Zo Vapual

Photo : Google Image

Vawiin khan Tynemouth, Newcastle ah World War I atanga kumza tlinna Centenary Memorial Service kan hmang. Indopui I na atanga kumza champha (1914-2014) hriatrengna hunserh Tynemouth ah kan hmang a, mipui kalkhawm kan thahnem hle a ni. He Indopui I na, kum 100 tlin hriatrengna hi Tualchhung kohhran puithiamin (priest) min kaihruai a, tichuan Military lam atang leh Civil lam atangin mipui thahnem tawkin urhsun takin kan hmang a ni.

Indopui I naa thi ta te sunna hunserh kan hmang hmasa ber a, sunna tingtang (ri mawi) leh parthi kual cheimawite dah a nih hnuin mipuiin fakna hla leh hlachhamte kan sain kan chham a, chumi zawh chuan National Anthem hla hmangin Indopui I na, kum 100 champha hriatrengna hunserh chu tih tawp a ni.

He Indopui I na, kum 100 champha hriatrengna hi London khawpuiah Queen leh Royal Family leh sawrkar mi pawimawh leh mipui nuai telin an hmang a, UK hmun hrang hrangah leh rampawn ah pawh urhsun taka hman a ni bawk.

Photo Image : Google

He Indopui I naah khan kan pi leh pute pawhin ram leh hnam chhan nan nun tam tak an lo chan a, a bik takin Kumpinu sawrkar leh a tanrualpuite puiin Zofate zing atang pawhin France ramah leh Europe hmun thenkhatah Kumpinu sawrkar leh a tanrualpuite chhan nan an nun an lo chan a, he ni a lo thlen apiangin kan Zofa Pasaltha te kha kan hrechhuak ve reng a ni. He Indopui I na, kum 100 champha hian rah tha chhuah se la, he khawvelah hian Remna leh Muanna famkim a lo thlen zel theihnan rah tha tak lo chhuah zel rawh se...... tih hi mi maltin ten kan tawngtaina ni rawh se.

Photo Image : Google