Zo Vapual

Saffron Revolution Day hmang....!

By L.M.Kima





Vawiin ni 26th September, 2011 Chawhnu dar 1:00 khan a vawi 4-na atan Saffron Revolution Day kan hmang. Saffron Revolution Day hi Burmese Embassy hmaah hmangin thalai 150-200 rual ten duh loh entirna kawng zawh neih a ni. He Saffron Revolution hi kum 2007 September ni 26 khan intanin kumin hi a vawi 4-na champha a lo ni leh ta reng mai. He Saffron Revolution hi kawl puithiamten mipui harsatna hriain lirthei chuan man to lutuk chungchangah te, ei leh bar chungchanga thil man to lutuk te denchhenin sipai sawrkar thuneitute hnenah an rilru dik tak lanchhuahtirna kawng zawh hi huaihawt a ni a, he kawng zawh runpuiah hian kawl puithiam te mai bakah mipui a nuai telin an rawn zawm a ni.



Photo : Pa Lai



Kum 2007 kawng zawhah khan sipai sawrkar thuneitute chuan ramchhunga lirthei chuan man an tihhniam loh mai bakah mipuite tana remna leh muanna zawngah kawng zawhtute chu an ralthuam hmangin an kap a, mi 100 -in an nunna an hloh a ni. (Hemi tum hian Japan chanchinbu mi pakhat pawh kahhlum tel a ni bawk.) Kum 2007 Monk's Saffron Revolution-ah khan keipawh Yangon-a ka awm ve lai tak a ni a, sipai sawrkar thuneitute leh mipui in tawng vel chu mit ngeiin ka hmu ve a ni. Tichuan ni 29 September pawh khan Sule bul velah kan thian pakhat nen kan va kal ve a, an silai kap ri te pawh kan hre thei bawk.

Buddhist puithiam ten ramchhung mipuite harsatna hriain remna leh muanna kawng zawha thlamuang taka kawng an zawh lai chu sipai sawrkar thuneituten an duh thalin an kap a, an hrem bawk a, anmahni puithiam te ngei pawh an that a ni. Hei hi khawvel sakhuana zawn atanga kan thlir pawhin hei tluka sualna rapthlak hi a awm thei chuang lo vang. Chuvangin he Ni hi Kawlram History ah chuan a reh tawh mai mai dawn lo va, hei hian pan ser angin kan thinlungah hmun a luah reng tawh dawn a ni. Heng zawng zawng hi eng dang vang a ni lo ve, sipai sawrkar thuneitute lal hrawtna vang leh sipai sawrkar inlungling vanga thil ti, mahni pathian pawh zuah lo va an thiltih vang a ni. Chuvangin vawiin niah hian he ni hriatrengna hi hman loh rual a ni lo va, kan thinlungah ser nung angin a awm reng tawh dawn a ni!

Vawiin Monk's Saffron Revolution Day, Burmese Embassy hmaa kan hman hi Burma Democractic Concerns (BDC) huaihawtna hmanga neih a ni a, kan hun hman dan tlangpuite chu : Chawhnu dar 1:00 atanga tanin ram tana an nunna hial lo hlan ta te hriatrengna leh sunna hun hman a ni a, tichuan kum 2007 -a an nunna chan ta te tan sunna hun neih a ni bawk. Tuna Myanmar jail-a lung in tang mek, kum 2007 kawng zawha an man tak mi 270 chuang leh political avanga mi 2000 chuang lung ina tang mek te tan ngaihhruina hun hman a ni a, minute khat chhung kan ngawi. Chumi zawhah chuan kan hlapui hmangin kan chhunzawm nghal a, kan hlapui hmanga kan chhunzawm hnuin BDC Director U Myo Thein hnen atangin fuihna thuchah kan ngaithla a ni. Chumi zawhin KIO aiawhin Mr. Ring Du hnen atangin thuchah kan ngaithla chhunzawm nghal a, chumi hnuah Mark-a hnen atangin thuchah kan ngaithla bawk. Tichuan Chin Community aiawhin Mr.Brian hnen atangin thuchah tawi ngaihthlak chhunzawm a ni a, chumi hnuin Ko Htein Linn hnen atangin ngaihthlak a ni bawk. Tichuan Monk's Saffron Revolution Day hunserh chu chawhnu dar 2 velah kan zo fel a, kan zawh fel hnuin mi thenkhat te chu chawhnu dar 3-ah Chinese Embassy hmaah Myit Sone Dam Project chungchanga duhloh entirna nei turin an kal chhunzawm nghal a ni.



Photo : Pa Lai



Tun tum kawng zawhah hian mi 200 tha vel kan kal khawm thei hi a ropui em em a, he ni hi kan ram (Myanmar) history ah chuan a reh tawh dawn lo va, engtikah mah siamthat theih a ni tawh bawk lo vang. Sipai sawrkar thuneituten mahni puithiam ngei ngei pawh thata nunrawng taka an lo tihna ni ngei hi kan thinlungah Ser nung angin a cham reng tawh dawn a ni. He sipai sawrkar thuneitute kut atang hian engtik niah emaw chuan kan la tal chhuak ngei ang a, mipui sawrkarna lal ram thar chu a la rawn ding chhuak dawn a ni. Chutih hunah chuan thil ti sualtute chu an phu tawka hrem ngei tur an ni ang a, hrem lohva chhuah an ni hauh lo vang. He kan ram kum 50 tha lai mai an thuneihna hmanga min lo awp behna hnuai atang hian kan tal chhuah hunah chuan kan ram (Myanmar) hian Zalenna takin Mipui sawrkarna kan lo nei tawh ang a, zalen takin ramchhungah ro kan rel thei tawh dawn a ni. Chumi hun chu thlir chung zelin pawl hrang hrang leh hnam hrang hrang te hian kan theihna zawn zawn atanga hma lain kan ram tan hian i han insangmar leh sauh sauh ang u hmiang ......?

Free Free : Burma Burma!



Photo : Pa Lai

Mr. Ring Du (KIO)
Photo : Pa Lai