Zo Vapual

A theih loh….tih hi tehna puitling a ni ngai lo!

C. Lalmuankima

Newcastle, United Kingdom

A nih theih loh dan vawi sang tel sawi leh ngaihtuah aiin a nih theih dan tur vawi khat ngaihtuahna sen hian hringnun hmasawnna a thlen thin a, tih hma hauhva tlanchhiatsan chingte hi mi dawihzep tak te an ni. A nih theih lohna lam ringawt ngaihtuah chingte hian a tawpah anmahni hial pawh an intichhe thin.

Mi tam tak hlawhchhamna hi han chhuiin han zir chiang ila, a tih theih lam aia a tih theih loh lama tang thin leh rilru pe thin leh thutlukna siam thinte an ni duh khawp mai. 

'A theih loh....' tih hi kan Dictionary atanga kan chawh reh ngam ni apiangah kan hringnun hi 'A theih....' tiin kan thlak ang a, chu chuan hlawhtlinna kawngpuiah min hruai thleng ang. Kan ngaihtuahnaa thil theih loh kan ngaihtuah chhung chuan kan hringnunah hian engtik lai mahin thil kan ti thei lo vang a, hlawhtlinna a thleng ngai lo bawk ang. Chuvangin kan ngaihtuahna hi 'A theih a ni....' 'A ni thei a ni....' adt. tih thu tein thuam khat tlat thin ila, tichuan chu chuan kawng dikah min hruaiin thil tha ngaihtuah chhuak thei turin rah tha min chhuahpui mai dawn a ni.

A nih theih loh dan kawng ngaihtuah tlat chingte hi pawl leh kohhranah pawh an hnawksak duh khawp mai. 'Hmanah pawh kan ti tawh a, kan hlawhtling chuang lo...' 'Hmanah pawh kan hmang tawh a, kan sawtpui chuang lo...' ‘Hmanah pawh kan ti chin a, kan hlawhtlinpui chuang lo….’ adt. tia hmana tih tawh kha sawi chhuah (apply) fo an ching a, thiltih apiang mai hi sawtpui lo vek turah an ngai thin. Heng mite hi an khawngaihthlak em em a, a eng zawnga thil an thlir thin loh avangin an hmaa hlawhtlinna lo thleng/awm tur chu an bawh pel fo thin reng a ni. Mihring chu kan rilru ngaihtuahna hian min thunun dan azira kan taksa chetpui/kalpui thin kan ni a, kan rilru ngaihtuahnaah a thim zawng hlir kan thlir chuan hlawhtlinna chu engtik lai mahin kan nunah a thleng ve ngai lo vang. Kan ngaihtuahna berin hlawhtling ve thei lo leh hlawhtling ve tlak lo tura min ngaih tlat chuan kan taksain a zawm nghal a, hlawhtling ve thei lo tura piangah min siam ta thin a ni.

Rilru lam zirmite leh mithiamte chuan heti hian an sawi a, 'He khawvela thil hlauhawm ber mai chu rilru nghing hi a ni a. Lirnghing ai pawha hlauhawm zawk chu mihring rilru nghing hi a ni.' tiin. Mihring rilru nghing hi a pawi em em a, mihring rilru hi a ni lo zawnga a nghin tawh chuan siamthat leh a harsa tawh thin. Rilru nghingin a nghawng pawi em emna chu a tawpah kha rilru nghing neitu hial pawh kha a tihlum thin a ni. Kha rilru ngaihtuahna nghing khan a taksa tihlum lo mah sela a beiseina nung lo piang chhuak tur pawh a tihhlumsak thin a, a pawi tak zet a ni e.

I hringnunah khan ‘A tih theih loh…’ tih hi tehna puitling emaw tia i hman phawt chuan i hlawhtlinna kawng i khar mek zel tihna a ni ang. Mi hlawtlingte nun hi han thlir ila a thim zawnga thlirna aiin a eng zawngin hringnun hi an thlir a, a eng zawngin an hringnun an khalh kal thin a, chu chuan beiseina nung siamsakin a tawpah mi hlawhtling takah a siam ta thin a ni. A thim zawnga thil thlir chingte avang hian kohhran leh pawl hmalakna pawh a hnufual phah thei a, an thu kan zawm phei chuan kohhran leh pawl hmasawnna tur kan chhe nghal tihna a ni.