Zo Vapual

I phak tawk rawngbawlna kha i hlen thin em?

C. Lalmuankima

Newcastle, United Kingdom

Mahni phak tawka rawngbawlna kan hlen thin hian Lalpa tan hna ropui tak kan lo thawk a lo ni reng mai. Mahni phak tawk pawh ti duh lova phunnawi tauh tauhva kan awm hian awmzia a nei chuang lo. Lalpan kan rawngbawl theih tawk hi a hai lo, rinawm taka thawh hmiah hmiah zel kha a lo hlawk ber thin a ni zawk. Rawngbawlnaa phun tauh tauh te nun hi a hlim ngai lo va, midangte tana ei tlak khawpin a par chhuak ngai lo.

Photo: Google Image

Kan phak tawk tawka mite kan tanpui a, keimahnia hlimna lo awm thin hi sum leh pai tam tak pawhin a lei theih loh hlimna a ni. Kan phak tawk ni lo tanpui ngai hi Pathian hian kan hmaah a rawn tirh ka ring lo. Kan hmaa rawn thleng chin hi chu Pathianin kan phak tawka kan tanpui ve theih tura a rawn tirh a ni duh khawp mai. Pathian hian kan hmaah hian kan phak tawk tur tanpui ngaite hi a rawn tir thin a, chu chu kut kuangkuahsan mai lova kan lo tanpui hian kan va tanpuiate an lawm mai bakah a tanpuitu pawh kan lawm a, Pathian pawh a lawm bawk a ni.

Kan lei taksa a boral ruala boral ve leh mai tur, kan thih hnua vanrama kan chhawm tel theih loh tur kan sum leh pai hmanga Pathianin a rawng kan bawl min la phalsak leh van ro kan khawl min la phalsak hi chu kan vannei ngawt mai....! Kan sawi tawh angin kan hmaah hian kan tanpui theih loh tur khawp khawp chu Lalpan tanpui ngaite a rawn tir hauh lo vang. Kan tanpui theih ngei tur hi rawn tirin keimahni fiah nan a rawn tir thin a ni.

LALPA Pathian chuan a thu hmangin leh hmanrua eng eng emaw ni hmangin ringtute a fiah thin a, Setana erawh chuan eng eng emaw ni hmanrua hmangin ringtute a thlem ve thung. Fiahna hi Pathian lak atanga lo kal, ringtuten nun puitling kan neih theih nana kan hnena lo thleng a ni a, thlemna erawh chu Setana atanga lo kal a ni ve thung. Thlemna leh fiahna hi kan hre hrang thin lo hi a pawi tak zet a ni.

A thisen far khat pawh luang ral mai lova Kalvari Kraws-a far ral thak mai kha nang leh kei min hmangaih vang a ni. Chu hmangaihna atang chuan mi kan en thiam phawt chuan kan hmaa kan rawngbawlna tawk hi Lalpan min lo pe zel nia....! I tih theih bak ti turin Lalpan a tir hauh lo vang che, i tih theih piah lamah erawh tanpui tur chein Amah khi a inhawng sa reng thung a ni. I rah ngam chin chinah inpuang turin i hmaah a ding reng a ni e. (I rah chin apiang i ram ni turin a ti che a, i ke i pen sawn loh chuan i ramri chu Lalpan a zauhsak dawn lo che tihna a nih chu.....)

I neih thil hmanga rawngbawl a la phalsak che leh van ro khawlkhawm a la phalsak che kha a khawngaihna vang liau liau a ni e. Kan neih thilte hi han en ila a nasat loh teh lul nen, heti chung chunga a rawngbawlna hmanrua atana min la hmansak phal hi Pathian hnenah lawmthu sawi mawlh mawlh tur kan va ni tak em! Kei chu heti hian ka ngaihtuah thin, keia lei taksa teh lul a khawngaihna avanga a hmang ve duh tluka ka lawmna hi a awm chuang lo. Mi ropui leh thiltithei, mi hausa leh mifing tam tak hman sen loh an awm teh reng nen, mahse Lalpan a khawngaihna avanga ka tlawmlai taksa a hmang duh tlat mai hi ka lawm hliah hliah a ni e. Pathian khian kan phak tawk rawngbawlna hi a hai hauh lo vang. Kan phak tawk ang zela inchawimawi hi a tih dan a ni tlat mai a ni. Kan phak bak piah lamah chuan min tir lui lo tawp ang, min tir lui pawh ni se la, kan hmaah khian a kal hmasa zel tho vang. Chuvangin i hmaa rawngbawlna Lalpan a dahsak che kha phunnawi kher lovin ti nghal tawp mai teh le, chu chu Lalpa i thawhpui ve theihna pawimawh tak a ni.

Rawngbawlna chi hrang hrang a awm thei ang a, chung rawngbawlna chi hrang hrang awm thei zingah chuan Lalpan a rawngbawlpui tura talent a pek hmang che khan hma han la teh le. I talent chu tihpuna a awm zel theihnan tuna Lalpan a kawltir mek che kha tipung hmasa la, tichuan a aia tamin a lo pung zel dawn a ni. Rawngbawlna hlen loh hi a pawi em em a, kan phak tawk ang anga Lalpa tana kan lo thahnemngaih ve hian min tirtu Lalpa hi a lawm a ni tih hi i hria ang u. Lalpan i phak tawk rawngbawlna a pekah che khan i ti thin nge i tlanchhiatsan zawk? Lalpa i thawhpui a ni tih hi hre chiang thin la chuan i inthlahdah ngam hauh lo vang. Lalpan i hmaa rawngbawlna a chhawpsak che kha hlen thin ang che.

II Timothea 4:5 – Nang erawh chu fimkhur la, hrehawm tuar la, chanchintha hriltu lam hna thawk la, i rawngbawlna kha hlen rawh.