Zo Vapual

Mawhphurhna hlen ngam khawpin huaisen thin ang che 

C. Lalmuankima

Slough, United Kingdom

Ziaktu pakhat chuan heti hian a lo ziak tlat mai, 'Mawhphurhna nei vea inhriatna chuan mi a tihuaisen a, mi puitling nihna leh finna leh remhriatna min pe bawk.' tiin.

Mahni mawhphurhna hlen ngam lote tluka mi dawihzep hi an awm chuang awm lo ve. Miin min ring tawk a, mawhphurhna min pe ngam a nih chuan an mi rin ang ngeia tihhlawhtlinsak hi mi puitlingte miziaa be nghet tlat a ni. Chhungkua, kohhran leh khawtlang, ram leh hnam thlengin miin mawhphurhna nei ve tlaka min ruat a nih phawt chuan huaisen taka tihhlawhtlinsak kha mi puitling nihna a lo ni reng mai.

Photo: Google Image

Mi puitling kan teh dan hi a in ang lo ve thei viauvin ka hria. 'Mi puitling' han tiha rilrua lo lang hmasa ber mai chu awmhmunah zahawm taka awm deuh khep khep emaw puipun nikhua leh thil tih ilo vela mipui hmaa ding emaw te hi an lo lang a, kawng tam takah chuan a dik mai thei. Mahse mi puitling nihna title pek awm tak zawk hi kan hmuh kan tlat zel em aw a tih theih bawk. Mi puitling chuan a chunga thil thlengah a lian a ni emaw a te a ni emaw a mawhphurhna a hlen ngam thin a ni. Mi puitling chuan a chunga mawhphurhna tla apiang a te emaw a lian emaw hlen ngei a tum thin a, chung mite chu mi puitling nihna pek awm hliah hliah an ni thung.

Miten mawhphurhna min pek apianga tlanchhiatsan phet tum emaw midang hnawn ching emaw kan nih chuan engtik lai mahin mi puitling leh hruaitu tha kan ni ngai lo vang. Thu hmasa lama kan sawi tawh angin mimal thil a ni emaw chhungkaw thil a ni emaw pawl thil a ni emaw miin mawhphurhna min pe a nih chuan zo taka hlen mai kha mi puitling zia chu a ni. Mawhphurhna nei ve nia kan inhriatna hian keimahniah neitu chan min chantir a, taimakna min siamsak tel nghal bawk. Thil reng reng chu neitu rilru kan put leh put loh azir hian a danglam duh khawp a, neitu rilru kan put fo erawh chuan hlawhtlin loh a awm ngai lo thung. Mawhphurhna nei ve nia kan inhriat loh phawt chuan a sir atanga thlir liamtuah kan tang kumkhua mai ang.

Mawhphurhna hlen ngam khawpa huaisenna hi thil pawimawh tak chu a ni. Bible-a talent kawl pungtute chanchin a sawi atang khan zirlai lak thiam a tha hle mai. 'An tih theih tawk tur ang zel theuhvin a pe a...' (Matt. 25:15) tih lai tak hi a pawimawh hle. Kan tih theih loh tur hi chu Pathian pawh hian min tihtir hauh lo vang. Kohhran leh khawtlang thilah kan tih ve theih tawka mawhphurhna min pek hi chu huaisen taka kan tihhlawhtlin hian a leh pek lo awm zel turah pawh tih leh kan cho zar tawh mai a ni. Mawhphurhna la ngam khawpin i huaisen thin ang u.

I vawi khat tihnaah khan famkim leh sawisel bo khawpin tih tum duh suh. Kha lam ai mah khan huaisen taka i mawhphurhna i hlen leh hlen lohvah khan i rilru puitlin leh puitlinlohzia a hmuh theih zawk a ni. I mawhphurhna i hlen loh khan nangmah leh nangmah i inbum nghal a, engtik lai mahin inrintawkna i nei ngai lo vang. I inrintawk loh chuan mawhphurhna i la ngam lo nghal bawk ang. Kan thalaite zingah inrintawkna kan tlachham lutuk hian kan nih ang tur min nihtir lo thin a, a pawi hle a ni. Mahni inrintawkna hian min tikiltawih a, thil tih min tizuam lo tel bawk. Chuvangin kan chanvo/mawhphurhna hi a lian a ni emaw a te a ni emaw hlen ngei thei turin intihuaisen sauh sauh thin ila, tichuan inrintawkna nei bawk ila, mahni tawka hlawhchham tur hi kan awm lo vang.

Mawhphurhna hlen ngam khawpa kan huaisen hnuin kan thiltihah a mawh kan phur ngam bawk tur a ni. Thenkhat chu mawhphurhna la ngam inti siin an thiltihah a mawh an phur ngam leh thin lo va, ka hmuh dan chuan chung mite tluka mi dawihzep an awm chuang lovin ka hria. Mawhphurhna kan lak ngam phawt chuan a leh pek lo thleng tur a chhia emaw a tha emawah pawh a mawh kan phur ngam tur a ni. Mahni thiltihah pawh mawh kan phurh ngam loh mite rin kan kai thei ngai lo vang.