkua hi chu thil dang hmanga inthlunzawm lovin Pathian Thu (Chanchin Tha) hmangin inthlunzawm tlat thin ila, chu chu a tlo ber a, hmelma Setana pawhin a beih ngam loh chu Chanchin Tha hi a nih tlat avangin kan inthlunzawmna hrui hi engtikah mah a chat ngai lo vang. Hawh u, kan chhungkua hi Chanchin Thain i inthlunzawm tlat thin ang u. 

Ka Pa Theological College

C. Lalmuankima

Slough, United Kingdom

'Ka pa Theological College-a ka kalna kha tun thleng hian ka chhawr ta a ni...' Rev. Vanlalzuata

Kohhran leh khawtlang rawngbawlnaa pate hniak hnung theihtawpa ka lo zui ve thinna kha vawiin thlengin chhawr tangkai hlein ka inhre thin. Mi thenkhat chuan kohhran leh khawtlanga akul ataia inhman te hi an sawisel lek lek thin a, mahse kei ka tan chuan ka hringnun inzirna bul tanna pawimawh tak a ni ve thung a, kei chuan kohhran leh khawtlanga a tam thei ang bera inhman tluka min chherhriamtu thil tha hi a awm thei chuangin ka hre lo. Kohhran leh khawtlangah kan inhmang lo a nih chuan thil dangah kan inhmang tho tho va, chutianga thil danga kan inhmanna chuan sual kawng min zawhtir fo thin zawk a ni. Chuvangin kohhran leh khawtlanga inhman hi a hlawk a, hringnunah min chher puitling bawk. 

Mi upain an lo sawi angin, 'Dotu za, duhtu za' tih a ni a, kan thiltihnaah hian dotu za kan neih laiin duhtu za pawh kan nei tel ve a ni tih hi hre kar ila. Min sawiseltu leh min sawihnawmtu an awm laiin min duhsaka min fuiha min chawimawitu pawh an awm ve bawk a ni tih hi kan hriat reng atan a tha hle ang. Mite sawisel avanga kan thiltih tha lai kan chawlhsan zel a nih chuan engtikah mah hlawhtlinna kan tawng ngai lo bawk ang. Mite sawiselna hi a thlir dan kan herrem thiam phei chuan min tichaktu hmanraw tangkai tak a ni thei thung. 

Photo Image: Google 

Hlawhtlinna Rahbi

C. Lalmuankima

Slough, United Kingdom

Thuhmahruai

Hlawhtlinna rahbi hriat hi hringnuna thil pawimawh tak pakhat a ni a, mi hlawhtling taka min siamtu leh hlawhtlinna tlang lawn chhuak thei tura min siamtu kailawn dawhzawmtu pawimawh tak a ni. Mi hlawhtling tak ni tur hian mi pakhat leh pakhat hlawhtling tura kan hmalak dan hi a in ang vek kher lo thei a, a hnahchawi kan bel duh dan pawh a in ang vekin a rinawm loh. Amaherawhchu chutiang mi hlawhtlingte chuan hlawhtling tura tih dan phung an neih tlanglawn tak erawh a in ang thung. Hlawhtlinnaa inhlangkai tur hian hringnunah rahbi pawimawi tak tak paltlang tur kan nei nual thei ang a, chung zingah chuan a pawimawh zual kan tih thenkhatte kan la chhuak dawn a ni.

Photo: Pinterest 

Lemchang Ngai Lo - Nu Hmangaihna Thinlung

C. Lalmuankima
Slough, United Kingdom

Hringnun hi lemchanna khawvel a ni tiin ti ti thiam deuhten an tawngkamah an hmang rimin an sawi uar hle mai a, an thlirna zawn atang chuan a dikna lai tam tak chu a awm ngei ang le. Amaherawhchu hringnun hi lemchanna khawvel angin miten hmu fo thin mah sela, lemchang ve ngai reng reng lo pakhat erawh a awm a ni. Chu chu engnge kan tih chuan Nu Hmangaihna Thinlung hi a ni. 

