 |
| Photo: Google Image |
Tunlai khawvel hmasawnna leh changkannain a thopa
zuana min thlawhpui vawn vawn lai hian kan fate hi anmahnia an awm hian an him
tawk em tih hi zawhna pawimawh tak awm thei a ni ve leh tlat mai. Nu leh pa
thenkhat chuan an fate ei leh bar tui tak tak an pek theih avang te, silh leh
fen manto leh tha tak tak an beltir theih avang te, zirna sikul tha ber ber leh
an infiamna tur material an leisak theih avang ngawt te hian an fate chunga
mawhphurhna hlen viau taah an inngai thin a, an tisual fo thin reng a ni. Kan
fate mamawh zawng zawng kan pek theih avang hian kan fate chunga kan
mawhphurhna kan hlen a ni lo va, an himna kan ngaihtuahsak tel bawk a ngai. Kan
fate himna lam hi kan ngaihtuah ngai em? Sum leh pai hnianghnar taka kan
support theih avang ngawt hian an himin kan hria em? Hei hi ngaihtuah tur tam
tak a awm a ni.
Kan fate hian kan thiltihsak (thilpek) hmang hian
engnge an tih thin tih hi mi tam tak chuan chik nachang kan hre hauh lo nia! Chutianga
kan fate thiltih pawh va hriatsak lo nu leh pate chu a tawpah an fate avanga
mittui tla tam ber ber te zu han ni tlat a! Chuvangin kan fate hi anmahnia an
awmin an him leh him loh hi kan ngaihtuah tel zel a pawimawh a, an thiltih kan
hriatsak fo a pawimawh bawk.
Entirna tawi te han zep tel lawk ila: Nu leh pa
thenkhat chu an faten tunlai khawvel IT mobile phone changkang tak tak an hman
theih avangin intihtheih nan tak an hmang a, midang hnenah hial sawi an chak
thin. Khang mobile phone hmang khan an faten an hmuh theih loh phenah engnge an
tih thin tih hi an ngaihtuah pha lo hrim hrim a, an fate mobile check-sak
nachang pawh an hre lo a ni. Kan fate hian an hlimna atana kan tihsak phenah
hian sual tihchakna lian tak an zir chhuak thei a ni tih hi kan hriat a tha hle
mai. A chhan chu mobile phone atang hian khawvel tukverhah an dak chhuak a, mi
bawraw tak tak te awm dan tha lo thlengin an hmuh theih avangin nunkawng tha lo
an zir chhuah theih vang a ni. Fate mobile phone neihtir hi a sual a ni lo va,
a tha lutuk e, amaherawhchu rilru lama la puitling lo an la nih rih avang hian
a hman dan thiam zirtirna kan pek fo a ngai. Chutianga a hman dan thiam
zirtirna kan pek si loh chuan anmahni tichhe theitu hmanrua a tling ve thei a
ni.
Kan thian pakhat a fate tleirawl nei chuan heti hian a
sawi a, entawntlak tak niin ka hria. ‘Ka fate sikul bang hi homework an tih zawh
hma loh chu an phone ka kawlsak a, tichuan homework an tih zawhah ka pe a, zan
an mut dawnah ka kawlsak leh thin a, an phone hi ka check-sak thin a ni….’
zu han ti a! Chutianga tih nachang hre lo tam tak kan awm thei ngei ang a, kan
fate rilru thang chho mek zel himna atan nu leh pate hian an mobile phone hi
kan check-sak fo tur a ni. Rilru la puitling lo na na na chu an thiante tu tute
emaw hmanga sual tih chakna an lo neihin an zui ve mai palh thei a, chumi lakah
chuan kan fimkhurpui a ngai hle.
Heng IT mobile phone changkang tak tak te hi kan fate
kan hmantir thei a, a lawmawm rual rualin la naupang lutuk hi chu an sikul
thleng thlengin mobile phone kentir loh a him ber. Kan kentir a nih pawhin an
phone kan check-sak fo a pawimawh ang. Chutianga kan tih phawt chuan nu leh
pate an ngaihsakzia an hria ang a, sual tihduhna remchang a awm lo nge nge ang
a, anmahni chauhva an awm pawhin himin an inhre bawk ang. Kan fate anmahni
chauhva an awm pawha an himna tur ngaihtuah thleng ngai lo nu leh pate kan nih
chuan a pawi ngawt ang. Hawh u, kan fate himna tur hi an thiltihna kawng engkimah
i ngaihtuahpui zel ang u.
No comments:
Post a Comment