Zo Vapual

Aung San Suu Kyi Birthday kan lawm.....!

by L.M.Kima

66th Birthday, Daw Aung San Suu Kyi (Photo-Ko Martin)

Kumin 2011 June 19 a lo thlen hian NLD hruaitu Daw Aung San Suu Kyi piancham vawi 66 na a lo ni reng mai a, ramchhung leh rampawna awm zawng zawng Kawlram mipuiten kan lawmpui tak meuh meuh a ni. Kan pi ber hian kum rei tak chhung ram leh hnam tan a theih tawp chhuahin politik lamah hma min lo hruai tawh thin a, kumin kum 20 dawn lai mai jail leh house arrest-a an khung hnuin nikum khan sipai sawrkar chuan a chhuah zalen ve chauh a ni. Nobel Peace Prize dawngtu NLD hruaitu ni bawk Daw Aung San Suu Kyi hi kan chhuang tak meuh meuh va, kan ram leh hnam tan Rohlu nih a tling tak meuh meuh bawk. Kum tam tak damin leh a Vision te a hlawhtlin ngei theihnan theih tawpin i tawngtai zel ang u.

 with Burma Democratic Concern's Leaders (photo - Ko Martin)

He kan ram hian inthlak danglam hi a hun tawh a ni. Kum 1962 kum atanga vawiin ni thlenga sipai sawrkar rothap tak tak, engmah pawi sawi lo pawh hlah chuang lo, pawngsual ching bawk, Human Rights mausamtu te, anmahni duhna chauh tihhlawhtlin tum, pawi sawi lo leh mi awm tha lai pawh sawisa thin sawrkar hi a ninawm tawh tak meuh meuh va, a hne awm tawh bawk a ni. 

Pi Aung San Suu Kyi, kan ram leh hnam tan kum tam tak min dampui la, i Vision te tihhlawhtlin lo ni thuai rawh se, he i piancham hlimawm takah hian damna leh hriselna tha zawk i neiha, i ram leh hnam tana huaisen leh chhel taka ke i pen zel theihnan duhsakna sang ber kan hlan a che.

Kum 2011 pi Aung San Suu Kyi piancham hlimawm hriat reng nan hian London a awm te chuan ZAKI'S Snooker Palace hmuna intihhlimna leh inkawm hona neiin hun kan hmang a, tichuan snooker intihsiakna pawh neih a ni. Chhun 12:00 atangin zan dar 8:00 thleng hun hman a ni a, member 20 tha vel kan kal khawm a, a hlimawm hle. Tichuan hawn dawn hnaihah Burma Democratic Concerns (BDC) hruaitu U Myo Thein hnen atangin thuchah tawi ngaihthlak a ni a, lawmman semna pawh a awm. Kumin pi Aung San Suu Kyi Birthday hi kan rilru leh thinlung takin kan lawmpui a, kum tam tak damin huaisen taka ke penin min hruai zel rawh se....tih hi kan duhthusam leh tawngtaina a ni e.

Pi Aung San Suu Kyi dam reng rawh se....!