Photo: BBC

Nu Hmangaihna Thinlung chuan thil dang zawng zawngin lem an chan lai pawhin ani chuan lem a chang ve ngai lo va, a ti tak tak a, a pasal fanaute tan a inhlan ral thak thin. Hei tak mai hi mi tam takin kan hrethiam lo fo thin a, nu hmangaihna thinlung hi pawnlang takin kan chhuah a, a pawi hle a ni. 

Damdawi in hmasa ber -  Chhungkua (Sam 68:6)

C. Lalmuankima 
Slough, United Kingdom 

Mal ngawih ngawiha awmte tan Damdawi in hnai ber chu chhungkua hi a ni a. Kristian Chhungkua chu an tawngtaiho thin tih a ni.

Chhungkua chu kan mangan, kan lungngaih, kan harsat, buaina niah pawh kan hahchawlhna in nuam a ni tur a ni. Chhungkuaah chuan a chhunga cheng chhungkaw member tinten kan harsatna kan inhriatthiampuiin kan intawrhpui thiam thin angin hlimna leh lawmna a lo thlen pawhin thiam takin kan inlawmpui thiam thin. Chhungkua chu taksa peng hrang hrang invuah khawm ang hian an lo tehkhin fo thin reng a ni. Taksaah hian peng hrang hrang a awm a, chung peng hrang hrangte invuah khawm chu taksa pumpui tia koh a ni. Chutiang bawkin chhungkuaah pawh hian a chhunga cheng member tinte infin khawm leh inchuktuah rem taka kan awmho hian chhungkua kan din thin a ni. Chu chhungkua chu Lal Isua Kristan a luah chiahin 'Kristian Chhungkua' tiin an lo koh thin a ni thung.

Photo Image: Living Country Magazine 

Zirlai pawimawh Nute mal chungah

C. Lalmuankima

Slough, United Kingdom

Nute mal chung hlutna leh pawimawhna hi kan ngaihtuah ngai em le? A hlutzia leh pawimawhzia hrethiamte chuan an fate an nakin hun lo awm tura an hringnun zirlai pawimawh tak tak leh an chatuan nun daih tur zirlai pawimawh tak tak pekna hmun atan an hmang thin asin! 

Nute mal chung hi an fate tan chuan an zirna sikul hmasa ber a ni a, chu mal chungah chuan an fate tana an dam chhung daih mai bakah an chatuan nun daih thil hlu tak a inphum ru tlat a ni. I faten an zirna sikul hmasa berah khan eng zirlai nge an zir thin tih leh eng zirlai nge i peka i zirtir thin tih hi mahni leh mahni lo inzawt fo thin ang che. I faten an zirna sikul hmasa berah khan an dam chhung khawsak daih mai piah lamah an chatuan nun daih thleng zirlai pek nachang i hre lo a nih chuan a pawi hle ang. Chuvangin i fate nakin hun lo awm lehzel tur hmakhua i ngai a nih ngai chuan i mal chung atang khan an chatuan nun daih tur zirlai pek nachang hre thin ang che. 

Photo: Masterfile

Lalpa Pathian tan i hun sen a thlawn ngai lo

C. Lalmuankima 

Slough, United Kingdom 

Lalpa tan a nih chuan minute khat chauh pawh hun seng mah la, i hun sen kha a thlawn ngai lo vang. Pathianin heti khawp hian hun tha min pe a, chuti chung chuan a tana hun sen kan hreh thin lutuk erawh hi chu a nih dan tur a ni ngai lo. 

Lal Isua ngeiin a taksa leh a thisen zawng zawng Kraws lerah kan tan a hlan ral thak a, chuti chung chuan eng vanga a tana hun sen hreh nge kan nih le? Kan nun hi inenfiah a va hun tak em!

