Zo Vapual

Mitin ta tur Chanchin Tha lâwmawm êm êm

(Isaia 9:6,7; Luka 2:8-10)

C. Lalmuankima

Newcastle, United Kingdom

"Hlau suh ulang, ngai rawh u, mi tin ta tur chanchin tha lawmawm em em ka rawn thlen che u a ni. Vawiinah hian in tan Davida khuaah Chhandamtu a piang ta, Lal Krista chu. Tin, hei hi in tan chhinchhiahna tur a ni, nausen puana tuam, ran chaw pekna thlenga mu in hmu ang." (Luka 2:8-10)

Chanchin lawmawm thenkhat hi chu thenkhat tan lawmna a nih rual rualin thenkhat tan erawh lawmna a tling zo tlat thin lo. Chanchin lawmawm thenkhat te phei chu thenawmte leh thian thate tan pawh thinhrikthlak tak leh ngaihnawm loh tak a ni thei bawk. Engvang nge kan tih chuan khawvel atanga chhuak chanchin lawmawm a nih vang a ni. 

Photo: Google Image

Entirnan thil pakhat ka han zep tel lawk teh ang: Rawngbawltu thenkhatin mihring thinlung makzia an sawinaa tehkhinthu/entirna fiamthu ti tak deuhva an sawi thin angin 'Keini aia dinhmun hniam zawka kan ngaihte leh keini aia sumdawnnaa tlachhe zawka kan ngaihte an rawn len thur thur chinah chuan lawmpui a hnekin thiknain kan khat a, thenawmte lawmna kha tawmpui a har thin......' an tih hi vawiin thlengin kan thinlungah a la thleng dik zel chu a nih hi maw. Kan level-puite ai pawha hniam zawkten keimahni aia a ni atela an thanlen thur thur chuan muttui a har duh khawp mai an tih ang deuhvin. Thenawm te tana chanchin lawmawm kha keini tan chuan thikna avangin chanchin lawmawm lo a ni ve leh thei tlat a ni. 

Khawvel chanchin lawmawm hi chu mi zawng zawng tan a ni vek kher lo mai thei a, mi zawng zawng tan chanchin lawmawm a thlen lo mai thei bawk. Lal Isua zara Chanchin Tha kan dawn erawh hi chu mi tin ta tur Chanchin Tha a nih angin mi rethei ber leh hausa ber tan pawh chanchin lawmawm a ni a, damlo tan leh natna hrehawm tuara khuma mu mek tan pawh chanchin lawmawm a tling tlat a ni.

Ringtu nunah phei chuan Lal Isua ni lova chanchin lawmawm va zawn phet tum hi a tha lo va, kan nun neih min uaihnawktu a ni fo thin. Khawvel chanchin lawmawm te hi chu kan hriat zat chiah kan tahpui leh thin a, kan lawm zat chiah min tilawm lotu an ni leh thin. Lal Isua Chanchin Tha lawmawm em em erawh chu kan hriat zat chiah kan lawmpui mai bakah kan lawmna tipungtu a ni fo thin a ni. Lal Isua ni lova Chanchin Tha lawmawm dang zawn tum chiam hi kan nun tibuaitu a ni fo thin.

Khawvel thila hlimna leh lawmna hi chuan kan rilru hlimna leh lawmna bak a thlen thei lo va, Lal Isua atanga hlimna leh lawmna erawh hi chu kan thlarau nun hlimna thlengin hlimna leh lawmna min siamsak thei a ni. Lalpaa hlimna leh lawmna dik tak hi chu a nghet bik talh a, khawvel thilin a tih chet zawh rual lohva nghet a ni. I ngaihtuahna leh rilru che vel kha khawvel thilin a la tihnghin theih viau che chuan nangmahah khan inenfiah ngai a awm tihna a ni ang.

