Zo Vapual

Harsatna dawnsawn dan thiam ringtu

C. Lalmuankima

Newcastle, United Kingdom

Photo : Google Image

Thil reng reng chu kan dawnsawn thiam dan azira phurrit min siama min siam lo thei a ni ve tlat a ni. 

Kan hmaa thil lo thleng kan la tawn ngai hauh lohvah pawh hian kan dawnsawn thiam dan azirin kan thatpui theiin kan thatpui lo thei bawk a ni. Harsatna lo thleng thin hi a dawngsawng thiamte chuan anmahni tichaktu leh kawng hrang hranga hmasawnna thlentua an ngaih laiin a dawngsawng thiamlote erawh chuan hringnun tawpna emaw tiin a dawnsawn dan an thiam thin loh avangin anmahni delhtu lian tak phurritah an ngai tlat thin a ni. Chuvangin kan hmaa thil thleng thin te hi a dawnsawn dan kan thiam loh phawt chuan kan tan phurrit a tling fo thin reng a ni.

Mihringten nun kawng zawh kan tum dan hi William Morley Presham chuan chi li in a lo thliar a. "Mi dawihzep chuan, 'Ka zawh tur hi kawng him a ni em?' a ti a. Remchang ngaihtuah mi chuan, 'He kawng zawh hi a finthlak ang em?' a ti a. Mi chapo chuan, 'He kawng zawh hi lansarhna a ni em?' a ti a. Chhia leh tha hriatna rawn mi chuan, 'A dik ber ang em?' a ti a ni" a ti. (Lalthankima, Upa : Kristian Thalaite leh Tunlai Khawvel, p-6)

Hetiang hian nun kawng kan zawh tum dan chu William chuan a lo then a, a dik ber chu kan ti thei hauh lo vang a; tawk fang chu ko ri a tu em em a ni kan ti thei ang. Upa Lalthankiman a pangana a han belh hi a mawi ka tizual a ni. "Isua zuitu chuan, 'Hei hi ka Lalpan zawh se min tih kraws kawng kha a ni ang em?' a ti tur a ni." a tih hi a ni. Ka ngaihtuah nawn apiangin he thu hian min cho let tlat nia.....! Ka Lalpan zawh se a tih kraws kawng ni lo kawng dang hi ka lo va zawh nasa tak em, Lal Isua kraws ni lo khawvel kraws, mahni tuk chawp kraws hi ka lo va pu tam tak em....! tih hi keimahah a inthum rawn tlut tlut a, a chang chuan mahni chauhva awm pawha zah chem chemna a lo awm tlat nia...! (Ka Lalpa kraws ni lo keima phuah chawp leh ka mihring lam hlawkna, thahnemngaihna kraws ka lo put ve fona hian ka Lalpa min lo hlattir fo thin a nih hi tih ka hrechhuak ta hial a....!)

A hmasa lama kan sawi tak harsatna dawnsawn dan thiam leh thiam loh nen khan a la inhrul vek a nia. He lei taksa kan put chhung hi chuan heng harsatna chi hrang hrang te nen khian kan la inkaihkuah tlat dawn a, chutih huna a dawnsawn dan kan thiam loh erawh chuan phurrit min siamsaktu an ni fo vang. Chuti ni lova engkima kan tawh apianga Lal Isua nena kan dawnsawn erawh chuan harsatna tin reng lo thleng thin pawh kan tan malsawmnaah chhiarin a awm zel dawn a ni. Chu erawh a man pek ve a ngai. A man erawh a to lo hle thung. A thu awih hi a man kan pek ve theihna awlsam ber a ni. Lalpan ti tura min phut leh a thu zawm tura min tih zawm hi Lalpa laka a man kan pek ve theihna awlsam ber a ni. (A man kan pek ve theihna awlsam ber pawh kan tih peih loh thin avangin kan buai leh thin a, harsatna hmachhawn dan kan thiam ta thin lo va; a tawpah mahni nunna hial pawh hlut zawh lohna a lo awm thin.)

Lalpa tellova harsatna hmachhawn hrehawmzia chu e, nilenga lungpuia indelhtir ai pawhin a rit zawk a; a dawnsawn dan thiam loh phei chuan kumkhaw phurritah kan neih thei a ni. Lalpa nena harsatna dawnsawn erawh chu a hahdam em em a, phurrit nei reng chung pawha hahdam taka phurh theihna a lo awm tlat mai a ni! Chu chu engvangnge kan tih chuan amah ngeiin, 'ka phur pawh a zang a ni...' tih leh 'keiman ka chawlhtir ang che u....' (Matt. 11:28-30) tia a lo sawi ang khan Lalpan a chawlhtirnaah chuan kan hmaah engtiang khawpa phurrit pawh lo thleng mah se la, Lalpa nen chuan a lo zang tawh thin a; nuam tak leh hahdam takin kan phur zel thei thin a ni.

Fakna hla siamtuin 'Harsatna tawk lo rawngbawltu awm maw?' tia a lo sawi angin he khawvela kan chen chhung hi chuan harsatna chi hrang hrang kan tawk zel dawn a, chung harsatna chi hrang hrang lo thleng thin te chu Lalpa thutak hmanga kan hmachhawn hun apiangin harsatna tawk reng chung siin Lalpa avangin hahdam takin nun kan hmang zel dawn a ni. Harsatna tawk chung renga hahdam taka hahchawlh theihna thuruk hi a lo awm tlat a ni.

Kan chunga harsatna lo thleng thin hi nang leh keia lo dan theih ngawt a ni lo va. Ruah leh ni sa tur kan dang thei lo va, chumi laka kan inhumhim ve theihna tur nihliap emaw chenna in emaw kan siam ve thei a ni tih hi hriat a tha khawp mai. Chutiang chiah chuan harsatna lo thleng thin te hi nang leh keia dan theih a ni lo va, chutiang harsatna a lo thlen apianga kan inhumhim theihna awm chhun erawh chu Lalpa Isua hi a ni. Lalpaa tlan lut thiam apiangte chuan harsatna lo thleng thin te chu an chaw tui takah an hmang thei thung. Chuvangin harsatna lo thleng thin te hi Pathian thu hmangin lo dawngsawng thiam zel ila, a malsawmna dawnthleng atan LALPAN min lo chhiarsak zel dawn a ni. Harsatnate hi Pathian ringtute tan chuan kan chaw tui ber a ni fo thin a ni. Chu mai ni lovin ringtu nunah min tithangliantu leh ringtu nun famkimna min siamsaktu pawimawh tak an ni a, a dawngsawng thiamte chuan malsawmnaah an chantir hlauh thin a ni.

"Sawichhiatna leh dona te hi ringtu tan chuan kan lungtat leh hriamhrei tha ber an ni."