Photo: Pinterest 

I harsatna Lalpa Pathian hmaah pharh (thlen) thin rawh

C. Lalmuankima 

Slough, United Kingdom 

Tuna i harsatna leh manganna, nangmah leh i chhungten in tawn mek kha Lalpa Pathian hmaa pharh (thlen) nachang i hre thin em? tih hi duhsak takin ka han zawt teh ang che.....

Mi tam tak chuan harsatna kan tawn mek hi a pharhna dik takah pharh nachang kan hre thin lo va, harsatna dangin kan nun min tlakbuak fo thin reng a ni. Engtiang khawpa harsatna lian pawh ni rawh se a pharhna tur dik tak Lalpa Pathian hmaa kan pharh thin phawt chuan a sutkian dan kawng min zawnsak turin kan rin Pathian khi a inpeih reng a ni tih hi kan hriat hmasak a tha hle. 

Photo: Pinterest 

Lal Hezekia chu Assuria hovin an ram lak tumin an rawn vau/vo va, Assuria lalten an chheh vel ram zawng zawng tichhe vekin an chunga an thiltihte chu rikrap nan rawn hmangin an rawn vau/vo leh a, tichuan Lal Hezekia chuan palaite kut ata lehkha chu a hmu a, a han chhiar a. Tichuan Hezekia chu LALPA inah chuan a han lut a, LALPA hmaah chuan a pharh ta a.....(Isaia 37:8ff) (A thawnthu chu Isaia 37-ah hian chipchiar takin chhiar tur a awm tho va, duh tawk mai ila.....)

Hun ka nei lo...??? 

C. Lalmuankima 

Slough, United Kingdom 

'Hun ka nei lo....' tih hi chu mite hmaa kan inphat mawina leh tlip mawina mai a ni. Hun ka nei lo kan ti hi chu kan hun pek duhna hmun azira hun nei leh hun nei lo thei kan ni ve bawk. Chuvangin i hun pek duhna hmun azirin hun i nei thei a , i hun pek duhna hmun azir bawkin hun i nei lo thei bawk.

Siamtu Pathianin kan ni tin hun hi kan hman tur indaih tawk theuhvin min pe vek a, chu chu kan hman thiam dan azira tangkaipui thei leh tangkaipui lo thei kan ni. Kan hman thiam dan azara hlawkpui thei leh hlawkpui lo thei kan ni bawk. 

Photo : Google Image

Pathian pawlna hun nei lo khawpin i buai thin em ni? Lalpa nena inpawlna hun ka nei lo kan ti hi chu mahni leh mahni kan inbumna mai niin ka hria. Pathian be hman lo khawp chuan i hnaah i buai ka ring lem lo. I ngaih pawimawh loh avang zawka Pathian be hman lo anga inngaihna i nei a ni zawk ang. Entirna pakhatin ka han tarlang teh ang. Pathian be hman lo khawpin i hnaah lo buai ta pawh ni la, i hnathawhna kalkawngah tal khan Lalpa nen hun hlimawm tak in hmang thei asin!

I mission i thawk tha em? 

C. Lalmuankima 

Slough, United Kingdom 

'Mission' tih thumal hi kan mi thiam hmasa J.F.Laldailova khan a Dictionary-ah heti hian a hrilhfiah a, 'Palai intirhna, palai tirh chhan, palai rual, kohna, palai hmunpui, sakhaw theh darhtu atana tirh chhuahte' tiin a dah a. A bik takin Kristiante chuan Lal Isua vana lak chhohva a awm dawn tum khan a zirtirte hnena a thuchah hnuhnung chu chang chawiin khawvel hmun tinah kala hnam tina mite zirtira siam tura tih kan nih thu hian a tifiah hle a ni. (Matt 28:19-20a).

