Zo Vapual

Sakei hliam aia hlauhawm - Fa duat sual

C. Lalmuankima

Slough, United Kingdom

Fa duat dan chin tawk kan thiam loh chuan kan fate hi sakei hliam ai pawha hlauhawmah kan chhuah thei a ni. Hei hi mi tam tak chuan kan hrethiam thin lo va, kan fate duhzawng tihhlawhtlinsak hi hmangaihna dik takah kan ngai a, kan tisual fo thin reng a ni. Fate duhzawng tihhlawhtlinsak theih hi hmangaihna a ni kher lo va, an duh ang apiang kan tihsak theih avang hian kan fate chunga kan mawhphurhna kan hlen tihna a ni hek lo. Chu chu kan hrethiam thin lo va, fate duhzawng apiang tihhlawhtlinsak theihah kan inel a, a tawpah fa sual kan nei teuh thin a ni.

Photo - Google Image

Nu leh pa tam takin an fate duhzawng apiang tihhlawhtlinsak theih avang hian an fate chunga an mawhphurhna tihlawhtling viauvah an ngai a, an tisual fo thin reng a ni. Fate duhzawng apiang pek theih avang hian fate chunga kan mawhphurhna kan hlen a ni lo. Chumi piah lama kan hmaih fo thin chu engtia khawsak tur nge tih zirtir hi a ni. Kan fate hian an nakin hun kal lehzel turah engtia khawsak tur nge tih hi an zir chhuah tel loh chuan sual lam kawng an zawh thuai thin. Chuvangin nu leh pate hian kan fate mamawh leh duhzawng kan tihhlawhtlinsak piah lamah hian nun dan tur kan zirtir tel a ngai a ni. Chutianga kan tih phawt chuan an damchhungin an thlah tawh ngai lo vang. Bible-ah pawh, ‘Naupang chu a kalna awm kawngah zirtir ula, a upat hun pawhin a thlah lo vang.’ tih kan hmu a (Thufingte 22:6), an kalna awm kawng zirtir hmasa si lova, an duhzawng chauh kan pek hian anmahni tan pawh thil hlauhawm tak a thlen thei a ni. ‘Kalna awm kawng...’ han tih hian an nun puitlin thlenga an thlah tawh ngai loh tur nunkawng tha hi a kawhtir theih ang a, Kristian kan nih angin Kristian nun hi an puitlin thlenga an nun khalhngiltu atan kan zirtir hmasa tur a ni. Chutianga an naupan lai atanga an kalna awm kawng kan zirtir phawt chuan an puitlin hnuah pawh an bo leh tawh ngai lo vang.

Mi tam takin fa duat dan chin tawk kan thiam thin lo va, in chhungah sakei hliam aia hlauhawm zawkin fate kan siam a, an duh tawkin an vawk lal len a, chutianga kan siam chinah chuan nu leh pate bawkin rilru hah leh hrehawm kan tuar phah thin. Chuvangin fate hi duat dan chin tawk kan thiam a tha hle a ni. Eng eng emaw ni hmanga fate thlem fote hi thatna aiin thatlohna a tam a, eng eng emaw ni tihsak phawt loh chuan thil tih an tum ngai lo. Fa duat dan chin tawk kan thiam loh va, eng eng emaw ni pek kher tur a lo awm loh chinah chuan kan faten tu tute emaw ta lak mai pawh an hreh lo vang a, a tawpah sual kawng zawhin lung in kawngka zau takin kan hawnsak lek ting tihna a ni ang. Naupang thenkhat phei chu eng eng emaw ni hlawhchhuah nan nawrh an ching a, eng eng emaw ni hlawh chhuak kher loh chuan thil tih an tum thin lo lehnghal, duat chin tawk kan thiam a tha. Chuvangin kan fate kan duat tak tak a nih chuan hringnuna an hmasawnna kawng tur ngaihtuahsakinin kan zirtirin kan kaihruai zel bawk tur a ni. Kan faten an puitlin thlenga hma an sawnpui tur thil tha kan zirtir ngai lo emaw zirtir nachang kan hre lo emaw a nih chuan kan fate kan hmangaih tak tak lo tihna  ni ang.

Kan u nu pakhatin a fa a enkawl dan chungchang min hrilhnaa ka rilru hneh deuh mai pakhat ka han zep tel teh ang. Heti hian a sawi a, 'Ka fapa hian thil danga a hun khawhral turin TV Games ka leisak lo va, a ngen bawk hek lo. A chhan chu a naupan lai atang rengin 'TV Games ka leisak ang che' tiin ka thlem ngai lo va, nakin lehzel atana thil tangkai tur ni hlei lova ka fa ka awmtir hi tulin ka hre lo.' a tih hian ka rilru a hneh hle mai. Mi tam tak chuan fate tlei nan tiin TV Games kan leisak a, an lo addict chinah chuan thil danga chhawr theih tawh lohvin an atchilh a, TV Games kha khawih lo thei lovin an lo awm ta thin a ni. Thil hi addict tawh chinah chuan thlah leh mai mai hi a lo har tawh thin si a, kan fate hmalam huna thil tangkai tur ni hlei lova kan inawrh hnawk chiam ai chuan an tana tha tur thil zirtir zawk ila, an puitlin hnuah pawh an la chhawr tangkai zel dawn a ni.

Faten, 'Chumi chu min leisak loh chuan ka ti dawn lo...' an tih pang pangna lo chhuahna hi nu leh pate atang asin ni. An puitlin hnuah phei chuan nu leh paten kan be tlawn leh thin si a, nu leh pate bawk hi kan rilru a hah thin a nih hi. Hei hi an naupan lai atanga enkawl danah kan fimkhur tawk loh vang leh zirtira kaihruai nachang kan hriat thin loh vang a ni duh khawp mai. Chuvangin naupang chu zirtira kaihhruai awlsam taka an awm lai hian thil tha kan zirtirin kan kaihruai thin tur a ni. Chu chuan an puitlin thlengin nun kawng dik leh thaah a hruai thleng thei ang. 

Kan fate hi an damchhung khawsak lungdamna buaina tur nei reng reng lovin kan dahin an duhzawng zawng zawng kan tihpuitlinsak thei a ni mai thei, an duh apiang pawh kan leisakin mamawh nei lovin kan siam thei a ni mahna. Mi tam takin chutianga kan fate duhzawng zawng zawng kan tihsak theih avang chuan duat dan dikah kan ngai a ni mai thei. Mahse chutianga kan tih theih avang chuan nu leh pate hian kan fate chunga kan mawhphurhna kan hlen a ni ngawt lo va, a pawimawh ber zawk chu an puitlin hnua an damchhunga anmahni nun kaihruaitu tur chi nung kan tuhsak lo a nih chuan kan fate kan enkawlnaah kan mawhphurhna kan hlen lo tihna a ni ang.  

Fa duat dan tha tak tur nia ka hriat chu an puitlin hnu thlenga hringnun khawsak dan thiam tura zirtir leh hringnun zirlai hrethiam tura zirtira kaihhruai tel hi a ni. Hei hi fate kan duat dan tur dik tak pawh niin ka hria. Chutianga tih nachang kan hre lo a nih chuan kan fate hi kan in chhungah sakei huai ai pawha hlauhawm khawpin kan siamin kan chhuah thei a ni.