Zo Vapual

Chhungkaw hrisel tak nei thin ang che

C. Lalmuankima

Slough, United Kingdom

Mi tam tak chuan chhungkaw hung tak leh chhungkaw in leh lo tha pui pui inhung khup theiha silh leh fen mawi tak tak inbel theiha ei leh bar tui tak tak eiin theih avangin chhungkua hi ropui viauvah kan ngai thin a, kan tisual fo thin reng a ni. Chhungkaw ropui berna lai chu in leh lo tha tak tak neih theiha silh leh fen mawi tak tak inbel theiha ei leh in tui tak tak ei theihah a awm lo va, chhungkuaa Pathian pawlna maicham (altar) kan hun thinnaah hian a innghat zawk a ni.

Chhungkuaa tu leh fateah lehkha thiam leh nihna sang tak tak neiha sawrkar mi lian tak tak neih avang ngawt pawh hian chhungkua a ropui a ni lo. Heng zawng zawng hi Pathian tihna tel lo a nih phawt chuan ropuina khingbai tak a ni zawk. Chuvangin, Kristian kan nih angin chhungkaw ropuina kan tehna tur dik tak zawk chu 'Chhungkaw Maicham' hung thin an/kan nihnaah hian tehna fung kan lek zawk tur a ni. Chuti ni lova khawvel ropuina lam zawnga kan tehna fung kan lek a nih chuan kan teh sual fo bawk ang.

Photo: Google Image

Chhungkuaa Pathian Maicham kan hun lai hi kan chhungkuain a nihna tur dik tak a niha a vawrtawp a thlen lai tak a ni a tih theih awm e. Chu aia sangin chhungkua hian a thleng sangin a invawrh sang thei chuang lo. Heti hian ka ngaihtuah thin alawm le, chhungkuaa Pathian hmaa maicham kan hun lai tak hi kan rin Pathian pawh lawm ve hle turah ka ngai thin. A chhan chu kan Pathian hian chhungkaw maicham a ngaih pawimawhzia kan Bible-ah pawh kan hmuh vang a ni.

Thu hmasa lama kan sawi kha la chhuak leh ta ila, Simeon Strunsky chuan an chhungkaw ropui lai ber chu an chhungkuaa Pathian pawlna maicham (altar) an chan lai hi a nih thu heti hian a sawi a, "Kan fate nen riltam tak maiin chaw kan kil kual pap a, kan ei hmaa kan chaw ei dawhkan chu Pathian pawlna maicham (altar)-a a chan lai tak hi kan chhungkaw ropui ber lai a ni." tiin. A tha ka va tiin chhinchhiah tlak ka va ti tak em! Chhungkuaa Pathian hmaa kan inhlan lai hi Pathian pawhin mal a sawm ngei ang tih hi ka ring tlat a, chhungkuain a tawng san ber lai pawh a ni. Sum leh pai, in leh lo hi chu a dawttu lek a ni zawk.

Chhungkuaa Lalpa Pathian tan maicham hun fo hi a tha a, chhungkaw hrisel tak neihna pawh a ni. Chhungkaw hrisel han tih hian taksa hriselna lam chauh hi kan rilruin kan kawhtir palh ang tih hi ka hlau thin. Chhungkuain taksa hriselna lam chauh a ngaih pawimawha rilru leh thlarau lam hriselna a hlamchhiah ni apiangah chhungkaw hriselna a lo tlahniam thin a, a tawpah enkawl harsa khawpin natna khirhkhan takin chhungkua a tlakbuak thin a ni. Chuvangin chhungkuain taksa hriselna a ngaih pawimawh tlukin rilru leh thlarau lam hriselna pawh a ngai pawimawh tel tur a ni a, chhungkaw maicham a hung fo tur a ni. Chumiah chuan chhungkaw nun hlimna a lo awm thin. Taksa leh rilru leh thlarau hriselna tha tak chhungkuain nei tur chuan chhungkaw maicham hun fo a pawimawh tihna a ni.

Chhungkaw maicham hung ngai lo leh hun nachang hre lote in chhung nun hi han zir chiang ila, taksa mamawh chakkhai mamawh tinreng nei kim vek mah sela a pawimawh ber rilru leh thlarau hlimna an neih tel tlat loh avangin kha chhungkaw nun kha a hlim thei ngai reng reng lo. Chu tak mai chu 'Chhungkaw hriselna khingkai' kan ti thei awm e.

Chhungkaw hrisel tak ni tur hian kan sawi tak taksa leh rilru leh thlarau damna a pawimawh a, taksa lam thil chauh kan ngaih pawimawha rilru leh thlarau lam thil kan hlamchhiah erawh chuan engtik lai mahin chhungkaw hrisel tak kan ni ngai lo vang. Chuvangin chhungkaw maicham hi kan ngaih pawimawh hmasak a, Lalpa Pathian hmaa chhungkaw maicham kan hun fo chuan chhungkuain a nih dan tur dik tak rawn ni chhovin ke a pen zel dawn a ni. Chhungkaw maicham hun fo avanga hrisel lo chhungkua sawi tur ka la hre lo, hrisel loh a hnekin an chhungkuaah hlimna leh lawmnain a thlen chilh zawk thin a, chhungkaw hlim leh hrisel tak an ni zawk thin. Chu chu chhungkuain a ropui ber lai pawh a ni.