Mission han tih hian mi tam tak rilrua lo lang hmasa ber mai chu ram thim ram rova (Chanchin Tha la hmelhriat reng reng lote hnena rawngbawlna) rawngbawlna hi a ni a, a dikna lai tam tak a awm ve bawk tho mai. Pathian thu la hre ngai reng reng lote sawina a nih theih lai hian keimahni in chhungah pawh Pathian thu hre fo si-a piantharna la chang hauh lote hi a kawhtir theih ve bawk a ni. Mission thumal hi Tlangmite rilruah chuan a mikhual lo hle mai a, mahni tawng tluka kan hman leh rilrua fiah a ni a tih theih bawk awm e. A...mission chungchang hrilhfiah vak lam kha chu kan sawi tum a ni viau lem lo va, mimal tin hian kan mission hi kan thawk tha tawk em tih lam hi kan sawi tum tak zawk chu a ni. 

Lalpa Pathian nen bul tan thin rawh

C. Lalmuankima 

Slough, United Kingdom 

Thuhmahruai

Pathian khawngaihna zarah kumthar kan lo chuangkai leh ta a, kumhluia thil thlengte kha mumang angin an ral riai riai mek zel a, khawvelin hunkhirh tak a tawn chhoh mek karah kumthar hun hlimawm tak kan hmang thleng leh thei hi a lawmawm tak zet a ni. Thenkhat tan chuan kumhlui liam ta kha mumang atan pawha kan man duh loh thil rapthlak tak a ni a tih theih ngei ang le. Engpawhnisela, Pathian remruatnaah kan thuneihna a tel lo em a, a remruatnaa innghah thiam zel erawh a him berin rilru a hahdam ber zel a, mi tam takin tunlai hrileng lakah nunna tam tak an chan mek laia kumthar kan hmuak thleng thei ringawt pawh hi Pathian hnena lawmthu sawi lo thei lo kan nih tichiangtu a ni chiang mai le. 'Kum a lo thar chuan chumi khami chu ka/kan ti ang a, chutah khatah ka/kan kal ang....' tia mimal leh chhungkua leh pawlho leh thianzahova ruahmanna siam kan awm leh teuhvin a rinawm. Ni e, ruahmanna chu mihring lam chan a ni a, lei chhanna erawh Pathian atang a nih zawk avangin kan ruahmannate chu a taka thlentir theitu Pathian hnena kan kawltir hmasak fo hi a him ber thin a ni.

Photo: Google Image 

Tun kumtharah hian ruahmanna tam tak kan siam leh ngeiin a rinawm. Chutianga ruahmanna kan siamnaah chuan ringtute tan chuan Pathian nena bul tan hmasak hi kan tih tur pawimawh lian tak a ni ngei mai le. Pathian ring chunga kan tih phawt chuan kan bul tanna hi sawi tham lohvin tê hle mah sela, kan la hlawhtling zel dawn a ni. Pathian rawn chung zela ke pentute Lalpan a hlawhchhamtir ngai lo va, an mualpho ngai hek lo. 

I thlarau nun hrisel nan engnge i tih ve thin le? 
C. Lalmuankima 
Slough, United Kingdom 

Ni 14/12/2017 zan dar 7:30 vela ka taksa insawizawi (ka exercise la zo), stretching ka tih mek laiin ka rilruah he thu hian min compare a, testimony han tih em em atan chuan a ho deuh mai thei bawk a, a hming vuah tur ka hriat mai loh avangin testimony category chhungah ka khung tel ta hram a, a lo inhmeh vak lo a nih pawhin a ngaihthlak dan tawk min lo thiamsak a ni mai ang chu.

