Zo Vapual

Pathian hmaah i fate thingthitpui thin rawh

C. Lalmuankima 

Slough, United Kingdom 

I fate tan tawngtai hman lo khawpin thil dangah i intibuai thin em ni? I fate Pathian hmaa thingthitpui hman lo khawp leh thingthitpui nachang hre lo khawpin khawvel thilah i inham buai thin em? Chutiang thil i lo ti thin a nih chuan tun atanga bansan turin thurawn ka pe duh che. I fate i hmangaih tak tak a nih chuan Pathian hmaa thingthitpui hman lo khawp chuan khawvel thilah intibuai thin suh. 

Photo ; cloudfront.net

Nu leh pa tam tak chu an fate ngaihsak hman lo leh an fate tan tawngtaia thu tha hla tha zirtira hrilh hman lo khawpin khawvel thilah an buai a, chung mite chuan nakin hnua an fate nunkawng awm dan tur an ngaihtuah ngai hauh lo tihna a ni. Kan hna leh thiltihnaah kan buai a, mahni fate ngaihsak thulh thak khawpin kan intibuai thinte hi fate hma lam hun tur kan ngaihsak tawk loh vang a ni duh khawp mai. Mihring nih chhung chuan damchhungin buaipui tur neuh neuh hi chu a awm zel dawn, mahse kan fate zirtir an ngaih hun rei loteah hian kan fate thu tha leh hla tha zirtir hman lo khawp chuan khawvel thilah i inham buai thin lo vang u.

Kan fate hi Pathian laka kan dawn rohlu berte an nih avangin an tan a tam thei ang bera hun pek hi nu leh paten kan tih tur pawimawh tak a ni. Kan fate zirtir hman lo khawp chuan khawvel thilah hian i duham thin lo vang u. Fate zirtir an ngaih laia zirtir hman lo khawpa khawvel thila duham hi duhamna dik lo a ni fo thin. Fate zirtir an ngaih hun lai taka zirtirna tha pe hman lo khawpa thil danga kan inham buai a nih chuan a pawi hle ang. Nu leh pate hi fate tan chuan zirtirtu tha ber kan ni tih hi kan hriat reng a tha. Zirtirtu tha han tih hian khawvel thiam thil finna leh hriatna chauh hi kawhtir lo ila, a pawimawh zawk hringnun zirlai hi kan fate hnenah kan zirtir thin em tih leh chu zirtirna chu kan fate nun chhungril ber a thleng pha em tih hi zawhna kan insiam fo a pawimawh. 

I fate hnenah hringnun zirlai hi i zirtir ngai lo a nih chuan an hmakhua tur i ngaihtuahsak ngai hauh lo tihna a ni. Chutianga hringnun zirlai la lova rawn puitlingte chuan kawng engkimah engtia nun tur nge tih an hre lo va, an hringnun chu buainain a chim buai thuai thin a, a tawpah tlanchhuahna tur an hriat loh tawpah tlanchhuahna tur an zawnna lamah sual khurah an tlu lut fo thin. Chuvangin kan fate hi sual khura tlu lut lo tur chuan zirtir an ngaih hun lai taka nu leh paten zirtirna kan pek that a pawimawh a, an chhungril thlenga lut thei tura duhsak taka kan zirtir a pawimawh hle. 

Hringnun zirlaiah chuan ni tina kan khawsak dan leh kan nunphung a tel vek a, sikula kan zirlai aia pawimawh zawk ni tina kan khawsak nunphung pawimawhna hi uar lehzualin kan fate kan zirtir fo tur a ni. Chutiang zirtir hman lo khawp chuan khawvel thilah hian i duham suh ang u. Fate tan tiin anmahni zirtir hman lo khawpin khawvel lam thilah kan inham buai a nih chuan an tan sual tihna remchang tak a lo awm thin a, fate tana hun kan pek theih loh chinah phei chuan hmelma Setanan tu tu emaw ni hmangin hun min peksak ang a, an nun min ruksak mai dawn a ni. Fate tana hun pe hman lo khawp hi chuan khawvel thilah i duham suh ang u. Fate tana hun pek hman lohvin a hrinchhuah that lohzia hi ngaihtuah thleng pha thin ila chuan tuna kan awm mai mai ang hi chuan ka awm ka ring lo. 

Hawh u, Pathianin ro tha ber min pek kan fate hi nakinah Pa Pathian angchhung kan thlen huna hruai let leh thei ngei turin kan fate tan hun i hmang tam ang u. Kan fate tan maicham i hung thin ang u. Kan fate nen Pathian hmaah i thingthi thin ang u. Kan fate tan tawngtai maicham pawh hung hman lo khawp leh an tan hun pe hman lo khawpa khawvel thila kan inham buai a nih chuan khawvel thil bawk hian an nun hi min neihsak ang a, a tawpah kan mittui titla tamtu a la ni thei a ni. Chutiang thil tha lo chu kan fate chungah leh kan chungah a thlen loh nan tun atang hian nu leh pate hian theihtawp chhuah hi kan tihmakmawh a ni e. I fate tan hun pe hman lo khawp leh tawngtai hman lo khawpin thil dangah intibuai thin suh ang che.

Fate hian nu leh pate nun hi kan la nasa ber a, kan fate an nakin hun zelah an fela an that kan duh a nih chuan nu leh pate thil tha ti lai hi fate hian hmu tam thin rawh se. Fate hian nu leh pate tawngtai lai te, Bible an chhiar keuh keuh lai te, an inkhawm lai te, mite an tanpui lai te hmu tam se la, chutiang thil an hmuh tama chutiang thil ti tura zirtirna an dawn tam phawt chuan an hma lam hun ngaihtuahawmin a awm ngai lo vang. Chuti ni lova nu leh paten khawvel thilah hamtam tak leh duham taka hun an hmang lai te, nu leh pate innghirnghova inhau lai te, nu leh pate thil tha lo ti lai hmel an hmuh tam phawt chuan an puitlin hunah an nih ve dan turah an rawn ngai hmiah ve mai ang. 

Nu leh paten fate nun kawng buaipui hman lo khawpa khawvel thila an intihbuai thinna hian nakina an fate hmakhua lo awm tur an ngaihtuah thlen thin loh vang a ni duh khawp mai. Fate tan kan thawkrim alawm ti si hian fate tana hun pe hman lo khawpa thil danga inhnamhnawih palh hi a pawi thin a, fate nunkawng khalhngil hman lo khawpin thil dangah kan inham buai a nih phei chuan a la pawi thui zel dawn a ni. Chuvangin i fate Pathian hmaa thingthitpui hman lo khawp chuan khawvel thilah intibuai thin suh ang che. 

A sawhkhawk lo let leh tur i dawngsawng ngam dawn te a nih loh chuan i fate Lalpa Pathian hmaa thingthitpui hman lo khawpin khawvel thilah inham buai ngai suh ang che. Fate ngaihsak hman lova khawvel thila i intihbuaina khan nangmah leh a la vaw let thei che a ni tih hi hre reng ang che.