Zo Vapual

Isua nihna chi 5 leh Krismas

(Bible: Isaia 9:6-7; Johana 5:8, Kolossa 1:12, 17; Luka 2:8-22)

C.Lalmuankima

Newcastle, United Kingdom

Thuhmahruai

Photo: Google Image

Thupui dang vuah ka tum pawhin he thupui bawk hi a rawn lan leh tak siah chuan ‘Isua nihna chi 5 leh Krismas’ tiin a inrem leh inrem loh lam pawh ngaihtuah chuang lovin ka han bel ve chawt mai a ni e. Krismas a lo hnai leh ta a, zawlnei Isaia hrilhlawkna bu hi kan chhiar tam leh viauvin a rinawm a, Lal Isua lo pian tur hrilhlawkna a nih angin he thupui innghahna atan pawh Zawlnei Isaia bu hi hman a ni. Lal Isua nihna hi tam tak sawi tur a awm teuh vang a, tun tumah hian a nihna chi 5 hi ngaihtuahho kan tum dawn a ni.

Maka

Maka a nihna hi sawifiah leh chuan tur awm tawh lovin a mak a, han sawifiah chiam tum hian a makzia kan sawi fuh lo zawk em aw tih tur khawpin Maka Pathian a ni. He khawvelah hian thilmak tak tak sawi tur a awm teuh mai thei, kan kuta kan khawih theih leh khawi theih loh te, kan mita kan hmuh theih leh theih loh kan kawchhung leh thisen zungzam kal dan te pawh sawi tur a awm teuh ngei ang. Chumai bakah mihringte zingah thiltihtheihna mak tak tak neite pawh sawi tur an awm teuh bawk ngei ang. Chung zawng zawng aia mak leh danglam ber mai chu Pathian fapa meuh ni si, a thilsiam mihringte a hmangaih avanga mihringa a rawn chang ta tlat mai hi a mak tawp thei lo va, hei aia thilmak leh danglam hi he khawvelah hian zawng mah ila, hmuh tur a awm chuang lo a ni.

Hetia han ngaihtuah mai pawha thil mak deuh mai chu: Mihringte hian thil kan siam chhuak thin a, chu kan thil siam chhuahah chuan tumah kan chang duh hauh lo. Pathian erawh min hmangaihna avangin a thilsiamah ngei amah a rawn tang a, mihringten harsatna leh natna kan tawrh zawng zawngte chu rawn tuar vein amah ngei a rawn inhlan tawp mai hi khawvela thilmak chhinchhiahna bua ziah tel loh chi rual a ni lo a ni. Chu Pathian ngei mihringa a rawn insiama kan zaa aia a rawn inhlanna chuan Chatuan Nunna min siamsak ta leh zel zel hi a mak tawp thei lo va, hla siamtu phei chuan a hmangaihna thukzia leh makzia auchhuahpuiin, ‘Mak tiin khawvel ka hmang zo vang…’ a ti hial reng a ni. Pathian hmangaihna aia thuk leh mak hi khawvel thilah zawn tum ngai suh, hei aia thuk leh mak hi i hmu chuang lo vang. A chhan chu amah hi Maka Pathian a ni tawp a, Amah avangin kan nung kan che kan awm a ni si a (Tirhkohte 17:28), Amah kal pela thilmak zawk va zawn tum chiamna hi sual a ni thung.

Remruattua

Mihringten rem kan ruat thin a, ruahmanna tha tak tak kan siam thin a, a tha hle mai. Chu aia tha lehzel chu kan remruatnaah te hian Lal Isua khian lalna a chang em? tih hi kan inzawhna lo ni fo thin se la a va tha dawn tak em! Isua Krista hi amah ringtute tan chuan remruattu Pathian nih a tling tak zet a, a remruatna hnuaiah he khawvel hi a awm mek a ni.