Thu dang lam teh chiam ni lovin.... Ka exercise la zo ka taksa ka han inpawt mar/fan (stretch) lai takin ka rilruah he thu hi a lo lang hlawl mai a, min rawn chhuahchhal ti tih hian min rawn khaikhintir mah zawk a tih theih awm e. ''Nang chuan i taksa hriselna ngai pawimawhin leh i taksa mawi loh hlauvin darkar hnih/thum i hun i pe a, i thlarau lam hriselna erawh i ngaih thah lawi si a, i thlarau lam hriselna atan hian darkar khat pawh i pe tha peih lo va, thlarau lama hrisel turin eng thil nge i tih thin le, i taksa hriselna i ngaih pawimawh rual rualin i thlarau nun hriselna tur pawh ngai pawimawh tur i ni asin.....?" tih thu hian ka ngaihtuahna a thum rawn tlut tlut a, changing room-ah kalin ka inthlak a, ka inbual zawh pawhin he thu bawk '....i thlarau hriselna atan engnge i tih thin le?' tih thu bawk hian min la um zui ta zel a, in ka thlen hnuah ka ngaihtuah nawn lehin ka zak chem chem a ni.

Photo : Google Image

Chanchin Thaa inthlunzawm - Chhungkua

C. Lalmuankima 

Slough, United Kingdom 

Chanchin Tha (Pathian Thu) avang a nih loh chuan Chhungkua hi inenkawlin inzirtir thin mah ila eng emaw ni tihsual hlekah ‘Chu mi vang a ni’ ‘Kha mi vang a ni’ ‘Nangmah vang a ni’ adt. tiin a chhan leh vang tha tak sawi tur awm lovin tu tute emaw inmawhpuh a awl hle mai a, a tawpah chhungkaw kehdarhna hial te pawh a thleng thin a ni. Chanchin Tha (Pathian Thu) avang a nih erawh chuan eng emaw ni tihsual palh thil thu a lo awm pawhin Chanchin Tha (Pathian Thu) ah kan inthawi dam leh mai thin a, Pathian Thu bawkin min tuam dam leh thin. Rawngbawltu pakhat tawngtai thuchham tha ka tih leh ka nun min hneh deuh mai chu, ‘Lalpa, kei hi chu lo na mah ila, Chanchin Thain min tuam dam leh thin. Kei hi chu a tlawm zawk zelah min siam ang che. Lalpa, kei hi chu a chan zawk zelah min siam ang che….’ a tih hi a ni. Pathian Thu hmanga intuam dam nachang hre lo chhungkua kan nih chuan a pawi ngawt ang le. 

Photo: Google Image 

Mite chhiar tlak chanchin hnutchhiah rawh

C. Lalmuankima 

Slough, United Kingdom 

Mitin mai hian chanchin a chhia a tha sawi leh ziah tur kan nei theuh va, mi engmah lo leh tê ber anga kan ngaih atanga mi ropui leh thiltithei ber thlengin chanchin sawi leh ziah tur kan nei theuh a ni. Chu kan chanchin chu midangin min sawisakin min ziahsak dawn lo va, keimahni ngeiin kan damlaia kan thil tih hmangin kan sawiin kan ziak mek zel zawk thin. 

I damlaia i chanchin chhiar tlak awm lo khawpa i tu leh fate i hnutchhiah a nih chuan i tu leh fate hrilh i tihai hle dawn tihna a ni. Chuvangin kan damlaia kan nitin nun hi kan chanchin kan sawina/ziahna pawimawh tak a nih avangin kan hnua lo kal lehzel turte chhiar tlak khawpin i ziakin i hnutchhiah thin ang u. I hnua lo kal zel tur i tu leh faten fiah taka an rawn chhiar theiha an rawn chhui nalh theih turin i chanchin hnutchhiah tum ang che.

Photo: Geneva College

Zokhaw lam Masi kha ka ngai thin

C. Lalmuankima 

Slough, United Kingdom 

Zofate hi uihum pawh zat lo mah ila Pathian khawngaihna zarah khawmual pui tinah kan lo inzar pharh ve ta reng mai. Hnam tlem te e ti lovin kan dai chin erawh a zau ve fu ta mai a, kan dai chinah kan va mikhualna rama hnamte tih dan leh nunphung pawh kar lovah kan lo chhawm tel ve ta zel mai a, a ram chhunga kan awm duh miau si chuan a ram chhung tih dan kan ti lo thei ta lo a ni. 