Mitin ta tur Chanchin Tha lawmawm em em a ti a, mitin zingah hian tel ve nia kan inhriat phawt chuan kan tan pawh Chanchin Tha lawmawm em em a ni ve tihna a ni. Pawl sawm pass chin te chu ti se la chuan pawl sawm pass lo vanduai deuh deuh kan awm ngei ang. B.A/M.A/Ph.D hmu chin emaw sawrkar hna lian thawk thei chin ti phei se la chuan tlinglo tur hi kan awm teuh a ni. Mahse kan Bible chhiarah khan mitin ta tur Chanchin Tha lawmawm em em a tih tlat avangin mi rethei ber atanga hausa ber thlengin kan ta tur a ni a, mi mawl ber atanga mi fing ber thleng pawhin kan ta tura Pathian thilthlawnpek liau liau a ni hi kan vannei ta a ni. Pathian inpuanna hi kan dinhmun a chhiat leh a that, a san leh a hniamah a innghat lo va, hmangaihna avang zawkin dinhmun chhe bera kan awmlai pawh hian a inpuan a thulh chuang lo. Chuvangin pa chhe ber hnen pawha thleng pha Chanchin Tha a nih tlat avangin kan hnena a inpuanna hi mi tuman an dal zo lo va, fakna hla siamtuin a sawi angin min hmangaih hi tuman an dang zo lo a ni.

Lt. Col. Lalhmingliana thu sawi tha ka tih deuh mai pakhat a awm. 'Thilpek hi a petu azirin a hlutna a dang daih thin a, hmangaihna avanga pek a nih phei chuan a hlu lehzual a ni...' a tih hi tha ka va ti tak em! Lei leh van leh a chhunga thil awm zawng zawng siama enkawltu chuan hmangaihna avangin a fapa Isua Krista chu thilthlawnpek hlu berah min lo pe a, chumi dawngtute nih tluka vanneihthlak hi a awm thei chuang awm lo ve. Ram bial pakhata ram lal ber thilpek mah a hluin hahipin kan sawi thin a, rambial pakhat mai ni lo rambial hrang hrang leh a chhunga awm zawng zawng siama enkawltu thilpek chu a va hlu lehzual dawn em! Chu chu miin a dawnna hmun a hriat thiam phawt chuan a hlut thiam bawk thin a ni.

Photo: Google Image

Mi zawng zawng tana Chanchin tha lawmawm em em min thlen theitu awm chhun chu Lal Isua chauh hi a ni a, a ni chu rethei te tana hausakna a ni a, hausa te tan pawha hausak belhna a ni. Damlo te tana damna a ni a, damna leh hriselna tha zawk neite tan pawha damna leh hriselna tha lehzual neihna a ni bawk. Chuvangin mitin zingah hian tel vea kan inhriat chuan Isua hi kan chanchin lawmawm ber a ni tih hi ka sawi uar duh hle. Isua ni lo chanchin lawmawm lehzual hi khawvel thilah zawn tum duh suh, Lal Isua ni lo chanchin lawmawm lehzual he khawvelah hian a awm chuang lo va, awm a hnekin khawvel thil chu boralna a ni zawk. Chuvangin Lalpa hi kan hlimna leh lawmna atan a tawk hle a, a aia thil dang beisei chiam tumna hi sual lak atanga chhuak a ni thung.

Chu mi tin ta tur Chanchin Tha lawmawm em em mai chu mi rethei ber hnenah pawh a thleng phak a, mi hausain amah chauhvin a pumbilh zawh theih a ni lo va, mi rethei leh pachhe ber hnenah pawh a thleng phak tlat mai hi mi tin ta tur Chanchin Tha lawmawm a nihna chu a ni chiang mai! Company thil siamte hi a leina tur neih loh phei chuan mi tin hnenah a thleng pha lo mai thei, Lal Isua Chanchin Tha erawh chu mi tin tan a ni a, mi rethei leh mi mawl ber hnen pawha thleng pha a nih tlat avangin a hlu em em a ni. Mi fing leh mi mawl hnena a thlen dan erawh a in chen vek lo mai thei. An fin leh mawl dan azir te pawh a ni thei ang.

A pawimawh ber chu Lal Isua hi he khawvel thilah pawh chanchin lawmawm sawi tur nei ve miah lote tan pawh kan chanchin neih awm chhun a ni a, Amah lo chu chanchin dang sawi tur nei miah lote tan hian a hlu hlei hlei a ni. Kan tana Lal thar lo piang tur hmuaka chibai kan buknaah hian 'mi tin ta tur chanchin tha lawmawm em em....' tih a nih angin mi tê ber leh mi lian ber tan pawh a ni a, mi rethei leh mi hausa tan pawh a ni tel bawk a ni tih hi kan hriat reng a tha hle mai. Chu mi tin ta tur chanchin tha lawmawm em em nang leh kei atan pawha lo pianga hian kan nunah hlimna leh lawmna thar min rawn thlen rawh se.