Mihring chuan kan hlawkna tur emaw mahni tana thatna tur lam chauh ngaihtuahin rem kan ruat thin a, thenkhat remruatna phei chu midangte chhe vek mah sela pawi ti hauh lote zu han awm a! Chuvangin kan remruatnaah hian Lal Isuan lalna a chan fo a pawimawh a ni. Kan remruatna kawng engkimah Lal Isuan lalna a chan phawt chuan mihring lamah kan duh dan angin thil thleng thin lo mah sela nun a hlim tel tlat tho a ni. A chhan chu keini remruat aia tha zawkin Lalpan min thawhsak leh mai ang tihah hian rilru ngaihngam takin a awm theih tlat vang a ni a, chutiang chiah chuan min siam bawk thin. Chhungkua leh pawlah pawh pawh remruatna tha tak hnuaiah chuan kal a nuam thin a, kan hlim a, kan thla a muang thin a ni. Chuvangin Pathian remruatna hnuaia miin ke a pen thiam phawt chuan a chenpuite leh a thawhpuite leh a mihringpuite thlengin hlimna leh thlamuanna an chang thin. Kan remruat aia tha zawkin rem min ruatsak thei a ni tih hriatnaah hian Lalpa khi ring ngam thin ila, a thu hmanga chhun khahin kan lo awm zel mai ang.

Pathian Chaka

Khawvela thil hmuh theih leh hmuh theih loh siama enkawltu Pathian a nihna hian a chakzia leh a thiltihtheihzia hi a hrilhfiah chiang hle mai. Khawvel thil hmuh theih leh hmuh theih loh aia hlu leh chak chu Pathian chauh hi a ni. A chakzia leh thiltihtheihzia chu a thiltih en hian sawifiah ngai lovin a fiah sa reng a ni.

Mihringte hian Pathian chakzia hi el theih emaw kan ti thin a, kan tisual fo thin reng a ni. Korinth lehkhathawn pahnihnaah chuan heti hian a inziak a, ‘Pathian atna chu mihring aiin a fing zawk a, Pathian chak lohna pawh chu mihring aiin a chak zawk bawk si a….’ tiin (1 Korinth 1:25). Mihringin thil ti ve thei viau nia inhriain vansang leh thlapui hialah kan inkap thleng a, tuirinriat li mawng thlengin kan hrut chhuak a, ti ve thei hlein kan inhre thin. Mahse kan Pathian chakna leh thiltihtheihna han khingsawng pha tur chu he khawvelah hian engmah a awm lo va, vanah pawh a awm hek lo. Pathian Chaka a nihna hi Amah chauh chu Chakna Pathian atana hmangtute nunah hian a fiah lehzual a ni. Pathian chakna ngawt lo chu chhuan tur neilote hnenah pawh Lalpan a chakzia leh a thiltihtheihzia a lantir thin. Pathian chakna hmaah chuan kan chaklohzia kan inhmu fo thin reng a ni. Chutia mahni chaklohzia inhmuhfiahna atang chiah chuan kan Pathian chaka a nihzia a rawn lang thin a, Lalpa inpuanna chawl lovin kan nunah a lo thleng thin a ni.

Chatuan Pa

Sakhaw dang pathiante hian ‘Chatuan Pa ka ni, nunna petu ka ni…’ an ti ngai lo. Anmahni thu ngawta tih theih a ni lo reng a ni. Kan Pathian (Isua) erawh chuan chatuan mi a nih thu te, chatuan pa a nih thu te kan Bible-ah vawi duai lo kan hmu a. Chu Chatuan Pathian chu nang leh keia rin Pathian a lo ni reng mai hi a thlamuanthlak i ti ve em? Amah Lal Isua ngeiin, ‘Keimah hi kawng leh thutak leh nunna ka ni, keimaha kal lo chu tumah Pa hnenah an thleng ngai lo.’ (Johana 14:6) tiin a lo sawi a, amah chu chatuan nunna petu a nih thu pawh kan hmu a ni.

Chu Chatuan Pathian sakhaw dang pathiante pawhin an neih ve loh leh an pek theih loh chatuan nunna thuruk vawiina nang leh kei atana hlana a awm tlat mai te hi ngaihtuah chian chuan a ropui tawp thei lo a ni. Chu chatuan nunna chu vawiina a thilsiam mihringte hnenah pekin kan awm a, chu chu Lal leh Chhandamtua pawm apiangte tan vohbik a ni. Chatuan thil ni lo, tun mit khap kara boral leh mai turah hian kan lo buai lutuk palh ang tih hi a hlauhawm hle mai.

