Ringtu nun zirhona
by C. Lalmuankima
London
Vawiin chu hna ka chawl a, inah awmin Computer ka khal nileng ti tih a, thu ziak han buatsaih ka tum ngial pawhin mood ka nei tlat lo mai. A tawp atawpah chuan ka Note bu pakhat ka keu ka keu ta mai a, tichuan Bible sikul kan kai laia ka note thenkhat ka hai chhuak hlauh mai a, a lawmawm ngei mai.! Thil dang teh chiam ni lovin.... kan zirtirtu pakhatin 'Ringtu nun ' min zirtir laia ka lo chhinchhiah ni ngei tur a ni. Hetiang hian ka lo chhinchhiah a,'Ringtu nun chu changpat nun nen a in ang tur a ni. Changpat chu kan dahna hmun apiangah nun khawchhuahna an zawng a, mihringten kan kuta duh tawka kan khawih pawhin kan duh ang angin an awm. Chutiang chiahin ringtu nun chu changpat nun angin Pathianin min dah dan ang anga awm tur a ni' tih thu hi ka va hai chhuak a, a tha ka ti khawp mai.
Changpat hi khawi hmunah pawh dah la, nun khawchhuahna a zawng ngar ngar thin a ni. Tuihmunah pawh dah mah la, (tuihmun han tih hian lei nena in dai lohna hmunah pawh dah mah la....) tlansan leh chhuahsan a tum lo reng reng, a tana nun khawchhuahna tur a zawng ngar ngar thei a ni. Chutiang zelin chhuat char lai ber, lei nena inhlatna hmunah pawh dah thin mah la, nun khawchhuahna tur a zawng tho tho. Lei hnawng tak leh lei thatna hmuna dah phei chuan lei leh thlaihnah chi hrang hrang tan malsawmna a la ni chho zel a ni. (Huan thlai lam buaipuitute hian changpat tangkaizia chu kan hre mai awm e. Lei tha siam turin a vulh te pawhin kan vulh thin a ni.)
 |
| Photo : Google Image |
Ni e, ringtu nun chu kan sawi tawh ang khan changpat nun angin Pathianin min dahna hmun apiangah hian kan awm thiam tur a ni a, nun khawchhuahna kan zawng bawk tur a ni. A changin Pathian a hnung lama min dah chan a awm thin a, a hnung lama min dah chang hi chuan kan thiltih hi a tluang thei miah lo va, tawngtai pawh a sawt mawh hle. U leh naute, then leh rual tha te pawh hian min kawmserh chang a awm thin. Hawina lam apiang hi a tawp chut mai tih tur khawpin a ping a, hei hi Pathianin ringtute chhelna min lo zirtirna hmun a lo ni reng mai. A changin Pathianin a hmaa min hun chang a awm leh a, chu chu enge kan tih chuan kan sualte min hmuhchhuahtir chang hi a awm thin. Lalpa hmaah chuan inthup theih a ni lo va, thil te ber anga kan ngaih pawh fiah takin a lang thin. Kan sualte min hriatchhuahtir chang a awm thin. Kan sualte min hriatchhuahtir hian thinlung lungchhia leh inchhirna ze dik min siam a, amah ngeiin thinlung lungchhia leh inchhirte chu a hnaih thin thu leh a kalsan ngai loh thu pawh kan Bible thuah kan hmu bawk. (Sam 34:18) Chuvangin Pathianin a hmaa min hun chang hi chuan kan sualte hriatchhuahna hun tha min siamsak thin a ni.
A changin Pathian a vei lama min hun chang a awm leh a. A vei lama min hun chang hi chuan mite sawichhiatna chi hrang hrang kan tawk thin a ni. Mihring ngaih pawha a lutuk chin nia kan ngaih anchhe lawh thlengin kan tawk a, heng zawng zawng pawhin kan tawrh atan Lalpa a phal tlat mai. Kan dikna leh thiamna ngei ngeiah pawh thiamthu kan sawi theih lohna hmun a awm thin a, amah Lal Isua ngei pawh kha a dikna leh thiamnaah pawh sawichhiat leh sawisak a tuar a; vuak leh velh, kraws-a khenbeh thlengin a tuar a nih kha! Hetiang chiah hian ringtu nun kawnga Pathianin a vei lama min hun chang hi chuan kan dikna ngei ngeiah pawh sawichhiat kan hlawh chang a awm fo thin a ni. Chutih hunah chuan Lalpa mawhchhiat mai lovin amah Isua ngei pawhin a lo paltlang tawhna hmun a nih thu kha hre reng i la, ringtu nunah pawh malsawmna ropui tak kan dawng thei ang. Tichuan a changin Pathianin a ding lama min hun chang a awm leh a. Chu chu enge kan tih chuan a malsawmna chi hrang hrang hmanga min vur hi a ni. Thil engkim mai hi han tih hian a tluang em em mai a, thil ho te ti anga kan inngaih pawhin (.... thatchhe tak leh thlahdah taka Lalpa rawng kan bawl chung chung pawhin i han ti deuh duai teh ang.....) Pathian chuan a khawngaih malsawmnain min vur tawp a, taksa leh rilru leh thlarau lam malsawmna chi hrang hrang hmanga min vur chang a awm thin a ni. Hei hi ringtu nun min fiahna chi khat te pawh a tih theih bawk ang. A chhan awm thei ni a lang chu, a malsawmna chi tin reng kan dawn chang hian mi tam zawk chu a malsawmnaah kan lawma malsawmtu kan theihnghilh chawk thin. Chuvangin a malsawmna chauhva lawm hi a tawk lo va, malsawmna chi tinreng min petu chungah pawh kan lawm bawk tur a ni.
Pathian inpuanna hi a malsawm dawng zawng chauhvin a inpuang ngai si lo va, a changin sawichhiatna hmunah, a changin malsawmna hmunah,...a changin a hnung lamah, a changin a hma lamah, a changin a vei lamah, a changin a dinglama min dah chang a awm thin a ni. Lalpa inpuanna hi hriatthiam a van har tak em......!
Pathianina min dahna hmun apianga awm thei tur chuan a thu zawm mi nih a ngai hmasa phawt ang a, tichuan a thu kan zawm tam poh leh a malsawmna tam tak kan chang dawn a lo ni reng mai. Lalpa hi a lo tha ber e.... kawng engkima min hruaitu atan.
Lalpan kan thu sawi te a tharin malsawm rawh se.
Amen....!
Thianpa chu titha hle mai. by Tluangtea
ReplyDeleteThianpa Tluangtea...... tilawmawm hle mai...! Ka blogspot tlawm takah i lo leng lut ve tih ka hriatin ka lawm tak meuh meuh va, thu leh hla hnuanhnang tha taka ka lo hlui thei lo che erawh chu a pawi ka ti hle a ni. Nasa lehzuala tan lak ka lo tum ang a, kan intanpui tawn zel dawn nia.
DeleteHe blogspot tlawm taka i lo len luh ve avangin ka lawm hle a ni.
I blog thlawh a nuam hle mai....Zofate tana thu leh hla tha tak tak a awm nual mai a, ro hlu tak niin ka hria..
ReplyDelete