Zo Vapual

Khum beta dam tunlai thalaite nun

C. Lalmuankima

Slough, United Kingdom

Tunlai kan thalaite zingah tunlai tawng takin khum beta na ni lo, khum beta dam tam tak ka hmuh hian ka lung an tichhiain rual kan el lohzia a va tilang nasa tak em tih hi ka ngaihtuah ve chawk thin nia! Khawvel hmasawnna leh changkannain a thopa zuana min thlawhpui dawr dawr laia kan thalaite nunah hmasawnna leh changkanna ze dik lo (rual elna awm map lova nileng leh zan khawtairek thak thaka social media buaipui emaw TV Games leh thil dang buaipui) takin bu a khuar erawh ka rilru a va tina thin tak em!

Thalai kut leh ke kim biai siin mahni thawh chhuaha chhungte chawm chu sawi loh nu leh pate thawh chhuah sa ringa a pawr thei ang bera thawk hreh miah lo kan zingah hmuh tur an awm nuk ta mai hian Thangthar nun ning Thasiama koh hial nap khawpin min siam fo thin reng a ni. Mahni thawh chhuah sawi tur apui nei lova awmhmuna chhungte thawh chhuah sa ringa lo inlak-champ ve ngawt hi nulaho phei chuan 'A pa lo hle' an ti tawh asin! Thenkhat phei chu chhungkuaah thawh chhuah sawi tur chhe te pawh nei hawt si lo hian a baa lak te hi zu han zak lovin zu han hreh der lo nia! A baa lak ngam hi changkannaah kan ngai zawk ta hial em ni tih khawpin kan zak hauh lo va, ba tam thei apiang mai hi an 'tunlai' ta berah kan ngai duh hial tate pawh hi inenfiah tur kan va ngah tak em! A baa lak kan huai tluk tal hian a pek tlak (pek let) lamah pawh huaisen ta ila kan nun hi corruption lakah kan chhanhim thei ang. 

Photo: Google Image

Hei hi tunlai thangtharte nun alawm tiin inhnem chawp dawn ngawt mah ila, khawvel tukverha han dak chhuah chiah hian a nih lohzia a tilang chiang leh lawi si. Hnam pui leh fing zawka kan ngaihte hi an thalaite nunah rual elna tha tak tuha a awm avangin an hun neih chhun pawh keini anga engmah tih lohva khum beta dampui atan chuan an hmang ve lem lo niin a lang. Rual hi an el em em a, anmahni tawkah inchawm zo turin an thawk fat fat zawk thin asin! Hnam pui zawka kan ngaihte leh hnam changkang zawka kan ngaihte nen hian hun chan in ang reng nei si hian kan hun hman danah erawh a lo inthlau ta thin a, rual elna kan tlachhhan hle tih a hriat mai a ni. Miin rual a el tawh loh chuan a el tawh loh ni atang khan a rual elpuiten an tlansanin hma an sawn khalh nghal a, vawiina thangtharte nunah hian kawng engkimah rual elna thinlung tlafir nei zel tura inchah nawn mawlh mawlh hi a pawimawh ta berin ka hria. Chuti a nih loh chuan kan hriat chhun leh thiam chhunah hian kan intilungawi ang a, hmasawn tum tawh lovin kan awm ang a, kan rual elpuiten hla te khua min thlensan mai ang tih pawh ka hlau hlel lo ve.

Khum beta dam sen hlurh mai tunlai kan thalaite zingah hmuh tur an tam ta! Hetiang nun hi heti maia awm tur chuan ka phal hlawl lo a ni. Ka ngaihtuah chian poh leh nakin lehzela thangthar lo awm turte lu kan la tihai hle mai dawn te hian ka hre thin. Hetianga kan kal zel a nih ngat chuan nakin lehzela thangthar lo awm turte hi hnam dang hmaah dak chhuak ngam lo khawpin kan siam ang a, keini aia hnam te nau zawka kan ngaihte hial rawng pawl kan la bawl lo vang tih a sawi theih miah loh a nia! He khawvel hi a taima hnam apiangte dinchhuahna khawvel a ni miau si a, tunlai kan thalaite hi awmhmunah thatchhiat hna kan lo thawh mai mai chuan kan duh loh nghawngkawlah hial kan la inbarh lut thei a ni.

Khum beta dam sen hlurh na na na chu ei in pawh an lo duhtui phian zel mai a, chhungkaw sum lut leh chhuak lam ngaihtuah hauh lovin hmuihmer lah chu a duh hlei hlei an la ni duh zel mai si a. Zuk leh hmuam lah chu a nei ber ang maiin a ba pawhin kan thial, kan hmuam, kan ei tin ten thei mai zel te hi zah nachang hriat aruangin ba nei tam thei chu intihtheihna atan tak kan hmang duh lek tawh a ni mai si a, khua hi a va var lo tak em ve aw! Mahnia thawh chhuah tum si lo hian chhungkaw sum pai dinhmun ngaihtuah lek lova lo chet san ve vak lah kan zak tawh lo chu a nih ber hi maw! He khum beta dam sen hlurhna hian kan nakin nunah engnge nghawng a la neih leh dawn tih lam hi kan va ngaihtuah lo tak em! Mahni pawh kan intodelh thei lo a nih chuan chhungkaw tan kan va tangkai nep dawn tak em! Ram leh hnam intodelh tura thil pawimawh hmasa ber chu mahni intodelh hi a ni asin! 

Chhunzawm leh atan....