Zo Vapual

I fate hnenah engnge i zirtir ve thin le?

C. Lalmuankima 

Newcastle, United Kingdom

Nula pakhat thi tur pawhin a nu hnenah, ''Ka nu, ka pa nena in inhauna tawngkam chanve tal pawh hian chhandamna thu hi min lo hrilh ni ula, hlim takin ka thi ve thei tur," tiin thlabar chungin thlan a pan ta a ni (Rev. Vanlalzuata). 

He thu atang hian nu leh fate hian kan fate kan enkawl dan chungchangah kan inenfiah a pawimawhzia kan hmu thei a ni. Nu leh pa tam takin fa fel leh tha kan duh a, tu nu leh pa mahin fa fel leh tha duh lo kan awm awm lo ve. Amaherawhchu fa fel leh tha nei tur erawh chuan enkawl leh zirtirna pek lamah kan thatchhe leh tlat lawi si hi kan duh leh duh lohvin fa sual leh tha lo kan lo nei ta thin a ni. 

Photo: Google Image 

D.L. Moody thu sawi kan hman rim em em leh ngaihthlak zin deuh mai hi i han zep tel teh ang. "Ka nuin min enkawl ang hian mi nu te hian an fate enkawl sela chuan Lung In hi a awm lo vang." tiin nuten an fate an enkawl chungchanga an pawimawhzia tarlangin Lung In awm ngai lo khawp hiala an fate enkawla kawng thaa an kawhhmuh theih thu kan hmu a ni. 

John Rondalph pawh khan fa enkawl chungchanga nute pawimawhzia hriain heti hian a lo sawi ve bawk a, ''Ka naupan laia ka nuin ka kut vuana a bula min thingthittira, 'Kan pa vana mi i hming zahawm rawh se, ' tih min zirtir hre chhuak hauh lo ila chuan, Pathian awm ring lo mi, Pathian a awm lo ti pawl ka ni ang." tiin. 

Zofa Society-a kan fate kan enkawl leh kan zirtir dan chungchangah pawh hian hmasawn tur tam tak kan la nei a ni. Naupang enkawl chungchang ngat phei chu nute mawhphurhna deuh bikah kan ngai deuh tlat bawk si a, nute mawhphurhna hi a ko hle a tih theih ang. Fate lah hian pate aiin nute hi kan lo nel zawk bawk si a, pate aiin nute bulah kan khawsa tam a. Nute zirtirna leh enkawlna dawng tha ngai lo naupang chuan a puitlin huna a hmabak tur chu ngaihtuah ngam loh khawpin a thim a ni. 

Fate enkawl leh zirtir hna hi nute chauh enkawl tur tihna a ni bik lo va, a tlangpui thuin fate hian pate aiin nute hi kan nel tlat avangin kan rilru zawng zawng phawrha inbunruah nan pawh kan hmang fo thin. Chutianga faten an rilru zawng zawng inbunruah nana an hman thinna hmun chu nute hi an nih tlat avangin fa enkawl leh zirtir kawngah chuan nute mawhphurhna a lo rit ta hle thin a ni. Chutianga mawhphurhna lian tak nei kan nih avang chuan fa enkawl leh zirtir kawngah hian nute hi inthlahdah thei kan ni lo. A sawhkhawk lo let lehin a nghawng chhiat pawi turzia ngaihtuah thleng pha thiam kan nih chuan kan fate kan enkawl leh zirtir kawngah kan inthlahdahin a rinawm loh.

Fate enkawl leh zirtir chungchanga mawhphurhna lian tak neitute kan nih avangin kan fate hi engnge kan zirtir ve thin le tih hi kan inzawhna pawimawh tak lo ni thin se la a va tha dawn em! Naupang enkawl chungchang hi Kristian Chhungkua ang deuh hi a ni a, inzirtir a tawk mai lo va, inkaihhruai tel a ngai a ni. A changin thu hmanga inkaihhruai hun a awm ang a, a changin chetzia hmanga inkaihhruai hun a awm bawk ang. Thu hmanga inkaihhruainain a thlen phak loh chinah chetzia hmanga inkaihhruai a tul chang a awm bawk a ni. 

I fate hnenah thil tam tak zirtir turin ka ti hauh lo che. Amaherawhchu a pawimawh ber te zinga mi erawh i hmaih palh ka hlau thung. I fate hnenah khan an lungngaih leh mangan nia Pathian koh dan i zirtir thin em? An lungngaih leh mangan ni a tlukluhna hmun tur dik tak i kawhhmuh thin em? An beidawn ni a pan tur dik tak Lal Isua an pan pawimawhzia i hrilh ngai em? I fate an lungngaih, mangan, beidawn ni a pan tur dik tak i kawhhmuha i zirtir ngai lo a nih chuan an puitlin hnuah rawn felin rawn tha viau turah beisei ngai suh ang che. A enkawltu berin kawng dik i kawhhmuha i zirtir miau si loh chuan an puitlin hnuah pawh han that vak ngaihna a awm dawn lo tihna a ni. Chuvangin kan fate enkawl an ngaih hun lai taka kan enkawla zirtirna kan pe tluka hlu leh pawimawh hi a awm lo va, kan faten an lungngaih, mangan, beidawn ni a pan tur dik tak Pathian an pan theih nan zirtirna tha kan pek phawt chuan kan fate nunkawng hi an puitlin hnuah pawh engtik lai mahin a ngaihtuahawm tawh lo vang. 

Fate enkawl leh zirtir chungchangah an hnenah fuihna thu tha tak tak i sawi thiam lo emaw i zirtir thiam lo emaw a nih pawhin i chetzia hmang khan zirtirna han pe thin mah teh, an puitlin hnuah pawh an bo leh tawh ngai lo vang.