Zo Vapual

Damdawi in hmasa ber -  Chhungkua (Sam 68:6)

C. Lalmuankima 
Slough, United Kingdom 

Mal ngawih ngawiha awmte tan Damdawi in hnai ber chu chhungkua hi a ni a. Kristian Chhungkua chu an tawngtaiho thin tih a ni.

Chhungkua chu kan mangan, kan lungngaih, kan harsat, buaina niah pawh kan hahchawlhna in nuam a ni tur a ni. Chhungkuaah chuan a chhunga cheng chhungkaw member tinten kan harsatna kan inhriatthiampuiin kan intawrhpui thiam thin angin hlimna leh lawmna a lo thlen pawhin thiam takin kan inlawmpui thiam thin. Chhungkua chu taksa peng hrang hrang invuah khawm ang hian an lo tehkhin fo thin reng a ni. Taksaah hian peng hrang hrang a awm a, chung peng hrang hrangte invuah khawm chu taksa pumpui tia koh a ni. Chutiang bawkin chhungkuaah pawh hian a chhunga cheng member tinte infin khawm leh inchuktuah rem taka kan awmho hian chhungkua kan din thin a ni. Chu chhungkua chu Lal Isua Kristan a luah chiahin 'Kristian Chhungkua' tiin an lo koh thin a ni thung.

Photo Image: Living Country Magazine 

Chhungkua chu mi thiamten damdawi angin an lo tehkhin thin a, an tehkhinna thiam hlein ka hria. Kan hriat theuh angin damdawi inah chuan damloten damna an chang a, inenkawl dam nan an hmang thin angin chhungkua pawh hi rilru hliam leh thil danga dam lohna neiten kan inenkawlna damdawi in tha ber a ni a, a aia hmun tha inenkawl damna a awm chuang lo. Hmangaihna leh lainatna, dawhtheihna leh infuihna/inzilhna thu tha tak tak hmanga kan infuih leh kan inzirtir/inzilhna hian a chhunga cheng chhungkaw member tinte tan damna a thlen thin a; taksa leh rilru leh thlarauva hliam neite tana inenkawlna hmun pawimawh leh tha ber mai pawh chhungkua hi a ni tlat a ni. 

Chhungkua hi nuam zawng zawng awmkhawmna a ni ti te pawhin a sawi theih awm e. Chhungkuaah chuan fuihna leh inzirtirna tha tak tak kan inhrilhin kan inzirtir thin a, chung zirtirna tha chu kan dawng thin a; zalen tak leh inpawh tawn takin kan awm ho thin. Chu zalênna chu cheng tam tak pawhina a lei theih loh a ni. Chu zalênna chuan chhungkuaah hlimna leh lawmna a thlen thin a, nuam zawng zawng awmkhawmna hmun chu chhungkua hi a ni a tih theih ang. Chu nuam zawng zawng khalhtu chu Lal Isua a nih erawh a pawimawh thung. Kristian chhungkaw nawmna chu a dintu ber Lalpa Isua ngeiin a chhunga cheng member tinte chungah chair a lak thin vang leh chung member tinte chu a khalh kal thin vang a ni. Kristian chhungkua invuah ve siin a laiah Lalpa Isuan chair a lak theih lohna hmun leh a khalh kal theih lohna hmun chhungkua chuan engtik lai mahin a tum ram a thleng ngai lo vang. Chuvangin chhungkaw hlim leh nuam tak din tur hian a chhunga cheng member tinte nunah Lal Isuan lalna a chan a, kha chhungkua kha Amah Lal Isua ngeiin a khalh kal fo a ngai a ni. 

Mahni in nuam ti tawh lo kan nih chuan keimahni lam kan fel tawk lo tihna a ni ang. Mahni lama chiantawklohna hian chhungkaw member zinga chen nuam tih lohna a hring chhuak fo thin. Mi thenkhat, mahni in aia khawlai nuam ti riau an awm ve bawk a, chung mite nun neih let nan chuan chhungkaw member tinten nasa lehzuala kan thawhho a ngai a; inthap ral thak pawha thawh a ngaih chang a awm mai thei. Chhungkaw tana hmasawnna leh thatna tur a nih dawn phawt chuan chhungkuaah inhlan fo nun hi a tel a ngai. 

