Zo Vapual

Mi hlawhtlingte hniak hnung zui hi a awl lo

C. Lalmuankima

Newcastle, United Kingdom

Mi hlawhtlingte hringnun kawng chhuk chho hi a tluang parh emaw kan ti palh ang e. Kawng buboh leh harsatna tin reng an paltlang a, chung harsatna chi tin rengin a hren beh zawh loh te an ni.

Khawvela mi ropui leh hlawhtling ber ber te hi vawi tam tak hlawhchhamna lo tawk tawh te an ni a, chu hlawhchhamna leh beidawnna in a hren beh zawh loh te an ni. An hmaa hlawhtlinna ropui tak chu an thlir a, an rilru leh mitthlaah an hmu lawk sa a, hlawhchhamnaah an rilru an pe duh lo va; a theih loh ang tihah an innghat hek lo; a tih theih a ni tih ah an innghat a, a tawpah chuan an hlawhtling leh nge nge thin. Hlawhtlinna hmelma lian ber mai chu beidawnna hi a ni. Beiseina nei tawh lo mihringah chuan hlawhtlinna hmuh tur a awm ngai lo.

Thomas Elva Edison-a khan nang leh kei angin vawi hnih khat a hlawhchham khan lo tawp san ta mai se la chuan vawiina Electric current eng hi kan hmu kher lo vang. Alexander Graham Bell - a pawh khan tuna kan ngaihtuah chen choh hi lo ngaihtuah se la chuan tunlai khawvela Telecommunications pawimawh tak hi kan hmang kher lo mai thei asin. Mi ropui te leh mi hlawhtling te hi mi pangngai te aia tam deuh hret an thawha an ngaihtuahna an sen atanga lo hlawhtling leh thil thar lo hmu chhuak thin te an ni asin...! An vawi khat hlawhchhamnaah an tawp san mai lo va, vawi sang/sing tel an hlawhchham hnu pawhin an beidawng duh lo va; beidawng lova bei hram hram te chu a tawpah an lo hlawhtling leh nge nge thin a ni.

Keini Zofate hi long term planning lamah hian kan peih rei lo em em a, vawiina chin naktuka a rah seng tum nghal rilru kan put thin avangin kan hlawhtling thin lo a ni. Thil kan han ti ve a, vawi hnih khat kan hlawhchham a, hlawhchham ta viauvah kan in ngai a, hlawhtlinna tak tak thleng turin kan peih rei lo thin. Chutiang rilru kan put chhung chuan engtikah mah kan hlawhtling ngai lo vang. Vawiina i theihai kung phun kha naktukah a rah lo turin veh tawh suh ang che, a kum tel a vei hnuah chauh rah tui tak a chhuah sak thei che a ni tih hriain thahnemngai taka beih hram hramna leh beidawng lova beih tang tang naah hian a ni hlawhtlinna chu a lo awm ni.

Mi ropui te leh mi hlawhtling te hlawhtlinna kan hmu a, kan awt fo thin. An hlawhtlinna phenah hian vawi engzatnge an lo hlawhchham tawh tih lam ngaihtuah loh chuan kan awt leh mai thin reng a ni. Amaherawhchu vawi tam tak an lo hlawhchhamna atanga beidawng duh lova an beih tang tangna va hmuhpuitu tan chuan an tumruhna leh an chhelna, vawi tam tak an lo hlawhchhamna hi zirlai hau tak ber te zing a mi a ni tih an hmuh kan thei hauh lo nia.

Mi ropui leh mi hlawhtlingte hringnun kawng zawh hi kawng mam a ni ngai lo va, a changin mahni taksa ngeia tawrh a tul chang te a awm thin a; a changin nun thap thak khawpa tawrh chhuah a tul chang te pawh a awm thin. Chutiang kawng bum boh tak an zawh chhuah hnuah chiah a ni hlawhtlinna tlang chhipa an thlen theih ni. An hlawhtlinna chauh hi kan awt palh ang tih a hlauhawm a, he hlawhtlinna hmu tur hian vawi engzatnge an lo hlawhchham tawh tih lam ngaihtuah lek lovin kan awt palh ang e tih hi.....mahni in enfiahna atan kan hman fo a tha a ni.

Mi ropui leh mi hlawhtling te kawng zawha an hniak chhui ve thei turin kan nun hi buatsaih ila, tumruhna te, taihmakna te, tawrhchhelna te, beidawng lova beih hram hramna te hi a ki pawimawh ber te an ni.