Photo: Gramho.com 

Kei ngei pawh Pathian khawngaihna zarah Kumpinu leilung ka rahna kum sawm nufa a lo tling ve ta der mai a, kum sawm chhung hian nunphung a lo danglam hman nasa hle a tih theih a ni. Chutianga nunphung leh khawsak dan danglam chho mek zelah chuan Zokhaw lama kan Masi hman dan erawh chuan lung min len lo thei lo va, thlang sappui mingoten an thiam thil rimawi chi hrang hranga an siam leh ri thei chi tin reng hmanga mawi taka an tum theih zingah ka chhungril han khawng pha zu han awm hauh lo va! Kei Zopa lutuk tan hian Sappui mingo valte remhriatna leh themthiamna hian tangkaina a nei ve ta lo te pawh a ni mahna. Kei chuan Urlawk zan atanga Khuangpui leh Khuangte chumchilha kan han 'Tlung-tlut, tlung-tlut' khan ka chhungril min la khawng ber chu a nih hi maw! Thlang Sappui mingo valten an rimawi chhuak thar ber ber man to tak tak leh changkang ber ber hmanga Krismas hla mawi eltianga an rem hian ka lung min len ve tlat lo, ka bengah chuan a mawi satliah a ni ringawt mai. Kei chuan Zopa takin Zokhaw lama Masi Lengkhawm zai hla urhsun tak hmanga 'Lal pian hun lawmawm tak kan thleng leh ta...' tia Ralngama hla te, 'Hlimna ni ropui chu a eng...' tia R.L.Kamlala hla te, 'Eden parmawi chul hnu tivul leh turin...' tia Rev. Taisena hla te,...adt. khan ka chhungril a khawng zawk mah a, ka lunglen min la hnem zel chu a nih hi maw! 

I tlukna hmun atang khan tho leh thin rawh

C. Lalmuankima 

Slough, United Kingdom 

I hringnun kawng zawh mekah khan vawi engzat nge hnek thluka i awm ve tawh? tih lam ai maha pawimawh zawk chu i hringnuna hnek thluka i awmna hmun atang khan thawh leh nachang i hria em? tih hi a ni. Kan hringnun kawng chhuk chho zawh mekah hian eng eng emaw ni hmanga hnek thluk kan lo ni tawh mai thei. Mahse hnek thluka kan awm avang khan kan Khawvel hi a tawp ta tihna a ni lo. Kan tlukna hmun atang ngei hian tha thar thawha thawh leh hi mi huaisente miziaa bet tel tlat a ni zawk. I tlukna hmun atanga tho ngam tawh lo khawpa i dawihzep a nih chuan nangmah ngeiin i hringnun tawp dan tur chu tuna i dinhmun ang chiah khan i siam nghal tihna a ni. Chuvangin i tlukna hmun atanga tho ngam khawpin huaisen thin ang che. 

Photo: Pinterest 

Khum beta dam tunlai thalaite nun

C. Lalmuankima

Slough, United Kingdom

Tunlai kan thalaite zingah tunlai tawng takin khum beta na ni lo, khum beta dam tam tak ka hmuh hian ka lung an tichhiain rual kan el lohzia a va tilang nasa tak em tih hi ka ngaihtuah ve chawk thin nia! Khawvel hmasawnna leh changkannain a thopa zuana min thlawhpui dawr dawr laia kan thalaite nunah hmasawnna leh changkanna ze dik lo (rual elna awm map lova nileng leh zan khawtairek thak thaka social media buaipui emaw TV Games leh thil dang buaipui) takin bu a khuar erawh ka rilru a va tina thin tak em!