Remna Lal

Isua tel lova mihring hmanga remna leh muanna thuthlung siam hi chuan a daih rei ngai lo va, ni leh thla leh kum a veiin hun tiam a thlen hmain emaw thlen hunah emaw thlun nawn a ngai leh thin. Hun tiam chin nei remna leh muanna hi chuan hun tiam thlen hma emaw hun tiam thlen hunah emaw tiam nawn a ngai leh thin. Lal Isuan min thlunsak remna leh muanna erawh hi chu chatuan daih a ni a, vawi khat min thlunsakna khan chatuan a daih avangin thlun nawn leh a ngai tawh lo thung. Chu remna leh muanna thuthlung min siamsaktu Pathian kan nei chu kan va vannei tak em! He khawvel remna leh muanna thuthlung hi chu eng eng emaw ni avanga chhe leh thei leh thlun nawn leh ngai thil a ni thin. Lal Isuan min thlunsak remna leh muanna erawh hi chu chatuan daih a ni a, thlun nawn a ngai tawh lo bawk a, engtikah mah a chhe ngai bawk dawn lo a ni. Chu thuthlung ropui tak mai chu; Pa Pathian nena inrem tawh lo remna min siamsak leh hi a ropui a, a ropuizia sawi zawh theih pawh a ni dawn lo a ni.

Chu Isuan Pa Pathian nena inremna thuthlung thar min siamsakna zarah chuan nang leh kei misual ber leh chanchin sawi tur nei ve lote tan pawh kan thatna, felna, thianghlimna leh chanchin neih chhun a ni a; chumi ngei chu amah Pathianin a fapa Isua ngei chu kan chanchin atan min lo thlansak ta zawk a ni. Lal Isua hi chanchin sawi tur nei ve lote tan pawh kan chanchin sawi ve neih tur awm chhun a ni a, ama zarah leh amah kaltlangin mawina kan lo chang ve thin a, kan remna leh muanna Pathian pawh a ni. Khawvel ngaiha mawina reng reng sawi tur nei ve lote tan pawh Isua chu kan mawina awm chhun a ni a, chatuan thleng pawhin kan mawina sawi tur a ni zel bawk ang. Chu kan chanchin thar Isua chu kan thiltihna kawng engkimah kan remna leh muanna famkim atan Pathianin min lo thlansak a, chu nun thiltithei hmanga ke pen mai hi kan tih theih awm chhun chu a lo ni reng mai.

Lal Isua hi nang leh kei chanchin sawi tur nei ve lote tan pawha kan chanchin sawina awm chhun a ni a, chu chu min hmangaihna vang a ni.

‘Chungnung berah Pathian ropui takin awm rawh se, lei chunga a lawm em em mihringte hnenah rem thu leng rawh se…’ (Luka 2:14)

Photo: Google Image

Thutlangkawmna

He Lal Isua nihna chi 5 hian kan nunah Krismas ze dik tak min hmantir rawh se. Lal Isua ni lo khawvel thilmak danglam zawk zawn talh tum hi sual lak atanga chhuak a ni a, Lal Isua ni lo remruattu dang min neihtir tumtu pawh hmelma lak atanga chhuak a ni. Pathian chakna ni lo khawvel thil chhuan tumna leh khawvel thil chak zawk awm anga ngaihna hi siamtu Pathian dodalna chi khat a ni a, chatuan nunna thu pai lova innghah kan tum chuan kan tisual bawk ang. Kan nitin nunah remna leh muanna min siamsak turin vawiina kan rin Lal Isua hi a tawk a, mihringten remna leh muanna kan siamte hi chuan min tibuai leh thin. Mahse Lal Isuan remna leh muanna min siamsak erawh hi chu chatuan daih a ni a, engtik lai mahin a buai ve tawh dawn lo a ni. Heng Isua nihna chi 5 hmang hian nang leh i chhungteah Krismas ze dik lo thleng nawn leh rawh se.