Zo Vapual

I kechheh a rualrem tha em?

C. Lalmuankima

Slough, United Kingdom

Pathian nena hun hmang tam tur chuan kan ke pen tin mai hian awmzia a nei a, kan vawi khat ke penin kan hringnun min tihchhiat vek theih laiin kan vawi khat ke pen bawk hian nun hlimna tam tak min thlen thei ve bawk a ni. Chuvangin kan ke pen tinte hi awmze nei taka pen fo a pawimawh. 'He kawng hi zawh dawn ta ila, Lal Isuan a zawh ve duh ang em?' tih hi kan ke pen hmain vawi tam tak ngaihtuah hmasa thin ila, hringnunah hian ke kan lo pen sual lo nge nge thin a ni. Chuti ni lova Lal Isuan a zawh duh loh tur kawng zawh phet kan tum a nih chuan sual lam kawng kan zawh tan mek tihna a ni ang a, a tawpah phei chuan talchhuah leh harsa khawpin kan pil bo thei a ni tih hi kan hriat reng atan a tha hle mai.

Tuna ka kawng zawh mek leh zawh tum hi Lalpan a lo zawh thin kawng kha a ni em? Tuna ka kawng zawh tum hi zawh ta ila, Lalpa a lawm ang em? Tuna ka kawng zawh mek hi keima hamthatna nge a nih Lalpa Pathian hamthatna? Tuna ka kawng zawh mekah hian Lalpa a lawm em? Tih hi kan nuna kan inzawhna pawimawh tak a nih fo loh chuan kan hriat loh hlanin sual kawngah thui tak ke kan lo pen thei a ni. Chuvangin tuna kan kawng zawh mekah hian Lalpa a lawm leh lawm loh te, Lal Isuan a lo zawh thin kawng (kraws kawng) a nih leh nih loh te inzawtin ngaihtuah hmasa fo thin ila, kan kawng zawh mekah leh zawh lehzel turah pawh kal sual (kawng zawh sual) a lo awm lo nge nge dawn a lo ni reng mai.

Kan ke pen tin mai awmze nei taka pentir thei tur chuan Lalpaa innghah a, a thu ang zela ke pen a pawimawh ang. Hei hi ringtu nuna thil pawimawh tak a ni bawk. Kan ni tin kechheh tirualrem tur hian Lalpa Pathian thua innghah fo a pawimawh a, Lalpa atanga kan tawlhbo ni apiang mai kha kan kechheh tihtleuva a awm ni a ni mai dawn tihna a ni. Chuvangin kan kechheh tirualrem tur hian Lalpa Pathiana innghah tlat leh a thu ang zela ke pen hi kan tih tur hmasa ber leh pawimawh ber a ni ang. Lal Isuan a zawh duh loh tur kawng hi chu zawh lo ve ngam thin ila a lo him ber bawk.

Khawvel thilah ke kan lo penin kawng tam takah kan kechheh tihtleuvin a lo awm fo tawh a ni mai thei. Chu chu thil kal tawh a ni a, sawi thu a cheng lo ve. A pawimawh ber zawk chu tuna i dinhmun atanga i ke pen leh turah khan awmze nei takin i pen tan dawn em? Amah Rev. Vanlalzuata thu sawi tha ka tih deuh mai pakhat ka han zeh tel duh chu, 'Pathian hmangaihna chuan i tihsual tawhah khan a en lo che a, i la tih that theihah khan a en zawk che a...i la tih that theih tur lam zawk kha a en fo thin a ni.' a tih hi a ni. Mi tam tak chuan kan hun kal tawha kan tih sual tawhna lam kan thlir a, en tui tang tawh lo khawpa chhia a nih kan hria a, mahni ngei pawhin kan enlet ngam loh thil tam tak pawh a inphum ru teuh thei. Amahaherawhchu kan la tih that theih lam kan thlir kan fo thin mai hian hringnunah hawiletna kawng min dang bet tlat thin a ni. I tih sual tawh kha ka tawmpui che a ni lo va, i tih sual avanga i siamthat theih loh thil tam tak pawh a awm ngei ang, mahse Lal Isua erawh chuan i lo sual tawhna lam ai mah khan a tana rinawm taka i la thawh that theih tur lam khi a thlir zawk a, Amah ngei pawhin mi sualte simtira a hnena kir tura tih chu a hna pawimawh tak a ni reng a ni. Kan sual tawhna lam hi chu thlir dawn ila chuan vawiin khawvela Pa Pathian hmaa dingtlak leh thleng thei kan awm hauh lo vang. Mahse kan sual tawhna lam ai hian kan la tih that theih lama min thlirsak fotu Lal Isua avang zawk hian vawiin khawvel hi hmang thleng thei kan ni zawk a ni.