Thalai kut leh ke kim biai siin mahni thawh chhuaha chhungte chawm chu sawi loh nu leh pate thawh chhuah sa ringa a pawr thei ang bera thawk hreh miah lo kan zingah hmuh tur an awm nuk ta mai hian Thangthar nun ning Thasiama koh hial nap khawpin min siam fo thin reng a ni. Mahni thawh chhuah sawi tur apui nei lova awmhmuna chhungte thawh chhuah sa ringa lo inlak-champ ve ngawt hi nulaho phei chuan 'A pa lo hle' an ti tawh asin! Thenkhat phei chu chhungkuaah thawh chhuah sawi tur chhe te pawh nei hawt si lo hian a baa lak te hi zu han zak lovin zu han hreh der lo nia! A baa lak ngam hi changkannaah kan ngai zawk ta hial em ni tih khawpin kan zak hauh lo va, ba tam thei apiang mai hi an 'tunlai' ta berah kan ngai duh hial tate pawh hi inenfiah tur kan va ngah tak em! A baa lak kan huai tluk tal hian a pek tlak (pek let) lamah pawh huaisen ta ila kan nun hi corruption lakah kan chhanhim thei ang. 

Photo: Google Image

Tlan paha chhiar theih nun

C. Lalmuankima 

Slough, United Kingdom 

Miten tlan pah pawha an chhiar theih leh an zir theih nun hi i kawl vein i inhria em? He zawhna leh he nun (mite chhiartlak nun) hi a pawimawh hle mai maw! 

Min zirtuten min zirtlak khawp leh ngaihnawm an tih khawp turin kan nun hi kan chetzia kawng tinrengah kan uluk leh kan takzia kan lantir zel a pawimawh a ni. A chhan chu Isua chhinchhiahna putute kan nih tlat vang a ni. Nangmah atanga zirtlak awm lo khawp leh miten an chhiartlak pawh awm lo khawpa nun ze nghet lo leh lepchiah tak kawltu i nih chuan a pawi viau ang a, nangmah avangin mite an tluk phah fo bawk ang. 

Photo: Google Image

Tlawmna nun - Isua atanga chhuak ngei kha

C. Lalmuankima 

Slough, United Kingdom 

Khawvel sawrkar chak takte chuan ralthuam chak tak tak hmangin khawvelah ram an la a, an ram lakten an do let leh fo thin. Lal Isua erawh chuan tlawmna nunin ram a la a, a ram a zau tial tial thung. Tlawmna nun tel lova ram lak chu a tawpah a zuih ral thuai thin.

Mite chhungril ber thleng pawha hneha luhtlang thei vek awmchhun chu tlawmna nun hi a ni. Lalpaa tlawmna nun tel lo chuan mite chhungril ber thlengin hneh a har khawp mai. Chuvangin tlawmna nun hi ringtuten Lal Isua nun kan tawmpui theihna awlsam ber a ni a, chu nun atang chuan mi rilru khauh leh sehhel tak anga lang pawh hneh theih a ni. 

Photo: Zovapual

Lalpaa tlawm hliah hliahna nun atang hian miten keimahniah Isua hmel an hmu thin a, an chatuan nun daih tur ei tur tak an hmu thin a ni. Pathian thuin min tihtlawmna hmun zel hi midangte tana malsawmna kan nihna hmun atan Lalpan min lo buatsaihsak thin a, chumi atang lo chuan mihring hi kan tlawm mawh khawp a nia! Mihring lam tak pawha inchhuan leh tlawhchhan tur eng eng emaw ni nei vea kan la inhriat chhung hi chuan nun hi Lalpaah a tlawm mawh khawp a. Kan intunnunna tur leh kan inphenna tura kan ngaihte phehchimsaka kan awm chinah chiah hian 'Tlawm rawh, tlawm rawh...' tih ngai miah lovin Lalpa hmaah kan tlawm nghal a, mihring lama chechang thei lova kan awm chinah chiah hian Lalpa inpuanna thar a lo thleng nawn thin a ni.