Thlarau Thianghlim tilungngai suh u
(2 Kor 13:14; Gal 4:6; Eph 4:30; Rom 8:1-17)
C. Lalmuankima
Newcastle, United Kingdom
"Tin, Pathian Thlarau Thianghlim chu tilungngai suh u, tlanna ni atan chuan amahah chhinchhiaha in awm kha." (Ephesi 4:30)
Thlarau Thianghlim tihvuia tihlungngaih chungchang sawi tur tam tak awm thei zingah kan thu sawi tum a fiah lehzual theih nan pahnih khat lekin i han la chhuak teh ang. Chanchin Tha Luka ziak chuan heti hian a lo sawi a, 'Thlarau Thianghlim meuh sawichhia erawh chu a sawichhiatna chu ngaihdamsak a ni lo vang...' (Luka 12:10) tiin Thlarau Thianghlim sawichhiat a pawizia leh ngaihdamna an chungah a awm loh tur thu kan hmu a. Pathian hian ringtute chhunga hna thawk thin Thlarau Thianghlim hi a lo ngai pawimawh hle a ni ang. Mihring Fapa sawiselna ngaihdamsak a nih theih laiin Thlarau Thianghlim sawichhiatna erawh ngaihdamsak theih a nih loh thu kan hmu a ni.
Tichuan Tirhkohte Thiltihah pawh khan Thlarau Thianghlim bum tum a pawizia kan hmu bawk a, Anania leh Saphiri te nupa pawh khan an nunna hial an chan phah a nih kha (Tirhkohte Thiltih 5:1-11). Chuavangin Thlarau Thianghlim tihvui leh bum tum hi a hlauhawm hle a, mahni ngei pawhin anchhia kan dawng thei a ni tih hi kan hriat a tha.
Chuti chu Thlarau Thianghlim chu ringtu nunah engtiang chena pawimawh nge a nih tih hi zawhna a awm thei ta a. Thlarau Thianghlim pawimawhna chu heti hian sawi dawn ila, Thlarau Thianghlim kaihhruaina tel lovin ringtu nun kawng a zawh dik theih loh va, a huaisen theih loh bawk a, Thlarau Thianghlim kaihhruaina avang erawh chuan ringtuten hmun raltitna berah pawh huaisen takin rawng kan bawl thin a ni. Vawiina khawvel hmun hrang hranga hmun ralti ber pawha huaisen taka rawng kan bawl theihna chhan pawh hi Thlarau Thianghlim kaihhruaina kan chan vang a ni. Chu Thlarau Thianghlim kaihhruaina chuan engtiang khawpa thinlung sak ber pawh mei bula sathaukhawvar leh khawihnun an tuiral zawih zawih angin a tituiral thei a, a hmaah ding zo thei an awm bawk lo.
Zofaten Thlarau Thianghlim hna thawh kan hmel hriat dan leh chan duh dan erawh inenfiah tur tam tak a awm thei ngei ang. Thenkhat chuan keimahnia rawn thawk deuh pup pup, lum deuh pup, hit deuh zuai, hnuk deuh awrh, tek deuh sawk atd...a lo thlen kher loh chuan Thlarau Thianghlim la chang lo ang te pawhin kan sawi thin a, hei hi thil tha ber a ni hek lo. Thlarau Thianghlim hnathawh harhna dik tak chuan Lal Isua a chawimawi thin a (Johana 16:14), Isua chawimawi lem lo mahni rau rauva raute hi chu Thlarau Thianghlim hnathawh dik tak a ni ngai lo. A rau chan zawnga kan sawi dawn chuan lehkhaden te, movie en te, dawtsawi te..adt. hian rau an nei vek a, eng rau rau emaw ni hi chu a chan teuh theih alawm, mahse Lal Isua chawimawi lo rau hi chu awmzia a nei lo va, Johana lehkha thawn chuan chumi laka fimkhur turin min fuih zawk a, thlarau nazawng ring lo tur leh thlarau chu Pathian laka mi an ni nge ni lo fiah turin min fuih a ni (1 Johana 4:1).
Thlarau Thianghlim hna thawh dan tam tak sawi tur a awm ngei ang, (Galatia 5:22-a thlarau rah te kha hre tel bawk ila), amaherawhchu kan thlarau chan dan hi Pathian lak ami a ni nge ni lo kan fiah a ngai a, kan thlarau chan Lal Isua chawimawi lo, mahni tisa phur phura inchawk phur chawp mai kan nih chuan keimahniah inenfiah tur kan nei tihna a ni. Pathian Thlarau Thianghlim hna thawh hi nu bulh bulhin a awm ngai lo va, a changtute nunah fiah fel fai takin hna a thawk zawk thin a ni tih erawh kan hriat reng atan a tha hle ang.
Thlarau Thianghlim harhna dik tak chuan kohhranah rah tha a chhuah thin a, kohhranah inunauna tha a siam a, kohhran intihchak tawnna a thlen bawk thin. Kohhran pawhin hma a sawnpui loh harhna chu Thlarau Thianghlim atanga chhuak harhna dik tak a ni kan ti thei lo vang. Chuvangin Pathian atanga chhuak Thlarau Thianghlim harhna dik tak chuan kohhranho a siam puitling a, kohhranah hmasawnna a thlen thin a ni. Kohhranho hmasawnna thlen thei hlei lo thlarau hi chu harhna dik tak a ni thei ngai lo vang.
A pawimawh ber chu Pathian atanga chhuak Thlarau Thianghlim harhna kan chan hi kohhranho zingah ngampa taka a awm zel theih nan a kaihhruaina ang zela ke kan pen a pawimawh a, chutianga kan tih phawt chuan kohhran pawhin taksa leh rilru leh thlarauvah malsawmna a let tam takin kan dawn phah thei ang. Chu Thlarau Thianghlim duh dan anga ke kan pen zel theih nan kohhranho hi i inhlan thar zel ang u.
No comments:
Post a Comment