Zo Vapual

Zirlai pawimawh Nute mal chungah

C. Lalmuankima

Slough, United Kingdom

Nute mal chung hlutna leh pawimawhna hi kan ngaihtuah ngai em le? A hlutzia leh pawimawhzia hrethiamte chuan an fate an nakin hun lo awm tura an hringnun zirlai pawimawh tak tak leh an chatuan nun daih tur zirlai pawimawh tak tak pekna hmun atan an hmang thin asin! 

Nute mal chung hi an fate tan chuan an zirna sikul hmasa ber a ni a, chu mal chungah chuan an fate tana an dam chhung daih mai bakah an chatuan nun daih thil hlu tak a inphum ru tlat a ni. I faten an zirna sikul hmasa berah khan eng zirlai nge an zir thin tih leh eng zirlai nge i peka i zirtir thin tih hi mahni leh mahni lo inzawt fo thin ang che. I faten an zirna sikul hmasa berah khan an dam chhung khawsak daih mai piah lamah an chatuan nun daih thleng zirlai pek nachang i hre lo a nih chuan a pawi hle ang. Chuvangin i fate nakin hun lo awm lehzel tur hmakhua i ngai a nih ngai chuan i mal chung atang khan an chatuan nun daih tur zirlai pek nachang hre thin ang che. 

Photo: Masterfile

Nute hian an mal chung hlutna leh pawimawhna hi an hre reng tur a ni. Mahni mal chung hlutna leh pawimawhna hre lo khawpa hruai atin kan awm palh ang tih hi a hlauhawm hle bawk . An puitlin hnua a sawhkhawk lo let leh tur kan tuar ngam dawn te a nih loh chuan mahni mal chung hlutna leh pawimawhna hre lo khawpin kan fate hi i enkawl ngai suh ang u. 

Faten zirlai an lak tanna hmun pawimawh ber mai chu nu mal chung hi a nih tlat avangin i mal chung hlutna leh pawimawhna hre ran chungin i fate enkawl thin ang che. Chutianga tih nachang i hre lo a nih chuan i mal chung kha i fate tan hremhmun kawng kaihruaitu mal chung hlauhawm tak a chang thei a ni. Chuvangin nute mal chung tluka hlu leh pawimawh hi an fate tan chuan a awm thei chuang lo va, hei hi nute hian an hre reng tur a ni. Nute mal chung hi an fate tan chuan vanram kawng kawhhmuhtu hmun pawimawh tak a nih theih laiin kawng lehlamah chuan hremhmun kawngkhar hawnsaktu mal chung hlauhawm tak a ni ve thei bawk. A chhan chu nute mal chung atang hian zirlai pawimawh tak tak a chhia emaw a tha emaw an zir chhuah thin vang a ni. 

Billy Sunday chuan, "Hremhmuna mi tam berte khi an nute mal chunga an awm laia Setanan a laksakte an ni, vanrama mi tam berte pawh khi an nute mal chunga an awm laia an nuten Pathian an pek a ni." tiin a lo sawi hial a. Mite hi chuan nute hlutna leh pawimawhna hi chu an lo va hrechiang thin ve aw ka ti thin. I faten an zirlai pawimawh tak an lakna hmun atanga zirtirna leh enkawlna tha pek nachang i hriat loh chuan an puitlin hnuah Setana tan a belchhung sa a ni ringawt mai ang. Fate enkawl hun lai taka enkawlna tha pek lohvin a hrinchhuah chu hremhmun a ni tawp mai a, a rapthlak tak zet. Chuvangin nute hian an mal chung hlutna leh pawimawhna hi an hre reng tur a ni. 

Nute mal chung hi an fate tan chuan chatuan nunkawng dawh zawmtu hmun pawimawh tak a ni a. Chu mal chung hlutna leh pawimawhna chu cheng tam tak pawhin a lei thei lo va, chumi hlutna leh pawimawhna hrethiamte chuan an mal chung leh vanram khi an fate tan an thlunzawm thin. Thu hmasa lama kan sawi ang khan mahni mal chung hlutna leh pawimawhna hre thiam lo khawpin hruai atin kan awm palh ang tih hi a hlauhawm hle. Mahni mal chung hlutna leh pawimawhna hre thiam lote avangin nu tam tak hian fa sual an hring thin a ni. A chhan chu an faten zirlai pawimawh tak tak an lakna hmun turah zirlai pek nachang an hriat tlat loh vang a ni. Mi tumahin fa sual ni turin sual saa piang an hring bik a ni lo va, an zirtir leh enkawl danin a zir miau si loh erawh chuan a tawpah fa sualah an chhuah ta thin a ni zawk. 

Aw.... Nute u, in mal chung hlutna leh pawimawhna hi ngaihtuah nawn fo thin rawh u. In fate nakin hun tur ngaihtuah chung rana in zirtir a, in enkawl phawt chuan an dam chhungin an bo hlen ngai tawh lo vang. Chuvangin in mal chung leh vanram in thlun zawmtir thei ang chiahin in mal chung leh hremhmun pawh in thlun zawmtir thei bawk a ni. In fate nakin hun tur atan a khawi zawk hi nge in thlansak dawn le? In mal chung hlutna leh pawimawhna hi hre ran chungin in fate tan in mal chung leh vanram thlun zawmtu pawimawh tak nih tum theuh ang che u. 

Thu sawi thiam tak pakhatin a sawi hi tha ka ti hle mai a, ka han zep tel hram teh ang. Heti hian a lo sawi a, "Ka nu mal chung hi ka tan chuan ka sikul a ni a, ka choka (ei leh in ka lamna hmun) a ni bawk a, ka toilet (ka zun leh ek inthiarna hmun) a ni tel nghal bawk a, ka khum a ni a, ka playground (ka infiamna hmun) a ni bawk a, ka engkim tihna hmun a ni...." tiin a nu mal chung hlutna leh pawimawhna a sawi hian min hneh hle a ni. Heti khawpa hmun pawimawh ni si hi engvangin nge kan fate nakin huna an hmakhua lo awm tur hi kan ngaihthah a, zirtirna tha pek nachang kan hriat loh thin le! Nute hian fate in enkawl danah ngaihtuah chiana inenfiah tur in nei a ni. 

Aw... Nute u, in mal chung hlutna bo thak khawpin in fate zirtirna tha pe lovin awm ngai suh ang che u.