Zo Vapual

Good morning Lalpa

C.Lalmuankima

Newcastle, United Kingdom

Chu pa chu 'good morning Lalpa' tih ngawt mai chu sawi tur a va hre lo tak em....in ti mai thei. In thlirna zawn atang chuan a dik viau vang.

Photo : Google Image

Rawngbawltu pakhat thu sawi ka hriat reng mai hi a awm a. "Pathian be hmasa lovin thil dang ka ti hmasa lo vang, midang ka be hmasa lo vang" a tih tawngkam hian ka rilru a hneh hle a, chu thil tha chu zawm ve ngei tumin 'good morning Lalpa' or 'Lalpa chibai le' tih hi ka rilruah a lo lian ve ta hle a ni. Chumi ka hriat atang chuan ka theih ang tawka tamin zawm ka han tum ve ringawt a, a lo awlai lo khawp mai. Zawh loh nghawngkawlah mahni leh mahni ka inbarh lut a ni ta ringawt mai lawm ni tih te ka ngaihtuah let hnu hnawh a.

He ti hian ka ngaihtuah chhunzawm ta a, thil tha te hi hre teuh mah ila a taka zawm lamah kan taihmak leh chuan si loh chuan keimahni min vaw lettu emaw kan tana thil sawt lo a ni thei ve a nih hi....tih hi ka ngaihtuah ta neuh neuh a. Zac-a thu sawi kha tha ka va ti tak em....! "Zoram mipuite, Pathian thu hi lo hriat belh tawh suh u; tuna in hriat chin hi a tawk hle a; lo zawm tawh zawk rawh u..." a tih hi a ni. Thil tha hi hre teuh mah ila a taka zawm lamah kan taihmak leh chuan si loh chuan kan thil tha hriat hian kan nun hi min chawm lo vang a, min siam lian hek lo vang. Chuvangin thil tha chu hriat tam aiin zawm tam hian kan nun min siam tha ber a ni.

Nichina kan thupuiah khan han let leh dawn ila, a changin han palzam mai ka tum a, a thla tel dawn lai lo tih tawh chuan palzam mai a har ta khawp mai. Rilruah a lo lut nghet ve tawh a ni ang. Ka han tih theihnghilh chang te hian ka rilruah nawm loh riauna a rawn awm a, Lalpa hnena ngaihdamna dil hnuhnawh leh chang te pawh ka nei thin. Mihring kan nih chhung chuan kan famkim thei lo...tiin kan inhnem chawp fo thin a, kawng tam takah a dikna lai chu a awm thin ang, amaherawhchu ka han ti talh ang e.....thil tam tak hi chu kan tum loh vang hrim hrim te leh kan inthlahdah vang hrim hrim te, nun kan uluk loh vang hrim hrim tea kan tawrh te pawh a awm thin a ni.

Lalpa, chibai le....or Chibai le, Lalpa.... tia a hnena lawmthu sawi tawngtaina hmanga ka zing tho bul ka tan hian (midang tan chuan a ho lulai deuh mai thei a....in nuih te pawh a za mai thei bawk...) ka ni leng hun hman min tinuam a, hlim leh nuam takin hun ka hman theih phah thin. Hei tluka ka nun min tihlimtu a awm chuang dawn em ni ka ti hial a ni. Nitin nuna hlim taka hun hman duh chuan heti hi a tam thei ang bera zawm a lo pawimawh dawn a nih hi tih ka hre chhuak ta. Chuvangin ka tuk zing tho hi 'Lalpa chibai le, Lalpa ka lawm e.....Vawiin ni thar min hmuhtir leh avangin lawmthu ka hrilh a che' ti lovin ka tho phal tawh lo a ni. Hei hian ka nunah hlimna min thlen ka ti lo thei lo.

Han ngaihtuah let vang vang ila: nizanah khan mi tam tak chu he hringnuna tho leh tawh lo turin an muhil hlen ta asin, mi thenkhat chu thihna kut vawtin a man tak te, thihna ko tlanga liam ta te tam tak an awm asin, keini erawh kan that bik vang leh kan tlin bik vang te, kan phu bik vang te ni hauh lova Vawiin hun, vawiin ni thar kan hmu leh thei ringawt te pawh hi Lawmthu sawi tur kan ngah teh asin. Pathian ringlotu chuan mihring kan ni a, a nihna dan tur reng alawm tiin a ngaihtuah mai thei. Mahse Pathian ringtu (a bik takin chhandam fate tan chuan....) chuan tun hun tun darkar, minute leh second thleng kan nunna thihna laka chhanchhuah kan la ni fo te hi min hmangaihna vang leh khawngaihna vang liau liau a ni. Chuvangin a hnena Lawmthu sawi ngawt loh chu engnge tih theih kan neih le..

Lalpa hming lam hmasa lo va, thil dang ngaihtuahna neih hmasak te hi awl deuh mai a nia. Hmelma Setana lah hi a fing thiam ropui si a, kan taksa chauh a thuhnuaia dah a tum lo va, kan ngaihtuahna te thleng hian a thuneihna hnuaia dah a tum tlat si a, he thil hi thil awlsam tak chu a ni lo reng a ni. Mihring hi kan rilru hian min lo thunun /khuahkhirh khawpa kan rilrua sualin bu a khuar tam phawt chuan kan taksa hi sual lam kawngah min hruai leh nge nge thin. Chuvangin i rilru ka rilru hi sual lam kawnga peng thui lo turin Lalpa Pathian thu tak hmangin i khuahkhirh tlat ang u. Chumiah chuan Kristian nun kawngah siam puitlinin kan lo awm dawn a ni.

Photo : Google Image

Engvangin nge Pathian chhiahhlawh mi hmasa te leh Sam ziaktu Lal Davida ngei pawhin he Zing lam hun tha hi Pathian fakna leh chawimawina, lawmthu sawina hun atana an lo thlen tih chuan, thil tam tak awm thei zingah heti hian han sawi dawn ila; zing ah chuan kan rilru a fim a, kan ngaihtuahna a fresh tha a, rilru a lut duh bawk a (zirlai te pawh lehkha zirna hun tha tak atan an hmang bawk a) rilru luh laia thil zir leh thil tih chu a nghetin a tlo bik a ni. Chuvangin miin Pathian a fak leh a chawimawina hun tha atan he zinglam hun tha, a rilru fim lai hun tak hi a lo thlang ta thin a ni.

Lalpa hmaah rilru zawng zawng bung ruakin miin a Pathian a fak phawt chuan a nileng hun hma turah khan a ngaihtuahawm tawh loh vang. A hlimin a thla a muang ngei ang tih hi ka ring tlat a ni. A chhan chu Keima tawn hriat tlem te atanga ka hmuh ve tlat vangin he thil hi chiang takin ka sawi ngam a ni.

Tin, kan Pathian hnenah khian Vawiin hun kan hman turah hian thil tha lo lakah te, thil sual lakah te, tawngkam mawi lo tak tak lakah te, kut ngeia kan khawih thil sual lakah te, rilrua kan ngaihtuahna sual lakah te....etc....min chhandam fo tura kan inhlana kan dil hi a pawimawh a ni. Tichuan kan nitin nun chu hlim takin kan hmang thei tawh ang.

Kan thu ziak a sei dawn ta......Heti hian duh tawk leh mai ila, kan zing tho hi Pathian hmasa thin ila, tichuan ngaihngam takin kan nileng hun kan hmang thei thin dawn a lo ni reng mai.