Zo Vapual

Tlan paha chhiar theih nun

C. Lalmuankima 

Slough, United Kingdom 

Miten tlan pah pawha an chhiar theih leh an zir theih nun hi i kawl vein i inhria em? He zawhna leh he nun (mite chhiartlak nun) hi a pawimawh hle mai maw! 

Min zirtuten min zirtlak khawp leh ngaihnawm an tih khawp turin kan nun hi kan chetzia kawng tinrengah kan uluk leh kan takzia kan lantir zel a pawimawh a ni. A chhan chu Isua chhinchhiahna putute kan nih tlat vang a ni. Nangmah atanga zirtlak awm lo khawp leh miten an chhiartlak pawh awm lo khawpa nun ze nghet lo leh lepchiah tak kawltu i nih chuan a pawi viau ang a, nangmah avangin mite an tluk phah fo bawk ang. 

Photo: Google Image

Ka duhthawh lutuk vang te pawh a ni mai thei e, keini chu miten tlan paha an chhiar theih chu sawi loh ding chunga nasa taka an thlek chung pawha an chhiar fuh hleih theih loh nun kan kawl leh tlat thin hian min chhiartute nunah tuihalna kan siam pha lo thin a ni. Fiamthu ti tak deuhva an sawi ang deuhvin, 'A ni hi chu ringtu (Kristian) a intih loh phei chuan a thiltih atang chuan kan hrethiam thin lo,...' tih hi kan nuna miten min hmuh dan a ni thei asin. Thenkhat phei chu ringlo mite tih duh loh thleng thleng te hian kan ti duh tlat zel mai te hi min chhiartute tan chuan kan nun hi chhiar fuh a va har dawn ve aw! Min chhiartute nuna tuihalna thlen pha khawp hian kan nun kan uluk a va pawimawh tak em! Nangmahah khan miten nun tuihalna chhe te mah an hmu lo a nih chuan i inenfiah leh a ngai tihna a ni ang. 

Kan nun hi kan awmna hmun leh kan thiltihna hmun apiangah fiah taka a lan phawt chuan ringlo mite pawn Lal Isua an fak thin. Kan nun chante hi hleprukna hmunah fiah thin rawh se, zu hmun hlimnaah fiah thin rawh se, hnathawhna hmunah fiah thin rawh se. Kan chenpuite leh kan hnathawhpuite pawhin ngaihnawm ti taka an chhiar theih loh nun kawltu kan nih chuan a pawi viau vang. Chuvangin kan nun chan hlutzia leh takzia hi miin tlan pah pawha an chhiar theih khawp turin fiah thin rawh se. Mahni pawhina kan chhiar tuitan loh tur nun phei chuan kan bula cheng vete nun a va hliam nasa thin dawn tak em! Chuvangin Isua nun neitu leh changtu kan nih angin kan thlen chin apiangah ringlo mite pawhin ngaihnawm leh hmuhnawm ti taka kan nun an chhiar theih turin uluk taka kan hman a pawimawh hle a ni. 

Isua nun neitute kan nih chuan kan ringtupuite leh ringlo miten min zirin min chhiar a ni tih hi kan hriat reng a tha hle mai. Min chhiara min zirchiangtuten ngaihnawm an tih loh khawpa lepchiah taka kan lo khawsa ve mai a nih chuan hmelma Setana tan sawichhiatna remchang tak kan siamsak tihna a ni ang. Chuvangin Isuan a thisen hlu tak hmanga min tlana nun min pek hi min zirtute pawhin tlan pah pawha an chhiar kan theih loh tur khawpa fiahin kan nun hi Lalpa tan kan serhin kan buatsaih fo thin tur a ni. Kan nun neih hi min zirtuten an zirtlak loh khawpa awmhmunah sual rawngbawl hna kan lo thawhpui mai a nih chuan kan tisual hle ang a, nakinah thinlung buktu hmaah engtin nge kan insawifiah theih teh lul ang le?

Kristian nun kan lanchhuahtirna hmun tur hi mi tam takin ramthim ramrovah chauh emaw eng emaw ni bikah chauh emaw lanchhuahtirna hmunah kan ngai thin a, kan tisual fo thin reng a ni. Kristian nun chu chutiang chu a ni lo va, kan nitin khawsakna leh thiltih leh hnathawhna kawng engkim hi a lanchhuahna pawimawh tak a ni zawk a. Kan chhehvela kan chenpuiten an chhiartlak khawpa kan nun hi kan hman a lo pawimawh zawk a ni. Entirnan: Hmun pakhatah chuan hnam dangte nena kan lo khawsaho/thawkho va, toilet han tihfai mai te, floor bal tak han hrutfai mai te....etc. hian kan chenpuite/thawhpuite chhiartlakin kan lo awm reng tawh tihna a ni. Ringtu nun hi thil harsa leh khirh lutukah kan ngai thin a, thil ho tê kan ngaih atang hian bul han tan leh thin ila, tichuan kan chhehvela kan chenpuite /thawhpuite tan kal pah pawha an chhiartlak nun neitute kan nihzia an hria ang a, an tan malsawmna thlentute kan lo ni zel dawn a lo ni reng mai. 

Tlan paha chhiar theih nun hi Bible chhung thu khirh pui pui va hriat teuh lam a ni lo va, Pathian Thu laimu ril tak tak va inhriatsiakna lam pawh a ni hek lo, kan hriat chhun chhunte hi nunpui thin ila, kan tawngkain a sawifiah thiam loh hi kan nunah lantir ila, tichuan min thlirtute tan an thlir ninawm loh khawpa mawiin kan nun hi a par chhuak tawh mai dawn a ni. Chu tak mai chu kan nuna chhiartlak awmchhun lo lanchhuahna tur chu a ni a, miten tlan pah pawha an chhiar fuh chat chat theih tur chu a ni zawk. I tawngkaa i sawifiah theih loh kha i chetzia hmangin mite chhiartlakin i lantir thei a ni tih hi hre reng thin ang che. 

Nang leh keia taksa lo hi chu Lal Isuan a hmel lan chhuahtirna dang a nei chuang lo. Nang leh keia kut leh ke lo chu Lal Isuan kut leh ke dang a nei chuang lo va, nang leh keia nun ngei hi mite chhiartlak nun duhawm tak ni thei turin ni tin buatsaih thin a pawimawh hle a ni. Chutianga kan buatsaih phawt chuan miten kan nun hi an rawn chhiar fuh chat chat thin ang a, kan nun atang hian ei tur tak thu nung an rawn hmu bawk ang. 

Tlang chunga pholeng tar chu a hnuai atang pawhin fiah takin a hmuh theih thin ang hian nangmaha pholeng tar Isua nun kha mi tam tak hmuh theihin lo awm zel se la, ni tin lo langfiah deuh deuh rawh se.