Zo Vapual

Hotupa i nih chuan

Thil siamna hmun lian tak pakhat bangah chuan he thu mak tak si, ngaihtuah tithui tak mai hi a intar a," Hotupa ni ta la, nangmah khan hetah hian hna rawn dil ta la, i inruai duh ang em?"

Mahni leh mahni inpu chawp chu a thua han sawi a rik dan a danglam ai hian a hla vak lo asin. Thil thar pawh zu ni hek lo va. Kum 3,000 vel kal taah khan Lal Solomona, a fin chungchuan vanga hmingthang em em mai chuan ziak ngeiin he thu hi a lo hnutchhiah tawh nia,"Mi chak ai chuan thinrim lama mi truanmuang chu a thra zawk e, khawpui hnehtu ai chuan ama ngaihtuahna thunun theitu pawh a thra zawk."

Photo-http://www.cio.com/special-reports/boss-and-you/index

Khawvel hmun hrang hrang tlawha zin vak mite tana hmuh theih turin mi ropui ni-a ngaihte hriatrengna thil chi hrang hrang an siam thrin a. Chung zinga langsar deuhte chu sipai hotu lalte hriatrengna te a ni fo thrin. Mahse tinna tinreng kawltu, Solomon-a chuan sipai chakna hmang hnehna emaw, chawimawina hlawhchhuah emaw ai chuan mahni inthunun thei chu a thra zawk a lo ti tlat mai. Mihring tehnaa teh chuan khawpui hian hneh te chu thil hriatreng tlak khawpa ropui a ni a. Van lam tehna atrang erawh chuan mahni leh mahni inhneha mahni leh mahni inpu thiam chu a la hlu zawk. He ropuina hi mi tlemte tana zuah bik a ni lova, keimahni tan threuh hian ban phakah a awm vek a ni. I thrian thra ber i ni the a, i hmelma i ni thei bawk!

Nordic thawnthu hlui pakhat chuan mi pakhat chanchin a tarlang a. Chu pa chu thlarau thra lovin a um a, a tana nun harsa tak mai turin a bei a. Chu thlarau sual chuan a In chung a hlihsak a, a tukverh a chhu keh a, a huan a chil chhiatsak a. A ran rual a tihhlumsak a, a buhte a tihmuih zova.

A tawpah chuan chu pa chuan a tuar zo ta ngang lo va, chu thil thra lo chu beih let a tum ta a. An inbei nasa ngiang mai. An pahnih chuan leiah an tlu a, an let tawp tawp mai a. A tunge chak zawk tur a hriat theih lawk loh. Chutah chua pa chuan a tha neih zawng zawng sawmkhawmin chu rapthlak tak mai chu a bawhbet a, a rek ta vak mai a. A hmelma tiboral tur chuan a chemte a phawrh ta. Mahse chutih lai tak chuan thli a lo thaw a, chhumte chu a rawn chhem kiang a, thla engmawi tak mai hnuaiah chuan chu thil rapthlak tak mai hmai chu a lo lang a. Chu thil rapthlak tak mai chu a hmel a'n hmuh chian chuan tu dang ni lovin am hmel chiah a hmu ta a ni. 

Thu lakna : Hei le vawiin - letlingtu P.L.Liandinga