Zo Vapual

I hlutna i ngaihtuah ngai em?

C. Lalmuankima

Newcastle, United Kingdom

‘Kan rinawm phawt chuan thil dik tak kan ti tih kan hria a ni.’

Rinawmna hi mihring hlutna leh zahawmna min siamsaktu pawimawh tak a ni a, chu rinawmna chuan mihring a luah khah loh chuan mihring hian a nih ang turin a ni lo thin a, mi rinawm lo chu an hlu lovin an zahawm lo tel bawk. Mahni hlutna leh pawimawhna lam ngaihtuah nachang hre lek lova eng emaw ni thil ho teah kan rinawmna hloh khawpa thil kan ti a nih chuan a pawi hle ang. Rinawmna hi mihring zahawmna min siamsaktu pawimawh tak a ni kan tih tawh angin mi rinawm lote bula awm tluka thil nuam lo a awm awm lo ve. Mahni hlutna ngaihtuah nachang hre miah lote hi mi rinawm lote an ni duh khawp mai.

Photo: Google Image

I hlutna i ngaih pawimawh leh ngaih pawimawh loh azirin i rinawm leh rinawm loh a hriat theih a ni ti ila mi tam takin min hnial ngei ang. Mahsela kawng tam takah chuan a dik tlat si a nih hi. Mahni hlutna leh pawimawhna ngai pawimawh hauh lova rinawm lohnain kan nun min suamsam dan leh ei chhiat dante hi ngaihtuah thleng thin ila chuan kan rinawm leh rinawm loh hi kan hlutna kan ngaih pawimawh leh ngaih pawimawh lohvah tam tak a innghat a ni tih hi kan tawmpui thei ngei ang.

Mi rinawm lo chuan a hlutna lam ai mahin ama hlawkna tur lam a ngai pawimawh zawk thin a, a hlawkna tur a nih dawn phawt chuan kut tling lova sum lak mai te, mi chanchin a chhe zawnga sawi leh rel te a tihreh thin lo a ni. Mi rinawm erawh chuan a hlutna a ngai pawimawh fo thin a, kut tling lova thiltihin a nghawng pawi turzia leh ama nun ngei pawh a chhe liam kawna a hnuhthlak theih thute thlengin a ngaihtuah hmasa thin a, chutianga kawng tam taka a ngaihtuah hnuah chuan a hlutna hloh thak tur a nih dawn ai chuan thil tha lo lakah a insum thin a ni. Thil tha lo laka insum thei te hi mahni nuna rinawm te an ni duh khawp mai. Kan rinawm loh chuan eng emaw ni hlekah hlawk tumna emaw midang laka hlawk tumna emaw kan nei fo thin.

Kan hnam zahawmna pawh hi kan rinawm leh rinawm lohvah thui tak a innghat a ni. Hnam zahawmna hi amahin a rawn insiam chawp mai lo va, hnama insiamten kan nunphung leh thiltih hmangin kan hnam zahawmna hi kan siam thin a ni. Kan rinawm loh phawt chuan kan hnam zahawmna kan tichhe mek zel a, kan rinawm erawh chuan kan hnam zahawmna kan siam mek zel thung. Kan rinawm leh rinawm loh azirin kan hnamin a zahawmin a zahawm loh phah thei a ni tih hi hria ila a tha hle ang. Kan hnam hlutna pawh hi khawi bazaar-ah emaw khawi mawi puithuna thiltihnaah emaw khawi maw hmun biru takah emaw va zawng duh suh, i hmu dawn chuang lo. Kan hnam hlutna kan zawnna hmun tur dik tak chu a chhunga cheng hnama insiamate kan rinawm leh rinawm lohvah hian kan zahawm leh zahawm lohna a hmuh theih a ni.

Engtiang khawpa mi ropui leh thiltithei, mi hausa leh neinung pawh ni mah la, i rinawm miau si loh chuan i nun a zahawm lo hrim hrim a, mite ngaihhlut i hlawh ngai lo bawk ang. A chhan chu nangmah tizahawmtu ber rinawmna kha i vawng tawh tlat lo va, nangmaha miten an ngaihhlut ber zahawmna a awm tawh loh chuan i hlutna a bo vek tihna a ni. Rinawmna hi mihring mihringa min siamtu a ni a, chu mihring zahawmna min siamsaktu chu mihringin a vawn tlat loh chuan amah leh amah kha dere-ah a insiam thei a, lak tlak loh khawpa nun duhawm lo takah a insiam thei. Chuvangin rinawmna ber i nunin a tlakchham tawh chuan i zahawmna i hloh tel nghal tihna a ni ang. He khawvelah hian mi rethei leh berhchep ber pawh ni mah la, i rinawm phawt chuan mi hausa leh thil tithei tak tak, rinawm lote aiin i zahawm tawh hrim hrim a, i nun hi a duhawm tawh hrim hrim tihna a ni. Chuvangin zahawmna hi neih thil hausak leh neih tamah a innghat lo va, kan rinawm leh rinawm lohvah a innghat zawk a, kan rinawm phawt chuan mi rethei ber pawh ni mah ila mi rinawm lote ai chuan kan zahawm tawh hrim hrim tihna a ni.

I hlutna bo thak khawpin thil tih ching i nih chuan i nun chu a khawngaihthlakawm hle ang. Mahni hlutna ngaihtuah nachang hrel ote nun hi khawvela mi khawngaihthlak ber nun a ni. Sum leh paiah kan hausa lo a nih pawhin rinawmnaah hausa ila, chu rinawmnaa kan hausak phawt chuan kan hringnun zahawmna kan insiam thin a ni. Chuvangin i hlutna pawimawhzia ngaihtuah thin la, i rinawm leh rinawm lohnain i zahawmna a siamin a siam lo thei a ni tih hi hre reng thin ang che.