Rev Dr Kenneth Chafin thu sawi hmang hian kan thu i han khaikhawm dawn teh ang. "Chhungkua ber a fuh tawh loh chuan khawvela eng pawl mah a fuh tak tak thei tawh lo." tiin a lo sawi a, chhungkaw pawimawhna a hai lang chiang hlein ka hria. Khawvela eng pawl mai pawh hi chhungkua atanga bul tan a ni a, chhungkaw in-awp dan a fuh loh chuan pawlah a nghawng chho lo thei lo va, a tawpah kehchhiatna rapthlak tak a thleng ta thin a ni. Chuvangin chhungkua atangin bul kan tan fuh loh chuan kan va tel vena pawl tin maiah a nghawng chho ang a, a tawpah kan tel ve tawhna phawt chu a tlachhe zel mai ang. 

Chhungkua hi keimahni ngeiin chenna nuam tak Vanram nunah kan siam thei a, chutiang bawkin keimahni ngeiin hmun hrehawm tak Hremhmun nunah kan siam thei ve bawk a ni. Ka chhungkaw tana vanram nun koh thlatu nge ka nih hremhmun lama hruai pengtu? tih hi mahni nun theuhvah i inzawt thin ang u. Mahni chhungkaw hmakhua tur ngaihtuah nachang hre lo khawpa hruai atin kan awm a nih chuan a pawi viau bawk ang. 

Sam 68:6-ah khan, "Pathian chuan mi mal te chu chhungkaw zingahte a teltir thin a....." tia kan hmuh angin Chhungkua chu mal ngawih ngawiha awmte tan pawh Damdawi In hnai ber a ni. Taksa leh rilru hliam inenkawlna hmun tha ber mai chu chhungkua hi a ni.

Chhungkua berin a chhunga cheng member tinte thawi dam thei lova a awm chuan kha chhungkua khan inenfiah a ngai tihna a ni ang. Chhungkuaah a chhunga chengten damna an hmuh theih tawh loh chuan kha chhungkua kha a ngaihtuahawm hle bawk ang. Chuvangin chhungkua chu a chhunga cheng member tinten damna an chan theihna hmun pawimawh tak a ni tur a ni a, chu chu taksa leh rilru damna chauh ni lovin thlarau damna pawh a ni tel tur a ni. Taksa leh rilru leh thlarau damna thlen turin chutianga min tidam theitu Lal Isua Krista lam chu en tlat ila, chhungkuaah Lalpa khi chair kan laktir fo a nih chuan kan chhungkua hian a nih dan tur ang takin ke a pen ang a, tichuan Lalpan a luah chhungkua a lo ni nghal ang a, chumi atang chuan taksa leh rilru leh thlarauva damna chang duhten damna an lo chang zel dawn a lo ni reng mai. Chhungkaw thenkhat chu Lalpa ngei chair latuah siam phal lovin mahni ngeiin chair lak kan tum a, chutianga kan tih chinah phei chuan chhungkaw kal lai hi a nghing lawih thin a, siamthat leh vat nachang kan hriat loh phei chuan a tawpah chhungkaw tlanchhiatna leh kehdarhna a lo thleng ta thin a, a pawi hle a ni. 

I chhungkaw tan malsawmna thlentu nge i nih anchhia thlentu...? tih hi nangmah leh nangmah kha lo inzawtin lo inenfiah fo thin ang che. Nangmah avangin i chhungkua vanram nunah i siam thei a, nangmah avang vekin i chhungkua chu hremhmunah i siam thei bawk a ni tih hi hre reng la, tichuan i chhungkaw hmakhua tur chu eng hi nge thlang fo thin ila tha ang tih hi i hre tawh mai dawn a ni. I chhungkua kha nangmah leh a chhunga cheng member tinte taksa leh rilru leh thlarauvah damna an channa hmunah siam fo thei turin chhungkaw neitu Lal Isua Krista ngei khalh kaltir fo thin ang che.