Zo Vapual

Khawvel tukverh khar phal nun nei thin ang che

C.Lalmuankima

Newcastle, United Kingdom

Kan pawn lam inthuam mawina kan ngaih pawimawh tluk hian kan chhung lam inthuamna pawh hi ngai pawimawh ni ila chuan kan nun hi a va duhawm dawn tak em!

Tum khat chu Mencap Planning for the Future Seminar kan neih mek laiin ka ngaihtuahnaah he thu hi a lo lut alawm le. 'Ringtute hian kan pawn lam inthuamna kan ngaih pawimawh tluk hian kan chhung lam inthuamna hi ngai pawimawh thin ni ila chuan kan nun hi a va duhawmin a va hlimawm dawn tak em!' tih hi. Mi tam tak chuan kan pawn lam taksa lan mawi dan kan ngaih pawimawh tluk hian kan chhung lam mawi dan kan ngaihtuah thleng pha lo thin a, a pawi hle a ni.

Photo: Google Image

Chhung lam mawina hi ngai pawimawh hmasa thin ila, pawn lamah pawh hian duhawm takin a rawn lang chhuak mai dawn a ni. Chuti ni lova pawn lam mawina chauh ngaih pawimawh hmasak bera kan neih phawt chuan kan nun hi midangte tan duhawm takin a par chhuak thei ngai lo vang. Chhung lam nun kha lutuk leh sehhel lutuk hi midangte pawhin an lo digest hlei thei der lo mai a, an bula chen hi nuam kan ti ngai lo va, an bul atanga kal sawn vat kan duh thin.

Tute emaw thu sawi thiam thenkhatin fiamthu ti tak deuhva an sawi angin, 'Ani hi chu Kristian ka ni a tih loh chuan a thiltihah hian Kristian nun a lang lo va, a chetzia atang Isua hmel hmuh tur ka nei lo,' an tih hi kan ni ve palh ang e. Thenkhat phei chu ringlo mite pawhin an tih duh loh thleng thlenga ti duh kan awm tlat mai te hi inenfiah kan ngai hle tihna a ni.

Keimahnia Isua hmel lanna hi hmun dangah hmuh tur a awm chuang lo. Kan thiltih atang hian miten Lal Isua hmel an hmu thin a, kan thiltih hmangin miten malsawmna an lo dawng thin a ni. Lal Isua hmel lan chhuahna tur ber kan taksa kan ngaih pawimawh lohva eng eng emaw hleka hlawkna lam ringawt um leh duak, fianriala inthlahdah leh mai thin, mahni hlawkna tur a nih dawn phawt chuan dawt sawi leh mai kan nih chuan kan chhunga Thlarau Thianghlim awm hi kan tivui fo vang.

'Miten min chhiar, min thlir reng e,....' tih hla sa reng chung sia kan kutin a thiltih tha lo a thulh chuan si loh chuan keimahniah hian Isua hmel lan tih a awm dawn lo tihna a ni. Taksa ngeia sual kan tlansanna hmunah hian keimahniah Lal Isua hmel a lo lang thin a, kan thiltih kaltlangin miten Lalpa an fak thin. I taksa ngeiin sual kalsan thin ang che.

Ringtu nuna kan thanmawhbawk lian tak pakhat chu kan nunah min tihnawktu khawvel thil kalsan kan hreh thin lutuk leh khawvel tukverh kan khar phal thin lo hi a ni. Khawvel thil kalsan kan hrehna hian ringtu nunah thanglian thei lo turin min siam fo thin. Lal Isua hminga kalsan tur apui lah hi a lo tam si a, chu assignment Pathianin min pek chu kan tih loh chiah khan ringtu nuna kan than dan turin kan thang lo nghal a ni. Chuvangin kan nunah hian min tihnawk theitu apiang kan kalsanna zelah Lalpa inpuanna thar a lo thleng zel ang a, khawvel thil kan kalsanna hmunah thlarau lam thila chhun khahin kan lo awm zel dawn a lo ni reng mai.

Kan taksa ngeia khawvel tukverh kan khar phalna hmunah hian Lalpan a van tukverh min hawnsak ang a, tichuan a van lam malsawmnain kan nun hi min vur zel dawn a ni. I taksa ngeia khawvel thil i kalsana khawvel tukverh i khar phalna hmunah chiah khan van Pathian chuan a van lam malsawmna chhiarsen lohvin a vur ang che. Taksa ngeia sual kan kalsanna hmun zelah hian kan chhunga awm Isua nun hi miten an lo hmufiah ang a, an chawimawi zel dawn a ni.

I nuna Pathian inpuanna chawl lova i dawn duh chuan i taksa ngeiin sual kalsan la, i taksa ngeiin khawvel tukverh khal ngam thin la, tichuan Pathian inpuanna van tukverh malsawmnaa vurin i lo awm zel tawh mai dawn a ni. I chhungril inthuamna i ngaih pawimawh hmasak hunah chiah nangmah kaltlangin miten Lal Isua hmel an lo hmu zel tawh mai ang. Miten nangmahah mi nung leh ei tur tak an hmuh zel theih nan i taksa ngeiin khawvel tukverh khar phal thin ang che.