Zo Vapual

Hmaihuh (Measles) Natna Avangin Burma Refugee...!

by Dr.RD

Photo : Google Image

USA a Milwaukee khawpui, Wisconsin State (Chicago hmar lam mile 100 vel) ah Malaysia atranga lo kal Burma refugee chhungkuaah “Hmaihuh (Measles)” natna an nei an hmu a, America mipui ten an kaichhawn darh an hlauh avangin USA sorkar chuan Burma Regfugee-te USA a lo lut tur chu tiamchin awm lovin a titawp rih a ni. Hei hi USA Health Department thuneitute sawi a ni.

August 24, 2011 ah Milwaukee khuaa lo thleng Burma refugee naupang kum 2 mi chu Hmaihuh natna a nei tih September 7, 2011 khan hmuhchhuah a ni. Burma refugee dang mi 2 pawh Hmaihuh natna an nei tih USA sorkar CDC (Central for Disease Control) in a puang.

Tin, Malaysia a tranga lo kal Burma refugee California state, USA lo thleng, kum 15 mi pawh Hmaihuh natna a vei tih an hmuchhuak leh a. He kum 15 naupang nena thlawhna (flight) ron chuang za ho refugee dang naupang 3 pawh Hmaihuh natna an vei tih an hmuchhuak leh zel a. Heng naupang damlote hi Hmaihuh venna/danna damdawi (Measles vaccine) chiu (jection) an la ni lo tih hmuhchhuah zel a ni.

CDC thu neitute chuan “heng naupangte hi Malaysia an awm lai rengin he natna hi an kai tawh nge? thlawhna (flight) chungah he natna hi an kaichhawng chauh nge tih hriatchian theih a ni lo” an ti.

“Tunah hian he natna hi USA ram-ah a darhzau loh nan, invenna atan Malaysia atranga USA lo kal tur Burma refugee-te chu hun tiamchin awm lovin lo kal rih lo turin thu kan chhuah a ni” tiin USA sorkar thu neituten chuan an puang.

Hmaihuh natana hi naupang ten an tuar tlangpui a, “Paramyxovirus” natna hrik group a “Morbillivirus” natna hrik avanga awm a ni a, a tlangpui thu in he natna tuarte chu an pang a sa a, an khuh a, an hnaptui a tla a, an mit a sen a, ni 2-3 hnuah maculopapular, erythematous an tih taksa (vun) a vual in a sen thrin a ni. He virus hi a thahna damdawi a awm lova (anti-biotics in a that thei lova) taksaa natna dodalna “Immunity or immune system” in a dodal a, ni 5-6 ah chuan an dam leh mai thrin. Mahse, hetia virus avanga an nat lai hian, naupangte chu natna dodalna an nei tlem a, an chak lo va, natna hrik dang awl takin an taksaah a lut thei a, natna dangin a tlakbuak thuai thei a ni. Entirnan:- hmaihuh natna an vei lai hian Pneumonia natna (chuap vung, khawsikpui), Diahroea (kawthra lo natna), Dysentry (santen natna) etc…

Kum 2008 khan khawvel pumpui ah Hmaihuh natna avangin naupang 160,000 (naui khat leh sing ruk) chuang an thi a ni.

(RFA news, Sept. 24, 2011 belhchhan a ziak a ni e)

Photo : Google Image

Thu lakna : Zoin