Zo Vapual

Hnam dinchhuah nan taihmak chhuah rawh

C.Lalmuankima

Newcastle, United Kingdom

Photo: Google Image

Zah lohna hmun turah kan zak a, zahna hmun turah kan zak leh si lo. Thil hlawk tak lo thleng mai tur kan um nasat luatah mahni zahawmna pawh hloh thak khawpin kan inzuar ral lo chauh va, kuttlinglova sum lak lah kan hreh hek lo, eng emaw ni dawt var sawi hleka hlawk pup pup tum lah bo lo, hetiang reng renga kan kal zel a nih chuan kan thatchhiatna hian min la eiral thuai ang. Sawrkar laipui sum ringin kan inchawm thau va, nakin lehzela kan hnam chhiatna tur thang hlauhawm takah kan inawk mek a ni tih lam hi kan ngaihtuah thleng pha hauh lo. Sawrkar laipui atanga sum hai lut thei thei sawrkar hi sawrkar tha berah kan puang duh ta hial mai te hi inenfiah a hun ta hle mai.

Kan thatchhiatna hian kan ram zim teah hnam dang kan cho chhuak a, hnam dangin kan thawh peih loh an rawn thawk a, chimral kan hlau leh lawi si a, keimahni lam hi inenfiah kan ngai a ni zawk mai lo maw? Hetianga chimral kan hlau a nih chuan hnam dangte chance neihtir lo khawpa taimain thawk ta zawk ila, hnam dangte ai hian taima zawk ila. Kan chhehvela hnam dang lo lut mekte hi kan thatchhiatnain a koh chhuah an ni zawk asin.

Pa pakhat, pa taima leh nei ve tak ka kawm tuma a thu min hrilh hian ka rilru a tina tak zet a, kan inenfiahna atana a tangkai takin tih thuah ka han zep tel teh ang. Engnge a sawi i lo ngaithla teh ang. "Mizote chu hnathawkah ka chhawr duh tawh lo, hlawh in ang ro ro ah pawh an zawmthawin an thatchhe lutuk, zing dar 9 a hna tan tura an rawn kalin minute 10-15 an rawn kal tlai a, an rawn kal tlai tawh nak alaia meizial zu leh kuhva eiin minute 15 vel hun an hmang leh a, chumi zawhah dar 9:30 atangin hna an tan thei tawk a, tlai lam ban a lo hun dawn hnaihin tlai dar 4:30 atangin an insingsa tan a, dar 5 a rik tawh chuan mawng hawlh ang maiin hawn an chak sek tawh thin a ni. Vaiho erawh chutiang chu an ni ve lo, zing dar 9 rik hmain an rawn thleng a, tichuan dar 9 ah an tan nghal chat a, tlai lam dar 5 thleng an thawk a, dar 5 hnuah an insingsa/insenghawi thin a ni. Chuvangin mahni tia induhsak hian awmzia a nei lo, hnathawk thate hi an chhawrnahawm ber a ni....." tih hi a ni. A sawi zawng zawng kha ziak chhuak vek kher lo mai ila, kan sawi atang hian thil tam tak ngaihtuah tur a awm nghal a ni.

Hlawh in ang ro roah pawh hna thawk tha chu miten rawih an chak zar mai a, hna thawk tha peih lo leh zawmthaw tak chu hna neitute pawhin an chhawr tha peih thin lo a ni. Tuna kan tarlan tak kha kut hnathawktute atangin a ni a, office lam leh thil danga thawkte pawh hi kan bang chuang lo. Zing dar 9 a office hna tan chat chat thin chu mi tlem te kan ni a, tlai dar 5 rik chata bang thin phei chu kan tlem lehzual a rinawm hle. Hlawh lak huna kan hlawh deduct (paih) erawh ka duh leh si lo, thawh loh hlawh lak kan hreh tlat lo hi kan thanmawhbawk lian tak a ni asin. Miin a hlawh loh pawha dawn a la tum fan hian thatchhiatna bak a thlen lo va, chu nget lian tak chuan Zofate hi min ei chhe mek zel a nih hi maw. 