I tih sual leh ke i lo pen sual tawhna zawng zawngah khan indawm kun reng khan i nun a siamthat phah dawn lo va, i la tih that theihna lam thlirsak fotu che Lal Isua avang zawk hian i ke pen tin mai kha awmze nei takin pen tum zawk la, tichuan i hringnun chu hlim takin i hmang chho thei ngei ang. Thil kal tawha kan chet that lohna lai ngaihtuaha hlawkna leh tangkaina awm si lovah hian a indawm kun reng ve theih a nia! Thil kal tawh kan tihdanglam theih lohvah rilru nghat lo ila, tun dinhmuna kan thil tawn mekah leh nakin lehzela kan thil tawn lehzel turah zawk hian rilru nghat zawk ila, tichuan nun hi hlawk takin kan lo hmang zel dawn a ni reng mai. Pathian hmangaihnain kan tih that lam min la thlirsak tlat chhung hi chuan kan tih sual tawh hlawkna awm lovah hian i indawm kun reng suh ang u.

Kan ke chheh a rualrem loh chuan kan ding nghet thei lo va, kan tlu thuai thin ang hian Lalpaah kan intihchaka kan ke chheh kan tihngheh fo loh chuan sual lam kawngah kan tlu thuai dawn tihna a ni. Lalpa Pathianah zel hian kan ke chheh hi tirualrem thin ila, sual lam kawngah kan lo pen lo nge nge thin. Pathian thuin intichak thin rawh. Chuti lo chuan sualin a hneh thuai ang che. 'Kan buante hi tisa leh thisen an ni si lo, lalnate leh, thuneihnate leh, he thim chunga khawvêl rorêltute leh, vân hmunahte thlarau sualho awmte an ni zâwk e...' (Ephesi 6:12) tia Ephesi lehkhathawna kan hmuh angin Lalpa Pathianah zel kan ke pen kan tihrualrem loh chuan thim chunga khawvel roreltute hian min nei thuai mai dawn tihna a ni. Chuvangin thil engkim kan tihna apiangah hian Lalpa Pathianah zel kan kechheh hi tirualrem thin ila, khawvel thim thuneihna lakah pawh venhimin kan lo awm zel ang. 'Lalpa, i tel lo chuan ka ke pen khat chauh pawh hi sual lam awn reng thin a ni a, ka veng zo lo a ni. Chuvangin keimah mai chuan he khawvelah hian ke min pentir suh ang che...' tiin i tawngtai thin ang u.

Kan tawngkam chhuak pawh hi midangte tana hriat nuam leh mahni pawhina kan dawn let duh ngei tawngkam hrisel ni thin rawh se. Ringtu tam tak hi chu kan tawngka chhuak atana inhmeh lo tak tak hi kan va chhak chhuak zing tak em! Keimahni ngei pawhina kan dawn duh loh tawngkam na leh kha tak tak hi chu midang pawhin an lo dawng duh bik lo va, kha tawngkam na leh kha tak kha a kal kual a kal kual a, a tawpah kan chungah bawk a thleng leh thin a ni. Chuvangin midangte pawhina an dawn duh tur tawngkam ngei chhak chhuah fo hi a ringtu nun hliah hliah a, mahni tan pawh malsawm dawnna pawimawh tak a ni fo. Nangmah ngei pawh kha midangte tan malsawmna luankawr atan insiam tur chuan midangte pawhin an dawn duh ngei i pek chhuah hmasak a ngai a ni. Nangmah ngei pawhina i dawn duh loh tawngkam na leh kha tak tak midangte hnena pek chhuah fo i chin chuan nangmah ngei pawh anchhe dawngah i insiam mek zel tihna a ni ang.

Lal Isua hmaa i sawi duh tur ngei mai kha i mihringpuite bulah pawh sawi thin la, an tan khawngaihna chia al a ni ang a, nangmah ngei pawhin malsawmna tam tak i dawn phah ngei bawk ang. Lal Isua bula i tawng chhuah duh loh tur tawngkam kha chu midangte pawhin an ei thei bik lo va, a kal kual a kal kual ang a, a tawpah a lo chhuahnaah bawk a rawn lut leh mai ang. Chuvangin Lalpaa kan kechhehte tirualrem tur hian kan ni tin nunah kan tawngka chhuak pawh hi venthat a pawimawh a, Sam ziaktuin 'Aw LALPA, ka ka bulah hian vengtu thuttir la, ka hmui kawngkhar hi veng ang che...' (Sam 141:3) tia a lo sawi angin kan tawngka chhuakte hi midangte tan malsawmna thlen theitu nge a nih midangte tan anchhia tih hi Pathian thu hmanga kan inven fo a pawimawh a ni. Tichuan Lalpa Pathian thu hmanga i inven theih chinah chuan midangte tan malsawmna luankawrah Lalpan a siam ang che ang a, i kechheh tihrualremin a lo awm zel bawk ang. Midangte tan malsawmna tam tak thlentu i nih zel theih nan Lalpan i kechheh tihrualremsak zel che rawh se. 

ReplyForward