Zo Vapual

Chhungkaw inlaichinna nghet i ngai pawimawh ang u

C. Lalmuankima

Slough, United Kingdom

Chhungkua hi inlaichinna nghet sawi em em tur pawh awm lovin a din ve theih a, amaherawhchu chutiang chhungkua chuan engtik niah emaw ni chuan tlukchhiat/tlakchhiat hun a nei leh thin. Chhungkuaah hian inlaichinna nghet a awm loh chuan pakhat leh pakhat inrintawkna a bo nghal a, inrinhlelhnain kan khat a, a tawpah chhungkaw kehchhiatna a lo thleng thin a ni.

Nu leh pate leh fate inkarah kan inlaichinna hi a tha tawk em tih hi kan inzawhna pawimawh tak ni fo rawh se. Pa leh fate, nu leh fate inkarah inlaichinna tha a awm loh chuan chhungkua hi a hlim thei lo mai ni lovin a hmalam hun kal lehzel turah pawh a thim chhah tawp a ni. Chu chhungkaw hmalam hun tur thim chhah tak mai su kiang tur chuan a chhunga chengten inlaichinna nghet kan siam a pawimawh a, inlaichinna nghet kan neih phawt chuan kan hmaa thim chhah tak anga lang pawh sutkianin a awm zel dawn a lo ni reng mai. A pawimawh ber chu chhungkuaa cheng member tinte inlaichinna hi a ni. 

Photo: Google Image 

Chhungkuaah inlaichinna nghet kan siam lohva kan ngaih pawimawh loh phawt chuan a chhunga cheng member tinte pawh hian chhungkua hi ngainat nachang kan hre lo ang a, hotel leh restaurant ang lekah ngaiin ni rei lote chamna tawk lekah kan ngai mai ang. Chhungkua hi chutiang dinhmuna kan din loh nan chhungkaw inlaichinna nghet hi kan siam fo a pawimawh. 

Chhungkua maha kan inlaichinna kan siamthat theih loh chuan kan Pathian nena kan inlaichinna chu siamthat a har ngawt ang le. Pathian nena kan inkar inlaichinna tha siam tur hian chhungkua kan inlaichinna hi a pawimawh hmasa asin! Lalpa nena in inlaichinna tha siam turin nang leh i chhungteah khan bul han tan teh le.

Chhungkua hi Lalpa Pathian nena kan inlaichinna a ngheh/fuh phawt chuan min tibuai thei thil dang lo thleng thin pawh Lalpa Pathian zarah hnehin a lo awm zel thin. Chhungkua leh Lalpa Pathiana inlaichinna nghet neilote bawk hian a ni harsat manganna a lo thlen chang pawha bikna hmun tur hre lo leh thin ni. Chutiang mite chuan an unau laichinte emaw an thiante emaw an hmelhriatte emawah bikna hmun (tlan luhna hmun) tur an zawng a, anni pawhin an harsat mangan thu bawkin an lo chhang let a, a tawpah chhungkuaah inhauhna a lo chhuak a, chhungkaw kehdarhna hial a lo thleng ta thin a ni. Chuvangin chhungkua hi Lalpa nena inlaichinna tha kan siam vat loh chuan mangan laia bikna hmun tur hre lovin khawvel thilah kan zawng ang a, kan va zawnnate khan keimahni ang bawka harsatna an lo neih phei chuan a tawpah beidawngin kal ngaihna hre lovin a awm theih a ni.

Chhungkua Lalpa Pathian nena inlaichinna nghet ngai pawimawh lote chuan tu tu emaw hmanga inlaichinna nghet siam an tum a, thui tak chu an kal ve thei ngei ang, mahse an va siamnate nena intihthiam loh hun a lo awm leh thin a, a tawp chu lungngaihna bawk a thleng thin. Lalpa tel ve lohna leh Lalpa nena inlaichinna siam lohna chhungkua chu chutiang chu an kal dan a ni. Chhungkua Lalpa Pathian nena inlaichinna nghet ngaih pawimawhna hmunah chuan mi tu tu emaw hmanga inlaichinna siam an tum ve lo va, chhungkuaah chair latu atan Lalpa Pathian an hmang zawk a, khawvel mite mithmuha tawrhna leh tahna ruamah pawh tuihna an hmu thar zel thin. Chhunhkua Lalpa Pathian nena inlaichinna nghet ngai pawimawhtute hi khawvela an cham chhungin harsatna leh manganna te, tuarna leh tahna te an tawng lo bik tihna a ni lo va, chutiang thil an tawng chung chung pawh chuan chumi piah lamah Lalpa Pathiana bikna hmun an hmu thin a ni. Harsat mangan lai ber pawha Lalpaa tlan lut zat zat thin chhungkuate hi Lalpa Pathianin a kalsanin a ensan ngai lo. Harsat mangan lai ber pawha Lalpa Pathiana tlan luh nachang hrelote bawk hian a ni chhungkuaah pawh harsatna tawk a, a tawpa kehdarh thin ni. 

Chhungkuaah Lalpa Pathianin lalna a channa hmunah chuan Pathian Thlarau Thianghlim a ngampa thin a, tichuan vanram nun chu chhungkuaah a takin an temho thin a ni. Lalpa Pathianin lalna a channa hmun zelah hian a ni chhungkuaa hlimna leh lawmna a lo awm ni. Miin vanram nun hi engvangin nge khawvel an chhuahsan hma pawha an chhungkuaa an lo tem lawk sa theih thin kan tih chuan, lei leh van siamtupa ber khan an chhungkua kha a luahin a chenchilh a, chumi van neitupa luah chhungkua chuan chawplehchilhin van nun an lo tep ta thin a ni. Van neitupa tel lovin vanram nun a tem theih loh tih hi kan hriat atan a tha. Chuvangin vanram nun tem lawk fo thei turin chhungkua hi Lalpa Pathian nen kan inlaichinna kan tihngheh hmasak a ngai. 

Chhungkuaah hian Lalpa nena inlaichinna nghet a awm phawt chuan eng dang mah a ngai tawh lo. Thil dang hi chu a behbawm mai a ni. Chhungkua Lalpa nena inlaichinna nghet siam hi i ngai pawimawh tlat ang u. Lalpa nena inlaichinna nghet siam tur hian chi hrang hrangin a siam theih ngei ang, a pawimawh ber zawk chu kan chhungkua hi Lalpa luah chhungkua a ni em? Pathian nena kan inkar inlaichinna hi a nghet tha tawk em? Tih hi chhungkuaa kan inzawhna pawimawh tak ni fo tur chu a ni. Lalpa Pathian leh i chhungkua inlaichinna nghet siam fo thin ang che.