Zo Vapual

Beidawnna inphuar behtir suh

C.Lalmuankima

Newcastle, United Kingdom

Kan kawng zawhah hian inchhuih palh chang kan nei thin a, tluk palh chang te pawh kan nei thin. Kan inchhuih palh avang leh tluk palh avangin tlaktlai lo ber kan ni chuang lo va, kan tum ram kan thlen loh phah chuang lo. A pawimawh ber zawk chu chumi atanga thawh leh vat a, tumna ram lam pan zel hi a ni. Chumi atanga thawh leh nachang hre lote hian an tum ram an thleng ngai lo. 

Photo - Google Image

I hringnunah khan vawi tam tak insawhin i lo tlu palh a ni mai thei e, chumi atang chuan tho leh thin ang che, tichuan a tawpah i tum ram ngeiah hruai thlenin i awm ang. Mahni tlukna hmun atanga thawh leh nachang hre lo khawpin beidawnna kan inphuar behtir ang tih hi a hlauhawm ber a ni. 

A chang chu hringnunah hian kan beisei phak aia chhia leh rapthlak zawk tawn chang kan nei thin a, chung kan thil tawnte avanga indawm kun reng tur erawh kan ni lo. Kan thil tawn tawh leh tawn mek atangin zirlai lak dan kan thiam a pawimawh hle a ni. A eng zawnga thlir thiamlo chuan a thil tawn apianga hlimna leh lawmna a hmu ngai lo va, a eng zawnga thlir thiam mi erawh a thil tawnah a chhia a ni emaw a tha a ni emaw zirlai lak dan a thiam a, a thil tawn apiangah a hlimin a lawm thin a ni. A chang chuan kan tlukna hmun atanga kan thawh lehna hian dinhmun nghet zawk leh tanhmun nghet nei thei turin min siam fo a nia.

Tlukna atanga thawh tawh loh hi a pawi ber a. Hringnun a nih miau avangin a changin inbah sual palha tihpelh rem rum chang te pawh a awm ngei ang le. Chumi hmun atanga kan thawh leh fo erawh a pawimawh a ni. Ringtu nunah pawh hi a changin kan tisual remrum a, tluk chang kan nei thin ngei ang. Chumi hmun atanga ding chhuak tura kan thawh leh fo a pawimawh hle. Mahni tlukna hmun atanga thawh tum tawh lote hian an nunah an thlan loh harsatna dangin a tlak buak duh fo a nia!

A chang chuan kan thil tawn mek harsatna te hian a changin beidawnna khurah min hnuhthlak tumin min phuarbeh an tum thin a, hringnuna ding chhuak thei tawh lo tur khawpa chauva min hrek beh an tum thin. Chu chu mi tam takin chawtak khuka lo khukpui thin kan awm a, a tawpah beidawnna khur thuk takah hnuhthlakin an awm thin reng a ni. 

Hringnunah hian beidawn chang chu a awm ve bawk ang chu, mahse chu beidawnna chu a mitah tak ena ngam taka kan hmachhawn chiah hian chumi lak atang chuan kan tal chhuak thei thin a ni. Beidawnna lama tan tum sa tlata kan awm erawh chuan engtik lai mahin kan hlawhtling ngai lo vang. Thenkhat chu thawh hma hauhva beidawng sa tlat leh beidawnna lama tang sa tlat an awm a, hei hi a pawi em em a ni. Beidawnnain a zuam theih loh tura kan tanhmun kan rem sauh sauh a pawimawh.