Zo Vapual

Engin nge Pathian hnaihtir che?

C. Lalmuankima

Newcastle, United Kingdom

Pathian min hnaihtirtu hi a in ang lo theuhvin a rinawm. Thenkhatin harsatna khur thuk tak atanga Lalpa an hnaih laiin a then erawh chuan thihna hial an tawh chiahin Lalpa an hnaih ve thung. A then erawh chu thununna leh zilhhauna tawh phawt loh chuan emaw mahni chunga eng eng emaw a lo thlen phawt loh chuan Pathian lam hnaih tum reng reng lo te pawh an awm ve bawk a. Eng dinhmunah pawh awm mah ila, Lalpa min hnaihtirtu a nih phawt chuan a tha vekah i ngai ang. Amaherawhchu chu aia pawimawh zawka lang chu Lalpan a khawngaihna kan chunga a lantir avanga a khawngaihna haidera kan awm erawh a pawi hle thung ang.

Photo: Google Image

Kan harsatna te leh mangan lusunna te hi Lalpa min hnaihtirtu an ni thei bawk a ni. Lalpa hnaihna a nih dawn phawt chuan eng dinhmunah pawh ding mah la a pawi reng reng lo turah ngai ila. Mahse thununna leh zilhhauna a lo thlen phawt loh chuan that tum hauh lo leh Lalpa hnaih tum hauh loh hi thil tha ber a ni chuang lo va, zilhhau fo pawha ring tihkhawng tlat leh luhlul chhuah fo phei chu vawi leh khata boralna thlen theihna a ni (Thufingte 29:1). Thununna leh zilhhauna kan nghak kher thin a nih chuan kan ti fuh hauh lo vang. Chuvangin thil zawng zawng hi Lalpa min hnaihtirtu a nih a, a that vek rual rualin thlahdah taka awm erawh chu a rem leh hauh lo a ni (Jeremia 48:10). Ringtuten kan nun kan hman danah kan fimkhur hle a tha hle mai. Keimahnia Lalpa hlawkna tur awm lovah hi chuan i inham tang thin lo vang u.

Harsatnate hi a pumpelh zawnga kal tum aiin Lalpa min auh tamtirtu atan hmang hlauh ila a tawpah kan lo hlawkpui leh thin a ni. Chuti ni lova tuar bik em em emawa kan inngaih leh a pumpelh zawng lam hlir kan ngaihtuah erawh chuan ringtu nun kawngah kan thanglian thei hauh lo vang. Fak hla siamtu chuan ringtu nun chu tuarnain bul an tan thin tiin a lo auchhuahpui a, a dik khawp mai. Chutih rual rual chuan Lalpan nunkawng min zirtir duh dan a awm a ni tih hi ngaihtuah tel ila a tha bawk ang. Kan rilru ngaihtuahnaah chuan tuar ngawr ngawr leh chan ngawr ngawr bik tura inngaihna kan nei mai thei a, chu lama kan rilru kan pek viau erawh chuan mahni inlainatna sualin kan khat fo vang tih hi hre hmasa ila. He tuarna leh channa atang hian Lalpan eng zirlai nge min zirtir a duh tih va hriat thiam tumna lam zawk hi kan ngaihtuah fo a pawimawh zawk a, chu lama kan rilru kan pek phawt chuan tuarna leh channa pawh hi hlawkna a nih thu a lo lang thin a ni.

Fak hla siamtu bawkin 'Tuarna pawh ka tan hlawkna....' tiin a tawrh ber lai pawhin hlawkna thuruk a hmuh chhuah thu a tlangaupui a. Hei tak hi a ni kan sawi tum chu ni. Tuarna leh channa ngawr ngawra kan rilru kan pek chuan hlawkna awm miah lovin a tuar chhuah theih a, Lalpan thu min zirtir a duh hi hlawkpui tur leh he harsatna atanga zirlai lak tum thin rilru pua kan awm erawh chuan tuarna leh channa pawh hlawkna a nih thu kan nun ngeiin kan sa thei thin a ni.

Engin nge Lalpa hnaihtir che tih hi ka rawn hriatpui hauh lo che a, nangmahin i inhre chiang zawk ngei ang. A pawimawh ber anga lang chu zilhhauna leh thununna a lo thlen phawt loh chuan that tum hauh loh hi ringtu nuna min hnuk hniamtu hmelma tawktarh a ni tih hi kan hriat reng a tha hle mai. Hei hi erawh kan thliar thiam a tha ang, Lalpa thununna sawtpui tur erawh chuan kan nun kan buatsaih fo a pawimawh hle a ni.

Pathian khian kan mizia hi a hrechiang a, keimahniin kan inhriatchian ai pawhin Lalpan min hrechiang a ni (Sam 139:1-4). Kan mize phu tawk ang lekin min lo enkawl se la chuan ni tin, darkar tin, minute tin, second tin maia hrem tlak kan ni a, hremhmun hma bak kan ni. (Hremhmun phu tawk lek mize pu kan ni si a....) Mahse kan he ti chung chunga a khawngaihna min la chantir leh kan Pathian nih a zak lo erawh hi chu kan vanneih phah ta a ni. Chu a khawngaihna tleipui zo lo leh chumi laka inchhu ngawng tlat kan nih hian khawngaihtu rilru kan tina thin a, khawngaihtu kan tah nawntir fo thin a ni.

Lalpa min hnaihtirtu a nih phawt chuan kan nuna kan thil tawn harsat lai ber pawh hi kan tan chuan hlawkna leh malsawmna a lo ni pha tawh hrim hrim a ni. Zilhhau ngai kher erawh chuan awm tum thin lo ila, chutianga kan awm fo erawh chuan keimahni leh keimahni anchhia kan inlawh thei a ni tih hi kan hriat reng a tha hle ang.