Hei hian kan hnam kan hmangaih lohzia a tilang chiang hle a tih theih a ni. Ram leh hnam hmangaih hi tawngkaa ram leh hnam tana thih ngama au vak vak lam a ni lo va, chetzia ngeia lantir chi a ni zawk asin! Tawngkain ram hmangaihna vawi sang tam tak chhak chhuak mah ila, kan taksa ngeia kan chet chhuahpui loh chuan awmzia a nei lo va, kan thu sawi hi thli-ah a thamral mai thin. Chuvangin ram leh hnam kan hmangaih tak tak a nih chuan kan chetzia kawng engkimah hian kan lantir zawk tur a ni. Thu hmasa lama kan sawi ang khan hnam dangten chance nei lek lo khawpin thawh tur awm apiang hi thawk zawkin keimahniin lo intodelh ila, hnam dang hi kan cho chhuak tawp lo vang. Hnam dangten thawh tur an hmuh zawh loh khawpin keimahniah lo intodelh ve ila, hnam dang hian min chimral malek lo vang maw le. Vawiina hnam dang chimral kan hlauh chhan hi ngaihtuah chian a ngai asin! Tun ang zela kan kal a nih chuan hnam dang hian min la chim tam telh telh ang. A chhan chu an tan inhlawhna tha tak kan siamsak tlat alawm. Anni chuan an inhamtan theihna leh awm theihna a nih dawn phawt chuan hna hram leh hahthlak tak tak pawh an thawk hreh lo a ni. 

Hna hlawk zawk beiseia hna hlawk lo zawk thawh kan tum tlat lo hian hnam dang tan hun tha kan siamsak tel bawk a ni tih hi kan hriat reng a tha hle mai. Hna hlawk tak hian a lo daih reng bik si lo va, hna hlawk lo zawk leh hna hram zawka ngaihte pawh hi taima takin thawk zel ila, tichuan hna hlawk zawk thawk thei turin mahni leh mahni kawng kan inhawn nghal dawn a lo ni reng mai. Hna hlawk zawk thawh kan duh a nih chuan hna hlawk lo atanga bul tan fo hi a chinfel dan tha berte zing ami a ni. I taihmaknain a tlin loh thleng thlenga hna hlawk zawk i beisei a nih erawh chuan i tifuh leh chuang lo vang. Nu leh pate thawh chhuah ringa lo in lak champ ve ngawt hian rei a daih dawn lo tih hi hriat a tha hle. Kan kutte hi hna chi kim thiam thei turin training ground-ah luhpui thin ang u. Tichuan kan kutin thil thiam chi hrang hrang a neih phawt chuan kan chhehvela hnam dang lo lut turte pawhin an cho loh khawpin kan lo thiam ang a, kan hnam hi kan lo intodelh chho zel bawk ang. Kan ram leh hnam hi kan intohdelh phawt chuan hnam dang laka kan hmel lan dan a lo zahawm ang a, tichuan kan kuthnuaiah hnam dang an rawn tulut tawh mai dawn a ni.

Hawh u, Mizo thalaite u, kan hnam a lo dinchhuah zel theih nan kawng engkimah taihmak i chhuah ang u. Hnathawhnaah a ni emaw zirna leh thiamnaah kawng kan zawhnaah a ni emaw taihmak i chhuah zual sauh sauh vang u. Chuti a nih loh chuan kan chhehvela hnam dangte hian min la chimral mai ang. Kan chenpui hnam dangte leh kan chhehvela hnam dangte kutah kan hnam hi kan hlan phal lo a nih chuan kawng engkima taihmak chhuaha kan thawhna hian rah tha a chhuah ang a, keini um hawn ngai lovin kan taihmakna hian hnam dang hi a um chhuak zawk mai dawn a ni. Kan thatchhiatnain kan chhehvela hnam dang a ko chhuak a nih chuan kan taihmaknain kan chhehvela hnam dang a um chhuak thei a ni tih hi i theihnghilh suh ang u.

Vawiina ka thalaipuite hnenah hian thil chah duh pakhat chiah ka nei. Chu chu engnge tih chuan ‘kan thiltihna kawng engkimah taihmak i chhuah ang u’ tih hi a ni. Hnam taima apiangte dinchhuaha dinchanna khawvel a nih tlat avangin awmhmunah mi ei rawh bar rawh nghaka kan lo awm thatchhiat viau chuan kan hnam hi chimralin kan awm zel ang a, hnam dang kuthnuaiah kan la kun zel bawk ang. Nakina kan hnua thangtharten min rawn dem mai loh nan taihmak i chhuah zual sauh sauh vang u. I ram leh hnam dinchhuah nan taihmak i chhuah lo a nih chuan i ram leh hnam i hmangaih tak tak lo tihna a ni ang. Vawiina i taihmak i chhuahna khan nakin lehzela i hnua lo kal zel turte tan thui takin kawng i sialsak a ni tih hi i hre reng thin dawn nia. I ram leh hnamin a au mek che a, nakin lehzela i inchhirna khua a sei loh nan i ram leh hnam tan taihmak chhuahin thawkrim thin ang che.